2 Chronicles 36:1-23
36 Áádóó Júdah dineʼé éí Josáíyah biyeʼ Jiihóʼahaz nídeidiiłtı̨́įgo Jerúsalem kin haalʼáagi bizhéʼé yę́ę bitsáskʼehgi aláahgo naatʼáanii ádayiilaa.
2 Jiihóʼahaz éí naadiin tááʼ binááhaigo nantʼá silı̨́ı̨́ʼ, áko Jerúsalemgi nantʼáago tááʼ nídeezid.
3 Áko Ííjip dineʼé aláahgo binanitʼaʼí éí Jerúsalemdi atsʼááhoníłtʼeʼ, áko kéyah éí béésh łigaii tálent* wolyéii neeznádiin dah hidiidloh bíighahgo índa óola tʼááłáʼí tálent bíighahgo ákʼé ninádazhdoodléełgo áhoolaa.
4 Áádóó Ííjip dineʼé aláahgo binanitʼaʼí éí Jiihóʼahaz bikʼis Iiláíyakim Júdah kéyahgi áádóó Jerúsalemgi aláahgo naatʼáanii nilı̨́įgo áyiilaago Jiihóíyakim éí yee hóózhiʼ, nidi Nííko éí hakʼis Jiihóʼahaz Ííjip kéyahgóó yił níʼáázh.
Jiihóíyakim nantʼáá nítʼééʼ (2Kgs. 23:36-24:7)
5 Jiihóíyakim éí naadiin ashdlaʼ binááhaigo aláahgo nantʼá silı̨́ı̨́ʼ, áádóó Jerúsalemgi nantʼáago łaʼtsʼáadah nááhai áádóó biDiyin God Bóhólníihii binááł doo yáʼádaashóonii yaa naayá.
6 Bábilan dineʼé aláahgo binanitʼaʼí Nébukadnézzar éí hachʼįʼ nídiidzáago béésh daʼahólzhaʼí yee hweʼaztłʼǫ́ǫgo Bábilangóó honílóóz.
7 Nébukadnézzar éí Bóhólníihii bikin biiʼ sohodizin góneʼ chodaoʼíinii ałdóʼ łaʼ Bábilan kin haalʼáágóó ayiizhjaaʼgo Bábilandi diyin dabidiʼníinii bá hooghan góneʼ niinínil.
8 Áko Jiihóíyakim łahjįʼ yaa naayáhígíí áádóó doo daaldinii yaa naayáhígíí índa bee bikʼíhástʼahígíí, jó, éí Ízrel dineʼé áádóó Júdah dineʼé aláahgo binanitʼaʼí danilínígíí binaaltsoos bikʼinídaháasdzo. Áko biyeʼ Jehóíyakin hatsáskʼehgi nantʼáá nítʼééʼ.
Jehóíyakin éí Bábilangóó yisnááh ábiʼdiilyaa (2Kgs. 24:8-17)
9 Jehóíyakin éí tseebíítsʼáadah binááhaigo aláahgo nantʼá silı̨́ı̨́ʼ, áko Jerúsalemgi nantʼáago tááʼ nídeezid áádóó neeznáá yiską́. Áko doo yáʼádaashóonii yaa naagháago Bóhólníihii binááł ákwáátʼįįd.
10 Dąągo aláahgo naatʼáanii Nébukadnézzar aníłʼaʼgo Jehóíyakin éí Bábilanjįʼ yił adaaskai áádóó Bóhólníihii bikin biiʼ sohodizin góneʼ chodaoʼíinii daʼílíinii daadziihígíí ałdóʼ ákǫ́ǫ́ adeizhjaaʼ, áko hakʼis Zedekáíyah éí Júdah dineʼé áádóó Jerúsalem dineʼé aláahgo yinanitʼaʼí nilı̨́įgo áyiilaa.
Zedekáíyah nantʼáá nítʼééʼ (2Kgs. 24:18-20; Jer. 52:1-3)
11 Zedekáíyah éí naadiin łaʼ binááhaigo nantʼá silı̨́ı̨́ʼ áádóó Jerúsalemgi nantʼáago łaʼtsʼáadah nááhai.
12 Doo yáʼáshóonii baa nijigháago biDiyin God Bóhólníihii binááł ájíítʼįįd, áádóó tʼáá hó Diyin God yá halneʼii Jeremáíyah éí Bóhólníihii bizaad yee yáłtiʼgo tʼáadoo aʼohgo ízhʼdiilyaa da.
13 Aláahgo naatʼáanii Nébukadnézzar éí Diyin God bee ádee hahoyííłdzííʼ yę́ę bichʼįʼ nízhdiilteeʼ áádóó áhozhdeeshchxǫʼgo índa hajéí jííłtłʼisgo ízhʼdiilyaago Ízrel dineʼé biDiyin God Bóhólníihii bichʼįʼ nijílteeʼ.
