2 Chronicles 35:1-27
35 Nááʼáłdóʼ Josáíyah éí Jerúsalem kin haalʼáagi atisʼadeesdzá bee bééhániihii yee Bóhólníihii yichʼįʼ nahasá, áko átsé nídízííd binih dı̨́ı̨́tsʼáadah yoołkááł góneʼ atisʼadeesdzá bee bééhániihii dibé yázhí nideistseed.
2 Áádóó náádaʼiiłniihii bindaanish dooleełii yeisįįd, áádóó chánah áyiilaago Bóhólníihii bikin biiʼ sohodizin góneʼ nihidadiilʼaʼ.
3 Áko Líívai dineʼé éí Ízrel dineʼé tʼáá ałtso yindeinitinii tʼáá éí Bóhólníihii bá diyingo nibideeʼnilii ábijiní, Ízrel dineʼé aláahgo binanitʼaʼí David yę́ę biyeʼ Sálaman yę́ę éí Bóhólníihii bikin biiʼ sohodizin áyiilaaí góneʼ tsitsʼaaʼ dílzinii nidanohʼaah, áko nihiwos bee nidaahʼáá nítʼéʼígíí doo nihide átʼéégóó siʼą́ą doo. Kʼad Bóhólníihii nihiDiyin God áádóó bidineʼé Ízrel bá nidaałʼaʼ.
4 Áko danihizhéʼé yę́ę bitsʼą́ą́dóó náás ahoolchíiłii dah nishoojaaʼígíí bikʼehgo Ízrel dineʼé aláahgo binanitʼaʼí David yę́ę biyeʼ Sálaman yę́ę yee akʼeʼashchíinii bikʼehgo tʼáá nihí hashtʼeʼádadołnééh.
5 Índa nihikʼisóó Ízrel dineʼé dabizhéʼé yę́ę bitsʼą́ą́dóó náás daʼahílchíihii daníjaaʼ bikʼehgo áádóó Líívai dineʼé náás daʼahílchíihii daníjaaʼ bikʼehgo diyingo hazʼánígi nídaohzįįhgo nidaołʼaʼ doo.
6 Áko atisʼadeesdzá bee bééhániihii biniyé dibé yázhí nidadoołtsił, áádóó ádadołdééh índa Bóhólníihii éí Mózes yichʼįʼ haadzíiʼii bikʼehgo danihikʼis náádadiʼyoołnih biniyé bá hashtʼedadoohłííł.
7 Áádóó Josáíyah éí atisʼadeesdzá bee bééhániihii bá tʼáá átʼé náádahidoonihígíí biniyé dibé bitahdę́ę́ʼ dibé yázhí índa tłʼízí yázhí éí diné tʼáá ałtso ákwii nidaakaígíí yeinínil; éí tádiindi mííl áádóó dóola yázhí éí táadi mííl, áko díí éí aláahgo naatʼáanii bilı̨́ı̨́ʼ bitahdę́ʼígíí átʼé.
8 Índa bikééʼdóó naatʼáanii danilíinii bił dahadleeʼgo diné áádóó náádaʼiiłniihii índa Líívai dineʼé yadaʼiiznil. Hilkáíyah áádóó Zekaráíyah índa Jáíyel éí Diyin God bikin biiʼ sohodizingi bídahólníihii éí atisʼadeesdzá bee bééhániihii nááhidoonih biniyé naakidi mííldóó baʼaan hastą́diin dibé yázhí áádóó tłʼízí yázhí índa táadi neeznádiin dóola éí náádaʼiiłniihii yaa deiznil.
9 Konanáíyah ałdóʼ áádóó bikʼis Shiiméíyah áádóó Niithániyel áádóó Hashabáíyah áádóó Jáíyel índa Jázabad, díí Líívai dineʼé yiląąjįʼ naazíinii éí atisʼadeesdzá bee bééhániihii nááhidoonih biniyé ashdladi mííl dibé yázhí áádóó tłʼízí yázhí índa ashdladi neeznádiin dóola éí Líívai dineʼé yaa deiznil.
