2 Chronicles 32:1-33
32 Kódahóótʼįįdóó bikʼijįʼ Heziikáíyah éí baʼahódlíigo Bóhólníihii yá naalʼaʼgo Asíriya dineʼé aláahgo binanitʼaʼí Senákerib éí Júdah kéyahgi nínáago, Kin hadaasʼáii ditą́ągo binídaʼastłʼinígíí yisnááh ádeeshłííł, nízingo yináshzhiizh.
2 Áko Heziikáíyah haa ákoniizı̨́įʼgo Senákerib éí Jerúsalem kin haalʼá bichʼįʼ nideeshbah jinízingo jiníyáá lá;
3 naatʼáanii danilíinii áádóó diné ayóó ádaatʼéii há nidaalʼaʼí danilíinii yił nayikʼíyádaastiʼgo kin haalʼáhídóó tłʼóoʼdi tó hadaazlínígíí yidádaʼdeestłʼingo háká ííjééʼ.
4 Áko diné tʼóó ahayóí áłah silı̨́įʼgo kéyah bikááʼgóó tó hadaazlínígíí áádóó tó danílínígíí tʼáá átʼé yidádaʼdeestłʼingo ádaaní, Haʼátʼíísh biniyé Asíriya dineʼé aláahgo binanitʼaʼí danilíinii yíkaigo tó tʼóó ahayóí yikʼídahakáah dooleeł.
5 Áádóó ałdóʼ hadziilgo ázhdiilyaago, tsé bee ahééʼítłʼin nideiniiskaadii tʼáá átʼé hashtʼééjiidlaa, áádóó éí bikááʼdóó yadaʼiitłʼingo bikááʼdóó haʼalzídí ájiilaa, áádóó tłʼóóʼdę́ę́ʼ tsé łaʼ ahéénínáánástłʼin, índa David bikin haalʼáagi Míllo hoolyéii hashtʼééjiidlaa áádóó bee naʼabaahii índa naagé tʼóó ahayóigo ádajiilaa.
6 Índa siláo yinanitʼaʼí danilínígíí éí dineʼé yá niinínilgo kin haalʼáii yah eʼetiinígi atiinjįʼ diné haa áłah ádayiilaago hadaʼólníi doogo bichʼįʼ hadzoodzíiʼgo ájíní,
7 Danihidziil áádóó hadaʼíínółní; Asíriya dineʼé aláahgo binanitʼaʼí índa siláo tʼóó ahayóí bił dah yikahígíí tʼáá ałtso tʼáadoo béédaałdzidí índa tʼáadoo nitsidaahkaaí, háálá nihí nihił hólónígíí éí áájí bił hólónígíí yiláahgo ayóó ánéelą́ą́ʼ.
8 Áájí éí atsʼíís tʼéí hoł hólǫ́, nidi nihí éí nihiDiyin God Bóhólníihii nihíká adoolwołgo anaaʼgi nihá nidoobah. Áko diné éí Júdah dineʼé aláahgo binanitʼaʼí Heziikáíyah saad hachʼįʼ yee haadzíʼígíí yee hadaʼoosnííʼ.
9 Áádóó bikʼijįʼ Asíriya dineʼé aláahgo binanitʼaʼí Senákerib éí bisiláo tʼáá ałtso yił tʼahdii Léíkish kin haalʼáii yináshzhiizhgo, Jerúsalem kin haalʼáágóó Júdah dineʼé aláahgo binanitʼaʼí Heziikáíyah áádóó Jerúsalemgi Júdah dineʼé tʼáá ałtso yichʼįʼ bá nidaalʼaʼí ayííłʼaʼgo ání,
10 Asíriya dineʼé aláahgo binanitʼaʼí Senákerib kóní, Haʼátʼíísh badaʼíínóhłíigo Jerúsalemgi anaʼí nihináshzhiizhgo nahísóotą́?
11 Daʼ doósh Heziikáíyah nihíniʼ áháléehgo tʼóó dichin índa dibááʼ nihidooghą́ą́ł biih ádadiʼdoohnił yiniyé áníi da, NihiDiyin God Bóhólníihii éí Asíriya dineʼé aláahgo binanitʼaʼí bitsʼą́ą́dóó yisdánihidoonił?
12 Díí Heziikáíyah éí Bóhólníihii bá ninádahałaah doo biniyé wódah nahazʼą́ągo ádaalyaaígíí índa bibikááʼ nááʼiiniihí nahjįʼ kódayiilaa áádóó Júdah dineʼé índa Jerúsalem dineʼé, Tʼááłáʼí bikááʼ nááʼiiniihí bidááhdóó nidahohłá índa tsin bijeeh dilidgo łikání halchinii bikááʼ dadohłid, yidííniidgo ání yaʼ?
