2 Chronicles 28:1-27
28 Éíhaz naadiin binááhaigo aláahgo nantʼá silı̨́įʼgo hastą́ʼáadah nááhaijįʼ Jerúsalemgi nantʼáá nítʼééʼ, nidi tʼáadoo tʼáá ákogi ájítʼı̨́įgo Bóhólníihii binááł jideeyáa da; hazhéʼé David áátʼįįdígi tʼáadoo ádziidzaa da.
2 Nidi Ízrel dineʼé aláahgo binanitʼaʼí nídaadleełii ádáátʼįįdii bikʼehgo joogááł, áádóó ałdóʼ doolyı̨́įʼgo Béíyalim bidaʼalyaago ádajiilaa.
3 Nááʼáłdóʼ Hínam biyeʼ bihonítsʼaaʼgi tsin bijeeh dilidgo łikání halchinii nááyiiłniih, áko Bóhólníihii éí Ízrel dineʼé bitsʼąą ałʼąą dineʼé chʼíiniiskaadii bidoo yíldingóó bibee éʼélʼįʼ bikʼehgo haʼáłchíní nidi jidiłidgo náádziisniiʼ.
4 Áádóó ninádahałaah doo biniyé wódah nahazʼą́ągo ádaalyaaígóó áádóó dah daaskʼidgóó índa tsin dootłʼizh naazkaadii tʼáá átʼé dabiyaagóó didlidgo nááhániihii nááyiiłniih nítʼééʼ índa tsin bijeeh dilidgo łikání halchinii nááhániihii dazhdiłid nítʼééʼ.
5 Éí bąą haDiyin God Bóhólníihii éí Síriya dineʼé aláahgo binanitʼaʼí yaa hodiníʼą́ągo hakʼeh hodeesdlı̨́ı̨́ʼ áádóó Júdah dineʼé tʼóó ahayóí yisnááh ádayiilaago Damáskas kin haalʼáágóó adayiizhʼeezh. Hó éí Ízrel dineʼé aláahgo binanitʼaʼí ałdóʼ yaa dahodeezʼą́; éí Júdah dineʼé tʼáá íiyisí tʼóó ahayóí neistseed.
6 Áko Remaláíyah biyeʼ Pííkah éí Júdah dineʼé dahayóii tʼáá łaʼóo jı̨́ neeznádiindóó baʼaan naadiindi mííl neistseed, háálá dahazhéʼé yę́ę biDiyin God Bóhólníihii yóóʼadazdeezʼą́.
7 Áko Íífreiyim dineʼé Zíkrai éí diné ayóó átʼéé léiʼ nilı̨́įgo aláahgo naatʼáanii Éíhaz biyeʼ Méíyasíyah áádóó aláahgo naatʼáanii bighan bee bóhólníhígíí Ázrikam índa aláahgo naatʼáanii tʼáá yikééʼ góneʼ sizínígíí Elkéínah yił neistseed.
8 Áádóó Ízrel dineʼé dabikʼisóó Júdah dineʼé naakidi neeznádiindi mííl deisná; éí asdzánída, dabiyeʼda, dabitsiʼda áádóó ałdóʼ naadeeł ádaatʼéii yighadayiisʼnilgo Samériya kéyahgóó adayiizyı̨́.
9 Nidi Bóhólníihii yá halneʼii léiʼ áadi naagháá lá; éí Óbed wolyéego Samériya kin haalʼáajįʼ oonéłígíí yidááh níyáago áyidííniid, Jó, danihizhéʼé yę́ę biDiyin God Bóhólníihii éí Júdah dineʼé yichʼįʼ báhóóchįįdgo biniinaa nihílákʼehodííʼą́, nidi tʼóó báhádzidgo nihá dahazhchįįdgo nidasoołtseedígíí yáʼąąsh góde ahosooltsʼą́ą́ʼ.
10 Áko kʼad, Júdah dineʼé índa Jerúsalem kin haalʼáagi kéédahatʼíinii, diné áádóó asdzánída nihinaalteʼ danilı̨́į dooleeł danohsingo daołtsood. Áko nihí nidi nihiDiyin God Bóhólníihii bichʼįʼ ádił nidaʼayoosíiʼgo átʼé.
11 Éí bąą dashíínółtsʼą́ą́ʼ, díí danihikʼis yisnááh ádaołaaígíí béédadohchííd, háálá Bóhólníihii yee hashké nídzinii yee atínihilééh.
12 Ákohgo Íífreiyim dineʼé aląąjįʼ naazíinii łaʼ Johéínan biyeʼ Azaráíyah áádóó Miishíliimath biyeʼ Berakáíyah áádóó Shálam biyeʼ Jiihizkáíyah índa Hádlai biyeʼ Améísa éí anaaʼdę́ę́ʼ siláo nááʼnéłígíí yidááh neheekaigo
13 ádeidííniid, Díí dasoołnánígíí doo kweʼé nidahidoohʼish da, háálá tʼáá íídą́ą́ʼ Bóhólníihii bichʼįʼ nidaʼiyeelzííʼ, áko baa nídoohkaígíí tʼóó yówehda bee ádił náádaʼdiilzih áádóó doo ákǫ́ǫ́ ánáádadiiʼníił da; jó, ayóó átʼéego doo ákǫ́ǫ́ ádeitʼįįd da, áko Ízrel dineʼé bikʼijįʼ tʼáá íiyisí atíʼélʼı̨́ bee hashké hwiidínóodzįįł.
