2 Chronicles 30:1-27
30 Heziikáíyah éí Ízrel dineʼé áádóó Júdah dineʼé tʼáá ałtso yichʼįʼ iʼiisʼaʼ áádóó Íífreiyim dineʼé índa Manáseh dineʼé yichʼįʼ naaltsoos ádayiilaa; éí Jerúsalem kin haalʼáagi Bóhólníihii bikin biiʼ sohodizinjįʼ dadookahgo Ízrel biDiyin God Bóhólníihii bichʼįʼ atisʼadeesdzá bee bééhániihii ádeidoolííł yiniyé nihidookah.
2 Jó, aláahgo naatʼáanii áádóó naatʼáanii danilíinii índa Jerúsalemgi áłah ílínígíí tʼáá ałtso naaki nídízííd binih atisʼadeesdzá bee bééhániihii náʼádleeh doo biniyé yił yaa nídaastʼįįdgo yee nidahazʼą́.
3 Háálá tʼáá baa náhwiilzhíísh góneʼ baa nizhdookahígíí doo bohónéedzą́ą da, háálá náádaʼiiłniihii tʼah doo hózhǫ́ ádadildéeh da índa Jerúsalemgi diné tʼah doo ahíikáah da.
4 Áko aláahgo naatʼáanii áádóó diné áłah silı̨́ʼígíí tʼáá ałtso bił yáʼádaatʼééh.
5 Kótʼéego bee hazʼáanii hadeidiilaago yaa nidahasneʼgo Ízrel kéyahgi tʼáá átʼéé nítʼééʼ, tʼáá Bíyer-shííba kin shijaaʼdóó Dan kin haalʼáajįʼ dineʼé Jerúsalemgi Ízrel biDiyin God Bóhólníihii bichʼįʼ atisʼadeesdzá bee bééhániihii ádazhdoolííł biniyé, háálá tʼáá bee akʼeʼashchínígi átʼéego doo ádeilééhgóó tʼáá íiyisí nízaad nihoolzhiizh.
6 Áko aláahgo naatʼáanii índa naatʼáanii danilíinii bitsʼą́ą́dóó éí Ízrel dineʼé índa Júdah dineʼé tʼáá ałtso dabitahgóó aláahgo naatʼáanii tʼáá yee haadzíʼígíí bikʼehgo naaltsoos eejaaʼ, kóníigo, Ízrel dineʼé nohłíinii, Éíbraham, Áízak índa Ízrel biDiyin God Bóhólníihii bichʼįʼ dah nídahidoohkááh, áko Asíriya dineʼé aláahgo binanitʼaʼí danilíinii bitsʼąą haohkaigo daahdziihígíí nihaa ánááhályą́ą doo.
7 Danihizhéʼé yę́ę índa danihikʼisóó yę́ę éí dabizhéʼé biDiyin God Bóhólníihii yóóʼadeideezʼánígi átʼéego tʼáadoo ákódanohtʼéhí. Áko éí daahʼı̨́įgo chohooʼı̨́ ádinjįʼ ninádahodiizʼą́.
8 Kʼad danihizhéʼé yę́ę ádaatʼéé nítʼéʼígi átʼéego kʼad tʼáadoo nidasoołteeʼí, nidi Bóhólníihii baa ádadinohtʼaahgo bikin biiʼ sohodizin éí hoolʼáágóó yiyíísı̨́ʼíjįʼ yah oohkááh áádóó nihiDiyin God Bóhólníihii bá nidaałʼaʼ, áko tʼóó báhádzidgo nihichʼįʼ báhóóchįįdígíí nihitsʼą́ąjįʼ nídoodleeł.
9 Bóhólníihii bichʼįʼ dah nídahidoohkai ládą́ą́ʼ, danihikʼisóó índa nihadaʼáłchíní éí dabisnáanii baa aʼááh dadínóozįįł, áko díí kéyah yiih nídooʼnééł. Háálá Bóhólníihii nihiDiyin God éí joobaʼii áádóó aa aʼááh nízinii nilı̨́; bichʼįʼ dah nídahidoohkaigo doo nihitsʼą́ąjįʼ hayiyííʼı̨́įʼ da doo.
10 Áko naaltsoos nideijaahígíí éí Íífreiyim áádóó Manáseh kéyahgóó kin hadaasʼáii bitahgóó tʼáá Zébyulan kéyahjįʼ ádaalyaa, nidi dineʼé éí tʼóó yaa daadlohgo índa yá nidahałtʼiʼ nítʼééʼ.
11 Ákondi Ásher dineʼé áádóó Manáseh dineʼé índa Zébyulan dineʼé éí łaʼ aʼohgo ádaʼdiilyaago Jerúsalem kin haalʼáajįʼ neheeskai.
12 Áádóó Diyin God éí Júdah dineʼé bitahgóó tʼáá łaʼ bijéí yee tsídeideeskéezgo áyiilaa, áko aláahgo naatʼáanii índa naatʼáanii danilíinii yichʼįʼ yee haadzíʼígíí Bóhólníihii bizaad kʼehgo ádaadzaa.
13 Áko naaki nídízííd binih dííkʼǫsh tʼáágééd bááh ályaii hodílzingo áłah náʼádleeh yaa nidookah biniyé diné tʼóó ahayóí Jerúsalem kin haalʼáagi neheeskai; tʼáá íiyisí tʼóó ahayóí áłah azlı̨́ı̨́ʼ.
14 Áádóó dadeeshnishgo Jerúsalemgi bikááʼ náádaʼiiniihí áádóó tsin bijeeh dilidgo łikání halchinii bikááʼ náádaʼiiniihí tʼáá átʼé chʼídayiizhjaaʼgo Kídran tó nílíní yiih dayiiskaad.
