2 Chronicles 6:1-42
6 Ákohgo Sálaman haadzíiʼgo ání, Bóhólníihii kóní, Kʼos diłhił biiʼ honishłǫ́ǫ doo.
2 Nidi kin biiʼ kééhótʼı̨́į dooleełii ná áshłaa; éí biiʼ hoolʼáágóó honílǫ́ǫ doo.
3 Áko aláahgo naatʼáanii náhaayáago Ízrel dineʼé áłah nilínígíí tʼáá ałtso naazı̨́įgo yikʼidzisdliʼ.
4 Áádóó ání, Ízrel dineʼé biBóhólníihii Diyin God baa haʼniih leʼ; éí shizhéʼé David yę́ę yichʼįʼ haadzíiʼii łaʼ yiyiilaago kóní,
5 Shidineʼé Ííjip kéyahdę́ę́ʼ chʼíníʼeezh bijı̨́ı̨́dóó kin haalʼáagi Ízrel dineʼé bitahgi doo łaʼ kin biiʼ sohodizinii shá íidoolíiłgo ákwii shízhiʼ baa haʼniih doo biniyé bikʼi diishniiʼ da, doodaiiʼ doo łaʼ shidineʼé Ízrel binazhnitʼáa doo biniyé náhodiiłtı̨́į da.
6 Nidi Jerúsalem kin haalʼáii éí náhodiiʼą́; ákwii shízhiʼ baa haʼniih doo biniyé áádóó David éí shidineʼé Ízrel yinantʼáa doo biniyé nídiiłtı̨́.
7 Áko shizhéʼé David yę́ę díí bíniʼ nilı̨́ı̨́ nítʼééʼ; éí kin biiʼ sohodizin ádoolníiłgo biiʼ Ízrel dineʼé biBóhólníihii Diyin God bízhiʼ baa haʼniih doo, nízin nítʼééʼ.
8 Nidi Bóhólníihii éí shizhéʼé David yę́ę áyidííniid niʼ, Kin biiʼ sohodizin ádíílíiłgo biiʼ shízhiʼ baa haʼniih dooígíí níniʼ nilı̨́ı̨́ nítʼéʼígíí éí yáʼátʼéhígi átʼéego baa nitsísíníkééz.
9 Azhą́ ákótʼée nidi, ni éí doo kin shá ádíílíił da, nidi niyeʼ tʼáá ni ná yizhchínígíí éí kin íidoolíiłgo biiʼ shízhiʼ baa haʼniih doo, níi niʼ.
10 Áko Bóhólníihii yee haadzíiʼii yiʼiilaago shizhéʼé David yę́ę bitsáskʼehjįʼ ííyá áádóó Bóhólníihii yee haadzíʼígi átʼéego Ízrel dineʼé bá bikááʼdóó nahatʼáii bikááʼdóó dah nédá índa kin íishłaago biiʼ Ízrel dineʼé biBóhólníihii Diyin God bízhiʼ baa haʼniih doo.
11 Áádóó ákóneʼ tsitsʼaaʼ dílzinii niiníʼą́; éí biyiʼ Bóhólníihii bibee ahaʼdeetʼáanii Ízrel dineʼé yił hashtʼedayiilaaígíí sinil.
12 Áko Sálaman éí Ízrel dineʼé áłah nilínígíí binááł Bóhólníihii bibikááʼ nááʼiiniihí bidáahjigo yiizįʼgo dah didiilniiʼ.
13 Háálá Sálaman éí béésh łitsoii bee wódahdi dah náhástʼą́ągo áyiilaa éí nááseeʼgo tsostsʼidóó nááʼáłníiʼgo ké silá áádóó naaniigo tsostsʼidóó nááʼáłníiʼgo ké silá índa dego éí dı̨́ı̨́ʼdóó nááʼáłníiʼgo ké silá, áko tłʼóoʼjigo nááhástʼánígíí nahaníiʼgi niiníʼą́; éí yikááʼdóó yiizįʼ áádóó Ízrel dineʼé áłah nilínígíí tʼáá ałtso binááł nitsidinígoʼgo yáʼąąshjigo dah didiilniiʼ.
