2 Chronicles 29:1-36
29 Heziikáíyah naadiin ashdlaʼ binááhaigo nantʼáago hahoolzhiizh áádóó Jerúsalemgi nantʼáago naadiin náhástʼéí nááhai. Bimá éí Abáíjah wolyéego Zekaráíyah yitsiʼ nilı̨́.
2 Heziikáíyah tʼáá ákogi átʼéii baa joogáałgo Bóhólníihii hooʼı̨́; hazhéʼé David yę́ę áátʼįįdii tʼáá átʼé bikʼehgo ájítʼı̨́.
Heziikáíyah éí kin biiʼ sohodizin biiʼ nahadláago ánáyiidlaa
3 Áádóó aláahgo nantʼáago tʼááłáʼí náhááh góneʼ átsé nídízííd binih Bóhólníihii bikin biiʼ sohodizin bidáádílkał aa nídazdeeztą́ągo hashtʼéédajiidlaa.
4 Áádóó náádaʼiiłniihii índa Líívai dineʼé éí áłah ájiilaago haʼaʼaahjigo hazʼánígi bił áłah dzizlı̨́ı̨́ʼ.
5 Áko ábijiní, Líívai dineʼé nohłíinii, dashíínółtsʼą́ą́ʼ, ádadołdéehgo danihizhéʼé yę́ę biDiyin God Bóhólníihii bikin biiʼ sohodizin hodiyingo hazʼą́ągo áńdaahdlééh áádóó tʼóó badaaʼihii hodiyingo hazʼą́ą́dę́ę́ʼ chʼídahohjááh.
6 Háálá danihizhéʼé yę́ę doo ákǫ́ǫ́ ádáátʼįįdgóó nihiDiyin God Bóhólníihii binááł doo yáʼáshóonii yaa nidaaskai áádóó yóóʼadeideezʼą́ áádóó yitsʼą́ąjįʼ ádaadzaago doo deiníłʼı̨́į da nítʼééʼ.
7 Áádóó ałdóʼ kin biiʼ sohodizin bidáahjigo chahaʼohgi dáádílkałígíí dádaʼdeeskaal índa bee dahoolʼiní deineestsiz áádóó tsin bijeeh dilidgo łikání halchinii nááhániihígíí índa didlidgo náádaʼiiniihígíí éí Ízrel dineʼé biDiyin God bihodiyin hazʼą́ągi doo náádayiiłniih da nítʼééʼ.
8 Éí bąą Bóhólníihii tʼóó báhádzidgo yee atíʼéłʼíinii Júdah kéyahdóó dineʼé áádóó Jerúsalem kin haalʼáádóó dineʼé bikʼijįʼ dahidíyı̨́; éí daohʼı̨́įgo achʼįʼ nahwiiʼná bikʼee tʼóó ił ahayóí índa haa daʼoodloh dooleełjįʼ nihodiizʼą́.
9 Éí bąą, jó, danihizhéʼé yę́ę diltłish bee nidaaztseed índa nihiyeʼké áádóó nihitsiʼké índa nihidaʼasdzą́ą́ yisnááh ádabiʼdiilyaa.
10 Kʼad Ízrel biDiyin God Bóhólníihii bił ałhadiʼdeeshtʼááł biniyé shíniʼ áhooshłaa, áko tʼóó báhádzidgo báhóóchįįdii nihitsʼą́ąjįʼ nídoodleeł.
11 Shiyeʼké, kʼad tʼáadoo nidaʼáhodołziidí, háálá Bóhólníihii binááł nisoozı̨́įgo bichʼįʼ nidahohłáago tsin bijeeh dilidgo łikání halchinii dadohłidgo bá nidaałʼaʼ doo biniyé nánihiizlááʼ.
12 Ákohgo Líívai dineʼé nídiijééʼ: éí Kóhath dineʼé Amaséíyai biyeʼ Méíhath, Azaráíyah biyeʼ Jówel áádóó Miirárai dineʼé Ábdai biyeʼ Kish, Jeháliilel biyeʼ Azaráíyah áádóó Gérshan dineʼé éí Zímah biyeʼ Jóʼah, Jóʼah biyeʼ Ííden,
13 áádóó Iilízafan dineʼé éí Shímrai áádóó Jáíyel índa Éísaf dineʼé éí Zekaráíyah índa Matanáíyah,
14 áádóó Hííman dineʼé éí Jáíyel índa Shímiyai, áádóó Jedúthan dineʼé éí Shiiméíyah índa Azáíyel nídiijééʼ.
