2 Corinthians 5:1-21
5 Háálá nihitsʼíís níbaal nahalingo nihokáaʼgi biiʼ kéédahwiitʼínígíí ábiʼdisdįįd nidi, kin yílá doo bee ályaii, yáʼąąshdi hoolʼáágóó nihá hólóonii Diyin God bitsʼą́ą́dę́ę́ʼ nihee hólǫ́ǫgo nihił béédahózin.
2 Kʼad yáʼąąshdi biiʼ kééhwiitʼı̨́į dooleełii biih jóyaʼ laanaa daniidzingo, bíká ádił nídahodiilchił,
3 áko éí biih dahisiikaigo doo atsʼíís tʼáágééd danihidiʼdooltséeł da.
4 Háálá tʼahdii díí nihitsʼíís níbaal nahalingo biiʼ kééhwiitʼı̨́įgo ádił nídahodiilchiłgo ádił háádeiidzoł; éí doo biiʼ hadahidiikah da daniidzin, nidi yáʼąąshdę́ʼígíí biih dahidiikah daniidzin, áko iiná ániidíii biniinaa díí atsʼíís dadootsaałii yóóʼadooldoh.
5 Tsʼídá díidíígíí biniyé Diyin God hashtʼenihiilaago tʼáádóo nídí bee ééhózinii tʼáá bí Níłchʼi Diyinii nihaidiníʼą́.
6 Éí bąą nihí tʼáá áłahjįʼ nihił dahózhǫ́ǫgo chánah daniidlı̨́; nihitsʼíís nihighan átʼéego tʼahdii biiʼ kéédahwiitʼı̨́įgo Bóhólníihii bitsʼą́ądi dahoniidlónígíí nihił béédahózin,
7 háálá oodlą́ bee dayíníikááh, anááʼ bee daatʼíinii bikʼehgo éí dooda.
8 Nihił dahózhǫ́ǫgo chánah daniidlı̨́įgo, danihitsʼíís bitsʼą́ądi, íiyisí danihighandi Bóhólníihii bił dahoniidlǫ́ǫ dooígíí laanaa daniidzin.
9 Éí bąą azhą́ kweʼé nihitsʼíís biiʼ dahoniidlǫ́ǫ nidi, doodaléiʼ bitsʼą́ądi dahoniidlǫ́ǫ nidi, tʼáá áłahjįʼ Christ bił dahoniilzhǫ́ǫ dooleeł biniyé yéego ádeiitʼı̨́.
10 Háálá tʼáá áníiltso Christ bibikááʼdóó ánihwiitʼaah bidááhdóó nihidiikah, tʼááłáʼí niitínígo tʼáá nihitsʼíís biiʼ kéédahwiitʼı̨́įgo ádeiitʼįįdii bikʼehgo, yáʼátʼéehii éí doodaléiʼ doo yáʼátʼéehii tsʼídá bą́ą́h niidlı̨́ı̨́ góneʼ nihaa nídahódóotʼįįł.
Kʼé náhodoodleeł biniyé naʼalʼaʼ
11 Áko Bóhólníihii Christ bikʼee yééʼ hwiindzin nihił bééhózinígíí bąą, yéego diné bił hwiilneʼgo bíniʼ bá ádahwiilneʼ, nidi nihí ániitʼéhígíí Diyin God bił bééhózin, tʼah nítʼééʼ lá nihí ałdóʼ nihaa ákodanoohsįįh łeh nisingo shił chohooʼı̨́.
12 Nihí doo tʼóó nihichʼįʼ chʼíʼínáádiyiiʼnił da, nidi biniyéii hólǫ́ǫgo nihaa dadzíínóhłíi doo biniyé íitʼı̨́, áko diné bijéí biyiʼ yáʼáhootʼéehgo doo ádaa haʼniihii, nidi atsʼíís kʼehgo nílʼíinii tʼéiyá yee ádaa haʼniihii bee bichʼįʼ tʼą́ą́ʼ háádadoohdzihii nihee dahólǫ́ǫ doo biniyé íitʼı̨́.
13 Doo nihíniʼ bíighah da nahoniidlingo éí Diyin God bá ákóniitʼéé nítʼééʼ, doodaléiʼ nihíniʼ bíighahgo éí nihí aají nihá ákóniitʼé.
14 Christ beʼayóóʼóʼóʼniʼ nanihiiłná, háálá éí tʼáá łashdiltʼéhígíí tʼáá ałtso bá dadziztsą́ągo nihił bééhoozin; ákótʼéego tʼáá ádzíłtso dazneezná.
15 Áko hó tʼáá ałtso bá dadziztsą́, dahinánígíí doo tʼáá bí ádá dahináa da doo biniyé, nidi bá dadziztsą́ą́dę́ę́ʼ náázdiidzáhígíí há dahináa doo biniyé bá dadziztsą́.
16 Éí bąą kʼad doo diné kʼehgo aa nitsáhákees bee łaʼda baa nitsíikees da; azhą́ lá łah Christ tʼóó diné nilı̨́įgo baa nitsíikees nítʼééʼ nidi, kʼad éí doo ákótʼéego baa nitsíikees da.
17 Éí bąą tʼáá háiida Christ yił łáʼí nilı̨́įgo, éí diné ániidíii ábiʼdiilʼįįh; tʼáá shiidą́ąʼdii bee biyiʼ áhootʼéé nítʼééʼ yę́ę bitsʼą́ąjįʼ yóóʼiildoh, jóʼakon, ániidíii bee biyiʼ honítʼiʼ yileeh.
18 Diyin God bitsʼą́ą́dóó díí tʼáá ałtsoní bee ayiʼ honítʼiʼii, tʼáá bí Christ binahjįʼ bił kʼé daʼahidiiʼníigo áyiilaa, índa Diyin God yichʼįʼ kʼé nídadínóodzįįł biniyé diné bił dahodiilnihgo nihaidiníʼą́.
19 Diyin God éí Christ yiiʼ hólǫ́ǫgo nihokááʼ dineʼé yił kʼé néistʼįįd, diné doo yee ákǫ́ǫ́ ádaadzaii tʼáá yikʼijįʼ yisʼą́ągo éí dooda, áádóó haneʼ bee kʼé hwiindzinii yee nihaʼoozlíiʼgo nihaidiníʼą́.
20 Éí bąą nihí Christ yá naazíinii daniidlı̨́įgo Diyin God nihee hazhóʼógo náʼookąąh. Diyin God bił kʼé daʼahidohní danihidiiʼníigo Christ bá nídanihiikąąh.
21 Háálá bił łáʼí daniidlı̨́įgo Diyin God tsʼídá tʼáá ákogi átʼéii bee tsʼídá tʼáá ákogi ádaniitʼée doo biniyé Christ, bąąhági átʼéii doo átʼé nízinii, nihibąąhági átʼéii bikʼi diitʼą́.
