2 Corinthians 4:1-18
4 Éí bąągo Diyin God yee aʼááh nízinii nihee hazlı̨́ʼígíí biniitʼaa díí bee neiilʼaʼgo doo nihąąh nahwiikaad da.
2 Nihí baa yádahasinii índa nanilʼingo óʼoolníiłii yóóʼadiitʼą́; nihí doo naʼadloʼ bee łíʼiicháazh da, doo nidi Diyin God bizaad bee nahwiigizgo baa hwiilneʼ da, nidi Diyin God binááł tʼáadoo bahatʼaadí tʼáá aaníinii baa hwiilneʼgo diné tʼááłáʼí nítínígo yáʼátʼéehgo nihaa ákodanízin.
3 Áko azhą́ haneʼ yáʼátʼéehii baa hwiilneʼii doo bééhózin da nidi, éí ádabidiʼdooldįįłii bídayéełkaahígíí tʼéiyá bichʼįʼ ákótʼé.
4 Éí hoł nahazʼą́ą́jí díí nihokááʼ diyin áhodilʼíinii níłchʼi bidaʼiiníziinii binanitʼaʼí wolyéii doo daʼoodlání dabíniʼ yił chʼaa yishchı̨́, áko Christ, éí Diyin God yináłtʼéii bee bitsʼádiʼnílíidii baa haneʼ yáʼátʼéehii bee adinídíín éí nihokááʼ diyin áhodilʼíinii doo daʼoodlání yikʼi diiłdíin dooleełgi yitsʼą́ąjįʼ yélná.
5 Háálá doo tʼáá nihí ádaa hwiilneʼ da, nidi Christ Jesus éí Bóhólníihii nilı̨́įgo baa hwiilneʼ, índa nihí éí Jesus bá nihinaalʼaʼí niidlı̨́įgo hwiilneʼ.
6 Diyin God éí, Chahałheeł biyiʼdę́ę́ʼ adinídíin leʼ, dííniidii tʼáá éí Christ biniiʼ yikʼi diiłdíinii nihił béédahodoozįįł biniyé bee bitsʼádiʼnílííd bee bééhózinii nihijéí yiiʼ dííłdíín.
7 Nidi hashtłʼish łeetsʼaaʼ nahoniidlingo díí tʼáá íiyisí ílíinii nihiiʼ hólǫ́, éí tsʼídá aláahdi átʼéego adziil nilíinii Diyin God bitsʼą́ą́dę́ę́ʼ átʼéego bééhózin doo biniyé, tʼáá nihí nihitsʼą́ą́dóó éí dooda.
8 Tʼáá ałtsojįʼ nihichʼįʼ nahwiiʼnáa nidi, doo tsístłʼaitʼaash da; tʼóó nihił haada nidi, doo nihił áhádįįh da;
9 atínihiʼdilʼı̨́į nidi, doo nihikʼiʼnichéeh da, naaʼanihínídzílghał nidi, doo nanihidiʼtseed da.
10 Jesus bitsʼą́ą́dę́ę́ʼ iiná ałdóʼ tʼáadoo bahatʼaadí nihitsʼíís biiʼ hólǫ́ǫgo yidooltsééł biniyé tʼáá áłahjįʼ aniné bee nahodítʼéégóó Jesus bá tádiitʼaash.
11 Nihitsʼíís dínóonéłígíí biiʼ Jesus bitsʼą́ą́dę́ę́ʼ iiná tʼáadoo bahatʼaadí néidooltsééł biniyé tʼah hiniiʼnáago tʼáá áłahjįʼ Jesus bá díníiʼnéełjįʼ ninánihiʼdiitʼaah.
12 Áko nihíjí aniné nihinaalnish, nidi aají nihíjí iiná nihindaalnish.
13 Łaʼ oosdląądgo ání, Iisisdląąd, éí bąą haasdzííʼ, níigo akʼeʼashchínígi átʼéego nihí ałdóʼ Níłchʼi Diyinii bee iiniidlą́, éí bąą nihí hahiidziih.
14 Háálá Diyin God éí Bóhólníihii Jesus néidiisáhígíí tʼáá éí ałdóʼ baa hoolzhiizhdi Jesus yee náánihididoołjah, áádóó tʼáá łaʼ bizhiʼee tʼáá hó hojílǫ́ǫdi nánihizhdooʼishgo nihił bééhózin.
15 Éí tʼáá ałtsojįʼ nihá yáʼátʼééh biniyé, nihokááʼ dineʼé bitahgóó Diyin God bibee ajoobaʼ tʼáá náás noosééł bikʼeh ahééh hwiindzin bilááh yileeł, éí Diyin God baa haʼniih doo biniyé áánííł.
Oodląʼ bee iináanii
16 Azhą́ atsʼíís bee ániitʼéii yizhash nidi, doo nihąąh nahakaad da, háálá nihiyiʼdi bee ániitʼéii éí tʼáá ákwíí jı̨́ ániidí ánáálnííł.
17 Háálá díí áłtsʼíísígo tʼóó kónígháníjįʼ tiʼhwiiʼníhígíí, éí tʼáadoo beełtʼéhígóó tʼáá íiyisí aa haʼniih nihá hashtʼeilééh. Áko díí aa haʼniih éí hoolʼáágóó hólóonii doo niitʼéehii átʼé.
18 Éí biniinaa nihí daatʼíinii doo baa nitsídeiikees da, nidi doo daatʼíinii baa nitsídeiikees, háálá daatʼíinii éí tʼóó kónígháníjįʼ ádaatʼé, nidi doo daatʼíinii éí doo bá nidahwiiztʼiʼ da.
