2 Chronicles 20:1-37
20 Áádóó ákódaadzaadóó bikʼijįʼ Móʼab dineʼé áádóó Áman dineʼé índa náánáłaʼ dadineʼé éí Jiiháshafat yił daʼahidoogą́ą́ł biniyé yichʼįʼ níná.
2 Ákohgo siláo łaʼ yíkaigo Jiiháshafat yił dahoolneʼgo ádaaní, Íídamdę́ę́ʼ diné ayóó ánéelą́ąʼgo tónteel bilááhdę́ę́ʼ nihikʼijįʼ yinééł; jó, Házazan-téímer hazʼą́ągi tʼáá éí Engíídai hoolyéegi dah yinééł.
3 Nítʼééʼ Jiiháshafat bił yééʼ hazlı̨́ı̨́ʼ, áko Bóhólníihii hátʼı̨́į doo yiniyé hashtʼeʼíʼdiilyaago Júdah dineʼé tʼáá ałtso bitahgóó doo adą́ą da dooleełgo yaa táhodoolneʼ.
4 Áko Júdah dineʼé ahíikaigo áłah silı̨́ı̨́ʼ; Bóhólníihii nihíká anilyeed deididooniił biniyé Júdah kéyahgi tʼáá kin hadaasʼáádę́ę́ʼ tʼáá átʼé nidahaaskaigo Bóhólníihii hádaatʼı̨́.
5 Áádóó Jiiháshafat yiizįʼgo Júdah dineʼé índa Jerúsalem kin haalʼáádę́ę́ʼ dineʼé áłah silı̨́ʼígíí binááł Bóhólníihii bikin biiʼ sohodizin bidááhjí ániidgo hazʼánígi sizı̨́įgo
6 ání, Danihizhéʼé biDiyin God Bóhólníihii nílíinii, daʼ doósh Diyin God yá biyiʼdi hólóonii nílı̨́į da? Áádóó daʼ doósh ni ałʼąą dineʼé bibee ídahólníihii bee nóhólníih da? Bee adziil índa ayóó átʼéii nílákʼee silá, áko doo łaʼda nidínóolʼąął da.
7 NihiDiyin God nílíinii, daʼ doósh díí kéyahgi kéédahatʼíinii Ízrel dineʼé nidineʼé nilíinii binááł chʼínííníłkaad da, áádóó kéyah éí nikʼis Éíbraham baʼáłchíní náás ahoolchíiłii hoolʼáágóó baa dííníʼą́ą da?
8 Áádóó ákwii yiiʼ kéédahatʼı̨́ı̨́ nítʼééʼ, áádóó éí kin biiʼ sohodizin biiʼ nízhiʼ baa haʼniih doo biniyé ádayiilaago ádaaní,
9 Doo yáʼádaashóonii nihikʼijįʼ silı̨́įʼgo, éí diltłish, doodaiiʼ nihichʼįʼ nahwiiʼnáago, doodaiiʼ naałniih, doodaiiʼ dahodííchįįdgo díí kin biiʼ sohodizin bidááhdóó áádóó ni nidááhdóó deidiidzįįł, háálá díí kin biiʼ góneʼ niʼdójí, áko nihichʼįʼ nidahwiiʼnáago nídaniikąąhgo nihididíítsʼı̨́įłgo yisdánihidíínił.
10 Áádóó kʼad, shoo, Áman dineʼé áádóó Móab dineʼé índa Dził Síyerdóó dineʼé nilíinii, Ízrel dineʼé éí Ííjip kéyahdę́ę́ʼ náákah yę́ędą́ą́ʼ nideidoołtsiłgo tʼáadoo bee baʼdííníʼą́ą da, nidi yikʼeeʼąą haakaigo tʼáadoo nideistseed da.
11 Shoo, kódíshní, Kʼéédanihididlééh yiniyé nihichʼįʼ yinééł; nikéyah áádóó nihííʼ dooleełgo nihaa dííníʼánídóó chʼídanihidínóołkał.
12 NihiDiyin God nílíinii, doósh nihá baa nídíítʼįįł da? Háálá nihí adziil nihee ádingo díí ayóó átʼé nihikʼijįʼ oonééł; ádadiiʼníłígíí doo nihił béédahózin da, nidi ni tʼéí nichʼįʼgo dadíníitʼı̨́ı̨́ʼ.
13 Áádóó Júdah dineʼé tʼáá ałtso Bóhólníihii yidááhdóó deizįʼ; dabiyázhí áádóó bidaʼasdzą́ą́ índa badaʼáłchíní yił naazı̨́.
