2 Chronicles 2:1-18
2 Ákohgo Sálaman éí Bóhólníihii bízhiʼ baa haʼniih doo biniyé bá kin ádeeshłííł dziniizı̨́ı̨́ʼ áádóó aláahgo naatʼáanii bighan ádá ádeeshłííł dziniizı̨́ı̨́ʼ.
2 Áádóó Sálaman éí tsostsʼidiindi mííl diné ánéelą́ąʼgo hééł nideijaahígíí índa tseebídiindi mííl diné éí dziłdi daʼatseeł dooígíí áádóó táadi mííldóó baʼaan hastą́ądi neeznádiingo diné bá nidaʼanishgo hadaʼasíid dooleełígíí niinínil.
3 Sálaman éí Táir dineʼé aláahgo binanitʼaʼí Háíram yichʼįʼ iʼííłʼaʼgo ání, Tʼáá shizhéʼé David yę́ę bił ahaa naʼiyíníłniiʼgo éí biiʼ bighan dooleełígíí yee íidoolííł biniyé dilkʼis tsin baa hidíníʼánígi átʼéego shił ahaa naʼayíłniih.
4 Shoo, Bóhólníihii shiDiyin God bízhiʼ baa haʼniih doo biniyé bá kin áshłéehgo éí tsin bijeeh dilidgo łikání halchinii nááhániihii áádóó Diyin God bichʼįʼ tʼáá áłahjįʼ bááh nááhániihii índa didlidgo nááhániihii éí biyiʼ abínígo áádóó eʼeʼaahgo índa hááʼáyı̨́ı̨́h jı̨́ı̨́ góneʼ áádóó dah néitı̨́įhgo índa Bóhólníihii nihiDiyin God bidiyingo áłah náʼádleehii baa náhwiilzhíísh góneʼ Bóhólníihii binááł náádahaniih doo biniyé díí kin Bóhólníihii diyingo bá atsʼádideeshʼááł. Díí Ízrel dineʼé bichʼįʼ hoolʼáágóó bikʼehgo hoogáałii átʼé.
5 Díí kin ádeeshłíłígíí éí tʼáá íiyisí ayóó átʼée doo, háálá nihiDiyin God éí diyin dabidiʼníinii tʼáá ałtso yiláahgo tʼáá íiyisí ayóó átʼé.
6 Nidi háísh éí yíneelʼą́ągo kin yá íidoolííł, háálá yá tʼáá yádiłhił índa yáʼąąsh tʼáá náhwiistʼą́ą́ nítʼééʼ doo bohóoghah da? Shíísh éí haʼátʼíí áshtʼı̨́įgo kin bá ádeeshłííł? Tʼóó bichʼįʼ nááʼiishniih dooleełgo tʼéiyá.
7 Éí bąą kʼad, diné łaʼ éí óola áádóó béésh łigaii índa béésh łitsoii, béésh dootłʼizhii índa naʼatʼą́hí tsídídééh nahalingo łichíʼígíí, łichxíʼígíí áádóó yá nahalingo dootłʼizhígíí éí yiyiichįįhgo yinaalnishii shichʼįʼ díłʼá, áádóó tʼáá éí akʼi naʼakʼaashjí bínabidiʼneestą́ąʼii éí Jerúsalem kin haalʼáagi áádóó Júdah kéyahgi hastóí daʼiichįįhgo nidaalnishii bił naashkaígíí, tʼáá éí shizhéʼé David yę́ę hashtʼeʼniinínilígíí yindadoolnish.
8 Áádóó ałdóʼ Dził Lébanandę́ę́ʼ dilkʼis tsin, chʼó índa tsin álgam wolyéhígíí shichʼįʼ bił ádahodíílííł, háálá ná nidaalʼaʼí Dził Lébanandi tsin yitseełgi bił éédahózingo shił bééhózin, áádóó shá nidaalʼaʼí éí ná nidaalʼaʼí yił nidaalnishgo
9 tsin neheeshjííʼ ayóó ánéelą́ąʼgo shá hashtʼedeidoolííł, háálá kin ábiʼniishłaaígíí ayóó ánóolningo ayóó átʼée doo.
