2 Chronicles 8:1-18
8 Áko naadiin nááhai bíighahjįʼ Sálaman éí Bóhólníihii bikin biiʼ sohodizin índa tʼáá bí bighan ałtso áyiilaa.
2 Háíram éí kin hadaasʼáhígíí Sálaman yeidiníʼáanii, Sálaman hashtʼééhoodlaago ákwii Ízrel dineʼé kéédahatʼı̨́įgo áyiilaa.
3 Áádóó Sálaman éí Héímath-zóbah bee óhólníihgo bił hazʼą́ą́góó níná áádóó yikʼeh deesdlı̨́ı̨́ʼ.
4 Áko honoojíidi Tádmor kin shijaaʼgo áyiilaa índa Héímathgi kin hadaasʼáago biiʼ nooh nídaʼachíhígíí tʼáá átʼé ałdóʼ áyiilaa.
5 Áádóó Beth-hóran wódahdi kin shijaaʼígíí índa Beth-hóran wóyahdi kin shijaaʼígíí ditą́ągo binaagóó ahééʼítłʼingo áádóó bidáńʼdaditı̨́įhgo éí bichʼą́ą́h dah nídaʼatı̨́įhgo áyiilaa.
6 Áádóó Béíyalath índa kin hadaasʼáago biiʼ nooh nídaʼachíihii Sálaman bee hólónígíí áádóó kin hadaasʼáago biiʼ tsinaabąąs bijáád naakiígíí nideiłbąąsii hólónígíí índa biiʼ siláo łı̨́ı̨́ʼ yee nidaabaahii hólónígíí áádóó Sálaman éí Jerúsalem kin haalʼáagi, Tʼáá hodeeshbįįł, nízinígi tʼáá átʼé áádóó Lébanan kéyahgi índa kéyah tʼáá átʼé bee bóhólníihgo nahazʼánígóó dahasbįʼ.
7 Áádóó Het dineʼé, Ámor dineʼé, Píírez dineʼé, Jííbas dineʼé índa Háíva dineʼé tʼáá ałtso daadzíʼígíí éí doo Ízrel dineʼé danilíinii
8 éí badaʼáłchíní díí kéyahgi daadzíʼígíí, tʼáá éí Ízrel dineʼé tʼáadoo ałtso nidabistseedígíí, éí Sálaman binaalteʼ danilı̨́į dooleełgo néidiinil, áko díí jı̨́ı̨́góó ákótʼé.
9 Nidi Sálaman éí Ízrel dineʼé tʼáadoo binaalteʼ danilı̨́įgo áyiilaa da, nidi diné nidaabaahii áádóó siláo yindanitʼaʼí índa tsindaabąąs bijáád naakiígíí yee nidaabaahii áádóó łı̨́ı̨́ʼ yee nidaabaahii yindanitʼaʼí danilı̨́įgo áyiilaa.
10 Díí éí aláahgo naatʼáanii Sálaman binaanish naatʼiʼgi aląąjįʼ naazı̨́įgo bídahólnííh nítʼééʼ; naakidi neeznádiindóó baʼaan ashdladiin ánéelą́ąʼgo éí diné nidaalnishígíí yindantʼáá nítʼééʼ.
11 Áádóó Sálaman éí David yę́ę bikin haalʼáhídóó Féro bitsiʼ bił chʼízhníʼáazhgo kin bá ájiilaaíjįʼ bił níjítʼáázh, háálá ájíní, Sheʼasdzą́ą́ éí doo Ízrel dineʼé aláahgo binanitʼaʼí David yę́ę bikin yiiʼ kééhatʼı̨́į da doo, háálá Bóhólníihii bitsitsʼaaʼ dílzinii niitʼą́ągi hodiyin.
12 Ákohgo Sálaman éí chahaʼoh bidáahjigo Bóhólníihii bibikááʼ nááʼiiniihí áyiilaaígíí yikáaʼjįʼ didlidgo nááhániihii Bóhólníihii yichʼįʼ nááyiisniiʼ.
13 Áádóó tʼáá ákwíí jı̨́ Mózes yee haadzíiʼii bikʼehgo tʼáá daʼníłkééʼ baa nídahwiilzhíishgo hááʼáyı̨́ı̨́h jı̨́ áádóó dah néitı̨́įhgo índa hodílzingo áłah nídaʼadleeh góneʼ éí díí tʼááłáʼí nináháháahgo táadi náʼádleeh; éí dííkʼǫsh tʼáágééd bááh ályaii áádóó Péntekast wolyéii índa chahaʼohgi hodílzingo áłah náʼádleeh baa ninájíkah nítʼééʼ.
14 Áko hazhéʼé David yę́ę yee haadzíiʼii bikʼehgo náádaʼiiłniihii ałkééʼ níjaaʼgo nidaalnish doo índa Líívai dineʼé éí náádaʼiiłniihii binááł tʼáá ákwíí jı̨́ naanish hólǫ́ǫgi aa dahojiniih doo áádóó nidajilʼaʼ doo biniyé nihonínil, áádóó dáńʼdaʼditı̨́ı̨́h yaa ádahalyánígíí ałdóʼ ałkééʼ níjaaʼgo tʼáá dáńʼdaʼditı̨́ı̨́hgóó yaa ádahalyą́ą doogo niinínil; kótʼéego Diyin God yá naalʼaʼí David yee haadzííʼ.
15 Áko aláahgo naatʼáanii yichʼįʼ yee haadzíiʼii yódí bídadéétʼiʼii índa hanaanish danilı̨́į dooleełii éí náádaʼiiłniihii índa Líívai dineʼé tʼáá ałtso yidaʼósin.
16 Kʼad Sálaman, Kótʼéego nidaʼdoonish, níigo Bóhólníihii bikin biiʼ sohodizin bitsé siláii áyiilaa bijı̨́ı̨́dóó wóshdę́ę́ʼ ałtso áyiilaajįʼ yindaashnish; kótʼéego Bóhólníihii bikin biiʼ sohodizin ałtso hadidzaa.
17 Ákohgo Sálaman éí Ííziyan-gííber kin haalʼáágóó áádóó Íídam kéyahdi tónteel bibąąhgi Íílath kin haalʼáágóó ííyá.
18 Áádóó Háíram éí tsinaaʼeeł índa bá nidaalʼaʼí tónteel bikááʼ naʼalʼeeł bił béédahózinígíí bá nidaalʼaʼí yił hachʼįʼ ayííłʼaʼ; éí Sálaman bá nidaalʼaʼígíí yił Ófer hoolyéégóó yił eekaigo áádę́ę́ʼ dı̨́įdi neeznádiindóó baʼaan ashdladiin tálent* bíighahgo óola aláahgo naatʼáanii Sálaman baa dadzizyı̨́.
Footnotes
^ Tálent wolyéii tsostsʼidiindóó baʼaan ashdlaʼ dah hidiidloh daatsʼí óolyé.
