2 Chronicles 21:1-20
21 Áko Jiiháshafat dabizhéʼé yę́ę daʼiiłhaazhígi átʼéego ajiiłhaazhgo David yę́ę bikin haalʼáagi dahazhéʼé yę́ę yóóʼádaalyaaígi yóóʼáhoʼdiilyaa. Áko hayeʼ Jiihóram hatsáskʼehgi aláahgo nantʼá silı̨́ı̨́ʼ.
2 Áádóó hakʼisóó hólǫ́, éí Jiiháshafat dabiyeʼ: Azaráíyah, Jiiháíyel, Zekaráíyah, Azaráíyah, Máíkel índa Shefatáíyah daolyé; díí tʼáá átʼé Ízrel dineʼé aláahgo binanitʼaʼí Jiiháshafat biyeʼ ádaatʼı̨́.
3 Béésh łigaii áádóó óola índa naalyeʼé daʼílíinii ayóó ánéelą́ąʼgo Júdah kéyahgi kin hadaasʼá ditą́ągo binaa ahéédaʼastłʼinígíí tʼáá bił hazhéʼé hataideezʼą́ą́ nítʼééʼ, nidi bibee óhólníhígíí éí Jiihóram yeidiníʼą́, háálá éí átsé yizhchíinii nilı̨́.
4 Áko Jiihóram éí bizhéʼé yę́ę bibee óhólníihii bee bóhólnííh silı̨́įʼgo bidziil íʼdiilyaago bikʼisóó tʼáá ałtso áádóó Ízrel dineʼé binaatʼáanii danilíinii łaʼ ałdóʼ diltłish yee neistseed.
5 Jiihóram éí tádiindóó baʼaan naaki binááhaigo aláahgo naatʼáanii silı̨́ı̨́ʼ áádóó nantʼáago Jerúsalem kin haalʼáagi tseebíí nááhai.
6 Ízrel dineʼé aláahgo binanitʼaʼí danilı̨́ nítʼéʼígíí bikʼehgo tʼáá Éíhab baʼáłchíní náás ahoolchíiłii ádaatʼı̨́ yę́ęgi átʼéego jiníyá, háálá Éíhab bitsiʼ éí hweʼasdzą́ą́ nítʼééʼ. Áko Bóhólníihii binááł doo yáʼáshóonii baa nijigháá nítʼééʼ.
7 Azhą́ ákótʼée nidi, Bóhólníihii éí David yę́ę yił ahaʼdeetʼáanii biniinaa hó índa dahayeʼké bá hoolʼingo hoolʼáágóó yee yá nihoníʼáanii bikʼehgo haʼáłchíní náás ahoolchíiłii doo áyółdįįh átʼée da.
8 Jiihóram bíídíiską́ą́dóó Íídam dineʼé éí Júdah dineʼé bee bóhólníihii yichʼįʼ nidaasteeʼgo yitsʼą́ąjįʼ daazlı̨́įʼgo aláahgo naatʼáanii ádá nideistı̨́.
9 Ákohgo Jiihóram éí naatʼáanii danilíinii áádóó bitsindaabąąs bijáád naakiígíí yee nidaabaahii tʼáá ałtso yił dah diiná, áko tłʼéeʼgo éí nízhdiijéeʼgo Íídam dineʼé bisiláo éí hó índa tsindaabąąs bijáád naakiígíí yee nidaabaahii bindanitʼaʼí bił honáshzhiizhígíí bikʼi jiijééʼ.
10 Díí jı̨́ı̨́góó Íídam dineʼé éí Júdah dineʼé yichʼįʼ nidaasteeʼ. Íídą́ą́ʼ Líbnah dineʼé ałdóʼ hachʼįʼ nidaasteeʼ nítʼééʼ. Dahazhéʼé yę́ę biDiyin God Bóhólníihii yóóʼazhdííʼą́ągo biniinaa ákótʼé.