14 Ákohgo Éísaf biyeʼké náás ahoolchíiłii Matanáíyah biyeʼ Jáíyel, éí biyeʼ Biinéíyah, éí biyeʼ Zekaráíyah, éí biyeʼ Jahéíziyel, éí Líívai dineʼé nilíinii éí Bóhólníihii biNíłchʼi Diyinii áłah ílínígíí biníiʼgi bikʼi hooleʼ.
15 Áádóó ání, Júdah dineʼé áádóó Jerúsalem kin haalʼáagi kééhohtʼíinii tʼáá ánółtso índa Jiiháshafat aláahgo naatʼáanii nílíinii, daʼíísółtsʼą́ą́ʼ; Bóhólníihii kónihiłní, Díí ayóó átʼé dah oonéłígíí biniinaa tʼáadoo béédaałdzidí, áádóó tʼáadoo bikʼee nisidaahdáhí, háálá nihí doo anadadoohtʼįįł da, nidi Diyin God anadootʼįįł.
16 Yiską́ągo ákóyaa bichʼįʼ hidoohkah; jó, Ziz tsénítʼiʼdę́ęʼgo hadookah, áko Jiirúʼel honoojíigi haʼaʼaahjigo honítsʼaaʼ nineelʼą́ągi bikʼídoohnééł.
17 Nihí éí díí anaaʼgi doo bikʼiidoohjah da; tʼáá nihí bichʼįʼ niʼádóhníiłgo hazhóʼó adahidíínóhsı̨́h, áko Bóhólníihii bibee yisdáʼiildéehii deidoołtsééł; Júdah dineʼé áádóó Jerúsalem dineʼé nohłíinii, tʼáadoo nihił daayéʼí, áádóó tʼáadoo bikʼee nisidaahdáhí; yiską́ągo bichʼįʼ chʼídoohnééł, háálá Bóhólníihii éí nihił hólǫ́ǫ dooleeł.
18 Áko Jiiháshafat éí yaa ádzaago neeshjool áádóó Júdah dineʼé índa Jerúsalem kin haalʼáagi kéédahatʼíinii tʼáá ałtso Bóhólníihii yichʼįʼ tséʼyaa daneeshjoolgo Bóhólníihii yichʼįʼ nidahasá.
19 Áádóó Líívai dineʼé éí Kóhath dineʼé áádóó Kórah dineʼé danilíinii deizįʼgo Ízrel dineʼé biBóhólníihii Diyin God yaa dahaniihgo chánahgo dahataał.
20 Áko tʼah abíínídą́ą́ʼ nízhdiijééʼ áádóó Tekówah honoojíijigo chʼízhníná, áko joonéełgo Jiiháshafat tʼáá ákǫ́ǫ́ yiizįʼgo ání, Dashíínółtsʼą́ą́ʼ, Júdah dineʼé áádóó Jerúsalemgi kéédahohtʼíinii, Bóhólníihii nihiDiyin God deinohdlą́ągo baa dadzíínóhłí, áko nihidziilgo adasoołkaal doo; yá dahalneʼii deinohdlą́, áko nihá łaʼ hooníił doo.
21 Áádóó dineʼé bił nabikʼíyádajistiʼgo Bóhólníihii yichʼįʼ dahataał dooígíí néidiinil, áádóó éí hodílzingo baa dahojiniih doo biniyé siláo yilą́ąjįʼ yikahgo ádadidooniił, Bóhólníihii baa dahohniih, háálá aa aʼááh nízingo ahóyéelʼá.
22 Áko adahoʼniitáalgo áádóó Bóhólníihii yaa dahaniihgo Bóhólníihii éí Áman dineʼé áádóó Móʼab dineʼé índa Dził Síyerdóó dineʼé éí Júdah dineʼé yiniyé niheeznáago ahaah héeshjéeʼgo áyiilaa, áko tʼóó ałkʼi néijééʼ.
23 Jó, Áman dineʼé áádóó Móʼab dineʼé bisiláo éí Dził Síyerdóó dineʼé ałtso ádeidoołdįįł biniyé yikʼiijééʼ, áko Síyerdóó kéédahatʼíinii ádeisdįįdgo tʼáá bí tʼááłáʼí nítínígo ahíłkáʼííjéeʼgo ahidiníłnáago ádaʼahisdįįd.
24 Áko Júdah dineʼé honoojíidi yaʼiiʼáago bikááʼdóó haʼalzídíjįʼ yíkaigo, diné haalʼáhíjįʼ dadééʼı̨́ı̨́ʼ nítʼééʼ; jó, atsʼíís daneeznáago niʼgóó nihidílʼá; doo łaʼ yidzíʼí da lá.
