2 Chronicles 25:1-28
25 Amazáíyah naadiin ashdlaʼ binááhaigo aláahgo nantʼá silı̨́ı̨́ʼ áádóó naadiin náhástʼéí nááhaijįʼ Jerúsalem kin haalʼáagi nantʼáá nítʼééʼ; bimá éí Jiihóʼadan wolyéego Jerúsalem kin haalʼáádóó naaghá.
2 Áádóó tʼáá ákogi ájítʼı̨́įgo Bóhólníihii binááł jiníyá, nidi tʼóó ájítʼı̨́įgo ájíítʼįįd.
3 Ákódzaago bee hóhólnííh dooleełii chánahgo há áyiilaago há nidaalʼaʼí nidzistseed, jó, aláahgo naatʼáanii hazhéʼé yę́ę dayiisxı̨́įgo éí biniinaa ájítʼı̨́.
4 Nidi nidabiʼdiztseedii baʼáłchíní éí tʼáadoo nidzistseed da, nidi Mózes binaaltsoos bee hazʼáanii bee akʼeʼashchínígíí biyiʼ Bóhólníihii haadzííʼ kóníigo, Azhéʼé danilíinii áłchíní biniinaa doo nidootsił da, doodaiiʼ áłchíní bizhéʼé biniinaa doo nidootsił da. Nidi diné tʼááłáʼí jinítínígo ádił nidaʼdziisíhígíí nidahoʼditseed doo.
5 Nááʼáłdóʼ Amazáíyah éí Júdah dineʼé áłah áyiilaago dahazhéʼé yę́ę baʼáłchíní náás ahoolchíiłii bikʼehgo mííl siláo dah deínéehii áádóó neeznádiin siláo dah deínéehii yindanitʼaʼí danilı̨́įgo Júdah dineʼé índa Bénjamin dineʼé yá niinínil. Áádóó naadiindóó dego béédááhaígíí yiyííłtaʼ nítʼééʼ, éí táadi neeznádiin diné néidiinilígíí, anaaʼ biniyé hashtʼeʼádadiilyaii, tsiidétáán áádóó naagé nideijaahgo yídaneelʼą́.
6 Áádóó ałdóʼ béésh łigaii tálent* wolyéii neeznádiin bíighahgo bikʼé Ízrel dineʼé bitahdę́ę́ʼ neeznádiindi míilgo siláo ayóogo dahayóígíí haa yíʼnil.
7 Nidi Diyin God yá halneʼii léiʼ haa níyáago ání, Aláahgo naatʼáanii nílíinii, tʼááká Ízrel dineʼé bisiláo nił dókááh yíilaʼ, háálá Bóhólníihii éí doo Ízrel dineʼé yił hólǫ́ǫ da, jó, Íífreiyim dineʼé danilı̨́įgo ádaatʼı̨́.
8 Nidi bił dadeeshbah nínízingo, nílááh, nidziilgo hashtʼeʼídílnéehgo díbááh; Diyin God éí anaʼí nihikʼeh dadidoodleełgo ánihidoolííł, háálá Diyin God adziil bee hólǫ́ǫgo áká adoolwoł índa akʼeh hodidoodleeł.
9 Áko Amazáíyah éí Diyin God bitsʼą́ą́dóó diné nilíinii ííłní, Ákoshąʼ neeznádiingo tálent wolyéii Ízrel dineʼé bisiláo baa nínilígíí haa dadiilnííł? Áko Diyin God bitsʼą́ą́dóó diné nilíinii áhodííniidgo ání, Éí bilááh ánéelą́ąʼgo Diyin God nichʼįʼ ninéidoodléełgo yíneelʼą́.
10 Ákohgo Amazáíyah éí Íífreiyim dineʼé bisiláo haa nínánígíí, Nihighangóó nídóhkááh, bijiníigo béézhníłniiʼ. Éí bąą ayóó átʼéego Júdah dineʼé yichʼįʼ bádahazhchįįdgo tʼáá íiyisí bádahachįʼgo dabighangóó anáákai.
11 Áádóó Amazáíyah bidziil íʼdiilyaago bidineʼé dah yidiiʼeezh áádóó Áshįįh Bił Honítsʼaaʼ hoolyéé góyaa yił nínáago Síyer dineʼé bisiláo neeznáadi míilgo nideistseed.
12 Áko Júdah dineʼé éí łahjįʼ neeznáadi míilgo daadzíʼígíí deisnáago tsé nítʼiʼ bighą́ąʼdi hadeiniskaad; áádę́ę́ʼ hadah adayiistłʼíidgo ałtso dadiitaaʼ.
13 Nidi Amazáíyah éí siláo hooghangóó béézhníłniiʼígíí éí Júdah kéyahgi kin hadaasʼáhígíí Samériya kin haalʼáádóó Beth-hóran kin shijaaʼjįʼ yaatįįh yikaigo táadi míilgo diné nideistseed índa bąąh daʼoogą́ʼígíí tʼóó ahayóí adayiizyı̨́.
14 Ákódzaadóó bikʼijįʼ Amazáíyah éí Íídam dineʼé íísdįįdę́ę́ʼ nádzáago Síyer dineʼé bidiyin dabidiʼníinii néiníjaaʼgo tʼáá bí bidiyin danilı̨́į dooleełgo dah deiznil áádóó nináháłaahgo yichʼįʼ tsin bijeeh dilidgo łikání halchinii nááyiiłniih nítʼééʼ.
15 Éí bąą Bóhólníihii éí Amazáíyah yichʼįʼ báhóóchįįdgo bá halneʼii hachʼįʼ ayííłʼaʼgo áhodííniid, Haʼátʼéegoshąʼ dadineʼé bidiyin dabidiʼníinii éí bidineʼé nitsʼą́ąjįʼ yisdéidooniłígi nádı̨́ʼídi doo yídaneelʼáanii bichʼįʼ choʼiisíníłʼįįd?