15 Ákohgo naaki nídízííd binih dı̨́ı̨́ʼtsʼáadah yoołkááł góneʼ atisʼadeesdzá bee bééhániihii biniyé dibé yázhí nideistseed. Áko náádaʼiiłniihii índa Líívai dineʼé ádaa yádaniidzı̨́įʼgo diyingo atsʼáʼádadeestʼą́ áádóó didlidgo nááhániihii Bóhólníihii bikin biiʼ sohodizinjįʼ nidayiizhjaaʼ.
16 Áádóó Diyin God bitsʼą́ą́dóó diné nilíinii Mózes bibee hazʼáanii bikʼehgo náádaʼiiłniihii tʼáá nídeidzįįhídóó naazı̨́. Áko náádaʼiiłniihii éí Líívai dineʼé bílákʼeedóó dił nídeidiiką́ągo bikááʼ nááʼiiniihí yikʼídeistah.
17 Áłah ílínígíí bitahgi tʼóó ahayóí doo diyingo ádabiʼdiilyaa da; éí bąą Líívai dineʼé bídahólníihgo diné doo bidadíídeeʼii bá éí Bóhólníihii bichʼįʼ dadiyingo ádazhdoolííł biniyé atisʼadeesdzá bee bééhániihii biniyé dibé yázhí nideistseed.
18 Háálá diné tʼóó ahayóí, Íífreiyim dineʼé índa Manáseh dineʼé, Ísakar dineʼé índa Zébyulan dineʼé tʼáadoo ádaʼdooldeeʼ da, áko azhą́ doo bee hazʼą́ą da, nidi atisʼadeesdzá bee bééhániihiigi atah daʼííyą́ą́ʼ. Nidi Heziikáíyah há sodoolzingo ání, Bóhólníihii joobaʼii éí tʼáá ádzíłtso habąąhági átʼéii há yóóʼiididooʼááł;
19 éí tʼáá háiida dahajéí bee Diyin God, tʼáá éí dahazhéʼé yę́ę biBóhólníihii Diyin God hádajitʼı̨́įgo hashtʼéʼ ádazhdiilyaaígíí, azhą́ kin biiʼ sohodizin bibee hazʼáanii bikʼehgo doo hodadíídeeʼ da nítʼééʼ, nidi há yóóʼiididooʼááł.
20 Áko Bóhólníihii éí Heziikáíyah yidiiztsʼą́ąʼgo diné nídayííłdzííʼ.
21 Áádóó Ízrel dineʼé Jerúsalem kin haalʼáagi nidaakaígíí tsostsʼid jı̨́įjįʼ dííkʼǫsh tʼáágééd bááh ályaii hodílzingo áłah nilı̨́įgo ayóó átʼéego bił dahózhǫ́ǫgo yaa naaskai. Áko Líívai dineʼé índa náádaʼiiłniihii tʼáá ákwíí jı̨́ Bóhólníihii yaa dahaniihgo índa dahataałgo sin yee nidaanéii ayóó íitsʼaʼgo yee Bóhólníihii yaa dahaniih.
22 Áko Heziikáíyah éí Líívai dineʼé tʼáá ałtso haʼahóní yee yichʼįʼ haadzííʼ; éí yáʼátʼéehgo Bóhólníihii binaanish* yikʼidaʼdiitįįhgo yindaashnish. Áko dineʼé éí tsostsʼid yiską́ąjįʼ hodílzingo áłah azlı̨́įʼgo daʼííyą́ą́ʼ; hózhǫ́ǫ́jí nááhániihii náádayiisniiʼ, áádóó dabizhéʼé yę́ę biBóhólníihii Diyin God yichʼįʼ ádaa nidahasneʼ.
23 Áádóó áłah ílínígíí tʼáá ałtso nayikʼíyádaastiʼgo, Tsostsʼid yiską́ąjįʼ hodílzingo áłah náʼádleeh náádeidiilʼaał, dadííniid, áko bił dahózhǫ́ǫgo tsostsʼid yiską́ąjįʼ yaa nináánáskai.
24 Jó, Júdah dineʼé aláahgo binanitʼaʼí Heziikáíyah éí tʼááłáhídi mííl dóola índa dibé tsostsʼidi míilgo áádóó naatʼáanii danilíinii éí tʼááłáhídi mííl dóola índa dibé neeznáadi míilgo náádahidoonih biniyé áłah ílínígíí yaa deineeskaad. Áko náádaʼiiłniihii tʼóó ahayóí diyingo atsʼáʼádadeestʼą́.
25 Júdah dineʼé áłah nilínígíí tʼáá ałtso áádóó náádaʼiiłniihii índa Líívai dineʼé bił áádóó Ízrel dineʼé neheeskaigo áłah nilínígíí tʼáá ałtso índa déʼéyóní Ízrel kéyahdę́ę́ʼ chʼídahaaznánígíí éí Júdah kéyahgi kéédahatʼínígíí biłgo hoł nidahoozhǫǫh.
26 Áko Jerúsalem kin haalʼáagi diné tʼáá ałtso bił dahózhǫ́; Ízrel dineʼé aláahgo binanitʼaʼí David yę́ę biyeʼ Sálaman bił hoolzhish yę́ędą́ą́ʼ Jerúsalemgi tʼah doo ákótʼéego hooʼaah da nítʼééʼ.
27 Ákohgo náádaʼiiłniihii Líívai dineʼé danilíinii diné yá sodadoolzin, áko biinééʼ dadiistsʼą́ą́ʼ áádóó sodadoolzingo bee Diyin God diyingo kééhatʼı̨́ı̨́góó adahosiistsʼą́ą́ʼ.
Footnotes
^ Hííbrew kʼehjí kóní.