10 Áko nahodoodlaał biniyé hashtʼehodeedzaa; aláahgo naatʼáanii yee haadzíiʼii bikʼehgo náádaʼiiłniihii bá nahazʼą́ą́góó áádóó Líívai dineʼé dah naazhjaaʼgo naazı̨́.
11 Ákohgo atisʼadeesdzá bee bééhániihii biniyé dibé yázhí nideistseed áádóó náádaʼiiłniihii éí diłígíí hálákʼeedóó hadeiizką́ągo akʼídeistah índa Líívai dineʼé éí nídaʼasʼah.
12 Áko didlidgo náádahaniihii tʼáá sahdii náádeidiiʼnił, áko Ízrel dineʼé dabizhéʼé yę́ę baʼáłchíní náás ahoolchíiłii daníjaaʼ bikʼehgo éí Bóhólníihii yichʼįʼ náádeidiyoołnih biniyé yitaa nídeiʼnih. Mózes binaaltsoos biiʼ bee akʼeʼashchínígíí bikʼehgo ákódaʼiilaa, índa dóolaígíí ałdóʼ ákódayiilaa.
13 Bikʼeh hoogáałii bikʼehgo atisʼadeesdzá biniyé dibé yázhí tsííkááʼ deistʼé áádóó łaʼ diyingo nááhániihígíí éí ásaaʼ bee abézhí áádóó ásaaʼtsohda índa ásaaʼ yázhída yee deishbéezhgo, tsxı̨́įłgo diné tʼáá átʼé yitaa deizką́.
14 Áádóó bikʼijįʼ índa Líívai dineʼé tʼáá bí ádá áádóó náádaʼiiłniihii ałdóʼ yá daʼastʼé, háálá náádaʼiiłniihii Éran biyeʼ náás ahoolchíiłii éí didlidgo náádahaniihii áádóó akʼah náádayiiłniih bindaanishgo hiłiijı̨́ı̨́ʼ; éí bąą Líívai dineʼé tʼáá bí ádá áádóó náádaʼiiłniihii Éran biyeʼ náás ahoolchíiłii ałdóʼ yá daʼastʼé.
15 Áko Éísaf baʼáłchíní náás ahoolchíiłii dahataałii tʼáá nideidzįįhígi naazı̨́; David yę́ę áádóó Éísaf yę́ę áádóó Hííman yę́ę índa Jedúthan éí aláahgo naatʼáanii yá náásgóó áhodoonííł yaa halneʼii nilı̨́įgo ádííniidii yikʼehgo naazı̨́, áko dáńʼdaʼditı̨́ı̨́h yaa ádahalyánígíí dáńʼdaʼditı̨́ı̨́hgóó naazı̨́, éí bindaanishígíí doo niʼ kódeilééhgóó; jó, dahakʼis Líívai dineʼé há chʼiyáán hashtʼéédayiilʼįįh.
16 Kótʼéego aláahgo naatʼáanii Josáíyah yee haadzíʼígíí bikʼehgo atisʼadeesdzá bee bééhániihii bee Bóhólníihii bichʼįʼ nidahozhdoołaałgo áádóó Bóhólníihii bibikááʼ nááʼiiniihí bikáaʼjįʼ didlidgo náádahaniihii náádahizhdoołnihgo biniyé éí hoolzhish góneʼ ałtso hashtʼedaalyaa.
17 Íídą́ą́ʼ Ízrel dineʼé ákwii nidaakaígíí atisʼadeesdzá bee bééhániihii áádóó dííkʼǫsh tʼáágééd bááh ályaii bee hodílzingo áłah nilı̨́įgo tsostsʼid jı̨́įjįʼ nidahasá.
