2 Chronicles 5:1-14
5 Kótʼéego aláahgo naatʼáanii Sálaman éí Bóhólníihii bikin biiʼ sohodizin yinaashnishgo ałtso áyiilaa, áádóó Sálaman éí bizhéʼé David yę́ę diyingo niidiníʼáanii yah ayiizhjaaʼ; béésh łigaii, óola índa chodaoʼínígíí tʼáá ałtso Bóhólníihii bikin biiʼ sohodizin góneʼ yódí bá hazʼą́ą́ góneʼ niinínil.
Sálaman éí kin biiʼ sohodizin góneʼ tsitsʼaaʼ dílzinii niiníʼą́ (1Kgs. 8:1-11)
2 Áko Ízrel dineʼé hastóí danilíinii áádóó aląąjįʼ naazíinii éí dabizhéʼé yę́ę baʼáłchíní náás ahoolchíłígíí yá aląąjįʼ naazíinii tsitsʼaaʼ dílzinii Bóhólníihii bibee ahaʼdeetʼáanii biiʼ sinilii David bikin haalʼáádóó Záíyan hoolyéhídóó chʼídeidooʼááł biniyé aláahgo naatʼáanii Sálaman éí Jerúsalem kin haalʼáagi áłah áhoolaa.
3 Áádóó Ízrel dineʼé bitahdóó diné tʼáá ałtso éí tsostsʼid nídízííd binih dílzingo áłah náʼádleehgi aláahgo naatʼáanii Sálaman yaa áłah silı̨́ı̨́ʼ.
4 Áko Ízrel dineʼé hastóí danilíinii neheeskai áádóó Líívai dineʼé tsitsʼaaʼ dílzinii nídeidiiʼą́.
5 Náádaʼiiłniihii índa Líívai dineʼé éí tsitsʼaaʼ dílzinii áádóó níbaal biiʼ dahozdísinii índa chodaoʼíinii dadílzinii níbaal biiʼ hodílzinii biyiʼ chodaoʼı̨́į dooígíí áádę́ę́ʼ nidayiizhjaaʼ.
6 Nááʼáłdóʼ aláahgo naatʼáanii Sálaman áádóó Ízrel dineʼé tʼáá átʼé baa áłah silı̨́ʼígíí tʼáá bił tsitsʼaaʼ dílzinii bidááhdóó nijíkaigo dibé áádóó béégashii doo jóołtaʼ ánéelą́ą́ʼgóó dazhdiłidgo náádajiisniiʼ.
7 Áko náádaʼiiłniihii éí tsitsʼaaʼ dílzinii Bóhólníihii bibee ahaʼdeetʼáanii biiʼ sinilii tʼáá bá hazʼą́ąjįʼ wóniidi tsʼídá aláahgo diyingo hazʼánígi diyingo naalʼaʼí chérabim wolyéii bitʼaʼ biyaajįʼ nideizʼą́.
8 Jó, diyingo naalʼaʼí chérabim tʼáá áłah bitʼaʼ éí tsitsʼaaʼ dílzinii bá hazʼánígíí yikáaʼgi yiníłbaal, áko tsitsʼaaʼ dílzinii áádóó tsin níyizii bee naʼatʼáhígíí yikáaʼgi yiníłbaal.
9 Áádóó tsitsʼaaʼ dílzinii tsin níyizii bee naʼatʼáhígíí éí chʼíníʼáago biniinaa wóniidi tsʼídá aláahgo diyingo hazʼánígíí bidááhjígo hodiyingo hazʼánídóó yitʼı̨́, nidi tłʼóóʼdę́ęʼgo éí doo yitʼı̨́į da. Áko éí dííshjı̨́įjįʼ tʼáá ákótʼé.
10 Tsé naakigo bikáaʼgi bikʼeh óʼooʼníiłii bee akʼeʼashchíinii tʼéiyá tsitsʼaaʼ dílzinii biiʼ sinil; éí Mózes joolyéii Dził Hórebdi biih jíínil; Bóhólníihii éí Ízrel dineʼé yił ahaʼdeetʼą́; íídą́ą́ʼ Ííjip kéyahdę́ę́ʼ nááʼnéełgo ákóyiilaa.
11 Áko náádaʼiiłniihii hodiyin hazʼą́ą́dę́ę́ʼ chʼíkaigo (Jó, náádaʼiiłniihii ákwii neheeskaígíí éí tʼáá ałtso tʼáadoo baa dahwiilzhíshí tʼáá haʼátʼíhída bidoołchǫǫłii chin ádąąh dayooldeeʼgo atsʼákai.)
12 áádóó Líívai dineʼé tʼáá ałtso éí dahataałígíí Éísaf, Hííman áádóó Jedúthan índa dabiyeʼké áádóó dabikʼis tʼáá daabił áłtsʼóózígo yisdizígíí bee naʼatʼą́hí łigaii ditsʼidgo ályaii yee hadadítʼéego béésh ahídíʼniłgo diitsʼaʼígíí, tsin tłʼóół neeznáá bąąh daneelzheeʼgo bee nidaʼaʼnéii áádóó tsin tłʼóół naakitsʼáadah bąąh daneelzheeʼgo bee nidaʼaʼnéii dah deíjáahgo bikááʼ nááʼiiniihí haʼaʼaahjigo niníʼáagi naazı̨́, áádóó tʼááłáhídi neeznádiindóó baʼaan naadiingo náádaʼiiłniihii tʼáá biłgo éí béésh dilní bee íʼdílzoołí yee ádaaní.
13 Áko béésh dilní bee íʼdílzoołí yee ádaanínígíí áádóó dahataałígíí tʼáá łaʼ Bóhólníihii yaa dahaniih áádóó yaa ahééh danízingo hodiistsʼą́ąʼgo yéego hadaʼdeezʼą́ągo béésh dilní bee íʼdílzoołí yee nidaanéhígíí áádóó béésh ahídíʼniłgo diitsʼaʼígíí índa sin yee nidaanéii náádaałaʼ yee yaa dahaniihgo ádaaní, Bóhólníihii éí yáʼátʼéehii nilı̨́, áádóó aa aʼááh nízingo ahóyéelʼá. Nítʼééʼ Bóhólníihii bikin biiʼ sohodizin góneʼ kʼos niʼ nihisheegizh.
14 Áko kin biiʼ sohodizin biyiʼ góneʼ kʼos niʼ nihisheegizhígíí biniinaa náádaʼiiłniihii doo nidaolʼaʼ átʼée da, háálá Bóhólníihii bee biʼoh hodidilyéehii Bóhólníihii bikin biiʼ sohodizin góneʼ hadeezbin.
