2 Chronicles 33:1-25
33 Manáseh naakitsʼáadah binááhaigo aláahgo nantʼá silı̨́ı̨́ʼ, áko nantʼáago Jerúsalem kin haalʼáagi ashdladiindóó baʼaan ashdlaʼ nááhai.
2 Nidi Bóhólníihii éí Ízrel dineʼé bitahdóó ałʼąą dineʼé chʼíiniiskaadii éí doo daaldinii yaa naakai yę́ę bikʼehgo éí Bóhólníihii binááł doo yáʼáshóonii baa nijiyá.
3 Áko hazhéʼé Heziikáíyah yę́ę ninádahałaah doo biniyé wódah nahazʼą́ągo ádaalyaii nayiiztiʼígíí áńdajiidlaa áádóó bibikááʼ nááʼiiniihí Béíyalim bá áńdajiidlaa áádóó asdzání bidaʼalyaii áńdajiidlaa índa yótʼááh hiníláii tʼáá átʼé yichʼįʼ nahałáá nítʼééʼ.
4 Áádóó Bóhólníihii bikin biiʼ sohodizin góneʼ bikááʼ náádaʼiiniihí ádayiilaa éí kin Bóhólníihii yaa yááłtiʼii, Jerúsalem kin haalʼáagi shízhiʼ bee hójíigo ahoolʼáa doo.
5 Áko Bóhólníihii bikin biiʼ sohodizin tłʼóoʼjigo naakigo hazʼánígi yótʼááh hiníláii tʼáá ałtso bá bikááʼ náádaʼiiniihí ádayiilaa.
6 Índa Hínam biyeʼ bihonítsʼaaʼ hoolyéegi haʼáłchíní didlidgo náájiisniiʼ áádóó bee ééhózinii áádóó bee álílee ádaʼoołʼįįłii índa nidadilniihii choyoołʼı̨́įgo chʼı̨́įdii yábiiłtiʼii áádóó dadiłgąshii choyoołʼı̨́, áko tʼáá íiyisí doo yáʼádaashóonii éí Bóhólníihii yinááł yaa naagháago yee yáhóółchįįd.
7 Áádóó edaʼalyaii ájiilaa; éí edaʼalyaii ájiilaago Diyin God bikin biiʼ sohodizin góneʼ bijiisįʼ; Diyin God tʼáá bí bikin yaa yááłtiʼii David áádóó biyeʼ Sálaman yę́ę áyidííniid niʼ, Díí kin áádóó Jerúsalem kin haalʼáagi Ízrel dineʼé tʼáá ałtso binááł náhodiiʼą́ągo ákwii shízhiʼ bee hójí áshłaago ahóyéelʼáa dooleeł.
8 Áádóó Ízrel dineʼé bikéyah doo bitsʼą́ąjįʼ kónááhodeeshdlíił da; éí danizhéʼé yę́ę bee bá nihoníʼą́; bee hazʼáanii tʼáá átʼé áádóó bee nihoyíʼáanii índa bikʼeh hoogáałii bikʼehgo Mózes binahjįʼ hachʼįʼ bee haasdzíiʼii tʼáá átʼé hazhóʼó baa dahojíyą́ągo dahojíłʼı̨́ı̨́ ládą́ą́ʼ.
9 Áko Bóhólníihii éí Ízrel dineʼé bitsʼąą ałʼąą dineʼé íísdįįdígíí ádajíítʼįįdii tʼah biláhígo Manáseh éí Júdah dineʼé áádóó Jerúsalemgi kéédahatʼínígíí doo yáʼádaashóonii baa nijikai áhósin.
10 Bóhólníihii éí Manáseh áádóó hadineʼé yichʼįʼ haadzííʼ, nidi doo tʼáá kʼad daʼdiiztsʼą́ąʼ da.
11 Éí bąą Bóhólníihii éí Asíriya dineʼé aláahgo binanitʼaʼí bisiláo yinanitʼaʼí danilíinii hachʼįʼ yiʼníłniiʼgo béésh adishahí yee Manáseh dayiiłtsood áádóó béésh daʼahólzhaʼí yee yidaʼaztłʼǫ́ǫgo Bábilandi yił daaskai.
12 Ákohgo tiʼhojooníihgo Bóhólníihii haDiyin God níjookąąh áádóó tʼáá íiyisí aʼohgo ízhʼdiilyaago dahazhéʼé yę́ę biDiyin God honíłʼı̨́.
13 Áádóó bichʼįʼ sozdoolzingo náhoniizı̨́ı̨́ʼ, áko níjookąąhgo háidiiztsʼą́ą́ʼ áádóó Jerúsalem kin haalʼáajįʼ habee óhólníihii bichʼįʼ hoł ninátʼáázh. Ákohgo Manáseh éí Bóhólníihii tʼéí Diyin God nilı̨́įgo hoł bééhoozin.