10 Áko ná nidaalʼaʼí tsin neheeshjííʼ yiniyé daʼatseełígíí éí tłʼoh naadą́ą́ʼ haaltseedígíí hastą́diindóó baʼaan naakidi mííldóó baʼaan ashdladi neeznádiin azis bíighahgo áádóó tłʼoh naadą́ą́ʼ bideeʼí hastą́diindóó baʼaan naakidi mííldóó baʼaan ashdladi neeznádiin azis bíighahgo índa wáin naadiindi mííl tóshjeeh yázhí bíighahgo áádóó áliv bineestʼąʼ bikʼah naadiindi mííl tóshjeeh yázhí bíighahgo baa hidideeshʼááł.
11 Nítʼééʼ Táir dineʼé aláahgo binanitʼaʼí Háíram wolyéii éí Sálaman yichʼįʼ naaltsoos áyiilaago ání, Bóhólníihii bidineʼé ayóóʼáyóʼníigo bąą bá aláahgo naatʼáanii nílı̨́įgo ániilaa.
12 Háíram ałdóʼ ání, Ízrel dineʼé biDiyin God Bóhólníihii éí yádiłhił índa nahasdzáán áyiilaii baa haʼniih doo; éí aláahgo naatʼáanii David yę́ę biyeʼ hóyáanii éí ił ééhózinii índa bee akʼidiitįįhii baa deetʼáanii éí Bóhólníihii yá kin íidoolííł áádóó tʼáá bí aláahgo naatʼáanii bighan ádá íidoolííł.
13 Kʼad diné łaʼ akʼidiʼyiitįįh áádóó naanish yiyiichįįhii nichʼįʼ ííłʼaʼ; éí Háíram wolyé.
14 Dan dineʼé dabitsiʼ łaʼ bitahdóó asdzání nilíinii biyáázh áádóó bizhéʼé éí Táir kin haalʼáádóó naaghá; éí óola, béésh łigaii, béésh łitsoii, béésh nitłʼizii, tsé, tsin índa naʼatʼą́hí tsídídééh nahalingo łichíʼígíí, yá nahalingo dootłʼizhígíí, łichxíʼígíí áádóó áłtsʼóózígo yisdizígíí bee naʼatʼą́hí łigaii ditsʼidgo ályaii bee bínabidiʼneestą́ąʼgo yinaalnishii áádóó éí ałtah átʼéego akʼinaʼakʼaash yindoolnish índa tʼáá nidoochʼąh ádaatʼéii baa hiditʼaahígíí éí nidiné daʼiichįįhígíí áádóó nizhéʼé David yę́ę shinanitʼaʼí bidiné daʼiichįįhígíí yił dadoolnish.
15 Éí bąą kʼad, tłʼoh naadą́ą́ʼ áádóó tłʼoh naadą́ą́ʼ bideeʼí áádóó áliv bineestʼąʼ bikʼah índa wáin éí bóhonishníihii bee háínídzíiʼii bíniʼ ná nidaalʼaʼí bichʼįʼ bił áhólééh,
16 áko Dził Lébanandę́ę́ʼ tsin tʼáá nínízinígíí ná dadiitsiłgo ahídahaastłʼǫ́ǫgo tónteel bee Jápa kin haalʼáajįʼ chʼídahidiilʼoł, áko éí áádóó Jerúsalem kin haalʼáá góde ahidííyééł.
17 Nítʼééʼ Sálaman éí tʼáá hazhéʼé David yę́ę déʼéyóní yiyííłtaʼ yę́ęgi átʼéego Ízrel kéyahgi déʼéyóní kéédahatʼínígíí yiyííłtaʼ, áko tʼááłáhídi neeznádiindóó baʼaan ashdladiindóó baʼaan táadi mííldóó baʼaan hastą́ądi neeznádiingo ánéelą́ą́ʼ lá.
18 Tsostsʼidiindi míilgo diné éí hééł nideijaah dooígíí áádóó tseebídiindi míilgo diné éí dziłdi daʼatseełígíí índa táadi mííldóó baʼaan hastą́ądi neeznádiingo diné nidaalnish doogi aląąjįʼ naazíinii niyiiznil.