14 Áko ání, Ízrel dineʼé biBóhólníihii Diyin God nílíinii, diyin nigi ánáánátʼéii yáʼąąshdi índa nahasdzáán bikáaʼgi doo hólǫ́ǫ da; ni tʼéiyá ná nidaalʼaʼí éí ahaʼdeetʼáanii áádóó aa aʼááh hasinii bił hashtʼeyínísinii ninááł deíkááh.
15 Ni éí ná naalʼaʼí shizhéʼé David yę́ę bichʼįʼ bee hahíínídzíiʼii bił hashtʼeyínísin nítʼééʼ; tʼáá aaníí bee háínídzíiʼgo díí jı̨́ átʼéhígi átʼéego biʼiinilaa.
16 Éí bąą kʼad, Ízrel dineʼé biBóhólníihii Diyin God nílíinii, ná naalʼaʼí shizhéʼé David yę́ę bá bee hwiiniłʼaʼígíí ánílééh; jó, ábidííníniid, Naʼáłchíní náás ahoolchíiłii doo łaʼda shinááł Ízrel dineʼé bibikááʼ dóó nahatʼáii yiʼoh dadínóolʼąął da; jó, naʼáłchíní ádaa dahóyą́ągo shibee hazʼáanii yikʼeh dahółʼı̨́įgo, shinááł yínááł yę́ęgi átʼéego deíkááh ládą́ą́ʼ doo yiʼoh dadínóolʼąął da.
17 Kʼad Ízrel dineʼé biBóhólníihii Diyin God nílíinii, ná naalʼaʼí shizhéʼé David yę́ę bichʼįʼ saad bee háínídzíiʼii éí tʼáá aaníi leʼ.
18 Nidi Diyin God nilíiniísh tʼáá aaníí nahasdzáán yikáaʼgi dineʼé yił kééhatʼı̨́į doo? Jó, yádiłhił índa yáʼąąsh tʼáá náhwiistʼą́ą́ nítʼééʼ doo nihóoghah da, índa díí kin ná áshłaaígíí ádiyooshéhí yeeʼ.
19 Ákótʼée nidi ná naalʼaʼí bisodizin áádóó náʼookąąhgo yíísíníłtsʼą́ą́ʼ, Bóhólníihii shiDiyin God nílíinii, ná naalʼaʼí nichʼįʼ náʼookąąhgo sodoolzingo bá disínítsʼą́ą́ʼ.
20 Áko tłʼéeʼgo áádóó jı̨́įgo díí kin siʼánígi shízhiʼ baa haʼniih doo, dííníniidígíí bikʼi díníʼı̨́įʼ doo, áko ná naalʼaʼí díí hazʼánígíí yichʼįʼgo déezʼı̨́įʼgo nichʼįʼ sonídílzįįhgo bá nídiitsʼı̨́įh dooleeł.
21 Ná naalʼaʼí áádóó nidineʼé Ízrel kojįʼ dadéezʼı̨́įʼgo nichʼįʼ nídaʼookąąhígíí yíísíníłtsʼą́ą́ʼ; yáʼąąshdi honílónídę́ę́ʼ íísíníłtsʼą́ąʼgo ádił nidaʼiisíihgo bá yóóʼahidíʼaah doo.
22 Diné łaʼda yił kééhatʼíinii yichʼįʼ ádił niʼiisíihgo éí ádee habidiʼyooldzíiʼgo díí kin biiʼ bikááʼ nááʼiiniihí bidááhdóó nidoogáałgo ádee hadidoodzih.
