2 Chronicles 24:1-27
24 Jóʼash tsostsʼid binááhaigo aláahgo nantʼá silı̨́ı̨́ʼ, áko Jerúsalem kin haalʼáagi nantʼáago dízdiin nááhai. Bimá éí Zíbiyah wolyéego Bíyer-shííba kin shijaaʼdóó naaghá.
2 Áádóó Jóʼash tʼáá ákogi ájítʼı̨́įgo Bóhólníihii binááł joogáałgo nááʼiiłniihii Jiihóíyada nibíiníłką́.
3 Áko Jiihóíyada éí hweʼasdzą́ą́ dooleełii naakigo há néidiinil áádóó hayeʼké índa hatsiʼké há niheezhchı̨́.
4 Áádóó ákódzaadóó bikʼijįʼ Jóʼash éí Bóhólníihii bikin biiʼ sohodizin hashtʼéédeeshdlííł jiniizı̨́ı̨́ʼ.
5 Áko náádaʼiiłniihii áádóó Líívai dineʼé áłah áyiilaago áyidííniid, Nílááh, Júdah kéyahgi kin hadaasʼáágóó dadohkááh, áádóó Ízrel dineʼé tʼáá ałtso bitsʼą́ą́dóó béeso bee Diyin God bikin biiʼ sohodizin hashtʼéédaołʼı̨́įdgo nináháháahgo yáál áłah áńdaołʼįįh doo, áko díí kótʼéego tsxı̨́įłgo ádaahtʼı̨́į doo. Ákondi Líívai dineʼé nidaʼáhodilziidgo béeso yiniyé tádadikááh.
6 Áádóó aláahgo naatʼáanii éí aláahgo nááʼiiłniihii Jiihóíyada hágo yidííniidgo ííłní, Haash yitʼéego tʼah doo Líívai dineʼé éí Júdah dineʼé índa Jerúsalem kin haalʼáádę́ę́ʼ dineʼé bitsʼą́ą́dóó béeso nehelyéii éí Bóhólníihii áádóó Ízrel dineʼé dah yinéełii yá naalʼaʼí Mózes yee haadzíiʼii bikʼehgo níbaal biiʼ hodílzinii biiʼ bee ahaʼdeetʼáanii siʼánígíí bá áłah ádaołéeh da?
7 Háálá asdzání doo yáʼáshóonii Athaláíyah biyáázhké éí Diyin God bikin biiʼ sohodizin góneʼ tʼáá naʼníleʼdii yah ííjéeʼgo Bóhólníihii bikin biiʼ sohodizin biiʼ diyingo nidahideestʼáanii tʼáá átʼé chʼídayiizhjaaʼgo Béíyalim baa hiditʼaah doogo yaa deideezʼą́.
8 Áádóó aláahgo naatʼáanii hachʼįʼ haadzíiʼgo tsitsʼaaʼ ádajiilaago Bóhólníihii bikin biiʼ sohodizin tłʼóoʼdi dáńʼdítı̨́įhgi nidadzizʼą́.
9 Áko Diyin God yá naalʼaʼí Mózes éí honoojíidi Ízrel dineʼé yąąh niinílá yę́ęgi átʼéego Bóhólníihii bichʼįʼ béeso nehelyéii nidahizhdoojih biniyé Júdah dineʼé áádóó Jerúsalem dineʼé bitahgóó bee yádajííłtiʼ.
10 Naatʼáanii danilíinii tʼáá ałtso áádóó diné tʼáá ałtso bił nidahoozhǫǫhgo tsitsʼaaʼ biiʼ béeso hadéébįįdjįʼ bibéeso nidayiizhjaaʼ.
11 Ákódzaago Líívai dineʼé éí aláahgo naatʼáanii bá nidaalʼaʼí tsitsʼaaʼ yaa nídeiʼáahgo áádóó béeso ląʼí yileehgo dayiiłtséehgo aláahgo naatʼáanii binaaltsoos ííłʼíní índa aláahgo nááʼiiłniihii bá naalʼaʼí yiʼashgo tsitsʼaaʼ bee béeso yááyiiʼáahgo siʼánígi ninéíʼááh. Kótʼéego tʼáá ákwíí jı̨́ béeso ląʼí áłah áńdayiilʼįįh nítʼééʼ.
12 Áko aláahgo naatʼáanii áádóó Jiihóíyada éí Bóhólníihii bikin biiʼ sohodizin yindadoolnishígíí yeinínil, áko tsé deitłʼinígíí índa kin ádeiłʼíní éí Bóhólníihii bikin biiʼ sohodizin hashtʼéédeidoodlííł biniyé shóyoostʼeʼ, áádóó ałdóʼ béésh índa béésh łitsoii yindaalnishígíí Bóhólníihii bikin biiʼ sohodizin hashtʼéédeiłʼı̨́į doo biniyé shóyoostʼeʼ.
13 Kótʼéego diné nidaalnishígíí nidaashnishgo yáʼátʼéehgo áńdaʼiidlaa, áko Bóhólníihii bikin biiʼ sohodizin tʼáá átʼé hashtʼéédayiidlaa áádóó bidziilgo siʼą́ągo áńdayiidlaa.
14 Áádóó ałtso nidaʼazhnishgo béeso chʼínééłnaʼígíí aláahgo naatʼáanii áádóó Jiihóíyada yichʼįʼ deizhjaaʼ; éí Bóhólníihii bikin biiʼ sohodizin góneʼ beedí chodaoʼíinii ádayiilaa; tʼáá éí didlidgo nááʼiiniihgi áádóó dilidgo łikání halchingo nááʼiiniihgi chodaoʼínígíí índa kin biiʼ sohodizin góneʼ chodaoʼíinii náádaałaʼ béésh łigaii áádóó óola bee ádaalyaa. Áko náádaʼiiłniihgo didlidgo nááhániihii Bóhólníihii bikin biiʼ sohodizin góneʼ tʼáá áłahjįʼ Jiihóíyada nááʼiiłniihgo nibíiníłką́.
