2 Chronicles 34:1-33
34 Josáíyah tseebíí binááhaigo nantʼá silı̨́ı̨́ʼ, áádóó nantʼáago Jerúsalem kin haalʼáagi tádiindóó baʼaan tʼááłáʼí nááhai.
2 Tʼáá ákogi átʼéego ájooníiłgo Bóhólníihii binááł nijiyá; hazhéʼé David yę́ę naayáhígi átʼéego yigáałgo nishʼnáájí, doodaiiʼ nishtłʼajígo tʼáadoo dah diiyáa da.
Josáíyah hashtʼééhoodlaa (2Kgs. 23:4-20)
3 Áko aláahgo naatʼáanii jílı̨́įgo tseebíí náhááh góneʼ, tʼah ániid nijigháago hazhéʼé David yę́ę biDiyin God hájítʼı̨́įgo hodideeshzhiizh, áádóó naakitsʼáadah yihah góneʼ Júdah kéyahgi índa Jerúsalem kin haalʼáagi ninádahałaah doo biniyé wódah nahazʼą́ągo ádaalyaaígíí áádóó asdzání bidaʼalyaii índa hadahaashkʼaazhgo edaʼalyaii áádóó dadoolyı̨́įʼgo edaʼalyaii ádaalyaaígíí nahjįʼ kódeileʼgo yaa nídiidzá.
4 Áko tʼáá hanááł diyin dabidiʼníinii Béíyalim bibikááʼ náádaʼiiniihí nidayiiztiʼ áádóó wódahdi edaʼalyaii naaznilii dayíítséél áádóó asdzání bidaʼalyaii áádóó hadahaashkʼaazhgo edaʼalyaii índa edaʼalyaii doolyı̨́įʼgo ádaalyaa yę́ę nidayiisneʼgo dizéigo edaʼalyaii bichʼįʼ náádaʼjiiłniih yę́ę dahajishchááʼ bikááʼgóó nideisas.
5 Índa bikááʼ náádaʼiiniihí yikáaʼjįʼ náádaʼiiłniihii yę́ę dabitsʼin deidííłid, áko Júdah kéyahgóó áádóó Jerúsalem kin haalʼáagi hashtʼééhojiidlaa.
6 Tʼáá ákótʼéego ałdóʼ Manáseh dineʼé áádóó Íífreiyim dineʼé índa Símiyan dineʼé bikédaayahgi bikin hadaasʼáágóó tʼáá Náftalai dineʼé bikéyahjįʼ nidi hashtʼééhojiidlaa.
7 Áko bikááʼ nááʼiiniihí áádóó asdzání bidaʼalyaii índa edaʼalyaii yiyíítseedgo dibahgo áyiilaa índa Ízrel dineʼé bikéyahgóó tʼáá átʼéé nítʼééʼ edaʼalyaii tʼáá átʼé niyiisneʼgo Jerúsalemgóó nádzá.
Bee hazʼáanii binaaltsoos bikʼídadziskai (2Kgs. 22:3-23:3)
8 Kʼad Josáíyah nantʼáago tseebíítsʼáadah náhááh góneʼ kéyah áádóó kin biiʼ sohodizin yiiʼ hashtʼééhoodlaago Azaláíyah biyeʼ Shéífan áádóó kin haalʼáádóó bóhólníhígíí Méíyasíyah índa Jóʼahaz biyeʼ Jóʼah éí naatʼáaniishchíín nilíinii éí Bóhólníihii haDiyin God bikin biiʼ sohodizin hashtʼéédeidoodlííł biniyé ajiisʼaʼ.
9 Áádóó aláahgo nááʼiiłniihii Hilkáíyah baa jíkaigo Líívai dineʼé dáádaʼdilkał yaa ádahalyánígíí éí Manáseh dineʼé áádóó Íífreiyim dineʼé índa Ízrel dineʼé daadziihígíí tʼáá ałtso índa Júdah dineʼé áádóó Bénjamin dineʼé tʼáá ałtso bitsʼą́ą́dóó béeso áłah ádayiilaii Bóhólníihii bikin biiʼ sohodizin góneʼ yah adeizhjaaʼígíí Hilkáíyah baa dadziznil, áko Jerúsalemgóó anáákai.
10 Áko diné éí Bóhólníihii bikin biiʼ sohodizingi nidaalnishgo bídahólníhígíí yílákʼe deiznil, áádóó éí Bóhólníihii bikin biiʼ sohodizin yindaalnishígíí hashtʼéédeidoodlíiłgo biniyé yaa deiznil.
11 Kin álʼı̨́ dayiichįįhígíí índa kin álʼı̨́ átʼé danízinii éí tsé hadahaasnilígíí áádóó kin bá daníʼáhígíí índa bitaʼ nidaazʼáhígíí yá tsin neheeshjííʼ nideidiyoołnihgo Júdah dineʼé aláahgo binanitʼaʼí danilíinii éí kin bąąh nidaʼiizhchxǫʼígóó hashtʼéédeidoodlííł biniyé béeso yaa deiznil.
