2 Chronicles 9:1-31
9 Áko Shííba kéyahdóó asdzą́ą́ naatʼááh éí Sálaman chʼíbiʼditʼáahgo yaa hodiiztsʼą́ąʼgo, éí bee hwééhodoozįįł biniyé nantłʼago naʼídíkidii yínahódídóołkił yiniyé Jerúsalem kin haalʼáajįʼ níyá, áko diné ląʼí hoł yíkai, áádóó spáis wolyéhígíí áádóó óola índa tsé daʼílíinii ghą́ą́ʼaskʼidii há deíłjiidgo yił níná. Áko Sálaman yaa níyáago biyiʼdi yee nitsíkeesígíí tʼáá átʼé yee yił ahił nahasneʼ.
2 Áádóó Sálaman bínabízhdééłkidígíí tʼáá átʼé yee hoł hoolneʼ, áko tʼáadoo łahgo néesʼı̨́ʼí tʼáá bééhózínígo Sálaman hoł hoolneʼ.
3 Áádóó Shííba kéyahdóó asdzą́ą́ naatʼááh éí Sálaman bibee hódzáanii bił bééhoozin, áádóó kin áyiilaa lá,
4 índa bikááʼ adání bikááʼdóó chʼiyáán índa yił nidahaʼáago bá nidaalʼaʼí dah nídinibįįhígíí, áhą́dígo bá nidaalʼaʼígíí áádóó dabiʼééʼ, bibee adlání yaa ádahalyáanii áádóó dabiʼééʼ índa Bóhólníihii bikin biiʼ sohodizin bichʼįʼ hááʼádáhígíí dziiłtsą́ągo tʼóó bikʼee hoł ahayóigo tʼáadoo ájóneʼgi da.
5 Aláahgo naatʼáanii ábijiní, Baa nanináhígíí índa nibee hódzáanii shikéyahdi bee naa haneʼgo disétsʼą́ʼígíí tʼáá aaníí lá.
6 Nidi yaa dahalneʼígíí doo yinishdlą́ą da nítʼééʼ. Tʼáá shí níyáago nééłʼı̨́įʼgo índa; ayóó átʼé nibee hódzáanii tʼáá bighąądígi nidi tʼáadoo bee shił hóóneʼ da lá; bee naa haneʼgo disétsʼą́ʼígíí biláahdigo ádaaníí lá.
7 Diné nidááhdóó naazíinii áádóó ná nidaalʼaʼí nidááhdóó naazı̨́įgo nibee hódzáanii tʼáá áłahjįʼ dayíistsʼą́ąʼii dooládóʼ bił dahózhǫ́ǫ da.
8 Bóhólníihii niDiyin God éí naa bił hózhǫ́ǫgo Ízrel dineʼé bá bikááʼdóó nahatʼáii yikááʼdóó dah nineesdáii baa haʼniih leʼ; Bóhólníihii éí Ízrel dineʼé hoolʼáágóó ayóóʼáyóʼnínígíí biniinaa doo haa dayitʼéégóó índa tʼáá ákogi átʼéego diné bá hóóʼáał doo biniyé aláahgo naatʼáanii ániilaa.
9 Neeznádiindóó baʼaan naadiin tálent bíighahgo óola áádóó spáis wolyéii tʼáá íiyisí tʼóó ahayóigo índa tsé daʼílíinii aláahgo naatʼáanii baazhnínil; díí spáis wolyéii éí Shííba kéyahdóó asdzą́ą́ naatʼááh éí aláahgo naatʼáanii Sálaman yeinínilígíí ákótʼéii tʼáadoo łaʼ baíʼnil da.
10 Áádóó ałdóʼ Háíram bá nidaalʼaʼí índa Sálaman bá nidaalʼaʼí éí Ófer hazʼánídę́ę́ʼ óola áádóó tsin álmug bídáátsélígíí índa tsé daʼílíinii nideizyı̨́.