14 Áko siláo nidaabaahígíí éí diné índa naadeełí deisnáanii naatʼáanii danilíinii áádóó dineʼé tʼáá ałtso yá tʼáá ákǫ́ǫ́ nideiznil.
15 Áádóó diné dabidééjiʼígíí dah diikaigo yisnááh ádabiʼdiilyaaígíí éí ééʼ yisnááh ádaalyaa yę́ę biʼééʼ ádaadinígíí tʼáá ałtso yee hadeidiilaa áádóó ké yaa dayiiznilgo chʼiyáán áádóó tó yił yadaʼastsood índa akʼah yee deistłahgo dayíísı̨́įʼgo doo dabidziilígíí tʼáá ałtso télii yikááʼ dah deidineesbingo éí páam naazkaadii kin haalʼá Jériko hoolyéégóó dabikʼisóó yichʼįʼ yił náʼná, ákohgo bí éí Samériya kéyahgóó anáákai.
16 Íídą́ą́ʼ aláahgo naatʼáanii Éíhaz éí Asíriya dineʼé aláahgo binanitʼaʼí, Shíká adíílwoł, yiłníigo yichʼįʼ iʼííłʼaʼ.
17 Háálá Íídam dineʼé náánáʼnáago Júdah dineʼé atídayiilaago deisnáago adayiizhʼeezh.
18 Filístiya dineʼé éí ałdóʼ kéyah ayeídi áádóó Júdah shádiʼááhjígo kin hadaasʼáhígíí Beth-shíímesh áádóó Éíjalan áádóó Gédiirath áádóó Sóko áádóó Tímnah índa Gímzo, éí binaagóó bikin dah naazhjaaʼígíí ałdóʼ tʼáá bił yaatįįh yikai, áko tʼáá ákwii kéédahatʼı̨́.
19 Áko Bóhólníihii éí Júdah dineʼé aʼohgo áyiilaa, háálá Ízrel dineʼé aláahgo binanitʼaʼí Éíhaz éí Júdah dineʼé tʼą́ą́ʼ ádaʼdólzingo ádzósin índa Bóhólníihii bibee hazʼáanii bichʼįʼ niʼjiisííʼ.
20 Áko Asíriya dineʼé aláahgo binanitʼaʼí Tíglath-pilíízer haa níyáago hachʼįʼ hodiisnááʼ, nidi tʼáadoo hadziilgo áhoolaa da.
21 Jó, Éíhaz éí Bóhólníihii bikin biiʼ sohodizindę́ę́ʼ áádóó aláahgo naatʼáanii bighandę́ę́ʼ índa naatʼáanii danilíinii dabighandę́ę́ʼ daʼílíinii chʼíyiizhjaaʼgo Asíriya dineʼé aláahgo binanitʼaʼí aa yílyáii átʼéego baazhnínil, nidi éí tʼáadoo háká eelwod da.
22 Áádóó tʼáá íiyisí yéego hachʼįʼ nahwiiʼnáago tʼóó yówehda Bóhólníihii bichʼįʼ doo ákǫ́ǫ́ ájíítʼįįd da; díí aláahgo naatʼáanii Éíhaz wolyéii átʼı̨́ ni.
23 Damáskas dineʼé hakʼeh dadeesdlı̨́ʼígíí bidiyin dabidiʼníinii bichʼįʼ nínáájiiłnihgo ájíní, Síriya dineʼé aláahgo binanitʼaʼí bidiyin bíká aalwodgo, éí bąą bichʼįʼ náádiʼyeeshnihgo shíká adoojah. Nidi hó áádóó Ízrel dineʼé tʼáá ałtso tʼóó bee ádazhdoolchxǫʼ.
24 Áádóó Éíhaz éí Bóhólníihii bikin biiʼ sohodizin góneʼ ásaaʼ áłah áyiilaago áłtsʼíísígo nidayiishgizh áádóó Bóhólníihii bikin biiʼ sohodizin bidáádílkał daʼdeideeskaal índa Jerúsalem kin haalʼáagi tʼáá bee nídaastłʼahgóó bikááʼ nááʼiiniihí ádá ádayiilaa.
25 Índa Júdah kéyahgi kin tʼáá hadaasʼáhígi diyin dabidiʼníinii bichʼįʼ tsin bijeeh dilidgo łikání halchinii dazhdiłid doo biniyé ninádahałaah doo biniyé wódah nahazʼą́ągo ádayiilaa; éí yee dabizhéʼé yę́ę biDiyin God Bóhólníihii yáhóółchįįd.
26 Kʼad Éíhaz łahjįʼ átséedi áádóó akéeʼdi yaa naayáhígíí tʼáá átʼé éí Júdah dineʼé índa Ízrel dineʼé aláahgo binanitʼaʼí danilínígíí binaaltsoos bikʼinídaháasdzo.
27 Éíhaz dahazhéʼé yę́ę bitahjįʼ ajiiłhaazhgo Jerúsalem kin haalʼáhígi yóóʼádahoolaa, nidi Ízrel dineʼé aláahgo binanitʼaʼí danilínígíí dabitséníʼootséél góneʼ éí doo nidahastı̨́į da. Áádóó hayeʼ Heziikáíyah éí hatsáskʼehgi nantʼá silı̨́ı̨́ʼ.