15 Áko dabikʼisóó áłah ádayiilaago hodiyingo ádadooldeeʼgo yah eekai, áádóó Bóhólníihii yee hasʼáanii bikʼehgo aláahgo naatʼáanii haadzíiʼgo Bóhólníihii bikin biiʼ sohodizin hashtʼéédahojidlééh biniyé yah ajookai.
16 Áádóó náádaʼiiłniihii éí Bóhólníihii bikin biiʼ sohodizin náwóneʼígóó yah eekaigo hashtʼedahoolaa índa tʼáá ałtsoní danchǫ́ʼígíí Bóhólníihii bikin biiʼ sohodizindóó tłʼóoʼdi hazʼáníjįʼ chʼídayiizhjaaʼ. Áko Líívai dineʼé éí Kídran tó nílínígíí yiih dayiiskaad.
17 Áádóó átsé nídízídígíí łaʼa jı̨́ı̨́ góneʼ dadeeshnish; tseebíí jı̨́ı̨́ góneʼ Bóhólníihii bikin biiʼ sohodizin yah eʼetiiníjįʼ baa hoolzhiizh, áko tseebíí yiską́ąjįʼ Bóhólníihii bikin biiʼ sohodizin dajíísı̨́ı̨́ʼ áádóó átsé nídízídígíí hastą́ʼáadah jı̨́ı̨́ góneʼ ałtso yindaashnish.
18 Ákohgo aláahgo naatʼáanii Heziikáíyah yaa daaskaigo ádeidííniid, Bóhólníihii bikin biiʼ sohodizin tʼáá átʼé diyingo ádeiilyaa áádóó didlidgo bikááʼ nááʼiiniihí bił chodaoʼínígíí tʼáá bił índa bááh nááhániihii bikááʼ nináʼniłígíí éí bił chodaoʼínígíí tʼáá bił diyingo ádeiilyaa.
19 Áádóó ałdóʼ aláahgo naatʼáanii Éíhaz nantʼá yę́ędą́ą́ʼ bee hazʼáanii kʼíinítiʼgo ásaaʼ yóóʼayiistłʼíidii hashtʼedeiilyaago diyingo atsʼádabiʼdeestʼą́; jó, éí Bóhólníihii bibikááʼ nááʼiiniihí bidáahgi sinil.
20 Ákohgo aláahgo naatʼáanii Heziikáíyah abíínídą́ą́ʼ nídiiʼnaʼgo kin haalʼáádóó aląąjįʼ naazíinii áłah áyiilaago Bóhólníihii bikin biiʼ sohodizin góde yił haaskai.
21 Áádóó bee óhólnííh índa kin biiʼ sohodizin bá áádóó Júdah dineʼé bá ádił niʼiidzííhjí nááhániihii biniyé tʼáá ałʼąą tsostsʼid níjaaʼgo dóola áádóó deenástsʼaaʼ áádóó dibé yázhí índa tłʼízíchǫǫh nidajiizhjaaʼgo náádaʼiiłniihii Éran bitsʼą́ą́dóó náás ahoolchíiłii éí Bóhólníihii bibikááʼ nááʼiiniihí bikáaʼjįʼ náádeidiyoołnih biniyé bichʼįʼ bee hadzoodzííʼ.
22 Áko dóola nideistseedgo bidił éí náádaʼiiłniihii nídeidiiką́ągo bikááʼ nááʼiiniihí yikʼídeistah; tʼáá ákótʼéego deenástsʼaaʼ índa dibé yázhí tʼáá ałkééʼ nideistseedgo dabidił bikááʼ nááʼiiniihí yikʼídeistah.
23 Áádóó tłʼízíchǫǫh ádił niʼiidzííhjí nááhániihii éí aláahgo naatʼáanii índa diné tʼáá átʼé bidáahjįʼ chʼídeizhʼeezh. Áádóó éí yikááʼ dah dadeesniiʼ.
24 Áko náádaʼiiłniihii éí tłʼízíchǫǫh nideistseedgo bidiłígíí yee kʼé nídeidootʼįįłii ádayiilaago bikááʼ nááʼiiniihí bikááʼdóó Ízrel dineʼé tʼáá ałtso bá kʼé náhodoodǫǫł biniyé yá náádayiisniiʼ, háálá díí didlidgo nááhániihii índa ádił niʼiidzííhjí nááhániihii éí Ízrel dineʼé tʼáá ałtso bá nááhidoonihgo aláahgo naatʼáanii yee haadzííʼ.