18 Áko Ízrel dineʼé bikéyah atisʼadeesdzá bee bééhániihgo nahadlá doo łaʼ ákótʼéego álnééhgóó Diyin God yá halneʼii Sámuel bíiniiłką́ áádóó Ízrel dineʼé aláahgo binanitʼaʼí danilíinii tʼáadoo łaʼ ákóʼiilaa da; Josáíyah áádóó náádaʼiiłniihii áádóó Líívai dineʼé áádóó Júdah dineʼé índa Ízrel dineʼé ákwii nidaakaígíí áádóó Jerúsalem kin haalʼáagi kéédahatʼínígíí ákódaʼiilaa.
19 Josáíyah nantʼáago tseebíítsʼáadah yihah góneʼ díí atisʼadeesdzá bee bééhániihii bee hooʼaʼ.
Josáíyah daaztsą́ (2Kgs. 23:28-30)
20 Áko díí tʼáá átʼé Josáíyah éí kin biiʼ sohodizin hashtʼééyiidlaadóó bikʼijįʼ Ííjip dineʼé aláahgo binanitʼaʼí Nííko éí Yufréítiiz tooh nílínígi Kárkiimish kin haalʼá yikʼijįʼ nidoobah yiniyé níná, áko Josáíyah ákǫ́ǫ́ yichʼįʼ ííbaaʼ.
21 Nidi Nííko éí aláahgo á naazíinii hachʼįʼ ayííłʼaʼgo ání, Júdah dineʼé aláahgo binanitʼaʼí nílíinii, doo niniyé áshtʼı̨́į da. Díí jı̨́ doo naaníbaaʼ da, nidi bił anadaʼahishʼínígíí éí biniyé yishááł; jó, Diyin God tsxı̨́įłgo ánítʼı̨́, shiłní. Diyin God éí shił hólónígíí doo ándoołdįįł da biniyé bitsʼąą áá honítʼįįh.
22 Ákótʼée nidi, Josáíyah doo hatsʼą́ąjįʼ dah dooyaʼ átʼée da, nidi hachʼįʼ nidoobah biniyé doo bééhoʼdílzingóó íʼdiilyaa. Diyin God éí Nííko yichʼįʼ yee haadzíiʼii doo jíistsʼą́ą́ʼgóó nizhdoobah biniyé Megído honítsʼaaʼgi jiníyá.
23 Nítʼééʼ daʼdiłtʼohii aláahgo naatʼáanii Josáíyah deiskah, áko aláahgo naatʼáanii bá nidaalʼaʼí ííłní, Nídashidoołteeh, háálá yéego kʼashiʼdoolkʼeh.
24 Éí bąą há nidaalʼaʼí tsinaabąąs bijáád naakiígíí yiiʼdę́ę́ʼ hadah hastı̨́įgo naaki góneʼ tsinaabąąs bijáád naakiígíí hwee hólónígíí yiih dahastı̨́įgo Jerúsalem kin haalʼáajįʼ nídahastı̨́įgo dadziztsą́ áádóó dahazhéʼé yę́ę dabitséníʼootséél łaʼ biiʼjįʼ yóóʼáhoʼdiilyaa. Áko Júdah dineʼé áádóó Jerúsalem dineʼé tʼáá ałtso éí Josáíyah yę́ę yaa yínííł naaskai.
25 Áko Jeremáíyah éí Josáíyah yę́ę yaa atínídindleeh nítʼééʼ. Áádóó dííshjı̨́ı̨́góó diné índa asdzání dahataałígíí éí yínííł danilı̨́įgo dahataałgo Josáíyah yę́ę yá hadahaasdzííʼ; éí Ízrel dineʼé bitahgi bikʼeh hoogáałgo ádayiilaa; jó, éí naaltsoos Atínídindleehígíí wolyéii bikʼinídaháasdzo.
26 Kʼad Josáíyah łahjįʼ yaa naayáhígíí áádóó Bóhólníihii bibee hazʼáanii biiʼ nídaháasdzooígíí bikʼehgo yáʼátʼéehgo ádzaii
27 áádóó átséedi áádóó akéeʼdi áátʼįįdígíí, jó, éí Ízrel dineʼé áádóó Júdah dineʼé binanitʼaʼí danilíinii binaaltsoos bikʼinídaháasdzo.
