2 John 1:1-13
1 Daʼoodlání yá aląąjįʼ sizíinii nishłı̨́įgo, asdzání éí Diyin God atsʼábiníłtíinii baʼáłchíní tʼáá bił tʼáá aaníinii* binahjįʼ ayóóʼóóshʼníinii bichʼįʼ naaltsoos áshłééh. Doo tʼáá shí tʼéiyá ayóóʼádanihóshʼníi da, nidi tʼáá aaníinii bił béédahózinii ałdóʼ tʼáá ałtso ayóóʼádanihóʼní,
2 háálá tʼáá aaníinii nihiiʼ dahólǫ́, áádóó hoolʼáágóó nihił hólǫ́ǫ dooleeł.
3 Tʼáá aaníinii índa ayóóʼóʼóʼníinii bikʼehgo Diyin God aTaaʼ nilíinii índa Bóhólníihii Jesus Christ tʼáá aTaaʼ biYeʼ nilíinii bibee ajoobaʼ áádóó bibee aa aʼááh hasinii índa bibee achʼįʼ hózhǫ́ náhásdlı̨́įʼii yee nihikʼijidlíi doo.
Tʼáá aaníinii índa ayóóʼóʼóʼní
4 Tʼáá Diyin God aTaaʼ nilíinii bibikʼeh óʼooʼníiłii yee nihá hasʼánígi átʼéego naʼáłchíní łaʼ tʼáá aaníinii yikʼehgo dayíkáahgo shił bééhoozinígíí tʼáá íiyisí baa shił hózhǫ́.
5 Áko lą́ą, shilah, bikʼeh óʼooʼníiłii ániidíii doo bee nichʼįʼ akʼeʼashchíi da, nidi daʼiisiidląąd yę́ędóó bikʼeh óʼooʼníiłii nihee dahazlı̨́ʼígíí, tʼáá éí bikʼehgo ayóóʼádaʼahííníiʼníi dooleełígíí baa nánooshkąąh.
6 Ayóóʼóʼóʼní bee nił hashneʼígíí éí Diyin God bibikʼeh óʼooʼníiłii tʼáá átʼé tsʼídá bikʼeh dahoniilʼı̨́į dooleełii ááhdishní. Bikʼeh óʼooʼníiłii, Ayóóʼádaʼahíínóhʼní, nínígíí éí haneʼ yáʼátʼéehii baa adahoʼniineʼ yę́ędą́ą́ʼ dasidootsʼą́ą́ʼ, éí bikʼeh deínóhkááh.
7 Doo tʼáá aaníígóó nidaʼnitinii tʼóó ahayóí nihokááʼgóó deíkááh. Éí, Jesus Christ diné silı̨́įʼgo biʼdizhchı̨́, doo daaníígóó nidaʼnitin. Ákójíníigo nazhʼnitinígíí éí binaʼadloʼii jílı̨́įgo Christ biʼanaʼí jílı̨́.
8 Éí bąą ádaa ádahołyą́, bee nidanihineetą́ąʼii tʼáá ádzaaí ádaohłeʼ lágo, áko nihichʼįʼ nidahidoolyéełii tʼáá átʼé nihichʼįʼ nidahidoolyééł.
9 Tʼáá háiida Christ binaʼnitin doo biʼjósingóó, nidi tʼáá biláahgo bee nazhʼnitinígíí éí Diyin God doo hwiiʼ hólǫ́ǫ da. Tʼáá háiida Christ binaʼnitin biʼjósinígíí éí Diyin God aTaaʼ áádóó aYeʼ nilíinii hwiiʼ hólǫ́.
10 Christ binaʼnitin doo yee naʼnitinii nihaa níyáago tʼáadoo nihaʼałkʼee sidáhí doo, tʼáadoo kʼé deínóhʼníní doo.
11 Háálá kʼé jóʼníigo éí binaanish doo yáʼátʼéehii bił ałtsʼą́ą́ʼ ajíłkʼiizgo átʼé.
Kʼé haʼníigo bee naaltsoos niiltʼiʼii
12 Tʼóó ahayóígóó bee nihił hodeeshnihii hólǫ́, ákondi akʼeʼashchíigo éí doo bee nihił hodeeshnih da, nidi tʼáá shí nihaa deesháałgo tʼáá yíní átʼéegi ahił nidahodiilnihígíí bíká shił chohooʼı̨́, áko nihíniʼ bíighahgo nihił dahózhǫ́ǫ doo.
13 Nádí, Diyin God nábidiiłtíinii baʼáłchíní kʼé daniłní.* [Tʼáá ákótʼée doo.]
Footnotes
^ Asdzání éí Diyin God atsʼábiníłtíinii baʼáłchíní tʼáá bił éí oodlání danilíinii áłah nídaadleehgo ááhyiłní daatsʼí.
^ Díí naaltsoos áyiilaaígíí yił oodlání danilínígíí, Kʼé danihiłní, jiníigo óolyé daatsʼí.
