2 Corinthians 8:1-24
8 Shikʼisóó, Masedóniyagi daʼoodlání áłah nídaadleehii Diyin God bibee ajoobaʼ bee baa hojoosbaʼígíí nihił béédahózin doo nihííníiʼní,
2 háálá yéego atídabiʼdilʼı̨́įgo nabídahonitaah nidi tʼáá íiyisí bił dahózhónígíí áádóó bitédaʼaʼı̨́ʼígíí, éí tʼah aláhídi átʼéego bił dahadleeʼgo ádabiilaa.
3 Háálá tʼáá bí ádeinízingo tʼáá yídaneelʼánígo índa yídaneelʼánígíi nidi biláahgo adaʼiiznilígíí bá baa hashneʼ,
4 áko Diyin God bidiyı̨́ı̨́ʼ bił ahił ídlı̨́įgo baa doolyéłígíí yee łahdóó yíká adoojahgo yídaneedlı̨́įgo yaa nídanihookąąh,
5 áko díí, tʼáadoo bee baa nitsídeiikees yę́ę nidi éí biláahjįʼ Diyin God íinízinígíí bikʼehgo Bóhólníihii átsé yaa ádadeestʼą́, índa nihí ałdóʼ kojí nihaa ádadeestʼą́.
6 Táítas tʼáá íídą́ą́ʼ ajoobaʼgo áká aʼalyeedii baa nízdiidzáhígi átʼéego aají nihitahgi ałdóʼ ałtso łaʼjidoolíiłgo baa náhwiisiikan.
7 Áko kʼad oodlą́, áádóó yátiʼ, áádóó ił ééhózin, áádóó tʼáá ałtsojįʼ haleebee áhátʼı̨́, índa ayóóʼádanihíínóhʼnínígíí díí tʼáá ałtso bee danihidziilígi átʼéego díí ajoobaʼgo áká aʼalyeedii bidziilgo ádeínóhsin leʼ.
8 Díí doo bee nihá hoołʼaʼgo ádíshníi da, nidi łaʼ tʼáá íiyisí haleebee ádaatʼı̨́įgo binahjįʼ niheʼayóóʼóʼóʼniʼ tʼáá aaníiniígíí ałdóʼ ííshjání ádoolnííł biniyé ádíshní.
9 Háálá nihiBóhólníihii Jesus Christ bibee ajoobaʼ nihił béédahózin, jó, éí azhą́ atʼı̨́į nidi, bahojoobáʼí silı̨́ı̨́ʼ, háálá nihá bahojoobáʼí silı̨́ʼígíí binahjįʼ nihí daʼdoohtʼįįł.
10 Áko kweʼé tʼáá shí baa nitséskeesígíí nihił chʼíníshʼaah; jó, kʼad łaʼ nááhaídą́ą́ʼ doo tʼóó baa nidiikah danoozı̨́ʼí tʼéiyá da, nidi bídanoohdlı̨́įgo baa nídoohkai yę́ę kʼad łaʼdaahłéhígíí nihá yáʼátʼééh,
11 éí bąą łaʼdadoohłííł. Baa nidiikah danoozı̨́ı̨́ʼ yę́ęgi átʼéego tʼáá bídanoołʼánígíí bikʼehgo łaʼdadoohłííł.
12 Jó, tʼáá kʼadę́ę áká ajoolwodgi, tʼáá hwee hólónígi bee áká aníjílwoʼgo yáʼátʼééh, doo bízhneelʼáanii bikʼehgo éí dooda.
13 Náánáłaʼ haleedígi ádabiʼdilʼı̨́įgo, áko nihí tʼéiyá nihitsʼádaʼiideeł dooleeł, doo dishníigo ádíshníi da,
14 nidi aheełtʼéego ahaa nitsáhákees bąą, kʼad haʼátʼíhída ląʼígo nihee dahólǫ́ǫgo éí bee ádaadinígíí bee bíká anáhjah, áko ląʼí bee dahazlı̨́įʼgo nihíjí nihee ádaadingo áádę́ę́ʼ ałdóʼ nihíká adoojah, aheełtʼéego chodaołʼı̨́į doo biniyé ádíshní.
15 Tʼáá Diyin God bizaad bee akʼeʼashchínígi átʼéego,
Ląʼígo nídajiizláʼígíí doo łaʼ há chʼínííłnaʼ da,índa tʼáá áłchʼı̨́ı̨́dígo nídajiizláʼígíí doo hatsʼą́ą́ʼ biʼoh silı̨́įʼ da.
Táítas áádóó yił naakaígíí
16 Shí nihaa hą́ą́h nisinígi átʼéego Diyin God éí Táítas hajéí tłʼááhdę́ę́ʼ nihaa hą́ą́s nízingo áhoolaaígíí bąą bichʼįʼ baa ahééh nisin.
17 Háálá Táítas doo tʼóó baa néisiikaní tʼéiyá da, nidi tʼáá íiyisí nihíneedlı̨́įgo tʼáá bí íinízingo akǫ́ǫ́ nihichʼįʼ dah diighááh.
18 Nihikʼis nilíinii łaʼ éí daʼoodlání áłah nídaadleehii bitahgóó haneʼ yáʼátʼéehii yaa halneʼgo tʼáá íiyisí bééhoʼdílzinígíí bił akǫ́ǫ́ hodeelʼaʼ,
19 áádóó doo tʼáá éí tʼéiyá bąą hodeelʼaʼ da, nidi Bóhólníihii baa haʼniih doo biniyé, índa yáʼátʼéehgo bee íiniidzinii ííshjání dooleeł biniyé daʼoodlání áłah nídaadleehii díí ajoobaʼgo áká aʼalyeedii baa neiitʼaashgóó nihił nijikai doo biniyé nidahastı̨́.
20 Díí ajoobaʼgo áká aʼalyeedii bineiilnishígíí łaʼda doo yee nihikʼíhodooʼah da daniidzin,
21 háálá doo Bóhólníihii binááł tʼéiyá da, nidi diné ałdóʼ binááł haʼátʼíhída ił nilı̨́ nilíinii bidadiilkaal.
22 Áko nihikʼis náánáłaʼ bił akǫ́ǫ́ dahodeelʼaʼ, jó, éí tʼóó nahwiilkaahgo tʼáá íiyisí ląʼíjįʼ nihízhneedlı̨́įgo nihił bééhoozin, nidi kʼad éiyá aají tʼáá íiyisí nihaa dzólíhígíí binahjįʼ tʼah aláhídi átʼéego haleebee nihá ájítʼı̨́.
23 Jó, Táítas éí shichʼooní nilı̨́ índa shił naalnishii nilı̨́įgo nihinaashnishígi kʼad áájí nihinaalnish, áádóó náánáłaʼ nihikʼis nidiltʼéego éí daʼoodlání áłah nídaadleehii yá yilʼaadii nilı̨́, éí hanahjįʼ Christ baa haʼniih.
24 Áko díí diné táltʼéhígíí dabinááł áádóó daʼoodlání áłah nídaadleehii dabinááł ayóóʼádaʼíínóhʼnínígíí índa nihaa dahwiiʼniihígíí yitʼíní ádaahłééh.