11 Aláahgo naatʼáanii éí Bóhólníihii bikin biiʼ sohodizin áádóó aláahgo naatʼáanii bighan bíyah daniiʼáhígíí tsin álmug bídáátsélígíí yee áyiilaa, tsin tłʼóół naakitsʼáadah bąąh daneelzheeʼgo bee nidaʼaʼnéii índa tsin tłʼóół neeznáá bąąh daneelzheeʼgo bee nidaʼaʼnéii éí dahataałígíí yá áyiilaa áádóó éí tsin álmug bídáátsélígíí Júdah dineʼé bikéyahgi ákótʼéii tʼáadoo nídadziiltsą́ą da.
12 Áádóó aláahgo naatʼáanii Sálaman éí Shííba kéyahdóó asdzą́ą́ naatʼááh yinízinii tʼáá átʼé hóyííkeedígíí baazhdiníʼą́ índa aláahgo naatʼáanii baazhníláhígíí bideená haidiníʼą́ągo hakéyahgóó há nidaalʼaʼí bił aníjookai.
Sálaman astʼįįd áádóó tʼáá átʼé nítʼééʼ bééhoʼdílzin (1Kgs. 10:14-29; 2Chr. 1:14-17)
13 Áko tʼááłáʼí nááhaijįʼ hastą́ądi neeznádiindóó baʼaan hastą́diindóó baʼaan hastą́ą́h tálent dah hidiidloh bíighahgo óola éí Sálaman baa náhágééh.
14 Tʼáá náábíláahgo naalyéhé yá naazdáii áádóó naalyéhé baa nidahaniihígíí índa Aréíbiya kéyahdę́ę́ʼ aláahgo naatʼáanii tʼáá ałtso áádóó kéyahdóó naatʼáanii danilíinii ałdóʼ óola áádóó béésh łigaii éí Sálaman yaa nídeigééh.
15 Aláahgo naatʼáanii Sálaman éí naakidi neeznádiin naagé nitsaaígíí óola tʼáá bízhání yee ádayiilaa; éí tʼááłáʼí níʼą́ bikʼehgo óola hastą́ądi neeznádiin shékel* wolyéii bíighahgo bee ádaalyaa.
16 Índa táadi neeznádiingo naagé áłtsʼísígíí óola tʼáá bízhání yee ádayiilaa; éí tʼááłáʼí níʼą́ bikʼehgo óola táadi neeznádiin shékel wolyéii bíighahgo bee ádaalyaa. Áko aláahgo naatʼáanii éí Lébanan kéyahdę́ę́ʼ dilkʼis dantsxaazii bee kin ályaa wolyéii biyiʼ góneʼ niinínil.
17 Nááʼáłdóʼ aláahgo naatʼáanii éí yikááʼdóó nantʼáii ayóó ánóolningo áívori* wolyéii yee áyiilaa áádóó éí óola tʼáá bízhání yikʼíístiʼ.
18 Bikááʼdóó nahatʼáii bichʼįʼ hastą́ągo ałkʼi hooʼnilí haazʼá áádóó bikʼi dah adéesʼeezí óolago bikááʼdóó nahatʼáii bidiiʼá índa bikʼi dah asdáhí ałtsʼą́ą́hjí níʼáhígíí hólǫ́; éí ałtsʼą́ą́hjí bíighahgi náshdóítsoh bitsiijįʼ daditłʼooígíí beʼelyaago sizı̨́.
19 Náshdóítsoh bitsiijįʼ daditłʼooígíí naakitsʼáadahgo éí naaki níláago ałkʼi hooʼnilí ałtsʼą́ą́hjí yikááʼ dah naazı̨́, áádóó náánáłaʼ bee óhólníihii bił nahazʼą́ą́góó doo łaʼ ákótʼéego ánáánályaa da.
20 Aláahgo naatʼáanii Sálaman bibee adlání tʼáá átʼé óola bee ádaalyaa, índa Lébanan kéyahdę́ę́ʼ dilkʼis dantsxaazii bee kin ályaa wolyéii biyiʼ ásaaʼígíí éí óola tʼáá bízhání bee ádaalyaa; béésh łigaii éí doo bee ádaalyaa da, háálá Sálaman bíyoołkááł yę́ędą́ą́ʼ éí doo daʼílı̨́į da.