11 Áádóó ałdóʼ Júdah kéyahgi daadziłgóó ninádahałaah doo biniyé wódah nahazʼą́ągo ádajiilaa, áko Jerúsalem kin haalʼáagi diné kéédahatʼínígíí naʼageh yee tsiʼnaakaigo ádajiilaa índa Júdah dineʼé tʼáá ádzaajigo dah yidiiʼeezh.
12 Áko Diyin God yá halneʼii Iiláíjah hachʼįʼ akʼeʼashchı̨́įgo ání, David yę́ę biDiyin God Bóhólníihii kóní, Nizhéʼé Jiiháshafat yę́ę índa Júdah dineʼé aláahgo binanitʼaʼí Éísa yę́ę tʼáadoo bikʼehgo díníyáa da,
13 nidi Ízrel dineʼé aláahgo binanitʼaʼí danilíinii bikʼehgo yíníyáago Júdah dineʼé áádóó Jerúsalemgi kéédahatʼínígíí éí Éíhab baʼáłchíní náás ahoolchíłígíí ałjiłnii danilínígi átʼéego ałjiłnii yee ádee nidaaʼnéego íinilaa, áádóó ałdóʼ danikʼisóó éí nizhéʼé yę́ę baʼáłchíní náás ahoolchíłígíí éí niláahgo yáʼádaatʼééh nítʼééʼ; éí ałdóʼ nisíníłtseed; éí bąą,
14 jó, ayóó átʼéego nahałniih yee Bóhólníihii éí nidineʼé áádóó naʼáłchíní áádóó nidaʼasdzą́ą́ índa nee hólónígíí tʼáá átʼé yee atíidoolííł.
15 Áádóó ni éí tʼáá íiyisí nitah hodínóogah, háálá naałniih bee nichʼííʼ bąąh dahwiidooʼaał; tʼáá ákwíí jı̨́ bee nichʼįʼ nahwiiʼnáago biniinaa nichʼííʼ hadoołhęsh.
16 Áko Bóhólníihii éí Filístiya dineʼé áádóó Iithiyópiya dineʼé bikéyah nahósʼaʼdóó Árab dineʼé éí bádahachįʼgo Jiihóram yichʼįʼ néidíníiłkaad.
17 Éí Júdah dineʼé bikéyah yikʼijįʼ nídiiʼnáago yaatįįh yikai, áko aláahgo naatʼáanii bighan biiʼdóó áádóó binaagóó honaalyeʼé nídayiizláaʼgo áádóó ałdóʼ dahayeʼké índa hwedaʼasdzą́ą́ tʼáá ałtso adayiizhjaaʼgo hayeʼ tʼááłáʼí nidi tʼáadoo há áádeisįįd da, nidi akéédę́ʼígíí Jiihóʼahaz tʼéiyá.
18 Díí tʼáá ałtso ádaadzaadóó bikʼijįʼ Bóhólníihii éí naałniih doo nádziihii yee Jiihóram atíyiilaa.
19 Áádóó bikʼijįʼ naaki nááhai baa hoolzhiizhgo naałniih bee hachʼííʼ bąąh dahazʼánígíí biniinaa hachʼííʼ hááłhęęzhgo tʼáá íiyisí hachʼįʼ nahwiiʼnáago dadziztsą́. Áko hadineʼé éí dahazhéʼé yę́ę yiyah déédeidiłjah yę́ęgi átʼéego tʼáadoo há ádayiilaa da.
20 Jiihóram tádiindóó baʼaan naaki binááhaigo aláahgo nantʼá silı̨́ı̨́ʼ áádóó Jerúsalem kin haalʼáagi nantʼáago tseebíí nááhai; doo hodiʼnidzingóó dashdiiyá, áko aláahgo naatʼáanii danilíinii dabitséníʼootséelgi éí tʼáadoo yóóʼáhoʼdiilyaa da, nidi David yę́ę bikin haalʼáagi łeeh hoʼdooltı̨́.
