2 Chronicles 3:1-17
3 Nítʼééʼ Sálaman éí Jerúsalemdi Dził Moráíyahgi éí hazhéʼé David yę́ę Bóhólníihii bichʼįʼ yitʼíní íʼdiilyaaígi David yę́ę éí Jííbas dineʼé Órnan habíʼínáʼálʼisígi hashtʼehoolaaígi ákwii Bóhólníihii bikin biiʼ sohodizin áyiʼniilaa.
2 Áko aláahgo naatʼáanii nilı̨́įgo dı̨́ı̨́ʼ náhááh góneʼ naaki nídízííd binih naakigóó yoołkááł góneʼ kin biiʼ sohodizin áyiʼniilaa.
3 Kʼad díí kótʼéego éí Bóhólníihii bikin biiʼ sohodizin ázhdoolíłígíí Sálaman bee nahodiʼneestą́ą́ʼ. Áłtséédą́ą́ʼ bíʼnéélʼąądígíí tʼáá éí bikʼehgo nááseeʼgo náhástʼédiin ké silá áádóó tádiin ké silá áníłtéél.
4 Kin bidáahjigo chahaʼoh béédiníʼánígíí éí nááseeʼgo áníłnézígíí kin naaniigo áníłtélígíí tʼáá bił aheeníłtso; éí tádiin ké silá áníłtso áádóó dego neeznádiindóó baʼaan tseebídiin ké silá ánízah. Biyiʼdę́ęʼgo éí óola tʼáá bízhání yikʼi niiníłkaad.
5 Índa hodiyingo hazʼání góneʼ sáípres tsin neheeshjííʼ kin biiʼdę́ę́ʼ sikaadgo áyiilaago óola yikʼíístiʼ índa bikáaʼjįʼ tsin páam áádóó béésh daʼahólzhaʼí bikʼi naaskʼęęʼgo áyiilaa.
6 Áádóó kin éí tsé daʼílíinii yee nizhónígo neizhchʼąąʼ. Parvéíyimdę́ę́ʼ óola choozʼįįd.
7 Áko kin biiʼ sohodizin éí áah sitáán áádóó dáádadilkał bá nidaazʼáhígíí áádóó biyiʼdóó daneelkálígíí índa dáádadilkałígíí óola yikʼíístiʼ, áko biyiʼdóó daneelkálígíí yikʼijįʼ diyingo naalʼaʼí chérab wolyéii bee bikʼi nidaʼashkʼaazhgo áyiilaa.
8 Áádóó tsʼídá aláahgo hodiyingo hazʼánígíí éí nááseeʼgo kin naaniigo tʼáá bił aheeníłtso, áko éí tádiin ké silá bíighah áníłtso índa naaniigo tádiin ké silá áníłtéél. Hastą́ądi neeznádiin óola tálent dah adiidlohígíí bíighahgo yikʼíístiʼ.
9 Ił adaalkaałí éí óola shékel wolyéii ashdladiin bíighahgo dah hidédloʼ. Áádóó adeídi dahooghanígíí éí biiʼdę́ę́ʼ óola bikʼídaastiʼgo áyiilaa.
10 Áádóó kin tsʼídá aláahgo hodiyingo hazʼání góneʼ éí chérabim naaki beʼelyaago áyiilaago óola yikʼíístiʼ.
11 Áko chérabim bitʼaʼ tʼáá ahótąʼgo tádiin ké silá áníłnééz, łaʼ chérab bitʼaʼ łahjí tsostsʼidóó nááʼáłnííʼ ké silá éí kin neelkálíjįʼ biníʼá. Áádóó łahjígo bitʼaʼígíí ałdóʼ tsostsʼidóó nááʼáłnííʼ ké silá éí łahjí chérab bitʼaʼígíí bił ahidiiʼá.
12 Áádóó náánáłahjí chérab bitʼaʼígíí tsostsʼidóó nááʼáłnííʼ ké silá éí łaʼ kin neelkálígíí biníʼá áádóó łahjíígíí chérab bitʼaʼ bił ahidiiʼá.
13 Díí chérabim bitʼaʼígíí tʼáá dı̨́įʼgo tádiin ké silá áníłnééz. Áko bikeeʼ yee sizı̨́įgo ahinílʼı̨́.
14 Áádóó ataʼnaníbaalígíí éí yá nahalingo dootłʼizhígíí áádóó tsídídééh nahalingo łichíʼígíí índa łichxíʼígíí éí áłtsʼóózígo yisdizígíí bee naʼatʼą́hí łigaii ditsʼidgo ályaii bikʼijįʼ diyingo naalʼaʼí chérabim wolyéii danízı̨́įgo bee nidaashchʼąąʼgo áyiilaa.
Kin biiʼ sohodizin biiʼ Háíram naashnish (1Kgs. 7:15-51)
15 Índa kin biiʼ sohodizin bidááhdóó ałdóʼ naakigo ííʼáa dooígíí ashdladiindóó baʼaan naakidóó nááʼáłníiʼgo ké silá áníłnéezgo éí bílátahdi tʼáá ałʼąą dah sinilígíí éí tsostsʼidóó nááʼáłnííʼ ké silá áníłtso.
16 Áádóó béésh daʼahólzhaʼí áyiilaaígíí éí ííʼáhígíí bílátah dah sinilígíí yąąh niinínil, áádóó pámgrenit wolyéii neeznádiingo beʼelyaii áyiilaago béésh daʼahólzhaʼí yąąh dah deiznil.
17 Áko kin biiʼ sohodizin bichʼéédą́ąʼgi nishʼnáájígo áádóó nishtłʼajígo ííʼáhígíí áyiilaa; nishʼnáájígoígíí éí Jéíkin yee yiyíízhiʼ áádóó nishtłʼajígoígíí éí Bóʼaz yee yiyíízhiʼ.
