2 Chronicles 7:1-22
7 Áko Sálaman sodizin niiníłtiʼgo yáʼąąshdę́ę́ʼ kǫʼ bidadíínáadgo didlidgo nááhániihii áádóó náádahaniihígíí iidííłkʼą́ą́ʼ, áko Bóhólníihii bee biʼoh hodidilyéehii kin biiʼ sohodizin biiʼ hadéébįįd.
2 Náádaʼiiłniihii éí Bóhólníihii bikin biiʼ sohodizin góneʼ Bóhólníihii bee biʼoh hodidilyéehii hadéébįįdgo biniinaa doo yah adaokááh átʼée da.
3 Nítʼééʼ Ízrel dineʼé tʼáá ałtso kǫʼ bidadíínáadgo áádóó Bóhólníihii bee biʼoh hodidilyéehii kin biiʼ sohodizin bikʼiilzhóodgo dayiiłtsą́ągo tsé niilkaadjįʼ yaa daneeshjoolgo nidahasáago Bóhólníihii yaa dahaniihgo ádaaní, Bí éí yáʼátʼéehii nilı̨́ áádóó aa aʼááh nízingo ahóyéelʼá.
4 Ákohgo aláahgo naatʼáanii áádóó Ízrel dineʼé tʼáá ałtso Bóhólníihii bichʼįʼ náádahaniihii náádayiisniiʼ.
5 Áádóó aláahgo naatʼáanii Sálaman éí naadiin naakidi mííl béégashii índa neeznádiindóó baʼaan naadiindi míilgo dibé éí Bóhólníihii bichʼįʼ didlidgo nááyiisniiʼ. Kótʼéego aláahgo naatʼáanii áádóó diné tʼáá ałtso Diyin God bikin biiʼ sohodizin diyingo nideideezʼą́.
6 Náádaʼiiłniihii ninádaalʼaahígi naazı̨́; Líívai dineʼé ałdóʼ éí Bóhólníihii bá nidaʼaʼnéhígíí yee áńdadiʼniihgo aláahgo naatʼáanii David éí Bóhólníihii bee baa haʼniih dooleeł biniyé áyiilaii dah deíjááh. Jó, aa aʼááh nízingo ahóyéelʼá. Áádóó dabidááhdę́ę́ʼ náádaʼiiłniihii béésh łitsoii dilní yee ádadííniid, áko Ízrel dineʼé tʼáá ałtso deizįʼ.
7 Nááʼáłdóʼ Sálaman éí Bóhólníihii bikin biiʼ sohodizin bidáahjįʼ hazʼánígíí ałníiʼgi diyingo niidiníʼą́; ákwii didlidgo nááhániihii índa hózhǫ́ǫ́jí nááhániihii akʼah nááyiisniiʼ, háálá béésh łitsoii bikááʼ nááʼiiniihí Sálaman áyiilaaígíí éí didlidgo nááhániihii áádóó akʼáán nááhániihii índa akʼah doo hózhǫ́ bíighah da.
8 Íídą́ą́ʼ ałdóʼ Sálaman áádóó Ízrel dineʼé tʼáá ałtso éí Héímath kin haalʼáádóó Ííjip tooh nílíníjįʼ diné tʼóó ahayóí yił áłah nilı̨́įgo tsostsʼid yiską́.
9 Tseebíí jı̨́ı̨́ góneʼ dahodósingo áłah silı̨́ı̨́ʼ, bikááʼ nááʼiiniihí tsostsʼid jı̨́įjįʼ dílzingo nideideezʼą́ índa tsostsʼid jı̨́įjįʼ dílzingo áłah silı̨́ı̨́ʼ.
10 Áko tsostsʼid nídízííd binih naadiin tááʼ yoołkááł góneʼ diné dabiníbaalgóó yééʼiisniiʼ índa Bóhólníihii éí yáʼádaatʼéehii David yę́ę áádóó Sálaman índa bidineʼé Ízrel yá yaa naayáhígíí yaa bił dahózhǫ́ǫgo bił nidahoozhǫǫh.
