2 Chronicles 23:1-21
23 Áádóó tsostsʼid nááhaigo Jiihóíyada hadziil ízhʼdiilyaago neeznádiingo siláo yindanitʼaʼí, éí Jiiróham biyeʼ Azaráíyah, Jiihohéínan biyeʼ Íshmeiyel, Óbed biyeʼ Azaráíyah, Adáíyah biyeʼ Méíyasíyah, Zíkrai biyeʼ Iilíshafat díí bił ahaʼdazʼdeestʼą́.
2 Áko éí Júdah kéyah nahósʼaʼgóó tádookaigo Júdah dineʼé bikin hadaasʼáádę́ę́ʼ tʼáá átʼé Líívai dineʼé áádóó Ízrel dineʼé dabizhéʼé aląąjįʼ naazíinii áłah ádayiilaago Jerúsalem kin haalʼáajįʼ neheeskai.
3 Éí áłah ílínígíí tʼáá ałtso Diyin God bikin biiʼ sohodizin góneʼ aláahgo naatʼáanii bił ahaʼdazʼdeestʼą́. Áko Jiihóíyada áhodííniid, Jó, Bóhólníihii éí David biyeʼké náás yichíiłii yaa yáłtiʼgo haadzíiʼii bikʼehgo aláahgo naatʼáanii biyeʼ łaʼ nantʼáa doo.
4 Áko díí éí kódadoohnííł, Táaʼgo dah oonéłígíí bitahdóó tʼááłáʼígo dah wohnéłígíí, éí náádaʼiiłniihii áádóó Líívai dineʼé hááʼáyı̨́ı̨́h jı̨́ı̨́ góneʼ nidaołnishígíí dáádaʼdilkał baa ádahołyą́ą doo.
5 Tʼááłáʼígo dah náánááhnéłígíí éí aláahgo naatʼáanii bighan baa ádahołyą́ą doo; tʼááłáhígo dah náánááhnéłígíí éí atłʼááh nástłʼin bidáńʼdítı̨́įhgi baa ádahołyą́ą doo, áádóó diné tʼáá ałtso éí Bóhólníihii bikin biiʼ sohodizindóó tłʼóóʼ binaa nááházʼánígi áłah nilı̨́į doo.
6 Nidi Bóhólníihii bikin biiʼ sohodizin góneʼ tʼááká łaʼda yah ooyaʼ lágo; tʼáá hazhóʼó náádaʼiiłniihii áádóó Líívai dineʼé ninádaalnishii tʼéiyá yah anídaakah doo, háálá éí dadiyin, nidi dineʼé tʼáá ałtso éí Bóhólníihii bá hadaʼdzisíid doo.
7 Áádóó Líívai dineʼé éí aláahgo naatʼáanii yinídootʼih, áko diné tʼááłáʼí nítínígo bideezlaʼ dah deíjáah doo; tʼáá háiida kin góneʼ yah ííyáhígíí hodiʼyoolyééł, nidi aláahgo naatʼáanii yah anádáahgo áádóó chʼínádáahgo baa ádahołyą́.
8 Áko Líívai dineʼé áádóó Júdah dineʼé tʼáá ałtso éí nááʼiiłniihii Jiihóíyada hachʼįʼ yee haadzíiʼii tʼáá átʼé bikʼehgo ádadziidzaa. Tʼááłáʼí jinítínígo hasiláo hááʼáyı̨́ı̨́h jı̨́ı̨́ góneʼ dadeeshnishígíí éí nidahaashnishígíí bił yah azhdookah, háálá nááʼiiłniihii Jiihóíyada doo hwééʼíłníih da.
9 Nááʼáłdóʼ nááʼiiłniihii Jiihóíyada éí aláahgo naatʼáanii David yę́ę bibee atsiidadétáán áádóó binaageʼ ádaałtsʼísígíí índa dantsaaígíí éí Bóhólníihii bikin biiʼ sohodizin góneʼ sinilígíí neeznádiingo siláo bindanitʼaʼí yeinínil,
10 áádóó diné tʼáá ałtso tʼááłáʼí nítínígo bideezlaʼ dah deíjáahgo éí kin biiʼ sohodizin bíighahgi nishʼnáájígo áádóó nishtłʼajígo nihoneelʼáníjįʼ áádóó bikááʼ nááʼiiniihí bíighahgóó índa aláahgo naatʼáanii binaagóó naazı̨́įgo áyiilaa.
11 Ákohgo aláahgo naatʼáanii biyeʼ yił chʼídaaskaigo naatʼá chʼah bikʼi dazdeezʼą́ áádóó bee akʼeʼashchíinii bee bééhániihii bílákʼedadzistsooz, áádóó Jiihóíyada índa biyeʼké éí akʼah hakʼi yadayiiziidgo aláahgo naatʼáanii ádahoolaa índa ádaaní, Aláahgo naatʼáanii asʼahgóó hináa leʼ!