25 David áádóó aláahgo naatʼáanii bá náásgóó áhodoonííł yaa halneʼii Géed índa Diyin God yá halneʼii Néíthan éí nidahazʼáanii bikʼehgo niinínil. Éí béésh ahídíʼniłgo diitsʼaʼígíí áádóó tsin tłʼóół neeznáá bąąh daneelzheeʼgo bee nidaʼaʼnéii índa tsin tłʼóół naakitsʼáadah bąąh daneelzheeʼgo bee nidaʼaʼnéii Líívai dineʼé dah deíjáahgo Bóhólníihii bikin biiʼ sohodizin góneʼ niinínil, háálá kótʼéego Bóhólníihii bá dahalneʼii yee haadzííʼ nítʼééʼ.
26 Áko Líívai dineʼé éí David yę́ę bibee nidaʼaʼnéhígíí dah deíjáahgo áádóó náádaʼiiłniihii éí béésh dilní bee íʼdílzoołí dah deíjáahgo naazı̨́.
27 Áko Heziikáíyah éí bikááʼ nááʼiiniihí bikáaʼjįʼ didlidgo náádiʼyoonihgo yee haadzííʼ. Didlidgo nááʼiiniihí bee hahoolzhiizhgo béésh dilní bee íʼdílzoołí áádóó Ízrel dineʼé aláahgo binanitʼaʼí David yę́ę bibee nidaʼaʼnéhígíí biłgo Bóhólníihii biyiin ałdóʼ yee nídadiineʼ.
28 Áádóó áłah ílínígíí tʼáá ałtso nidahałáago dahataałígíí éí dahataał índa béésh dilní bee íʼdílzoołí yee ádaanínígíí dadiistsʼą́ą́ʼ, áko didlidgo nááʼiiniihígíí ałtso deidííłidjįʼ nidahałá bíighah azlı̨́ı̨́ʼ.
29 Áko ałtso náádaʼdziisniiʼgo aláahgo naatʼáanii áádóó bił áłah nilínígíí tʼáá ałtso bił nitsidazdéesgoʼgo nidahodzisá.
30 Nááʼáłdóʼ aláahgo naatʼáanii Heziikáíyah áádóó naatʼáanii danilíinii éí Líívai dineʼé yidaʼasniiʼgo David yę́ę índa áhodooníiłii yaa halneʼii Éísaf yę́ę bizaad bee Bóhólníihii baa dahohniihgo bichʼįʼ dahohtaał deidííniid. Áko yaa dahaniihgo bił dahózhǫ́ǫgo dahóótáál áádóó yaaʼádaatʼéego nidahasá.
31 Ákohgo Heziikáíyah áhodííniidgo ání, Kʼad Bóhólníihii bichʼįʼ diyingo atsʼánídaʼasidohtʼą́; áyídíjįʼ ninohkáahgo nááhidoonihii áádóó ahééh hasinjí nááhániihii áádóó didlidgo nááhániihii Bóhólníihii bikin biiʼ sohodizin góneʼ yah adaahjááh. Áko áłah nilínígíí éí didlidgo nááhániihii áádóó ahééh hasinjí nááhániihii nidayiizhjaaʼ índa tʼáá bí ádeinízinígíí didlidgo nááhániihii nidayiizhjaaʼ.
32 Áko áłah ílínígíí éí didlidgo nááhidoonihii nidayiizhjaaʼígíí éí dóola tsostsʼidiingo, deenástsʼaaʼ neeznádiingo índa dibé yázhí naakidi neeznádiingo tʼáá átʼé Bóhólníihii bichʼįʼ didlidgo nááhániihii biniyé deineeskaad.
33 Áádóó diyingo atsʼádahideestʼánígíí éí béégashii hastą́ądi neeznádiin áádóó dibé éí táadi mííl.
34 Nidi náádaʼiiłniihii tʼáá díkwíigo bąą didlidgo nááhidoonihii chʼééh ałtso nídajiłʼah. Áko náánáłaʼ náádaʼiiłniihii tʼah ádadildéehgo biná ałtso bindajishnishjįʼ dahakʼisóó Líívai dineʼé háká ííjééʼ, háálá Líívai dineʼé éí náádaʼiiłniihii biláahgo tʼáá ákogi ádaatʼéego ádadooldeeʼ.
35 Áádóó didlidgo nááhániihii tʼóó ahayóí áádóó hózhǫ́ǫ́jí nááhániihii bikʼah tʼáá bił índa yanáadziʼgo nááhániihii didlidgo nááhániihígíí tʼáá bikʼeh daníką́ągo, kótʼéego Bóhólníihii bikin biiʼ sohodizingi nidahojiłáago ádajiilaa.
36 Áádóó Diyin God éí diné tʼáá ałtso yá áátʼįįd biniinaa Heziikáíyah índa diné tʼáá ałtso bił nidahoozhǫǫh, háálá tʼáadoo hooyání ádzaa.