23 Ákohgo yáʼąąshdi didíítsʼı̨́įłgo ná naalʼaʼí nidiltʼéhígíí tʼáá haʼátʼéegoda ádíílíiłgo baa nídíítʼįįł, éí doo yáʼáshǫ́ǫ́góó ádzaaígíí yá ninádootłishgo bee bá nihodííʼááł índa tʼáá ákogi ááníiłii éí bitʼáá ákogi átʼéii bikʼehgo bikʼijiidíídliił.
24 Nidineʼé Ízrel nichʼįʼ nidaʼiisíiʼgo biniinaa biʼanaʼí bikʼeh dadeesdlı̨́įʼgo áádóó nízhiʼ dayózhíigo nichʼįʼ ninákaigo índa díí kin biyiʼ nídaʼookąąhgo sodadilzingo
25 yáʼąąshdi didíítsʼı̨́įłgo nidineʼé Ízrel nidaʼiisíiʼii bá yóóʼádidííʼááł áádóó kéyah baa dííníʼánígíí áajįʼ dabizhéʼé yę́ę bił ninádííʼish.
26 Nidineʼé Ízrel nichʼįʼ nidaʼiisíiʼgo biniinaa níłtsą́ nihééʼniʼ áádóó díí hazʼánígíí yichʼįʼgo dadéezʼı̨́įʼgo nichʼįʼ sodadilzingo índa nízhiʼ dayózhíigo nidaʼiisíʼígíí yitsʼą́ąjigo ninákai; jó, bichʼįʼ nidahoyíníłnááʼ.
27 Ákohgo yáʼąąshdi didíítsʼı̨́įłgo ná nidaalʼaʼí áádóó nidineʼé Ízrel nidaʼiisíiʼii bá yóóʼahidíʼaah doo, yáʼátʼéehgo honítʼiʼgóó deíkáah dooígíí bee nanítingo bikéyah bikʼijįʼ nidahałtin doo; kéyah daabííʼ dooleełgo nidineʼé baa dííníʼą́.
28 Kéyah bikááʼgóó hodííchįįdgo, doodaiiʼ nidahałniihgo, doodaiiʼ nídahooltseigo, doodaiiʼ dláád dahazlı̨́įʼgo, doodaiiʼ nahachagiitsoh dahazlı̨́įʼgo, doodaiiʼ chʼosh ditłʼooí dahazlı̨́įʼgo bikéyahdóó kin hadaasʼáhígíí łaʼ biʼanaʼí yinadééjéeʼgo tʼáá haʼátʼíhída atíʼoolíiłii bidadeesnaʼgo, tʼáá haʼátʼíhída naałniih baa níłniiʼgo,
29 ákohgo diné tʼáá háiida sodilzingo, doodaiiʼ náʼookąąhgo, doodaiiʼ Ízrel dineʼé tʼáá ałtso ákótʼéego yaa naakaigo, tʼááłáʼí nítínígo tʼáá bí yikʼee tiʼdahooníihii áádóó yaa yínííł danilíinii yaa ákódahiniizįįhgo índa díí kin biiʼ sohodizin biyiʼdóó dah dadéelníihgo sodadilzingo
30 yáʼąąshdi kééhótʼı̨́įdi didíítsʼı̨́ı̨́ł áádóó nidaʼiisíʼígíí bá yóóʼahidíʼaah doo, áádóó diné tʼááłáʼí nítínígo bá dahonítʼiʼ bikʼehgo bá ádadííliił, diné dabijéí nił bééhózinígíí; (tʼáá ni tʼéiyá nihokááʼ dineʼé dabijéí nił bééhózin;)
31 éí danihizhéʼé yę́ę kéyah baa dííníʼánígíí yikááʼ tʼáá abídayiiską́ bijı̨́įjįʼ dandósin doo biniyé ákódíínííł.