Bóhólníihii éí naaki góneʼ Sálaman yichʼįʼ yitʼíní íʼdiilyaa (1Kgs. 9:1-9)
11 Kótʼéego Sálaman éí Bóhólníihii bikin biiʼ sohodizin áádóó aláahgo naatʼáanii bighan ałtso áyiilaa, áko Sálaman éí Bóhólníihii bikin biiʼ sohodizin góneʼ áádóó tʼáá bí bighan góneʼ tʼáá ádeeshłííł nízinígíí yáʼátʼéehgo bá ááníiłgo łaʼyoolííł nítʼééʼ.
12 Áko tłʼéeʼgo Bóhólníihii éí Sálaman yichʼįʼ yitʼíní íʼdiilyaago ííłní, Nisodizin disétsʼą́ą́ʼ áádóó díí kin biyiʼdóó shichʼįʼ nááʼiiniih doo biniyé ádá nidinishtʼą́.
13 Shí éí yá bidádiʼníłkaalgo bąą doo nahałtin dago, doodaiiʼ kéyah ałtso bąąh nahachagiitsoh daʼdooyı̨́įłgo biʼníłniiʼgo, doodaiiʼ dineʼé bitahjįʼ naałniih níłniiʼgo
14 shidineʼé éí shízhiʼ bee dabiʼdójíii aʼohgo ádaʼdiilyaago áádóó sodadoolzingo áádóó hádashidéezʼı̨́įʼgo índa doo yáʼáshǫ́ǫ́góó ádaatʼínígíí yitsʼákaigo, áko índa yáʼąąshdę́ę́ʼ hodideestsʼı̨́ı̨́ł áádóó ádił nidaʼdziisíiʼii há yóóʼadideeshʼááł áádóó hakéyah hadaałtʼé náhodoodleeł.
15 Kʼad lá, hakʼi díníshʼı̨́įʼ doo ni, kweʼé hazʼánídóó shichʼįʼ sodadilzingo bá yínístsʼą́ąʼ doo.
16 Háálá kʼad díí kin nidiníʼą́ągo diyingo áshłaa, áko shízhiʼ bee wójíigo ahoolʼáa doo, áádóó bikʼi déshʼı̨́įʼgo tʼáá áłahjįʼ ákwii honishłǫ́ǫ doo.
17 Áko ni éiyá tʼáá nizhéʼé David yigááł yę́ęgi átʼéego yínáałgo bee nichʼįʼ haasdzíiʼii tʼáá átʼé bikʼeh ánítʼéego, áko bee nihoyíʼáanii índa bee nihodiyíʼáanii ádaa nilzįįhgo shinááł yínáałgo,
18 bibikááʼdóó nahatʼáii bitsʼą́ą́dóó bee óhólnííh yéego bidziilgo ádeeshłííł; éí nizhéʼé David yę́ę bił ahaʼdiʼnishtʼą́ągo ádííniidígíí Ízrel dineʼé yinantʼáa dooígíí ninahjįʼ doo łaʼ yiʼoh dínóolʼąął da.
19 Nidi shitsʼáíníyáago bee nihoyíʼáanii índa shibikʼeh óʼooʼníiłii ná áshłaaígíí yóóʼadííníʼą́ągo áádóó diyin dabidiʼníinii łaʼ bá nanilʼaʼgo índa bichʼįʼ nahółáago
20 kéyah nihaa diníʼáanii bitsʼą́ąjįʼ kónihideeshłííł áádóó díí kin biiʼ shízhiʼ baa haʼniih doo biniyé diyingo áshłaaígíí chʼíhideeshxą́ąłgo doo néideestséeł da índa dadineʼé tʼáá átʼé bitahgóó éí bá nahatʼiʼgo índa yaa nináʼádahodiltiʼgo ádeeshłííł.
21 Índa díí kin éí aláahdi átʼéhígíí bikʼee tʼóó bił adahayóigo yą́ą́h dah hidikáhígíí tʼáá ałtso ádadidooniił, Haʼátʼíí lá biniyé Bóhólníihii díí kéyah áádóó díí kin kóyiilaa lá?
22 Áko ádadidooniił, Dahazhéʼé yę́ę biBóhólníihii Diyin God éí Ííjip kéyahdę́ę́ʼ chʼíhoníʼeezhígíí yóóʼadazdeezʼą́ągo diyin dabidiʼníinii dajiiłtsood áádóó bichʼįʼ nidahojiłáago índa bá nidajilʼaʼgo biniinaa Bóhólníihii éí díí doo yáʼáshóonii tʼáá átʼé hakʼijįʼ kóyiilaa.
