2 Chronicles 4:1-22
4 Áádóó ałdóʼ bikááʼ nááʼiiniihí béésh łitsoii yee áyiilaa; áníłtsogi éí nááseeʼgo áádóó naaniigo tádiin ké silá áádóó dego éí ashdlaʼáadah ké silá.
2 Nááʼáłdóʼ biiʼ táʼádígisí nitsaaígíí béésh łitsoii doolyı̨́įʼgo bee ályaa; éí názbąsgo ashdlaʼáadah ké silá haʼnaa áníłtso áádóó dego tsostsʼidóó ałnííʼ ké silá; bidáaʼgi dízdiindóó baʼaan ashdlaʼ ké silá ánízahgo ahééhoolʼá.
3 Bidááʼ gónaa biyaadóogo éí dóola bidaʼalyaago ashdlaʼáadah ké silá bíighahgo ahéénízı̨́. Tʼááłáʼí béésh łitsoii éí dóola béédaʼalyaago naakigo ałnaashiijí nítʼiʼ.
4 Béésh łitsoii bee dóola ályaaígíí naakitsʼáadahgo naazı̨́; táaʼgo náhookǫsjigo dadéezʼı̨́ı̨́ʼ, táaʼgo eʼeʼaahjigo dadéezʼı̨́ı̨́ʼ, táaʼgo shádiʼáahjigo dadéezʼı̨́ı̨́ʼ índa táaʼgo haʼaʼaahjigo dadéezʼı̨́ı̨́ʼ; dabitłʼaaʼ ahidadiiʼáago bikáaʼgi biiʼ táʼádígisí nitsaaígíí dah yistʼą́.
5 Dı̨́ı̨́ʼ bikʼehgo íidéetą́ą́ʼ, áádóó bidááʼ gónaa éí bee adlání bidááʼ gónaaígíí nahalingo chʼilátah hózhóón lílii wolyéii bee naashchʼąąʼ. Tʼááłáhídi neeznádiindóó baʼaan náhástʼédiin tóshjeeh bíighahgo bee tó siką́.
6 Áádóó ałdóʼ biiʼ táʼádígisí neeznáá béésh łitsoii yee áyiilaa, áko éí ashdlaʼgo nishʼnáájí niinínil áádóó ashdlaʼgo nishtłʼají niinínil. Áko didlidgo náádahizhdoołnihii éí díí biiʼjįʼ tánínádadzigis doo, áádóó biiʼ táʼádígisí nitsaaígíí éí náádaʼiiłniihii yiiʼ táʼánídadigis doo.
7 Bee dahoolʼiní bá yadaaʼáii neeznáago ádoolníłígíí bikʼehgo óola yee áyiilaago kin biiʼ sohodizin góneʼ niinínil; nishʼnáájígo ashdlaʼ niinínil áádóó nishtłʼajígo ashdlaʼ niinínil.
8 Áádóó ałdóʼ bikááʼ adání neeznáá áyiilaago kin biiʼ sohodizin góneʼ niinínil; nishʼnáájígo ashdlaʼ niinínil áádóó nishtłʼajígo ashdlaʼ niinínil. Índa biiʼ táʼádígisí neeznádiingo óola yee áyiilaa.
9 Nááʼákóneʼé éí náádaʼiiłniihii bá hazʼánígíí áádóó nitsaago hazʼánígíí áyiilaa índa bidáádadilkał áyiilaago béésh łitsoii yikʼídeistiʼ.
10 Áádóó biiʼ táʼádígisí nitsaaígíí éí shádiʼááhdóó haʼaʼaah bichʼįʼjígo kin biiʼ sohodizin naanázʼáhígi niiníʼą́.
11 Háíram ałdóʼ ásaaʼ áádóó łeeshchʼiih bee hahakaahí índa łeetsʼaaʼ nímazí ádayiilaa, áko Háíram éí Bóhólníihii bikin biiʼ sohodizin siʼą́ągi chodaoʼı̨́į dooleełígíí aláahgo naatʼáanii Sálaman yá ałtso áyiilaa.
12 Naakigo ííʼáa dooígíí éí tʼáá áłah bílátahdi łeetsʼaaʼ nímazí nahalingo ályaii áádóó éí łeetsʼaaʼ nímazí nahalingo naakigo ályaaígíí ałnánaneesdizgo bináztʼiʼgo bee naashchʼąąʼgo áyiilaa.
13 Naaki ałnánaneesdizgo yistłʼónígíí bá dı̨́įdi neeznádiin pámgrenit aneestʼąʼ bééʼályaago neizhchʼąąʼ; éí naaki ííʼáhígíí tʼáá áłah bílátahgi łeetsʼaaʼ nímazí nahalingo ályaaígíí béésh łitsoii ahidiníłnádaoztʼiʼgo tʼáá ałʼąą pámgrenit ahąąh ahéénítʼiʼgo bináztʼiʼgo áyiilaa.
14 Áádóó biiʼ táʼádígisí bá naaznilígíí bikáaʼgi biiʼ táʼádígisí dah naaznilgo ałdóʼ áyiilaa.
15 Biiʼ táʼádígisí nitsaaígíí biyaadóó dóola naakitsʼáadah bééʼályaago naazı̨́įgo áyiilaa.
16 Ásaaʼ áádóó łeeshchʼiih bee hahakaahí áádóó bílaʼtáaʼiida índa chodaoʼínígíí tʼáá ałtso éí aláahgo naatʼáanii Sálaman bá Bóhólníihii bikin biiʼ sohodizin góneʼ chodaoʼı̨́į doo biniyé Háíram béésh łitsoii bídazdilidii yee ádayiilaa.
17 Jórdan tooh bibąąhgóó halgai hóteel wolyéhígíí Sákath hazʼání áádóó Zeredéíthah hazʼání bitaʼ gónaa hashtłʼish ditsʼidí hólónígi ákweʼé aláahgo naatʼáanii béésh deidííłhı̨́ı̨́ʼ.
18 Kótʼéego Sálaman díí chodaoʼínígíí tʼáá átʼé tʼóó ahayóii áyiilaago béésh łitsoii haa shı̨́ı̨́ néelą́ą́ʼ dah hidédloʼgo choozʼįįd; éí doo bééhózin da.
19 Áko Sálaman éí chodaoʼínígíí tʼáá ałtso áádóó bikááʼ nááʼiiniihí índa Diyin God bichʼįʼ bááh nááhániihii bikááʼ nináʼnił dooígíí óola yee Bóhólníihii bikin biiʼ sohodizin yá áyiilaa,
20 áádóó bee dahoolʼiní bá yadaaʼáii éí bee dahoolʼiní tʼáá biłgo óola tʼáá bízhání bee ályaa; éí tʼáá átʼée dooleełígi átʼéego wóniidi diyingo hazʼánígíí bidááhdóó diltłiʼ doo biniyé áyiilaa.
21 Chʼilátah hózhóón áádóó bee dahoolʼiní índa tsííd bee náhádláhí éí óola tʼáá bízhání yee ádayiilaa.
22 Kǫʼ bee náhiniltsésí, biiʼ táʼádígisída, łeetsʼaaʼ tsin bijeeh dilidgo łikání halchinii báhígíí índa tsííd bee naakáhída éí óola tʼáá bízhání bee ádaalyaa. Kin biiʼ sohodizin bidáádílkał bąąh dah naaznilgo bee dándaʼdilkałígíí índa tsʼídá aláahgo diyingo hazʼánígíí bidáádadilkałígíí áádóó hodiyingo hazʼánígíí bidáádadilkałígíí éí óola bee ádaalyaa.
