2 Chronicles 31:1-21
31 Kʼad díí tʼáá átʼé ałtso bíighah daʼazlı̨́įʼgo Ízrel dineʼé tʼáá ałtso ákwii nidaakaígíí éí Júdah kéyahgi kin hadaasʼáágóó adahaaskaigo edaʼalyaii dayiiztiʼgo deidííséí áádóó asdzání bidaʼalyaii dayiisneʼ áádóó dah daaskʼid bighą́ąʼdi ádaalyaaígíí adadayiistłʼííd índa Júdah kéyahgóó, Bénjamin kéyahgóó, Íífreiyim kéyahgóó índa Manáseh kéyahgóó tʼáá átʼé bikááʼ náádaʼiiniihí ałtso ádeisdįįdjįʼ adadayiistłʼííd. Ákohgo Ízrel dineʼé tʼááłáʼí nítínígo hwee dahólónígíí hakin hadaasʼáajįʼ baa ninádajiiskai.
Heziikáíyah éí náádaʼiiłniihii áádóó Líívai dineʼé dayíłkiin dooígíí yeidiníʼą́
2 Áko Heziikáíyah éí náádaʼiiłniihii áádóó Líívai dineʼé ałʼąą dah naazhjaaʼgo nihwiiznilgo diné tʼááłáʼí nítínígo nidaalʼaʼígíí bikʼehgo náádaʼiiłniihii áádóó Líívai dineʼé éí didlidgo nááhániihii índa hózhǫ́ǫ́jí nááhániihii náádajiiłniihgo nidajilʼaʼ doo áádóó Bóhólníihii bidineʼé dabiníbaal naaznilígi dáńʼdaʼditı̨́ı̨́hgóó ahééh daznízin doo áádóó baa dahojiniih doo biniyé niyiiznil
3 áádóó aláahgo naatʼáanii tʼáá bí bee hólónígíí łaʼ niidiyiiʼaahígíí ałdóʼ yee haadzíiʼgo Bóhólníihii bibee hazʼáanii biiʼ bee akʼeʼashchínígíí bikʼehgo abínígo áádóó eʼeʼáahgo didlidgo náádahaniihii áádóó háádaʼayı̨́ı̨́h jı̨́ı̨́ góneʼ áádóó dah néitı̨́įhgo índa hodílzingo áłah nídaʼadleehígíí biniyé didlidgo náádahaniihii dooleełgo niidiyiizʼą́.
4 Nááʼáłdóʼ Jerúsalem kin haalʼáagi kéédahatʼínígíí éí náádaʼiiłniihii áádóó Líívai dineʼé dayíłkiin dooígíí baa dahidohʼaah, yidííniid, áko hadaʼólníigo Bóhólníihii yee há hasʼáanii bikʼeh ádajítʼée doo.
5 Áko bee haʼoodzíʼígíí tʼáá ałtsogóó baa dahodeezneʼgo tʼáá áko Ízrel dineʼé éí tłʼoh naadą́ą́ʼ áádóó wáin ániidíii áádóó áliv bineestʼąʼ bikʼah, áádóó tsésʼná bitłʼizh índa dáʼákʼehdę́ę́ʼ áłtsé daneestʼánígíí tʼáá ałtso nidayiizhjaaʼ, áko neeznáá daníjaaʼígíí éí tʼááłáʼígo shijaaʼ nihiditʼaahígíí átʼéego tʼáá ałtsoní tʼóó ahayóí nidayiizhjaaʼ.
6 Ízrel dineʼé índa Júdah dineʼé éí Júdah kéyahgi kin hadaasʼáágóó kéédahatʼínígíí ałdóʼ béégashii áádóó dibé neeznáá naazı̨́įgo tʼááłáʼí sizı̨́įgo nihiditʼaahígíí nidayiizhʼeezh áádóó dabiDiyin God Bóhólníihii bichʼįʼ diyingo atsʼádadeestʼánígíí nidayiizhjaaʼgo yáádaaʼáago ádayiilaa.
7 Áko tááʼ nídeezid binih yáádayiitséehgo yaa nídiikaígíí tsostsʼid nídeezidjįʼ ałtso yáádayiitsih.
8 Áádóó Heziikáíyah índa naatʼáanii danilíinii yíkaigo yáádaaʼáhígíí dayiiłtsą́ągo Bóhólníihii yaa dahaniih áádóó bidineʼé Ízrel yikʼidajisdliʼ.
9 Ákohgo Heziikáíyah éí náádaʼiiłniihii índa Líívai dineʼé yáádaaʼáhígíí yíndayídééłkid.