16 Áádóó tʼah yájíłtiʼgo aláahgo naatʼáanii áháłní, Daʼ niísh aláahgo naatʼáanii bá kótʼé diníigo ádaniilyaa? Kʼadí! Haʼátʼíísh biniyé nidiyoolyééł? Áko Diyin God yá halneʼii áá hoostʼįįd, nidi ání, Díí shił bééhózin: Diyin God, Ándeeshdįįł, nóʼní, háálá díí baa nisíníyá áádóó díí kótʼé nidishnínígíí doo yísíníłtsʼą́ąʼ da nítʼééʼ.
17 Ákohgo Júdah dineʼé aláahgo binanitʼaʼí bá nidaalʼaʼígíí ííłní, Haʼátʼíí lá baa naasháa doo, yiłníigo Jííhu binálí Jiihóʼahaz biyeʼ Jóʼash Ízrel dineʼé aláahgo binanitʼaʼí yichʼįʼ iʼííłʼaʼgo ání, Hágo, anaaʼ biniyé ahididiitʼashgo ahidiigą́ą́ł.
18 Áko Ízrel dineʼé aláahgo binanitʼaʼí Jóʼash éí Júdah dineʼé aláahgo binanitʼaʼí Amazáíyah yichʼįʼ iʼííłʼaʼgo ííłní, Lébanan kéyahdóó chʼil deeníní ałtsʼíísí léiʼ éí Lébanandóó gad ayóó átʼéé léiʼ yichʼįʼ iʼííłʼaʼ kóníigo, Nitsiʼ shiyeʼ beʼasdzą́ą doo biniyé baa níłteeh, áko Lébanangi naaldlooshii ałchinii naagháago éí chʼil deeníní łeeh yíʼííłʼeez.
19 Áko ádíní, Jó, Íídam dineʼé bisiláo niséłtseed, diní; éí bee ádaa hosíníʼnih. Kʼad nighangi tʼóó bił ánítʼé. Haʼátʼíísh biniyé ni áádóó Júdah dineʼé tʼáá bił nihikʼeh didoodleełgo atínihidoolíiłii baa nánítʼı̨́.
20 Nidi Amazáíyah doo íistsʼą́ąʼ da, háálá Diyin God bíniikʼehgo ádzaa, áko Íídam dineʼé bidiyin dabidiʼníinii bíká chojoołʼı̨́įgo biniinaa hwedaʼanaʼí yaa hodidooʼááł.
21 Áko Ízrel dineʼé aláahgo binanitʼaʼí Jóʼash ákóde ííyáago Júdah kéyahgi Beth-shíímesh kin haalʼáagi Júdah dineʼé aláahgo binanitʼaʼí Amazáíyah yił ahidiiʼáázh.
22 Áádóó Ízrel dineʼé éí Júdah dineʼé yikʼeh dadeesdlı̨́įʼgo diné tʼááłáʼí nítínígo dabiníbaalgóó anídahineezhchą́ą́ʼ.
23 Áko Ízrel dineʼé aláahgo binanitʼaʼí Jóʼash éí Júdah dineʼé aláahgo binanitʼaʼí Amazáíyah éí Jiihóʼahaz binálí Jiihóʼash biyeʼ Beth-shíímeshgi yiyiiłtsoodgo Jerúsalem kin haalʼáajįʼ yił daaskai, áko Jerúsalem ditą́ągo binaa ahééʼítłʼinígíí éí Íífreiyim biyah aʼatiinídóó bee nástłʼahgi yah aʼatiiníjįʼ éí hastą́ądi neeznádiin ké silá bíighahjįʼ naaʼadeineeskaad.
24 Áádóó óola índa béésh łigaii tʼáá átʼé áádóó Bóhólníihii bikin biiʼ sohodizin góneʼ beedí chodaoʼíinii, Óbed-íídam baa áhojilyánígíí áádóó aláahgo naatʼáanii bighandóó naalyeʼé nídayiizláʼígíí áádóó diné yisnánígíí bił Samériya kin haalʼáágóó anááʼná.
25 Ízrel dineʼé aláahgo binanitʼaʼí Jiihóʼahaz biyeʼ Jóʼash daaztsą́ą́dóó bikʼijįʼ Júdah dineʼé aláahgo binanitʼaʼí Jóʼash biyeʼ Amazáíyah hináago ashdlaʼáadah nínáánááhai.
26 Kʼad Amazáíyah łahjįʼ átséedi áádóó akéeʼdi ádzaaígíí, jó, éí Júdah dineʼé índa Ízrel dineʼé binanitʼaʼí danilínígíí binaaltsoos bikʼinídaháasdzo.
27 Áko Amazáíyah éí Bóhólníihii yikééʼ yigááł yę́ę yitsʼą́ąjįʼ hááyáádóó bikʼijįʼ Jerúsalem kin haalʼáagi hondahazʼą́ągo Léíkish kin haalʼáágóó azhnííchą́ą́ʼ. Nidi ákǫ́ǫ́ hakééʼ adaʼasʼaʼgo áadi dahwiisxı̨́.
28 Áádóó łı̨́ı̨́ʼ yee nídahastı̨́įgo Júdah kéyahgi kin haalʼáagi dahazhéʼé yę́ę yóóʼádaalyaagi yóóʼádahoolaa.
Footnotes
^ Tálent wolyéii tsostsʼidiindóó baʼaan ashdlaʼ dah hidiidloh bíighahgo daatsʼí óolyé.
