2 Corinthians 7:1-16
7 Ayóóʼánihóshʼníinii, díí kótʼéego nihaa deetʼą́ągo biniinaa, haaʼíshąʼ nihitsʼíís índa nihiníłchʼi niyiiłchxǫǫhii nahjįʼ kódadiilnííł, áádóó Diyin God dadíníilzingo diyingo iiná hadaałtʼéego ádadiilnííł.
Paul éí Christ dayoosdląądii yaa bił hózhǫ́
2 Nihijéí biiʼ nihá dahoołʼaah, tʼáadoo łaʼda bąąhági áhwiilyaa da, łaʼda doo yiilchǫʼ da, łaʼda doo łíshiicháazh da.
3 Díí doo nihainíshtʼı̨́įgo ádíshníi da, háálá tʼáá íídą́ą́ʼ ánihidííniid, Łáʼí daniidlı̨́įgo niiʼnéełgo, doodaiiʼ dahiniiʼnáago nihijéí biiʼ dahonohłǫ́ǫ doo.
4 Tʼáá íiyisí nihaa jííníshłíigo yáshtiʼ, tʼáá íiyisí nihaa hashniih, áko tʼáá hazhóʼó atínihiʼdilʼı̨́į nidi tʼáá íiyisí shikʼi hataʼ áádóó shił hózhǫ́.
5 Azhą́ Masedóniyadi niitʼáázh yę́ędą́ą́ʼ nidi, nihitsʼíís tʼáadoo hanáályı̨́įʼ da, nidi tʼáá ałtsodę́ę́ʼ atínihiʼdoolʼįįd, nihinaadę́ęʼgo saad nihídeiʼááh nítʼééʼ, nihí éí tʼáá ádíiyiʼídi nihił yééʼ nítʼééʼ.
6 Diyin God éí bąąh nidahwiizkaadii hayiʼ iyoołniihii, éí Táítas níyáhígíí yee hanihiʼiyoosniid.
7 Éí níyáhígíí doo tʼáá éí tʼéiyá bee da, nidi bí aají nihee haʼoosniidígíí bee nihí ałdóʼ hanihiʼiyoosniid, háálá nihídin danohłı̨́įgo, áádóó daahchago índa shídanoohdlı̨́įgo yee nihił hoolneʼ, áko éí bąą tʼah aláhídi átʼéego shił nááhoojǫǫd.
8 Háálá azhą́ shinaaltsoos bee yínííł biih nihíínil nidi, kʼad éí doo bikʼédí nishłı̨́į da, tʼáá lá aaníí bikʼédí sélı̨́įʼ nidi, háálá éí naaltsoos yínííł yiih nihíínilgo shił bééhózin, nidi éí tʼóó kónígháníjįʼ ákónihiilaa.
9 Jó ákohgo, kʼad éí shił hózhǫ́, yínííł biih noodeeʼígíí éí doo biniinaa da, nidi yíní biih noodeeʼígíí bee łahgo átʼéego Diyin God bichʼįʼ tsíńdasidookézígíí bąą shił hózhǫ́, háálá Diyin God bíniikʼehgo yínííł biih noodeeʼ, áko nihinahjįʼ haʼátʼíhída doo yóóʼadasoołdéel da.
10 Háálá Diyin God kʼehgo yínííł daniidlı̨́įgo éí łahgo átʼéego Diyin God bichʼįʼ tsínánihidiiłkosgo bee yisdáʼiildéehii yaa nihiiʼéésh, áko éí doo bikʼédí daniidlı̨́į da, nidi nihokááʼjí kʼehgo yínííł danilı̨́įgo éí aniné tʼéiyá nánídlı̨́.
11 Jó, díí Diyin God bíniikʼehgo yínííł ídlı̨́ éí dooládóʼ yéego haleebee áhátʼı̨́ éʼéłʼı̨́į da, dooládóʼ bídanoohdlı̨́įgo doo nihidahodiitʼiʼgóó ídaʼdołnéeh da, dooládóʼ bąąhági átʼéii biniinaa nihił nináʼátʼįįh da, dooládóʼ doo nihił dahóózhǫǫd da, dooládóʼ nihił yééʼ áhósin da, dooládóʼ nihá laanaa danohsin da, dooládóʼ nihídanoohdlı̨́į da, dooládóʼ doo ákǫ́ǫ́ áátʼįįdígíí atídoolnííł danoozı̨́įʼ da lá! Ákótʼéego bee tʼáá ałtsojįʼ doo nihidahodiitʼiʼgóó bééhózingo ídaʼdoołyaa.
12 Azhą́ lá nihichʼįʼ akʼeʼshéłchı̨́į nidi, éí doo łaʼda doo ákǫ́ǫ́ áátʼįįdígíí biniyé da, doo nidi łaʼda doo ákǫ́ǫ́ áhóótʼįįdgo yikʼee tiʼhoozniiʼígíí biniyé da, nidi Diyin God binááł aadę́ę́ʼ yáʼátʼéehgo nihídanoohdlínígíí yitʼíní ádoolnííł biniyé nihichʼįʼ akʼeʼshéłchı̨́.
13 Áko éí bee haʼiisiilniid. Áádóó haʼííníilnínígíí éí Táítas aají nihaa bił hózhónígíí bóóltąʼgo tʼáá íiyisí tʼah aláhídi átʼéego nihił nááhóózhǫǫd, háálá tʼáá ánółtso tʼáadoo biʼdiiłʼáhígóó ádaahłaa.
14 Háálá tʼáadoo leʼé bee nihaa hashniihgo bichʼįʼ haasdzíiʼgo, éí yáhásin doo yiih shííłtʼeʼ da, nidi bee nihichʼįʼ hahaadzíʼígíí tʼáá ałtso tʼáá aaníí danilínígi átʼéego, tʼáá ákótʼéego Táítas hanááł nihaa hwiiʼniihígíí ałdóʼ tʼáá aaníí daazlı̨́ı̨́ʼ.
15 Áko kʼé bee nihaazhníyá yę́ędą́ą́ʼ nitsidaahkaigo, áádóó ádił nídahodoołchiłgo tʼáá ánółtso akʼeh dahonołʼı̨́ı̨́ nítʼéeʼii bééjílniihgo ayóóʼánihijóʼníigo tʼah aláhídi átʼéego nihaa nitsídzíkees.
16 Tʼáá ałtsojįʼ nihaa jííníshłíhígíí tʼáá íiyisí bąą shił hózhǫ́.