10 Áko Zéídak bitsʼą́ą́dóó náás ahoolchíiłii łaʼ aláahgo nááʼiiłniihii Azaráíyah áhodííniidgo ání, Bóhólníihii bikin biiʼ sohodizingi nidahiditʼaahígíí diné éí nidayiijááhdóó wóshdę́ę́ʼ ląʼí daʼiidą́ą́ʼ, áko tʼóó ahayóí chʼídahineesnaʼ; Bóhólníihii bidineʼé yikʼijisdliʼgo, éí bąą díí chʼídahineesnaʼgo ayóó átʼé yáádaalkʼidígíí átʼé.
11 Ákohgo Bóhólníihii bikin biiʼ sohodizin góneʼ dahooghan hashtʼedadoolníiłgo Heziikáíyah yee haadzíʼígíí éí hashtʼedaalyaa.
12 Áádóó nidahideestʼáanii índa neeznáá daníjaaʼígíí éí tʼááłáʼígo shijaaʼ bíighahgo ninádahiditʼaahígíí áádóó diyingo atsʼádahideestʼánígíí bee hadaʼahódlíigo nidajiijááh nítʼééʼ. Éí Konanáíyah, Líívai diné nilíinii bee bóhólnííh áádóó bikʼis Shímiyai hakééʼ góneʼ sizı̨́.
13 Áko aláahgo naatʼáanii Heziikáíyah índa Azaráíyah éí Bóhólníihii bikin biiʼ sohodizingi bee bóhólníhígíí yee haadzíiʼii bikʼehgo Jiiháíyel, Azazáíyah, Néíhath, Éísahel, Jériimath, Józabad, Iiláíyel, Ismakáíyah, Méíhath índa Biinéíyah éí aląąjįʼ naazíinii danilı̨́įgo Konanáíyah áádóó bikʼis Shímiyai yiyaadóó hadaʼídéesʼı̨́ı̨́ʼ.
14 Áádóó Líívai diné Ímnah biyeʼ Kórii, haʼaʼaahjígo yah eʼetiin yaa áhályánígíí éí Bóhólníihii bikin biiʼ sohodizingi Diyin God bichʼįʼ tʼáá bí ádeinízingo nááhániihii bá baa áhojilyą́; éí Bóhólníihii bichʼįʼ náádahaniihii áádóó aláahgo diyingo náádahaniihii bá ninádítʼááh.
15 Áko hayaadóó nidaalʼaʼ éí Ííden, Mínyamin, Jéshuwa, Shiimáíyah, Amaráíyah índa Shekanáíyah éí náádaʼiiłniihii bikin hadaasʼáágóó dahakʼisóó atisgo nidaalʼaʼídóó tʼáá ádaałtsʼíísíjįʼ nidi, dayíłkiin dooígíí bikʼeh nínilgo bitaa nídajiʼnih.
16 Dinéhígíí tʼáá ahoolchíłígíí bikʼehgo tádiindóó dego béédááhaígíí tʼáá háiida Bóhólníihii bikin biiʼ sohodizin góneʼ yah ajiikáhígíí éí tʼáá ákwíí jı̨́ bindaanishígíí bikʼehgo tʼáá daʼníłʼąą baa nídaʼajih nítʼééʼ.
17 Náádaʼiiłniihii éí dabizhéʼé yę́ę bitsʼą́ą́dóó náás ahoolchííł bikʼehgo áádóó Líívai dineʼé naadiindóó dego béédááhaígíí éí tʼáá ałkééʼ daníjaaʼgo bindaanishígíí bikʼehgo dayíłkiin dooígíí baa nídaajih nítʼééʼ.
18 Dah oonééł bitahgóó tʼáá ałtso dinéhígíí ahoolchííł bikʼehgo, hadaʼáłchíní, hweʼasdzą́ą́, hayeʼké, hatsiʼké tʼáá hó daóltąʼgo dayíłkiin dooígíí bitaa nídaʼajih nítʼééʼ, háálá hondaanish ádadzósin doo biniyé diyingo atsʼádadeestʼą́.
19 Áádóó ałdóʼ Éran baʼáłchíní náás ahoolchíiłii náádaʼiiłniihii éí kin hadaasʼáago dah nídadziltsogóó kéédahatʼínígíí łaʼ diné dabiʼdééjiʼígíí éí náádaʼiiłniihii badaʼáłchíní bitahdę́ę́ʼ dinéhígíí áádóó Líívai dineʼé dayééltaʼígíí bikʼehgo tʼáá átʼé chʼiyáán bitaa nídajijih nítʼééʼ.
20 Kótʼéego Heziikáíyah éí Júdah kéyahgóó tʼáá átʼé yáʼádaatʼéehii áádóó tʼáá ákogi ádaatʼéii índa tʼáá aaníí ádaatʼéii biBóhólníihii Diyin God yinááł yaa naayá.
21 Áko Bóhólníihii bikin biiʼ sohodizin góneʼ honaanishígíí baa nízhdiidáahgo áádóó bee hazʼáanii índa bikʼeh óʼooʼníiłii éí hajéí tʼáá átʼé bee Diyin God hájítʼı̨́įgo baa nijiyá áádóó náás jideeyá.