12 Nítʼééʼ Athaláíyah éí diné hahóółʼáago deíjeehgo aláahgo naatʼáanii yaa dahaniihgo yidiiztsʼą́ąʼgo Bóhólníihii bikin biiʼ sohodizin góneʼ diné yichʼįʼ yah ííyá.
13 Ákohgo dééʼı̨́ı̨́ʼ nítʼééʼ, shoo, aláahgo naatʼáanii yah eʼetiingi kin bíyah niiʼáii yíighahdóó sizı̨́; naatʼáanii danilíinii áádóó béésh dilní bee íʼdílzoołí yee ádaanínígíí aláahgo naatʼáanii yíighahdóó naazı̨́ índa kéyahdóó diné tʼáá ałtso bił nidahoozhǫǫhgo béésh dilní yee ádaaní áádóó ałdóʼ sin bee naʼaʼnéego dahataałígíí aa dahaniihgo alą́ąjįʼ dahataał nítʼééʼ. Áko Athaláíyah ákʼinaʼooldláadgo hadoolghaazhgo ání, Shiyaʼiidloʼgo shighahodeetʼą́!
14 Ákohgo nááʼiiłniihii Jiihóíyada éí neeznádiin siláo dah yikahii yindanitʼaʼí danilíinii chʼíiníʼeezhgo áyidííniid, Siláo bitaʼ góneʼ bił oohkááh, áko tʼáá háiida hakééʼ góneʼ eelwodígíí diltłish bee bidiʼyoolyééł, háálá nááʼiiłniihii ádííniid niʼ, Tʼááká Bóhólníihii bikin biiʼ sohodizin góneʼ hodiʼyoolyééł yíilaʼ.
15 Áko Athaláíyah deisiłgo aláahgo naatʼáanii bighan bichʼįʼgo łı̨́ı̨́ʼ bee yah anáʼádahí góneʼ chʼélwodgo ákweʼé biʼdiisyı̨́.
16 Áko Jiihóíyada áádóó Júdah dineʼé tʼáá ałtso índa aláahgo naatʼáanii éí Bóhólníihii bidineʼé dajílı̨́į doo biniyé ahadazdeestʼą́.
17 Ákohgo diné tʼáá ałtso éí diyin bidiʼníinii Béíyal bá kin góneʼ yah eekaigo nidayiiztiʼ áádóó bibikááʼ náádaʼiiniihí índa bidaʼalyaii tʼáá íiyisí ałtso nidayiiztiʼgo deidííséiigo Béíyal binááʼiiłniihii Mátan éí bikááʼ nááʼiiniihí bidááhjígo dayiisxı̨́.
18 Jiihóíyada éí náádaʼiiłniihii Líívai dineʼé danilíinii éí David yę́ę haa yáłtiʼgo haadzíiʼii bikʼehgo Bóhólníihii bikin biiʼ sohodizin góneʼ naanish bee bídahólníihgo Bóhólníihii bichʼįʼ didlidgo náádaʼjiiłniih dooleeł biniyé niyiiznil áádóó Mózes bibee hazʼáanii yee akʼeʼashchínígi átʼéego hoł nidahoozhǫǫh doo áádóó dahojitaał dooleełgo bee hódahólnííh; David haa yáłtiʼgo haadzíiʼii bikʼehgo ídaʼjiłʼı̨́ı̨́ nítʼééʼ.
19 Tʼáá łaʼda doo hoʼdidééhgóó éí doo yah azhdoogáał da biniyé Bóhólníihii bikin biiʼ sohodizingi dáádílkał yaa ádahalyánígíí niinínil.
20 Áko siláo yindanitʼaʼí áádóó aląąjįʼ naazíinii áádóó diné yindanitʼaʼí danilíinii índa kéyahdóó diné tʼáá ałtso éí yił dah diikaigo Bóhólníihii bikin biiʼ sohodizindę́ę́ʼ aláahgo naatʼáanii yił hadadaaskai, áádóó adeíjí dáńʼdítı̨́ı̨́hdę́ę́ʼ aláahgo naatʼáanii bighanjįʼ jíkai. Áko aláahgo naatʼáanii éí bikááʼdóó nahatʼáii yikááʼ dah deineesdá.
21 Áádóó éí kéyahgóó diné kéédahatʼíinii tʼáá ałtso bił nidahoozhǫǫh; Athaláíyah yę́ę diltłish yee dayiisxı̨́ı̨́dóó bikʼijįʼ kin haalʼáhígi hashtʼehodíítʼeʼ.