13 Daʼ shizhéʼé yę́ę áádóó shí náánáłaʼ kédaayahgóó ałʼąą dineʼé ádeiilʼįįdígíísh doo nihił béédahózin da? Éí kédaayahdóó ałʼąą dineʼéésh dabidiyinii tʼáá haʼátʼéegoda yídaneelʼą́ągo hakédaayah shílákʼeedóó háádayooʼnil?
14 Dashizhéʼé yę́ę éí ałʼąą dineʼé ałtso ádeisdįįdii dabidiyinii bitahdóó háidíígíishąʼ yíneelʼą́ągo bidineʼé shitsʼą́ą́dóó yisdáyíínil? Áko nihiDiyin God daʼ éísh yíneelʼą́ągo shiyaa háánihidooʼnił?
15 Éí bąą kʼad, tʼááká Heziikáíyah nihiʼdóleeh, doodaiiʼ díí yee nihíniʼ áhólééh lágo; tʼáadoo nidi dahwiinohdlání, háálá ałʼąą dineʼé índa bee ídahólníihii dabidiyinii doo łaʼ hadineʼé, shí, doodaiiʼ dashizhéʼé yę́ę nihiyaadóó hahodooniłii yíneelʼání da, áko nihiDiyin God nidi doo shiyaadóó háánihidooʼnił da.
16 Áko bá nidaalʼaʼí tʼóó yówehda Diyin God yikʼijįʼ índa Heziikáíyah yikʼijįʼ hadahaasdzííʼ.
17 Áádóó ałdóʼ Asíriya dineʼé aláahgo binanitʼaʼí naaltsoos áyiilaa; éí bikááʼ Ízrel dineʼé biBóhólníihii Diyin God tʼóó baaʼihgo yaa yáłtiʼ índa yikʼijįʼ yáłtiʼgo ání, Náádaałahgóó ałʼąą dineʼé dabidiyinii éí hodineʼé danilíinii tʼáadoo shigháádahwiisnil da; ákótʼéego Heziikáíyah haDiyin God éí hodineʼé doo shiyaa hahizhdooʼish da.
18 Áádóó Jerúsalem kin haalʼáagi tsé ahénátłʼinígíí bikáaʼgi diné nidaakaígíí yił yééʼ ádahodoolíiłgo nídadooldzííł biniyé Jew dineʼé bizaad kʼehgo hadadeeshghaazh, áko kin haalʼáii dadiilnééł, danízin.
19 Áádóó nihokááʼ dineʼé bidiyin dabidiʼníinii diné ádayiilaii yikʼijįʼ hadahadziihígi átʼéego Jerúsalem kin haalʼáádóó Diyin God yikʼijįʼ hadahaasdzííʼ.
Bóhólníihii éí Heziikáíyah yisdáyííłtı̨́ (2Kgs. 19:1-37; Is. 37:1-38)
20 Áko díí biniinaa aláahgo naatʼáanii Heziikáíyah áádóó Éímaz biyeʼ éí Diyin God yá halneʼii Aizéíyah yił yáʼąąsh góde Diyin God yichʼįʼ yéego sodoolzin.
21 Áko Bóhólníihii éí diyingo naalʼaʼí yiníłʼaʼgo siláo ayóó ádaatʼéii dahayóii tʼáá ałtso áádóó diné nideiʼeeshii índa Asíriya dineʼé aláahgo binanitʼaʼí bisiláo yinanitʼaʼí danilíinii ałtso íísdįįd. Áko tʼóó haa yáhásingo hakéyahgóó anídzoodzá. Áádóó nítʼééʼ hadiyin bidiʼníinii bikin góneʼ yah ajííyáago ákwii tʼáá hó hayeʼké diltłish yee dahwiisxı̨́.
22 Kótʼéego Bóhólníihii éí Heziikáíyah áádóó Jerúsalemgi kéédahatʼínígíí éí Asíriya dineʼé aláahgo binanitʼaʼí índa hwedaʼanaʼí tʼáá ałtso bitsʼą́ąjįʼ yisdáhóónil, áko tʼáá ałtsodę́ęʼgo haa áhályą́ągo hooʼish nítʼééʼ.
23 Áádóó diné tʼóó ahayóí éí aa doolyéełii Jerúsalemjįʼ Bóhólníihii yichʼįʼ nidayiizhjaaʼ, índa Júdah dineʼé aláahgo binanitʼaʼí Heziikáíyah aa doolyééł daʼílínígíí yaa dayiizhjaaʼ. Kodóó lą́ą ałʼąą dineʼé tʼáá ałtso binááł ayóó ájítʼéego hodideeshzhiizh.
