2 Chronicles 26:1-23
26 Ákohgo Júdah dineʼé tʼáá ałtso éí Azáíyah hastą́ʼáadah binááhaigo bizhéʼé yę́ę Amazáíyah bitsáskʼehgi aláahgo naatʼáanii nilı̨́įgo ádayiilaa.
2 Áko aláahgo naatʼáanii yę́ę bizhéʼé daʼiiłhaazhígi átʼéego ajííłhaazhdóó bikʼijįʼ Azáíyah éí Íílath kin haalʼáii áyiilaago Júdah dineʼé yaa néidiníʼą́.
3 Azáíyah éí hastą́ʼáadah binááhaigo aláahgo nantʼá silı̨́ı̨́ʼ; Jerúsalem kin haalʼáagi nantʼáago ashdladiindóó baʼaan naaki nááhai. Bimá éí Jekoláíyah wolyéego Jerúsalemdóó naaghá.
4 Áádóó tʼáá ákogi ájooníiłgo Bóhólníihii honíłʼı̨́; hazhéʼé Amazáíyah áátʼįįdii tʼáá átʼé bikʼehgo ájítʼéé nítʼééʼ.
5 Áádóó Diyin God hájítʼı̨́įgo Zekaráíyah bíiníłką́; bí éí Diyin God dílzingo bił bééhózin, áko Bóhólníihii tʼáá hájítʼı̨́įgo Diyin God éí náás ajiyoołdiłgo áhósin nítʼééʼ.
6 Áko dashdiiyáago Filístiya dineʼé bił anadaʼahijoolʼįįd; Gath kin haalʼáagi áádóó Jábneh kin haalʼáagi áádóó Áshdad kin haalʼáagi tsé bee binídaʼastłʼinii naaʼadadziiskaad, áádóó Áshdad kin haalʼá nahósʼaʼgi índa Filístiya dineʼé bitahgóó kin hadaasʼáago ádajiilaa.
7 Índa Diyin God háká análwoʼgo Filístiya dineʼé áádóó Ger-béíyal kin shijaaʼgi Árab dineʼé índa Miihónim dineʼé bił daʼahijigą́ą́ nítʼééʼ.
8 Áko Áman dineʼé éí aa doolyéełii Azáíyah yaa dayiizhjaaʼ áádóó tʼáá níléí Ííjip kéyah hoodzo bíighahgóó chʼíhoʼditʼááh, háálá tʼáá bí ayóó átʼéego bidziilgo íʼdiilyaa.
9 Nááʼáłdóʼ Azáíyah Jerúsalemdi náhástłʼah aańʼdítı̨́įhgi áádóó honítsʼaaʼ aańʼdítı̨́įhgi índa tsé naanástłʼinígi yadaʼiiʼáago bikááʼdóó haʼalzídí ádayiilaa.
10 Áádóó ałdóʼ honoojíidi yadaʼiitłʼingo áyiilaa, índa tʼóó ahayóigo tó hadayiiznil, háálá kéyah wóyahgo nahazʼą́ą́góó índa halgaigóó daʼalı̨́ı̨́ʼ tʼóó ahayóí dah danéelkaad, áádóó daadziłgóó índa ayóo nidaʼntʼaʼgo nahazʼą́ą́góó diné kʼéédaʼdidléehii áádóó chʼil naʼatłʼoʼii yaa ádahalyáanii yisnil, háálá kʼéédílyéehgi bił ayóó áhootʼé.
11 Nááʼáłdóʼ Azáíyah éí diné anadaʼałʼíinii bee hólǫ́; éí anaaʼgóó nídadibahígíí náádadoobahgo ałkééʼ nayiinil; éí aláahgo naatʼáanii bisiláo yindanitʼaʼí łaʼ Hananáíyah bóhólníihgo éí naaltsoos ííłʼíní Jáíyel áádóó naatʼáaniishchíín Méíyasíyah éí yiyííłtaʼígíí bikʼehgo ahádeiznil nítʼééʼ.
12 Áádóó daʼazhéʼé yę́ę baʼáłchíní náás daʼahílchíihii aląąjįʼ naazíinii, siláo ayóó ádaatʼéii tʼáá ałtso yééltaʼígíí naakidi mííldóó baʼaan hastą́ądi neeznádiin lá.
13 Áko bisiláo dah deínéehii éí táadi neeznádiindóó baʼaan tsostsʼidi mííldóó baʼaan ashdladi neeznádiingo ánéelą́ą́ʼ; éí anadaʼałʼı̨́įgo ayóó ádabóodziilgo aláahgo naatʼáanii yíká anájahgo anaʼí yichʼįʼ nidaabaah nítʼééʼ.
14 Azáíyah éí naagé, tsiidétáán, béésh chʼah, béésh ééʼda, ałtı̨́ı̨́ʼda índa tsé bee daʼditłʼı̨́įhda siláo dah deínéehii tʼáá ałtso yá hashtʼedayiilaa.
