2 Corinthians 3:1-18
3 Tʼáá nihí yáʼátʼéehgo ádaa haneʼésh baa nínáádiitʼáázh? Daʼ yáʼátʼéehgo nihaa haneʼgo nihichʼįʼ naaltsoos ádoolníłígíísh ádá bídin niidlı̨́? Éí doodaiiʼ naaltsoos ákótʼéii aají nihitsʼą́ą́dóó deeznaʼiísh ałdóʼ ádá bídin niidlı̨́?
2 Tʼáá nihí naaltsoos yáʼátʼéehgo nihaa halneʼii danohłı̨́įgo, shí índa Timothy nihijéí biyiʼdi bee akʼeʼashchíinii danohłı̨́, áko éí akʼeʼashchínígíí diné tʼáá ałtso dayółtaʼgo bił béédahózin,
3 áko éí Christ bitsʼą́ą́dę́ę́ʼ haneʼii bee nihił hwiilneʼígíí danohłı̨́. Bee akʼeʼalchíhí éí doo bee akʼeʼashchı̨́į da, nidi Diyin God hináanii biNíłchʼi Diyinii bee akʼeʼashchı̨́, tsé dilkǫǫhgo hashtʼeelyaaígíí bikáaʼgi doo bee bikʼedaʼashchı̨́į da, nidi ajéí biyiʼdi bee bikʼedaʼashchı̨́.
4 Ákótʼéego Christ binahjįʼ Diyin God baa dzííníidlí.
5 Tʼáá nihí ániitʼéhígíí bee bíniilʼą́ éí doo diiʼníi da, nidi Diyin God éí bee bíniilʼą́,
6 éí bee ahaʼdeetʼą́ ániidíii baa dahodiilnihgi bohónéedzą́ągo bíniilʼą́ągo nihá áyiilaa, éí doo bee hazʼáanii bee akʼedaʼashchíinii átʼée da, nidi Níłchʼi Diyinii yaa halneʼ. Háálá bee hazʼáanii bee akʼedaʼashchíinii doo bikʼeh hólʼínígíí biniinaa óʼoołdįįł, nidi Níłchʼi Diyinii éí iiná aa yiilé.
7 Áko ałkʼidą́ą́ʼ bee hazʼáanii bikʼehgo aniné yee inaalnish yę́ę, éí tsé bikʼi naʼashkʼaazhgo bikʼeʼashchíinii bitsʼą́ą́dóó bee hazʼáanii ayóó átʼéii bitsʼádiʼnílííd deeztʼiʼ silı̨́ʼígíí biniinaa, azhą́ Mózes biniiʼ bitsʼádiʼnílídígíí doo wózhǫ́ bitsʼádiʼnílííd náádleeł da nidi, Ízrel dineʼé doo deinóołʼı̨́ı̨́ʼ átʼée da.
8 Díí ákótʼéego ałkʼidą́ą́ʼ bee hazʼáanii ayóó átʼéii yee inaashnishgo, jóʼáko Níłchʼi Diyinii tʼah aláhídi ayóó átʼéii yee inaalnish.
9 Háálá ałkʼidą́ą́ʼ bee hazʼáanii bee naʼatseedgo ánihwiitʼaah yee inaalnishii éí ayóó átʼéego, jóʼáko tsʼídá tʼáá ákogi éʼétʼé Níłchʼi Diyinii yee inaalnishii éí tʼáá íiyisí aláahdi átʼéego ayóó átʼéii ánáánátʼé.
10 Kweʼé ałdóʼ tʼáá aaníí kónáánátʼé, łah ayóó átʼé atsʼádiʼnílííd nítʼééʼ yę́ę éí kʼad ánásʼzįįdígíí tʼah aláhídi átʼéego atsʼádiʼnílídígíí kʼad ákóneʼ inaalnish.
11 Ákohgo ayóó átʼé atsʼádiʼnílídígíí ánásʼzįįdgo, atsʼádiʼnílííd doo bił yóóʼahodoogáłígíí éí tsʼídá aláahdi átʼéego inaalnish.
12 Jó, kótʼéego nihił chohooʼı̨́įgo bąą, tʼáá íiyisí doo dasiitiʼgóó dahwiilneʼ,
13 nihí doo Mózes átʼı̨́ yę́ęgi ádeiitʼı̨́į da, jó, éí haniiʼ bitsʼádiʼnílíidgo, doo bitsʼádiʼnílíid da yileełígíí ádin silı̨́įʼjįʼ Ízrel dineʼé doo yikʼi dadooghał da jinízingo bikʼíníjíłtih nítʼééʼ.
14 Nidi éí bíniʼ bił chʼaa daashchı̨́, háálá díí jı̨́įjįʼ, bee ahaʼdeetʼą́ áłtséhígíí dayółtaʼgo, tʼáá shiidą́ąʼdii bintsíkees bikʼídaʼastiʼ yę́ę doo nahgóó iiltsóos da, háálá éí Christ bee tʼéiyá nahgóó adooltsos.
15 Tʼáá aaníí, azhą́ tʼáá Mózes binaaltsoos díí jı̨́ı̨́góó nídayółtah nidi tʼahdii bijéí biyiʼdi bintsíkees tʼáá bikʼídaʼastiʼgo átʼé,
16 nidi Bóhólníihii yichʼįʼ dah nídiikaigo dabintsíkees bikʼéstiʼ yę́ę nahgóó iiltsos.
17 Bóhólníihii éí Níłchʼi Diyinii nilı̨́, áko Bóhólníihii biNíłchʼi Diyinii hólǫ́ǫgi ákweʼé áhonídleeʼ.
18 Áko nihí tʼáá áníiltso tʼáadoo nihiniiʼjįʼ bikʼídaʼastiʼí biiʼ adéestʼı̨́ı̨́ʼ biyiʼjįʼ adéestʼı̨́ʼígi átʼéego Bóhólníihii bee bitsʼádiʼnílíidii daníilʼı̨́, áádóó Bóhólníihii éí Níłchʼi Diyinii nilı̨́įgo nihiyiʼ naalnishgo Bóhólníihii bitsʼádiʼnílídígi átʼéego tʼáá ałkééʼ honíʼą́ągo nihí ałdóʼ nihitsʼádiʼnílííd dadiidleeł.