12 Áko diné badaʼahódlíigo nidaashnish, áádóó bikʼehgo nidaʼanishígíí éí Líívai dineʼé nilíinii Miirárai baʼáłchíní náás ahoolchíiłii łaʼ Jéíhath índa Obadáíyah áádóó Kóhath baʼáłchíní náás ahoolchíiłii łaʼ éí Zekaráíyah índa Miishálam bá nihoʼdeeʼnil. Líívai dineʼé tʼáá ałtso éí sin yee nidaanéego dayiichįįhii,
13 éí ałdóʼ hééł nideiyéhígíí índa tʼáá daʼníłʼąą ádaatʼéego bindaʼanishii yikʼi dadéezʼı̨́ı̨́ʼ, áádóó Líívai dineʼé łaʼ naaltsoos ííłʼíní áádóó naatʼáanii danilíinii índa dáńʼdaʼditı̨́ı̨́h yaa ádahalyáanii danilı̨́.
14 Áko Bóhólníihii bikin biiʼ sohodizin góneʼ béeso yah aajaaʼígíí chʼídeizhjaaʼgo aláahgo nááʼiiłniihii Hilkáíyah éí Mózes bibee hazʼáanii naaltsoos bee siʼánígíí Bóhólníihii beidiníʼáanii yikʼíníyá.
15 Áádóó Hilkáíyah éí Shéífan naaltsoos ííłʼíní áyidííniid, Bóhólníihii bikin biiʼ sohodizin góneʼ bee hazʼáanii naaltsoos bee siʼánígíí bikʼíníyá. Áko Hilkáíyah éí naaltsoos Shéífan yeiníʼą́.
16 Áko Shéífan éí naaltsoosígíí aláahgo naatʼáanii yichʼįʼ yiníʼą́ áádóó haneʼ yaa néiníʼą́ągo ání, Ná nidaalʼaʼí baa dadeestʼánígíí tʼáá ałtso yaa nidaakai.
17 Áádóó Bóhólníihii bikin biiʼ sohodizin góneʼ béeso hashtʼeʼniheesʼnilii áłah ádayiilaago bá nidaʼanishígíí áádóó diné nidaalnishígíí yaa deiznil.
18 Ákohgo naaltsoos ííłʼíní Shéífan éí aláahgo naatʼáanii yił hoolneʼgo ání, Aláahgo nááʼiiłniihii Hilkáíyah éí naaltsoos léiʼ sheiníʼą́. Áko Shéífan éí aláahgo naatʼáanii yinááł yiyííłtaʼ.
19 Ákódzaadóó aláahgo naatʼáanii saad bee hazʼáanii naaltsoos bee siʼánígíí yidiiztsʼą́ąʼgo ákʼinaʼooldláád.
20 Áádóó aláahgo naatʼáanii éí Hilkáíyah, Shéífan biyeʼ Aháíkam, Máíkah biyeʼ Ábdan áádóó naaltsoos ííłʼíní Shéífan índa aláahgo naatʼáanii bá naalʼaʼí Asáíyah yichʼįʼ haadzíiʼgo ání,
21 Nílááh, díí naaltsoos nídiitʼánígíí biyiʼdóó ánínígíí éí Ízrel dineʼé áádóó Júdah dineʼé daadziihígíí índa shí ałdóʼ éí Bóhólníihii nihá nideídółkid; jó, Bóhólníihii tʼóó báhádzidgo yee atíʼéłʼíinii yee atínihiilaa, háálá danihizhéʼé yę́ę Bóhólníihii bizaad díí naaltsoos bikʼináháasdzooígíí tʼáá átʼé tʼáadoo yikʼehgo ádaadzaa da.
22 Áko Hilkáíyah áádóó aláahgo naatʼáanii éí diné niinínilii Diyin God yá halneʼii Húldah wolyéii Shálam yeʼasdzą́ą́ nilı̨́įgo yichʼįʼ eekai; Hásrah biyeʼ, Tíkvath éí biyeʼ Shálam, éí ééʼ ninádaaʼnił yaa áhályáanii nilı̨́įgo Jerúsalem kin haalʼáii ániidígo hazʼánígi kééhatʼı̨́, áko diné éí asdzą́ą́ yichʼįʼ yaa yádaałtiʼ.
23 Húldah hachʼįʼ haadzíiʼgo ání, Ízrel dineʼé biBóhólníihii Diyin God kóní, Diné shaa nihiníłʼaʼígíí bił dahołneʼ,
24 Bóhólníihii kóní, Shoo, doo yáʼádaashóonii díí hazʼáníjįʼ índa ákwii kéédahojitʼínígíí hakʼijįʼ kódeeshłííł; éí hóyéeʼgo á hadaʼiisdzíiʼii tʼáá átʼé naaltsoos bikʼinídaháasdzogo ályaa yę́ę, Júdah dineʼé aláahgo binanitʼaʼí binááł yééltaʼii hakʼijįʼ kódeeshłííł.
