2 Corinthians 11:1-33
11 Tʼáá yíní ádinígi átʼéego tʼáá áłtsʼíísígo hadeesdzihígíí bichʼįʼ hadaʼíínółníi doo nisin. Tʼáá shǫǫdí shichʼįʼ hadaʼíínółní!
2 Chʼikę́ę́h tʼah doo diné bee haleehii éí bahastiin tʼááłáʼí dooleełígi átʼéego Christ baa danihidiyéʼą́ągo Diyin God kʼehgo łeʼhasin bee nihaa łeʼnisin.
3 Nidi níłchʼi bidaʼiiníziinii binanitʼaʼí binahagiz yee átsé asdzą́ą́ Íiv yiʼdeezloʼ yę́ęgi átʼéego nihintsíkees tʼááłáʼíígíí bee Christ nihił danilíinii bitsʼą́ąjįʼ tʼáá ádzaagóó anihidiyooʼishii éí nihá binásdzid.
4 Háálá łaʼda náánáádáałii éí Jesus baa hwiilneʼii bitsʼą́ą́jí Jesus łahgo ánáánátʼéii yaa nááhálneʼgo, doodaléiʼ Níłchʼi Diyinii nihee dahazlı̨́įʼii bitsʼą́ą́jí níłchʼi łahgo átʼéii nihee náádahadleehgo, náádoodaléiʼ haneʼ yáʼátʼéehii nídadooláhígíí bitsʼą́ą́jí łahgo átʼéii nínáádadoołéego, jó, éí tʼáá chaałída baa ádadiyohtʼaah.
5 Daalʼaadii aláahdi ádaatʼéii doo tʼáá biʼohgo áníshtʼéego ádaa nitséskees da.
6 Azhą́ yátiʼ daatsʼí doo yiishchįįh da nidi, baa yáshtiʼígíí éí tsʼídá shił bééhózin; díidíígíí tʼáá ałtsoní binahjįʼ tʼáá ałtsojįʼ nihił ííshjání íishłaa.
7 Diyin kʼehgo ayóó átʼéii ádanihididoolníłígíí biniyé aʼohgo íʼdiishyaago tʼáadoo bideenánígóó Diyin God baa haneʼ yáʼátʼéehii bee nihił hweeshneʼígíísh bee ádił asisziih?
8 Náánáłaʼ daʼoodlání áłah nídaadleehii béeso yee shíká anájah nítʼééʼ yę́ę bee nihinishishnish.
9 Áádóó nihitahgi naasháago tʼáadoo leʼé bídin nishłı̨́ yę́ędą́ą́ʼ tʼáadoo łaʼda naanish biih yíłtʼeʼ da. Háálá Masedóniyadę́ę́ʼ ałkʼisóó danilíinii nidahaaskaígíí bídin nishłíinii éí yee shíká ííjééʼ. Áko łaʼda tʼáá haʼátʼéegoda naanish biih hodeeshtʼeełjįʼ bił tʼą́ą́ʼ sétı̨́ áádóó bił tʼą́ą́ʼ sétı̨́į doo.
10 Christ binahjįʼ tʼáá aaníígóó yáshtiʼgo ádíshní, Akéya hoolyéegi, díí bee aa haʼniihígíí tsʼídá doo didoolyił da.
11 Haʼátʼéegoshąʼ? Daʼ doo ayóóʼánihííníshʼníi daígíí daatsʼí biniinaa? Jó, ayóóʼánihííníshʼnínígíí Diyin God shá bił bééhózin!
12 Áko kʼad baa naasháhígíí tsʼídá tʼáá éí baa naasháa doo, áko łaʼ ádeinízingo, Paul éí Diyin God bá joolnishígíí tʼáá bił aheełtʼéego nideiilnish, danízingo ádaa dahaʼniihígíí dabiyoochʼíidgo béédahodoozįįł.
13 Háálá tʼáá ádzaagóó nidazhʼnitinígíí éí tʼóó ádahozhdilʼı̨́įgo daalʼaadii dajílı̨́, naalnishí bindaʼadloʼii dajílı̨́, éí Christ yá daalʼaadii tʼóó bééʼádahozhdilʼı̨́.
14 Áyaanída Séítan tʼáá bí níłchʼi bidaʼiiníziinii binanitʼaʼí nilíinii nidi, łahgo átʼéego diyingo naalʼaʼí bitsʼádiʼnídínígi átʼéego yíʼínídiilʼįįh.
15 Éí bąą bá nidaalʼaʼí ałdóʼ łahgo átʼéego tsʼídá tʼáá ákogi éʼétʼé yá nidaalʼaʼí nahalingo yíʼínídadiilʼįįhígíí doo tʼóó bikʼee ił ahayói da. Yaa nidaaskaígíí bikʼehgo atéʼélʼı̨́ biiʼjįʼ tʼóó bá nidahwiiztʼiʼ doo.
Paul yilʼaadii nilı̨́įgo tiʼhoozniiʼii
16 Kʼad díí bee hanáánásdziih, Łaʼda doo laʼ áhojilyą́ą da, tʼáadoo dashijóʼníní, nidi nihí łaʼ ákódashíínóhníigo doo áhályáaniigi áníshtʼéego tʼóó yéego shił hadaʼíínółní, éí binahjįʼ shí ałdóʼ tʼáá áłtsʼíísígo aa hodeeshʼnih.