25 Jiiháshafat áádóó bidineʼé éí bidaʼanaʼí yę́ę bindaalyeʼé yąąh deídóobeeł biniyé yíkaigo daneeznáanii bitahgóó yódí tʼóó ahayóí índa tʼáadoo leʼé daʼílínígíí yikʼídahaaskaigo, tʼáá bí ádá nidayiidláahgo tʼóó yówehda áde ádayiilyaa; tʼáá nídayiiláahgo tááʼ yiską́; jó, tʼóó ahayóí lá.
26 Áádóó dı̨́ı̨́ʼ yiską́ągo yíldzis Bérakah* hoolyéegi áłah silı̨́ı̨́ʼ, áko ákweʼé Bóhólníihii yaa dahaniih; éí bąą éí hazʼánígíí díí jı̨́įjįʼ yíldzis Bérakah hoolyé.
27 Ákohgo Júdah dineʼé áádóó Jerúsalem kin haalʼáádóó dineʼé Jiiháshafat halą́ąjįʼ yigáałgo hoł dahózhǫ́ǫgo Jerúsalem kin haalʼáágóó níjíkai, háálá hodaʼanaʼí bikʼeh dazdeesdlı̨́įʼgo biniinaa Bóhólníihii hoł nidahoozhǫǫhgo áhoolaa.
28 Tsin tłʼóół neeznáá bąąh daneelzheeʼgo bee nidaʼaʼnéii áádóó tsin tłʼóół naakitsʼáadah bąąh daneelzheeʼgo bee nidaʼaʼnéii índa béésh dilní bee íʼdílzoołí yee nidaanéego Jerúsalem kin haalʼáagi Bóhólníihii bikin biiʼ sohodizinjįʼ nákai.
29 Nítʼééʼ bee ídahólníihii tʼáá átʼé kédaayahgóó Bóhólníihii éí Ízrel dineʼé bidaʼanaʼí yichʼįʼ naazbaaʼígíí yaa dahodiiztsʼą́ąʼgo Diyin God yikʼee bił yééʼ dahazlı̨́ı̨́ʼ.
30 Áko Jiiháshafat yee bóhólníihgo nahósʼaʼgi hodiiyeel, háálá haDiyin God hanaadę́ę́ʼ doo áchʼįʼ niʼjódlíígóó háázhdoolyįhgo há áyiilaa.
Jiiháshafat nantʼáá nítʼééʼ (1Kgs. 22:41-50)
31 Kótʼéego Jiiháshafat éí Júdah dineʼé yinantʼáá nítʼééʼ. Tádiindóó baʼaan ashdlaʼ binááhaigo aláahgo naatʼáanii silı̨́ı̨́ʼ áádóó Jerúsalem kin haalʼáagi nantʼáago naadiin ashdlaʼ nááhai. Bimá éí Azúbah wolyéego Sháílhai yitsiʼ nilı̨́.
32 Áko bizhéʼé Éísa yę́ę yaa naayáii yikʼehgo níyá; éí doo yitsʼághááhgóó Bóhólníihii binááł tʼáá ákogi ádaatʼéii yaa naaghá.
33 Azhą́ ákótʼée nidi, ninádahałaah doo biniyé wódah nahazʼą́ągo ádaalyaaígíí tʼáadoo nahjįʼ ályaa da, háálá dineʼé éí dahazhéʼé yę́ę biDiyin God bichʼįʼ tʼáadoo bijéí yee nideideezʼą́ą da.
34 Kʼad łahjįʼ Jiiháshafat átsé áádóó akéeʼdi ádzaaígíí, jó, Hanéínai biyeʼ Jííhu éí Ízrel dineʼé aláahgo binanitʼaʼí danilíinii binaaltsoos bikʼinídaháasdzo.
35 Díí ádahóótʼįįdóó bikʼijįʼ Júdah dineʼé aláahgo binanitʼaʼí Jiiháshafat éí Ízrel dineʼé aláahgo binanitʼaʼí Eihazáíyah doo yáʼáshóonii yaa naagháii yił yíní ahíldin.
36 Tsinaaʼeeł Társhish kin haalʼáágóó ałnáádaaʼoł doo biniyé ádeidoolíiłgo yił ahidiiʼáázh; Ííziyan-gííber kin haalʼáagi éí tsinaaʼeeł ádayiilaa.
37 Ákohgo Maríísha kin haalʼáádóó diné Dódava biyeʼ Eliyíízer éí Jiiháshafat yikʼijįʼ hahaasdzíiʼgo ání, Eihazáíyah bił ahidiniʼáazhgo biniinaa Bóhólníihii éí bindashínílnishii yiyííłchǫʼ. Áko tsinaaʼeeł dahaastǫʼgo doo dazhdółʼeeł átʼée da silı̨́ı̨́ʼ.
Footnotes
^ Bérakah jiníigo éí Hííbrew kʼehjígo aa haʼniih jiníigo óolyé.