15 Nidi Jiihóíyada haastih, asʼah nibíiníłką́ągo daaztsą́; neeznádiindóó baʼaan tádiin binááhaigo daaztsą́.
16 Áko David yę́ę bikin haalʼáagi naatʼáanii danilı̨́ı̨́ nítʼééʼ yę́ę bitahjįʼ yóóʼádahoolaa, háálá Ízrel dineʼé bikéyahgi Diyin God bá índa bikin biiʼ sohodizin bá yáʼátʼéehii ájiilaa.
17 Jiihóíyada daaztsą́ą́dóó bikʼijįʼ Júdah dineʼé binaatʼáanii danilíinii yíkaigo aláahgo naatʼáanii yichʼįʼ yaa ádaadzaa. Ákohgo aláahgo naatʼáanii hodiiztsʼą́ą́ʼ.
18 Áko dahazhéʼé yę́ę biBóhólníihii Diyin God bikin biiʼ sohodizin bitsʼájíkaigo áádóó asdzání beʼelyaii áádóó edaʼalyaii bichʼįʼ nidahojiłáá nítʼééʼ, áádóó Júdah dineʼé índa Jerúsalem dineʼé díí doo ákǫ́ǫ́ ádáátʼįįdígíí biniinaa bee atíʼélʼı̨́ hakʼi hooleʼ.
19 Ákótʼée nidi Diyin God yá dahalneʼii éí Bóhólníihii yichʼįʼ ninádahodooʼish biniyé ayiisʼaʼ, áko éí hakʼijįʼ danilı̨́įgo nidahasneʼ, nidi doo dayíistsʼą́ąʼ da.
20 Áko Diyin God biNíłchʼi éí nááʼiiłniihii Jiihóíyada biyeʼ Zekaráíyah bikʼi hooleʼ; éí dineʼé yikʼidiyaadóó sizı̨́įgo áyidííniid, Diyin God kóní, Haʼátʼéegoshąʼ Bóhólníihii bibikʼeh óʼooʼníiłii dahohtííh? Áko éí biniinaa doo náás dohkáah da. Bóhólníihii yóóʼadasidooʼą́ biniinaa bí ałdóʼ yóóʼanihidííʼą́.
21 Áádóó hondahazʼą́ągo aláahgo naatʼáanii haadzíʼígíí bikʼehgo Bóhólníihii bikin biiʼ sohodizindóó tłʼóoʼdi hazʼánígi tsé yee hoł nidadzisneʼ.
22 Kótʼéego aláahgo naatʼáanii Jóʼash éí Zekaráíyah bizhéʼé Jiihóíyada yę́ę haa joozbaʼgo há yaa naayáii tʼáadoo bééjoolniiʼ da, nidi Zekaráíyah dziisxı̨́. Áko Zekaráíyah biʼniitsą́ągo ání, Bíniʼ Bóhólníihii nooʼı̨́įgo kʼééndidoodlííł.
23 Ákódzaadóó ałtso nááhaigo Síriya dineʼé bisiláo dah deínéehii Jóʼash yaatįįh yikai; Júdah kéyahgi áádóó Jerúsalem kin haalʼáagi nínáago diné bitahdóó naatʼáanii danilíinii tʼáá ałtso ádeisdįįdgo bąąh daʼoogą́ʼígíí tʼáá átʼé Damáskasgóó aláahgo naatʼáanii yichʼįʼ adayiizyı̨́.
24 Síriya dineʼé bisiláo bitahdóó diné tʼáá díkwíí yíkai, áko tʼóó ahayóí dah oonééł Bóhólníihii beidiníʼą́, háálá Jóʼash áádóó Júdah dineʼé dahazhéʼé yę́ę biDiyin God Bóhólníihii yóóʼadazdeezʼą́. Kótʼéego Síriya dineʼé bisiláo éí Jóʼash atídayiilaa.
25 Áádóó Jóʼash yitsʼą́ą́ʼ dah nídiikaigo (jó, tʼáá íiyisí yéego átʼéego yitsʼą́ą́ʼ dah diikai), áko tʼáá hó há nidaalʼaʼí honídahodeezʼą́ągo nááʼiiłniihii Jiihóíyada biyeʼ bidił nidaashchxiiʼ ájiilaa yę́ę biniinaa hatsáskʼeh bikáaʼjįʼ dahwiisxı̨́. Kótʼéego dadziztsą́ągo David yę́ę bikin haalʼáagi yóóʼádahoolaa, nidi aláahgo naatʼáanii danilínígíí bitséníʼootséél góneʼ tʼáadoo yóóʼádahoolaa da.
26 Áko díí éí Jóʼash yikʼijįʼ nahazʼáanii éí Áman asdzání nilíinii Shímiyath biyáázh Zéíbad índa Móʼab asdzání nilíinii Shímrith biyáázh Jiihózabad wolyé.
27 Kʼad Jóʼash hayeʼké bídadéétʼiʼii áádóó ayóó átʼé naanish bidziilii baa nijiyáhígíí índa Bóhólníihii bikin biiʼ sohodizin hashtʼéédaalyaaígíí, jó, éí aláahgo naatʼáanii danilínígíí binaaltsoos biiʼ baa dahaneʼgo bikʼinídaháasdzoh. Áko hayeʼ Amazáíyah hatsáskʼehgi nantʼáá nítʼééʼ.