17 Kʼad díí bee yáshtiʼígíí doo Bóhólníihii yee hasʼą́ą da, nidi doo áhályáanii kʼehgo ádaa haʼniih bee ádaa jóshdlíigo ádíshní.
18 Jó, ląʼí nihokááʼ bił nidahaztʼiʼii yee ádaa dahaʼniih, éí lá bąą shí ałdóʼ ádaa hodeeshʼnih ni.
19 Jó, tʼáá shı̨́ı̨́ dahonohsą́ągo doo ádahalyáanii bizaad bąą nihił dahózhǫ́ǫgo bichʼįʼ hadaʼíínółní!
20 Háálá diné danilíinii naalteʼ ádanihósingo, doodaléiʼ tʼóó nihaa nahodikaigo, doodaléiʼ naʼadloʼ yee łídanihicháazhgo, doodaléiʼ ayóó átʼéii ídaʼdilʼı̨́įgo, náádoodaléiʼ nihizanídadziltsʼı̨́įh nidi éí tʼáá ałtso bichʼįʼ hadaʼíínółní.
21 Ákónihidiilníłígi doo bíniildzil da, éí baa yániidzin! Ákondi tʼáá háiida tʼáá haʼátʼíhígíida tʼáadoo náhoniyésí bee ádaa hojiʼniihgo shí ałdóʼ tʼáadoo náhoniyésí tʼáá éí bee ádaa hodeeshʼnih (doo áhályáanii nahalingo ádíshní).
22 Daʼ éísh Hííbrew dineʼé danilı̨́? Shí lá ałdóʼ tʼáá éí nishłı̨́ ni. Daʼ Ízrel dineʼéésh danilı̨́? Shí lá ałdóʼ tʼáá éí nishłı̨́ ni. Daʼ Éíbraham bitsʼą́ą́dóó yichíiłiísh danilı̨́? Shí lá ałdóʼ tʼáá éí nishłı̨́ ni.
23 Daʼ Christ yá nidaalʼaʼiísh danilı̨́? Shí lá tʼah aláhígo yáʼátʼéehgo éí nishłı̨́ ni; naanish tʼah aláhídi ádaatʼéii baa naashá, doo jóołtaʼ ánéelą́ąʼdi náshidiʼneesghaal, tʼah aláhídi átʼéego awáalyaaí nísísdlı̨́ı̨́ʼ, índa ląʼídi kʼasdą́ą́ʼ shiʼdiisyı̨́ (doo áhályáanii nahalingo ádíshní).
24 Jew dineʼé danilíinii tádiindóó baʼaan náhástʼéidi nínádashidiiłtsxisgo ashdladi ákónéelą́ąʼdi nínádashineestsxas.
25 Táadi tsin bee náshidiʼneesghaal; łah tsé bee kʼasdą́ą́ʼ shił nidzílneʼ. Táadi tsinaaʼeełtsoh shił náztsʼil; łaʼa tłʼééʼ áádóó łaʼa jı̨́ dah naashʼeeł nítʼééʼ;
26 nídíshdááhgóó díí bee bádahadzidii bitaa séyá, tooh danílíinii, aghadaʼiiʼníiłii, tʼáá shí shidineʼé nilíinii, doo Jew dineʼé danilíinii, kin hadaasʼáii dabiyiʼgóó, dahonoojítahgóó áádóó tónteel bikááʼgóó, áádóó ałkʼisóó ádahodilʼíinii bee bádahadzidii bitaa séyá,
27 naanish shiiłhéego áádóó shichʼįʼ nahwiiʼnáago tiʼhwiiséniiʼ, haa shı̨́ı̨́ néelą́ąʼdi tłʼééʼ bíighah doo ashhoshgóó dichin áádóó dibááʼ nishłı̨́įgo, tʼáá ahą́ą́h chʼiyáán tʼáágééd tádííyá, yishdlóohgo, ééʼ bídin nishłı̨́įgo tádííyá.
28 Áádóó náánáłaʼ bikʼee tiʼhwiiséniiʼígíí tʼáadoo chʼídaashʼaʼí, daʼoodlání áłah nídaadleehii tʼáá ałtso baa áháyą́ągi tʼáá ákwíí jı̨́ bichʼįʼ shíniʼ ííʼá.
29 Łaʼda biʼoodląʼ doo bidziilgóó shí éí shił bahojoobáʼí. Łaʼda adoosihjįʼ abidiʼnootʼaaʼgo éí biniinaa doo shił haldin da.
30 Tsʼídá ádaa hashʼniih dooleeł ládą́ą́ʼ, tʼáá haʼátʼíhída doo shidziilgóó ásósinígíí tʼéí bee ádaa hashʼniih doo.
31 NihiBóhólníihii Jesus Christ biDiyin God tʼáá éí biTaaʼ nilíinii, hoolʼáágóó baa haʼniihii, bił bééhózingo doo shiyoochʼíid da.
32 Damáskasdi kin haalʼáhígíí Áretas naatʼáanii nilínígíí bá yinanitʼaʼí nilíinii bisiláo shił nidadoodił biniyé hadaʼídółʼı̨́ı̨́ʼ, yiłníí nítʼééʼ,
33 nidi kin haalʼáii ditą́ągo binaa ahééʼítłʼinígíí tsésǫʼ góyaa tsʼiizis shił bidaadloʼgo biyaa háíyá.