32 Áádóó ałdóʼ déʼéyóní łaʼ doo Ízrel dineʼé nilíinii, nidi nízhiʼ ayóó átʼéii áádóó ayóó ánóodziilii índa nigaan bitsʼáhoníyéeʼii biniinaa díí hazʼánígíí yichʼįʼgo déezʼı̨́įʼgo nichʼįʼ sodidoozįįłgo
33 yáʼąąshdi kééhótʼínídę́ę́ʼ didíítsʼı̨́ı̨́ł, áádóó déʼéyóní níyókeedígíí tʼáá ałtso bá biʼdíílííł; díí tʼáá nidineʼé Ízrel nízhiʼ bił béédahózingo deidósinígi átʼéego nihokááʼ dineʼé tʼáá átʼé dandósin doo áádóó bił béédahodoozįįł: díí kin áshłaaígíí nízhiʼ bee wójíi doo.
34 Nidineʼé biʼanaʼí danilíinii yichʼįʼ dahidibáahgo, tʼáá háájída hidíłʼáago kin haalʼá nidííníʼánígíí áádóó kin éí nízhiʼ bee wójíigo íishłaaígíí yichʼįʼ dadéezʼı̨́įʼgo nichʼįʼ sodadilzingo
35 yáʼąąshdi bisodizin índa bináʼookąąh bá didíítsʼı̨́ı̨́ł índa yiniyé ádaaníinii bá biʼíínísin doo.
36 Nichʼįʼ ádił nidaʼiisíihgo, (jó, diné tʼáá ałtso ádił daʼiisííh,) áko hachʼįʼ náhodoochįįłgo hweʼanaʼí baa hodidííʼááł, áko dahodoołnéełgo bikéyah nízaadgóó, doodaiiʼ áhą́dígóoda yóóʼadahodínóołkał,
37 nidi éí kéyahgóó yisnááh ádahoʼdiilyaa yę́ędi hajéítłʼáahdi łahgo átʼéego tsíńdazdookosgo áádóó dahasnánígíí bikéyahdi nichʼįʼ nidaʼjookąąhgo kódajiníi doo, Ádił nidaʼayeelzííʼ, doo ádahwiilyą́ą́góó, doo yáʼáshǫ́ǫ́góó ádeiitʼįįd.
38 Dabisnánígíí bikéyahdi dahajéí índa dahániʼ tʼáá átʼé bee łahgo átʼéego tsíńdazdookosgo áádóó hakéyah dahazhéʼé yę́ę baa dííníʼáanii índa kin haalʼá nidííníʼáanii, áádóó kin áshłaaígíí nízhiʼ bee wójíi doo,
39 yáʼąąshdi kééhótʼínídę́ę́ʼ bisodizin áádóó bináʼookąąh didíítsʼı̨́ı̨́ł áádóó yiniyé ádaaníinii bá biʼíínísin doo índa nidineʼé nichʼįʼ ádił nidaʼiisíiʼii bá yóóʼahidíʼaah doo.
40 Kʼad, shiDiyin God nílíinii, nánooshkąąh, díí hazʼą́ą́dóó nichʼįʼ sodiszingo shíísíníłtsʼą́ą́ʼ.
41 Éí bąą kʼad, Bóhólníihii shiDiyin God nílíinii, díldzííł, háánílyı̨́ı̨́h dooleełgóó tsitsʼaaʼ dílzinii nidziil bee bééhózinii bił dínááh, Bóhólníihii shiDiyin God nílíinii, hániʼdii ninááʼiiłniihii yisdáʼiildééh yee hadadítʼée leʼ áádóó hániʼdii nidiyı̨́ı̨́ʼ danilíinii yáʼátʼéehii yaa bił nidahoozhǫǫh leʼ.
42 Bóhólníihii shiDiyin God akʼah bikʼi yeiniziidgo yíínísı̨́įʼii doo tʼóó biʼdííłnih da, béénílniih, ná naalʼaʼí David yę́ę baa aʼááh ná niidzįįh nítʼééʼ.