21 Háálá Sálaman bitsinaaʼeeł éí Háíram bá nidaalʼaʼí Társhish kéyahgóó nídaʼdiłʼołgo tááʼ nínáhah bikʼeh Társhishdóó tsinaaʼeełgi ádaatʼéií yee óola, béésh łigaii, áívori* wolyéii, mągítsoh índa tsídii bitseeʼ naashchʼąąʼígíí pííkak wolyéii ninádayiigééh.
22 Kótʼéego lá aláahgo naatʼáanii Sálaman éí nihokááʼgóó aláahgo naatʼáanii danilíinii tʼáá ałtso yiláahgo yódí índa bee hódzáanii yistʼįįd.
23 Áádóó nihokááʼdóó aláahgo naatʼáanii danilíinii tʼáá ałtso Sálaman éí Diyin God bee hódzáanii biih yiyííláhígíí bá dideestsʼı̨́ı̨́ł danízin nítʼééʼ.
24 Áko diné tʼááłáʼí nítínígo aa deidooléełii nidayiijááh nítʼééʼ: éí béésh łigaii bee ádaalyaii áádóó óola bee ádaalyaii áádóó ééʼ ádaatʼéii áádóó deezlá índa spáis daolyéhígíí, łı̨́įʼda índa dzaanéezda tʼááłáʼí nináháhááh bikʼeh aa dajiinííł nítʼééʼ.
25 Sálaman éí dı̨́įdi mííl łı̨́ı̨́ʼ áádóó tsindaabąąs bijáád naakiígíí dabighan bee hólǫ́ índa naakitsʼáadahdi mííl łı̨́ı̨́ʼ yee nidaabaahígíí, éí díí bá hashtʼedahootʼéegi kin hadaasʼáágóó niyiiznil, áádóó Jerúsalem kin haalʼáagi aláahgo naatʼáanii binaashiigóó yił niinínil.
26 Áádóó tooh nílíní Yufréítiizdóó Filístiya dineʼé bikéyahjįʼ áádóó Ííjip dineʼé bikéyah bibąąhjįʼ aláahgo naatʼáanii danilíinii tʼáá átʼé éí Sálaman yinantʼá.
27 Áádóó aláahgo naatʼáanii tsé yílʼáhígíigi átʼéego Jerúsalemgi béésh łigaii bee ádaʼazįįdgo áádóó síkamor tsin honítsʼaaʼgi yílʼáhígíigi átʼéego dilkʼis tsin bee ádaʼazįįdgo áyiilaa.
28 Áko Ííjip kéyahdę́ę́ʼ áádóó tʼáá ałtso kéyah naaznildę́ę́ʼ Sálaman éí łı̨́ı̨́ʼ baa heesgı̨́.
Sálaman daaztsą́ (1Kgs. 11:41-43)
29 Kʼad Sálaman łahjįʼ átsé áádóó akéeʼdi yaa naayáhígíí éí Diyin God yá dahalneʼii Néíthan áádóó Sháíloh hazʼánídóó diné nilíinii Aháíjah índa á ooʼíinii Ído wolyéii éí Nííbat biyeʼ Jerobówam bídéétʼiʼii yiyiiłtsánígíí díí bindaaltsoos bikʼinídaháasdzo.
30 Jerúsalemgi Sálaman éí Ízrel dineʼé tʼáá ałtso yinantʼáago dízdiin nááhai.
31 Áádóó Sálaman dahazhéʼé yę́ę daʼiiłhaazhígi átʼéego ajiiłhaazh áádóó hazhéʼé David yę́ę bikin haalʼáagi yóóʼáhoʼdiilyaago hayeʼ Riihobówam hatsáskʼehgi nantʼáá nítʼééʼ.
Footnotes
^ Tádiindóó baʼaan naaki shékel wolyéii éí tʼááłáʼí dah hidiidloh.
^ Áívori (ivory) jiníigo chı̨́ı̨́h yee adilohii biwózhahí jiníigo óolyé.
^ Áívori (ivory) jiníigo chı̨́ı̨́h yee adilohii biwózhahí jiníigo óolyé.
