2 Chronicles 27:1-9
27 Jótham éí naadiin ashdlaʼ binááhaigo aláahgo nantʼá silı̨́ı̨́ʼ, áko nantʼáago Jerúsalem kin haalʼáagi hastą́ʼáadah nááhai. Bimá éí Jiirúsha wolyéego Zéídak yitsiʼ nilı̨́.
2 Áko tʼáá ákogi ájítʼı̨́įgo Bóhólníihii binááł jiníyá; hazhéʼé Azáíyah áátʼįįdii tʼáá átʼé bikʼehgo ájoonííł nítʼééʼ. Bóhólníihii bikin biiʼ sohodizin góneʼ éí doo yah ajigháah da. Áko dineʼé tʼahdii doo yáʼádaatʼéehii yaa nidaakai.
3 Áádóó Bóhólníihii bikin biiʼ sohodizin adeídi yah aʼatiinígíí áyiilaa, índa yílkʼid Ófel hoolyéii tsé binaa ahénátłʼinígíí bikááʼgóó ląʼí yínááyiitłʼin.
4 Nááʼáłdóʼ Júdah kéyahgi daadziłgóó bineʼ nidaʼadziʼii áádóó yadaʼiitłʼingo bikááʼdóó haʼalzídí ádayiilaa.
5 Áádóó Áman dineʼé aláahgo binanitʼaʼí índa bisiláo yikʼiijéeʼgo yikʼeh dadeesdlı̨́ı̨́ʼ; tʼáá éí yihahígíí biiʼ Áman dineʼé éí béésh łigaii tálent wolyéii tʼááłáhídi neeznádiingo áádóó tłʼoh naadą́ą́ʼ hastą́diindóó baʼaan naaki yikááł bíighahgo índa tłʼoh naadą́ą́ʼ bideeʼí hastą́diindóó baʼaan naaki yikááł bíighahgo dah dahidédloʼgo haa nídeigééh nítʼééʼ. Kótʼéego naaki áádóó tááʼ náhááh góneʼ haa nídeigééh nítʼééʼ.
6 Áko Jótham éí biDiyin God Bóhólníihii binááł tʼáá ákóneʼ ájítʼı̨́įgo nahodzizʼánígíí biniinaa ayóó ájítʼé dzizlı̨́ı̨́ʼ.
7 Kʼad Jótham łahjįʼ yaa naayáhígíí áádóó tádííbaaʼígíí tʼáá átʼé índa nahazʼánígíí, jó, éí Ízrel dineʼé índa Júdah dineʼé binanitʼaʼí danilínígíí binaaltsoos bikʼinídaháasdzo.
8 Naadiin ashdlaʼ binááhaigo éí nantʼá silı̨́ı̨́ʼ áádóó Jerúsalem kin haalʼáagi nantʼáago hastą́ʼáadah nááhai.
9 Áko Jótham éí dahazhéʼé yę́ę bitahjįʼ ajiiłhaazhgo hazhéʼé David yę́ę bikin haalʼáhígi yóóʼádahojiilaa. Hayeʼ Éíhaz éí hatsáskʼehgi nantʼáá nítʼééʼ.