14 Ákódaadzaadóó bikʼijįʼ David bikin haalʼá ditą́ągo binaagóó ahééʼítłʼinígíí éí Gáíhan tó háálíní eʼeʼaah bichʼijí yíldzisídóó łóóʼ nidahaniihgi dáńʼdítı̨́hí hoolyéejįʼ índa Ófel hoolyéii bikʼi dinaago tʼáá íiyisí wódahgo ahééʼítłʼingo áyiilaa, áádóó Júdah kéyahgi kin hadaasʼáii ditą́ągo binídaʼastłʼingóó siláo bindanitʼaʼí ałdóʼ niyiiznil.
15 Áádóó Bóhólníihii bikin biiʼ sohodizin siʼą́ą́dóó diyin dabidiʼníinii áádóó eʼelyaii chʼíyiizhjaaʼ. Índa dziłgi Bóhólníihii bikin biiʼ sohodizin siʼánígi áádóó Jerúsalemgi bikááʼ náádaʼiiniihí ádayiilaii tʼáá átʼé kin haalʼáádóó chʼíyiizyı̨́.
16 Áádóó ałdóʼ Bóhólníihii bibikááʼ nááʼiiniihí hashtʼééyiidlaa; ákwii hózhǫ́ǫ́jí nááhániihii índa ahééh hasinjí nááhániihii nááyiisniiʼ, áádóó Júdah dineʼé yichʼįʼ haadzíiʼgo ání, Ízrel dineʼé biBóhólníihii Diyin God bichʼįʼ nidahohłá.
17 Azhą́ ákótʼée nidi, dah daaskʼid bighą́ąʼdi ádaalyaaígóó diné tʼahdii náádaʼiiłniihgo biDiyin God Bóhólníihii tʼéiyá yichʼįʼ náádaʼiisniiʼ.
18 Kʼad Manáseh łahjįʼ yaa naayáii áádóó biDiyin God yichʼįʼ sodoolzin yę́ę índa áhodooníiłii yaa dahalneʼii éí Ízrel dineʼé biBóhólníihii Diyin God bízhiʼ hachʼįʼ yee hahaasdzíiʼii, jó, éí Ízrel dineʼé aláahgo binanitʼaʼí danilíinii binaaltsoos bikʼinídaháasdzoh.
19 Áádóó hasodizin yę́ę índa Diyin God hanáʼookąąh há yiniizı̨́ʼígíí áádóó ádił niʼjiisíʼígíí tʼáá átʼé áádóó doo ákǫ́ǫ́ ájíítʼįįdii áádóó ninádahałaah doo biniyé wódah nahazʼą́ągo ádaalyaaígíí áádóó asdzání bidaʼalyaii índa edaʼalyaii tʼah doo aʼohgo ízhʼdílnééh yę́ędą́ą́ʼ niyiiznilii, díí baa nijiyáii; jó, éí áhodooníiłii yaa dahalneʼii binaaltsoos bikʼinídaháasdzoh.
20 Áko Manáseh dabizhéʼé yę́ę bitahjįʼ ajiiłhaazh, áádóó tʼáá hó haghangi yóóʼádahoolaa, áko hayeʼ Éíman hatsáskʼehgi aláahgo nantʼá silı̨́ı̨́ʼ.
Éíman nantʼáá nítʼééʼ (2Kgs. 21:19-26)
21 Éíman éí naadiin naaki binááhaigo aláahgo nantʼá silı̨́ı̨́ʼ, nantʼáago Jerúsalem kin haalʼáagi naaki nááhai.
22 Áádóó hazhéʼé Manáseh yę́ę áátʼįįdígi átʼéego Bóhólníihii binááł doo yáʼádaashóonii baa nijiyá; jó, Éíman éí hazhéʼé Manáseh yę́ę edaʼalyaii hadahaashkʼaazhgo ádayiilaa yę́ę éí tʼáá átʼé bichʼįʼ nínááʼjiiłnihgo nahojiłáá nítʼééʼ.
23 Índa hazhéʼé Manáseh yę́ę aʼohgo íʼdiilyaaígi átʼéego hó tʼáadoo Bóhólníihii binááł aʼohgo ízhʼdiilyaa da, nidi Éíman éí tʼáá íiyisí tʼóó yówehda bee hazʼáanii yiyiiztiʼ.
24 Áko há nidaalʼaʼí hodahodeezʼą́ągo tʼáá hó haghan góneʼ dahwiisxı̨́.
25 Áko kéyahdóó kéédahatʼínígíí éí aláahgo naatʼáanii Éíman yindahazʼánígíí ałtso nideistseed, ákohgo hayeʼ Josáíyah hatsáskʼehgi aláahgo naatʼáanii ádayiilaa.
