2 Chronicles 19:1-11
19 Áko Júdah dineʼé aláahgo binanitʼaʼí Jiiháshafat éí hózhǫ́ǫgo bighangóó Jerúsalem kin haalʼáajįʼ anáádzá.
2 Áádóó Hanéínai biyeʼ Jííhu éí náásgóó áhodoonííł yaa halneʼii bidááh doogááł yiniyé chʼíníyáago aláahgo naatʼáanii Jiiháshafat ííłní, Daʼ doo diyin kʼehgo dahináaniísh bíká anánílwoʼ áádóó Bóhólníihii deijoołáhígíísh ayóóʼííníʼní? Éí bąą Bóhólníihii nichʼįʼ hashké dínóodzįįł.
3 Azhą́ ákótʼée nidi, yáʼádaatʼéehii bee ánítʼéego átʼé; jó, éí kéyah bikáaʼgi asdzání edaʼalyaii ałtso néishíníłchxǫʼ áádóó nijéí bee nidííníʼą́ągo Diyin God hánítʼı̨́.
Jiiháshafat ádahwéeʼaahii niinínil
4 Áko Jiiháshafat éí Jerúsalem kin haalʼáagi kééhatʼı̨́ı̨́ nítʼééʼ, áádóó dah náádiidzáago Bíyer-shííbadóó níléí Dził Íífreiyim nahósʼaʼgóó diné yitah tádííyáago dabizhéʼé yę́ę biDiyin God Bóhólníihii yichʼįʼ nidahałáago áńdayiidlaa.
5 Áádóó kéyahgóó tʼáá átʼé, Júdah kéyahgi kin hadaasʼá binaa ahéédaʼastłʼingo ádahoolyaaígóó tʼáá átʼé diné ándahodiyiiʼaahii niyiiznil; tʼáá kin hadaasʼáhígi ákóyiilaa.
6 Áko ándahodiiʼaahii áyidííniid, Baa nidaahkaígíí doo tʼáadoo baa áńdaʼáhodółtʼíní, háálá dineʼé éí doo bá ándahodiyohʼaah da, nidi Bóhólníihii bá ándahodiyohʼaah; bí nihił hólǫ́ǫgo nidahodiyohʼaah.
7 Éí bąą kʼad, Bóhólníihii dadíínóhsin, áádóó hazhóʼó baa nídaʼáhodółtʼı̨́ʼígo baa naahkai, háálá doo ákwii átʼéii Bóhólníihii nihiDiyin God doo yee hasʼą́ą da, doodaiiʼ ałʼohgo ahaa nitsáhákeesii, doodaiiʼ bee nahoʼdiiniihii doo yee hasʼą́ą da.
8 Nááʼáłdóʼ Jiiháshafat éí Jerúsalem kin haalʼáagi Líívai dineʼé łaʼ áádóó náádaʼiiłniihii łaʼ índa Ízrel dineʼé aląąjįʼ naazíinii łaʼ Bóhólníihii yá nidahodiyiiʼaahii danilı̨́į dooleeł áádóó Jerúsalemgi saad yee ałchʼįʼ naasteeʼii yá yaa nídaatʼı̨́į doo biniyé niinínil.
9 Áko yichʼįʼ haadzíiʼgo ání, Kótʼéego Bóhólníihii dadíínóhsingo áádóó nihadaʼahódlíigo índa danihijéí tʼáá ákóneʼ átʼéego ádaahníił dooleeł.
10 Áádóó nihikʼisóó danilíinii kin hadaasʼáágóó kéédahatʼínígíí tʼáá haʼátʼíhída bá baa náhódóotʼįįłgo, éí dił deezgoʼ ídéétʼiʼii, doodaiiʼ bee hazʼáanii áádóó bikʼeh óʼooʼníiłii, doodaiiʼ yee nihwiizʼáanii áádóó yee nihodiizʼáanii ídéétʼiʼ; Bóhólníihii bichʼįʼ doo ákǫ́ǫ́ átʼéii doo yaa naakai da doo biniyé tʼáá bítséedi bee bił dahołneʼ doo, áko nihí áádóó danihikʼisóó bee atíʼélʼı̨́ doo nihikʼihwiidooleeł da; díí kódaohtʼı̨́įgo doo ákǫ́ǫ́ áhátʼíinii doo baa naahkai da doo.
11 Shoo, aláahgo nááʼiiłniihii Amaráíyah éí baa hwiinítʼı̨́ danilíinii bee bóhólníih doo, áádóó Íshmeiyel biyeʼ Zebadáíyah aláahgo naatʼáanii bídadéétʼiʼii Júdah dineʼé yinanitʼaʼí nilı̨́į doo áádóó Líívai dineʼé éí nihilą́ąjįʼ naatʼáaniishchíín danilı̨́į doo. Hadaʼíínółníigo baa naohkai, áko Bóhólníihii kótʼéego yáʼátʼééhjí yił hólǫ́ǫ dooleeł.