Heziikáíyah bitah honiigai (2Kgs. 20:1-11; Is. 38:1-22)
24 Éí yoołkááł yę́ędą́ą́ʼ Heziikáíyah bitah doo hóótsʼíídgóó biʼniitsą́, áádóó Bóhólníihii yichʼįʼ sodoolzin, áko bichʼįʼ haadzíiʼgo bee ééhózinii baidiníʼą́.
25 Nidi Heziikáíyah éí Bóhólníihii yee háká eelwodii tʼáadoo baa ahéésniizı̨́ı̨́ʼgóó hajéí bee ádaa hojisnihígíí biniinaa hó áádóó Júdah dineʼé índa Jerúsalem dineʼé tʼóó báhádzidgo bee atíʼélʼíinii hakʼijįʼ kóyiilaa.
26 Nidi Heziikáíyah hajéí biiʼ ádaa hojisnih yę́ę hó índa Jerúsalemgi kéédahatʼíinii bił aʼohgo ádazhʼdiilyaa, áko éí biniinaa Heziikáíyah bíyoołkááł yę́ędą́ą́ʼ Bóhólníihii yee atíʼéłʼíinii doo hakʼijįʼ kwííłʼı̨́ı̨́góó Heziikáíyah bíiníłką́.
Heziikáíyah éí Bábilandę́ę́ʼ baa íldeeʼ (2Kgs. 20:12-19; Is. 39:1-8)
27 Heziikáíyah tʼáá íiyisí astʼįįd áádóó ił yílįįd, áko yódí bá dahooghanígíí ádayiilaago éí biiʼgóó béésh łigaii áádóó óola áádóó tsé daʼílíinii áádóó spáis wolyéii áádóó naagé índa daʼílíinii ałtah ádaatʼéii ákǫ́ǫ́ yah ayiizyı̨́.
28 Áádóó tłʼoh naadą́ą́ʼ áádóó wáin índa áliv bineestʼąʼ bikʼah éí tʼóó ahayóí yileełgo yá kin biiʼ nooh nídaʼachíihii ádayiilaa índa alı̨́ı̨́ʼ ałtah ádaatʼéii tʼáá átʼé áádóó dibéda éí dabighan yá ádayiilaa.
29 Nááʼáłdóʼ kin hadaasʼáago ádá áyiilaa, áádóó dibé índa alı̨́ı̨́ʼ tʼóó ahayóí hainínil, háálá Diyin God éí yódí tʼóó ahayóí haidiníʼą́.
30 Áádóó díí Heziikáíyah ałdóʼ Gáíhan bideidę́ę́ʼ tó háálínígíí yidádiʼníłtłʼingo David yę́ę bikin haalʼáajįʼ eʼeʼaahdę́ęʼgo tó bá aníʼáago yah íílı̨́įgo áyiilaa. Áko Heziikáíyah yinaashnishígíí tʼáá átʼé yáʼátʼéehgo bá áánííł nítʼééʼ.
31 Áko Bábilan dineʼé binanitʼaʼí danilíinii bá nidaalʼaʼí éí kéyahgi ayóó ánóolningo ádahóótʼįįdígíí yíndaʼídídóołkił biniyé hachʼįʼ ayiisʼaʼgo Diyin God hwíidínóotah biniyé tʼáá ákǫ́ǫ́ nihoníłtı̨́, áko hajéí biiʼ bee nitsídzíkeesii tʼáá átʼé bił bééhodoozįįł.
Heziikáíyah daaztsą́ (2Kgs. 20:20,21)
32 Kʼad Heziikáíyah łahjįʼ yaa naayáhígíí áádóó yáʼátʼéehgo ádzaaígíí, jó, éí Éímaz biyeʼ éí Diyin God yá halneʼii Aizéíyah índa Júdah dineʼé áádóó Ízrel dineʼé binanitʼaʼí danilínígíí binaaltsoos bikʼinídaháasdzoh.
33 Áko Heziikáíyah éí dahazhéʼé yę́ę bitahjįʼ ajiiłhaazh, áádóó yóóʼádahoolaago David biyeʼké yę́ę bitsénídaʼootséél aláahgo wódahdiígi nidahastı̨́; dadziztsánígi Júdah dineʼé índa Jerúsalem kin haalʼáagi kéédahatʼínígíí tʼáá ałtso neheeskaigo bił dajíílįįd, áádóó hayeʼ Manáseh hatsáskʼehgi aláahgo nantʼá silı̨́ı̨́ʼ.
