2 Chronicles 22:1-12
22 Jerúsalem kin haalʼáhídóó dineʼé éí hayeʼ akéédę́ʼígíí Eihazáíyah hatsáskʼehgi aláahgo naatʼáanii ádayiilaa, háálá siláo Árab dineʼé yił ninínáago hayeʼ daʼalą́ąjįʼígíí ałtso nideistseed. Áko Júdah dineʼé aláahgo binanitʼaʼí Jiihóram yę́ę biyeʼ Eihazáíyah nantʼáá nítʼééʼ.
2 Eihazáíyah dízdiindóó baʼaan naaki binááhaigo aláahgo naatʼáanii silı̨́ı̨́ʼ, áádóó Jerúsalem kin haalʼáagi nantʼáago tʼááłáʼí nááhai. Bimá éí Athaláíyah wolyéego Ámrai yitsiʼ nilı̨́.
3 Áko ałdóʼ Éíhab bighandóó danilíinii dayíkaígi átʼéego jiníyá, háálá bimá éí doo yáʼádaashóonii ádoolníiłgo yínabiniłtin nítʼééʼ.
4 Éí bąą doo yáʼádaashóonii baa joogáałgo Bóhólníihii honíłʼı̨́, tʼáá Éíhab bighandóó ádáátįįdígi ájítʼı̨́, háálá éí hazhéʼé yę́ę ádindóó bikʼijįʼ hodoołchxǫǫłii yee nidahoneeztą́ą́ʼ.
5 Kótʼé dadííniidii ałdóʼ yikʼehgo yigááł, áko Ízrel dineʼé aláahgo binanitʼaʼí Éíhab yę́ę biyeʼ Jiihóram éí Réímath-gíliyad kin haalʼáagi Síriya dineʼé aláahgo binanitʼaʼí Házeiyel yichʼįʼ anaaʼ hodoohłeeł biniyé yił dah diiʼáázh nítʼééʼ. Síriya dineʼé bisiláo éí Jóram hadayiiskʼeh.
6 Áko Jóram kʼabiʼdoolkʼehii nídoodzih biniyé Jézriyel kin haalʼáágóó anáádzá; éí Réímahdi Síriya dineʼé aláahgo binanitʼaʼí Házeiyel bił ahijigą́ą́ nítʼééʼ. Áko Júdah dineʼé aláahgo binanitʼaʼí Jiihóram biyeʼ Eihazáíyah éí Jézriyeldi Éíhab biyeʼ Jóram daatsaahgo biniinaa ákóyaa yichʼįʼ ííyá.
Jííhu éí Eihazáíyah yiyiisxı̨́ (2Kgs. 9:27-29)
7 Jóram baazhníyáhígíí biniinaa Eihazáíyah hoʼdiisyı̨́ éí Diyin God bikʼehgo ádzaa, háálá jiníyáago Jiihóram bił dashdiiʼáazhgo Nímshai biyeʼ Jííhu baatįįh jííʼáázh; éí Éíhab bighandóó náás ahoolchíłígíí íidoołdįįł biniyé Bóhólníihii akʼah yikʼi yayiiziidgo yiyíísı̨́ı̨́ʼ.
8 Áko nítʼééʼ Jííhu éí Éíhab baʼáłchíní náás ahoolchíiłii neiłtseedgo, Júdah dineʼé naatʼáanii danilíinii áádóó Eihazáíyah bikʼisóó dabiyeʼ éí Eihazáíyah yá nidaalʼaʼígíí yikʼíníyáago neistseed.
9 Áádóó Jííhu éí Eihazáíyah haintá; éí Samériya kin haalʼáadi naʼádinilʼin nítʼééʼ, áádóó bił niʼdeedéelgo Jííhu baa yídlóozgo biʼdiisyı̨́. Áko yóóʼádayiilaa, háálá ádadííniid, Jó, Jiiháshafat binálí jílı̨́; éí bijéí tʼáá átʼé bee Bóhólníihii yichʼįʼ choʼoołʼı̨́ı̨́ nítʼééʼ, ákondi Eihazáíyah baʼáłchíní náás ahoolchíiłii éí bee óhólníihii yiʼoh danéésʼąąd.
Athaláíyah éí bikááʼdóó nahatʼáii aghaideetʼą́ (2Kgs. 11:1-21)
10 Nítʼééʼ Eihazáíyah bimá Athaláíyah biyáázh daaztsą́ągo yaa ákoniizı̨́įʼgo dah diiyáago Júdah dineʼé aláahgo binanitʼaʼí yę́ę biyeʼké ałtso íísdįįd.
11 Nidi aláahgo naatʼáanii bitsiʼ Jiihoshábiyath, éí Eihazáíyah biyeʼ Jóʼash, aláahgo naatʼáanii biyeʼké nidaaztseedígíí bitahdóó yił dah diiʼáazhgo bí áádóó asdzání baa áhályánígíí nídaʼiilkáhí góneʼ náhodeesʼı̨́ı̨́ʼ. Kótʼéego aláahgo naatʼáanii Jiihóram bitsiʼ Jiihoshábiyath, nááʼiiłniihii Jiihóíyada beʼasdzą́ą́ nilíinii, Eihazáíyah bideezhí jílı̨́įgo biniinaa Athaláíyah yitsʼąą náhodeesʼı̨́ı̨́ʼ, áko tʼáadoo hwiisxı̨́į da.
12 Áko Bóhólníihii bikin biiʼ sohodizin góneʼ asdzání haa áhályánígíí bił nahodiʼnilʼingo hastą́ą́h nááhai. Áádóó Athaláíyah éí kéyah yiiʼ kéédahatʼíinii yinantʼáá nítʼééʼ.