25 Háálá yóóʼadashideezʼą́ áádóó diyin dabidiʼníinii yichʼįʼ tsin bijeeh dilidgo łikání halchinii deidiłid; tʼáá bí ádayiilaii tʼáá átʼé yee shá dahodoołchįįł yiniyé ádaatʼı̨́. Éí bąą díí kéyah nahósʼaʼígíí bikʼijįʼ bee hashké niisdzı̨́įʼii yeideeshxéełgo doo dínóoltsis da.
26 Nidi Júdah dineʼé aláahgo binanitʼaʼí éí Bóhólníihii nideídídóołkiłgo nihijííłʼaadígíí kódabididoohniił, Saad bee hadaʼiisdzíiʼii baa hosidínítsʼą́ʼígíí éí bídadéétʼiʼgo Ízrel dineʼé biBóhólníihii Diyin God kóní,
27 Nijéí joozbaʼgo áádóó Diyin God binááł aʼohgo ádiʼnilyaago bizaad yee díí kéyah índa ákwii kéédahatʼínígíí yikʼijįʼ haadzíiʼgo dísínítsʼą́ąʼgo, shinááł tʼáá ni aʼohgo ádiʼnilyaago áádóó niʼééʼ ákʼinéíníldláád índa shinááł nichago biniinaa shí ałdóʼ nisodizin disétsʼą́ą́ʼ, ní Bóhólníihii.
28 Jó, danizhéʼé yę́ę bił áłah ánándeeshdlííł, áádóó hózhǫ́ǫgo hazʼą́ągo yóóʼándiʼdoolnííł; díí kéyah nahósʼaʼgi índa yikááʼ kéédahatʼínígíí bikʼijįʼ doo yáʼádaatʼéehii tʼáá átʼé kódeeshłíłígíí éí doo yiidííłtséeł da. Kótʼéego aláahgo naatʼáanii haneʼ baa nídadzizʼą́.
29 Nítʼééʼ aláahgo naatʼáanii iʼiisʼaʼgo Júdah dineʼé bitahdóó índa Jerúsalem kin haalʼáádóó hastóí aląąjįʼ naazíinii haa áłah ádayiilaa.
30 Áádóó aláahgo naatʼáanii éí Bóhólníihii bikin biiʼ sohodizinii siʼáníjįʼ haayá; Júdah dineʼé áádóó Jerúsalemgi kéédahatʼínígíí áádóó náádaʼiiłniihii áádóó Líívai dineʼé índa diné tʼáá ałtso ayóó ádaatʼéii áádóó aʼohgo ádaatʼéii yił yíkaigo bichʼįʼ iʼízhníiłtaʼgo daʼíistsʼą́ąʼgo saad tʼáá átʼé naaltsoos bee siʼą́ągo bee ahaʼdeetʼáanii éí Bóhólníihii bikin biiʼ sohodizin góneʼ nídiitʼánígíí jííłtaʼ.
31 Áko aláahgo naatʼáanii tʼáá néidzįįhídóó yiizįʼgo Bóhólníihii yił ahaʼdeetʼą́, ákótʼéego Bóhólníihii yikééʼ yigáał doo áádóó bibikʼeh óʼooʼníiłii áádóó yee hahaasdzíiʼii índa yee nihwiizʼáanii hajéí tʼáá átʼé bee índa hwiiʼ sizíinii tʼáá átʼé bee éí saad bee ahaʼdeetʼáanii naaltsoos biiʼ bee akʼeʼashchíinii biʼjósin doo.
32 Áádóó Jerúsalemgi índa Bénjamin dineʼé bikéyahgi nidahaaskaígíí tʼáá ałtso bił daalą́go yee naazı̨́įgo áyiilaa. Áko Jerúsalemgi kéédahatʼínígíí Diyin God bibee ahaʼdeetʼáanii, tʼáá éí dabizhéʼé yę́ę biDiyin God yikʼeh ádaadzaa.
33 Áko Josáíyah éí kédaayah tʼáá átʼé Ízrel dineʼé daabíhígíí bitsʼą́ą́dóó doo daaldinii tʼáá átʼé nahjįʼ kóyiilaago Ízrel dineʼé bikéyahgi nidajikaígíí tʼáá ádzíłtso haBóhólníihii Diyin God yá nidaalʼaʼgo áyiilaa. Áádóó Josáíyah bíyoołkááł yę́ędą́ą́ʼ Bóhólníihii tʼáadoo yitsʼákáhí, dabizhéʼé yę́ę biDiyin God yá nidaalʼaʼ nítʼééʼ.