14 Nááʼáłdóʼ aláahgo náádaʼiiłniihii áádóó diné tʼáá ałtso tʼáá íiyisí bee hazʼáanii dayiiztiʼ; ałʼąą dineʼé bidoo daaldinii tʼáá átʼé bikʼehgo yaa naaskai, áko Jerúsalemgi Bóhólníihii bikin biiʼ sohodizin dílzingo atsʼéidiníʼáanii dayííłchxǫʼ.
15 Dahazhéʼé yę́ę biBóhólníihii Diyin God éí haneʼ nideiʼáhí hachʼįʼ ałnáánéíłʼaah, háálá bidineʼé áádóó hodiyingo hoł hazʼánígi yaa aʼááh nízin nítʼééʼ.
16 Nidi Diyin God yá haneʼ nideiʼáhígíí yá nidahałtʼiʼ índa hazaad dayííʼįįd índa há dahalneʼii yaa daadloh nítʼééʼ, áko Bóhólníihii bidineʼé yichʼįʼ tʼóó báhádzidgo yee atíʼéłʼíinii tʼáadoo bidééłníní da silı̨́įʼjįʼ hanííchaad.
Júdah dineʼé dabidisná (2Kgs. 25:8-21; Jer. 39:8-10; 52:12-30)
17 Éí bąą Kaldíya dineʼé aláahgo binanitʼaʼí hachʼįʼ yiyííłʼaad, éí hakin biiʼ sohodizin góneʼ hadinééh danilíinii diltłish yee nideistseed, áko dinééh, doodaiiʼ chʼikę́ęhda, hastóí haastihiida doo yaa aʼááh nízin da; Bóhólníihii éí tʼáá ádzíłtso yílákʼee hodííʼą́.
18 Bóhólníihii bikin biiʼ sohodizin góneʼ chodaoʼíinii dantsaaígíí índa ádaałtsʼíísígíí tʼáá átʼé, áádóó Bóhólníihii bikin biiʼ sohodizindóó áádóó aláahgo naatʼáanii bighandóó índa naatʼáanii danilíinii dabighandóó daʼílíinii tʼáá átʼé éí Bábilangóó ayiizhjaaʼ.
19 Áádóó Bóhólníihii bikin biiʼ sohodizin adeideeskʼą́ą́ʼ índa Jerúsalem kin haalʼá ditą́ągo binaa ahééʼítłʼinígíí tadayoostłʼííd, áádóó naatʼáanii dabighan ałtso deidííłid, índa chodaoʼíinii daʼílíinii ałtso nidayiishchxǫʼ.
20 Áko diltłish yitsʼąą hadahineezhchą́ʼígíí éí Bábilan kin haalʼáágóó ayiizhʼeezh; áadi Pérzha dineʼé yee bóhólníihii hwee ádíhólnííh silı̨́įʼjįʼ Nébukadnézzar índa biyeʼké ałdóʼ yá nidaalʼaʼ nítʼééʼ.
21 Áádóó Jeremáíyah éí Bóhólníihii yee haadzíiʼii bohodoolnííł biniyé tsostsʼidiin nááhaijįʼ kéyah hááʼáyı̨́ı̨́h yee ákeesdlaʼ, áko bikááʼ doo nihwiildlaadgóó tsostsʼidiin nááhaijįʼ hanáályı̨́ı̨́ʼ.
Sáíras nahasneʼ (Ezra 1:1-4)
22 Áko kʼad Pérzha dineʼé aláahgo binanitʼaʼí Sáíras nantʼáago tʼááłáʼí náhááh góneʼ Jeremáíyah éí Bóhólníihii bizaad yee hahaasdzíiʼii bohodoolnííł biniyé Bóhólníihii éí Pérzha dineʼé aláahgo binanitʼaʼí Sáíras biníłchʼi yidiisnááʼ, áko aláahgo naatʼáanii bee óhólníihgo bił hazʼą́ą́góó tʼáá átʼé baa nidahazneʼ índa bee akʼeʼashchı̨́įgo ałdóʼ áyiilaago ání,
23 Pérzha dineʼé aláahgo binanitʼaʼí Sáíras kóní, Yáʼąąshdę́ę́ʼ Bóhólníihii Diyin God éí nahasdzáán bikáaʼgi bee ídahólníihii tʼáá átʼé sheidiníʼą́, áko Júdah kéyahgi Jerúsalem kin haalʼáagi kin biiʼ sohodizin bá ádeeshłíiłgo shąąh niinílá. Háishąʼ Diyin God bidineʼé tʼáá ałtso bitahdóó nidaahkaii? Éí haBóhólníihii Diyin God hoł hólǫ́ǫ leʼ áádóó bíniʼ Jerúsalem góde nihééhizhdookah.
Footnotes
^ Tálent wolyéii tsostsʼidiindóó baʼaan ashdlaʼ dah hidiidloh bíighahgo daatsʼí óolyé.