15 Áádóó Jerúsalemgi diné daʼiichįįhii éí yadaʼiiʼáago bikááʼdóó haʼalzídí áádóó tsé nástłʼin binídaastłʼah dabikááʼdóó bee aditłʼı̨́įhtsoh ádayiilaii dah dadooʼnił biniyé áádóó kʼaaʼ bee daʼdiltʼoh índa tsé dantsaaígíí bee daʼditłʼı̨́įh dooleeł biniyé ádeidoolíiłgo yee hoołʼaʼ, índa nízaadgóó tʼáá átʼé hwééhoʼdílzin, háálá hadziil dzizlı̨́įʼjįʼ tʼáá íiyisí háká aʼoolwod.
16 Nidi hadziil dzizlı̨́įʼgo éí hodoołchǫǫłgo ádaa hodzisnih; jó, Bóhólníihii haDiyin God bibee hazʼáanii bichʼįʼ niʼjiisííʼ, áádóó Bóhólníihii bikin biiʼ sohodizin góneʼ bikááʼ nááʼiiniihí bikááʼdóó tsin bijeeh dilidgo łikání halchinii nááhizhdoołnih biniyé yah ajííyá.
17 Áko nááʼiiłniihii Azaráíyah áádóó Bóhólníihii bináádaʼiiłniihii tseebídiingo, éí diné dahayóii danilı̨́įgo yił hakééʼ yah aakai.
18 Aláahgo naatʼáanii Azáíyah bidááh nijíkaigo ádabizhdííniid, Azáíyah yinílyéii, tsin bijeeh dilidgo łikání halchinii Bóhólníihii bichʼįʼ nááhidííłnihgo doo ni ná átʼée da, nidi Éran dabiyeʼké náádaʼiiłniihii éí tsin bijeeh dilidgo łikání halchinii náádayiiłniih doo biniyé diyingo atsʼádabiʼdeestʼáanii éí tʼéiyá bá átʼé. Diyingo hazʼánídóó chʼínínááh, háálá doo ákǫ́ǫ́ íínítʼįįd da áádóó Bóhólníihii Diyin God doo bił nílı̨́ı̨́góó ándoolííł.
19 Ákohgo Azáíyah éí tsin bijeeh dilidgo łikání halchinii yididoołiłgo dah yooʼáałgo báhóóchįįd. Áko nítʼééʼ náádaʼiiłniihii yichʼįʼ báhóóchįįdgo, shoo, náádaʼiiłniihii binááł Bóhólníihii bikin biiʼ sohodizin góneʼ tsin bijeeh dilidgo łikání halchinii bikááʼ nááʼiiniihí bíighahgi łóód atsʼíís yiyáanii naałdzidii hátáaʼgi bidoolnaʼ.
20 Aláahgo nááʼiiłniihii Azaráíyah áádóó náádaʼiiłniihii tʼáá ałtso dahonééłʼı̨́įʼgo, shoo, hátáaʼgi łóód atsʼíís yiyáanii naałdzidii silı̨́ı̨́ʼ lá. Áádóó tsxı̨́įłgo chʼídahwiisxan; tʼáá hó ałdóʼ tsxı̨́įłgo chʼízhníyá, háálá Bóhólníihii atíhoolaa.
21 Áko aláahgo naatʼáanii Azáíyah daaztsą́ bijı̨́įjįʼ łóód atsʼíís yiyáanii naałdzidii bąąh hólǫ́ǫ́ nítʼééʼ, áádóó łóód atsʼíís yiyáanii naałdzidii bee bąąh dahazʼą́ągo tʼáá sahdii kin yiiʼ bighan, háálá Bóhólníihii bikin biiʼ sohodizin bitsʼáhodeeltʼeʼ. Áko hayeʼ Jótham éí aláahgo naatʼáanii bighandóóígíí bee bóhólníihgo Júdah dineʼé yá nihodiiʼaah nítʼééʼ.
22 Kʼad Azáíyah łahjįʼ átséedi áádóó akéeʼdi ádzaaígíí Éímaz biyeʼ Diyin God yá halneʼii Aizéíyah akʼeʼashchı̨́.
23 Áádóó Azáíyah dahazhéʼé yę́ę bitahjįʼ ajiiłhaazh dahazhéʼé yę́ę yóóʼádaalyaaígi, tʼáá éí aláahgo naatʼáanii danilínígíí yóóʼádaalʼínígi yóóʼáhoʼdiilyaa, háálá ádadííniid, Łóód atsʼíís yiyáanii naałdzidii hąąh hólǫ́ǫ́ nítʼééʼ. Áko hayeʼ Jótham hatsáskʼehgi nantʼá silı̨́ı̨́ʼ.
