2 Kings 1:1-18
1 Nítʼééʼ Éíhab daaztsą́ą́dóó bikʼijįʼ Móʼab dineʼé éí Ízrel dineʼé yichʼįʼ nidaasteeʼ.
2 Áko Eihazáíyah éí Samériyadi adeídi haghangi tsin yistłʼǫ́ǫgo tsésǫʼgi dáádiníbaalígíí bigházhnítłizh, áko bitsʼą́ą́dóó hatah doo hóótsʼíid da, áádóó haneʼ yił nidaalʼaʼíii ajííłʼaʼgo ábijiní, Nílááh, Ékran kin haalʼáagi diyin Béíyalzííbab shá nidabídółkid, Díí naałniih daatsʼí bitsʼą́ą́dóó náádideeshdááł, dooda daatsʼí.
3 Áádóó Bóhólníihii bidiyingo naalʼaʼí éí Tíshbeh dineʼé Iiláíjah ííłní, Nídiidááh; nílááh, Samériyadóó aláahgo naatʼáanii bá nidaalʼaʼí bidááhgóó dínáahgo ábidiní, Daʼ Ízrel dineʼé bitahdiísh Diyin God ádingo biniinaa Ékran kin haalʼáagi diyin bidiʼníinii Béíyalzííbab nidabídídóołkił biniyé wohkah?
4 Díí bąą kʼad Bóhólníihii kóní, Tsáskʼeh bikááʼ sínítínídóó doo nídidííʼnah da, nidi tʼáá aaníí dadíítsaał. Áko Iiláíjah dah nídiidzá.
5 Áádóó nidaalʼaʼí éí Eihazáíyah yaa nákai, áko ííłní, Haash yitʼéego tʼóó nánoohkai?
6 Áko ádahałní, Diné léiʼ nihidááh níyáago ánihiłní, Nílááh, aláahgo naatʼáanii nanihiłʼaʼígíí bichʼįʼ nídóhkáahgo ádabidohní, Bóhólníihii kóní, Daʼ Ízrel dineʼé bitahdiísh Diyin God ádingo biniinaa Ékran kin haalʼáagi diyin bidiʼníinii Béíyalzííbab nabídídííłkił biniyé bichʼįʼ iʼííníłʼaʼ? Díí bąą tsáskʼeh bikááʼ sínítínídóó doo nídidííʼnah da, nidi tʼáá aaníí dadíítsaał.
7 Eihazáíyah áháłní, Diné haashąʼ yitʼéé léiʼ nihidááh níyáago díí saad yee nihił hoolneʼ?
8 Áko hachʼįʼ hádaasdzííʼ, Diné ditłʼoii léiʼ akałsis binííʼ gónaa yee ákászaaz. Áko Eihazáíyah ání, Éí lá Tíshbeh dineʼé Iiláíjah átʼı̨́ ni.
9 Nítʼééʼ aláahgo naatʼáanii éí siláo yinanitʼaʼí nilíinii bisiláo ashdladiingo yił hachʼįʼ ayííłʼaʼ. Áko ákóde hachʼįʼ haayá; jó, wókʼą́ągi dah dzizdá. Áko hachʼįʼ haadzíiʼgo ání, Diyin God yá naalʼaʼí nílíinii, aláahgo naatʼáanii ání, Wóshdę́ę́ʼ, hadaninááh, niłní.
10 Áádóó Iiláíjah éí ashdladiin siláo yinanitʼaʼí yichʼįʼ haadzíiʼgo ííłní, Diyin God yá naalʼaʼí nishłı̨́ı̨́ ládą́ą́ʼ bíniʼ yáʼąąshdę́ę́ʼ kǫʼ hadadidoonołgo ni áádóó ashdladiingo nisiláo ánihidoołdįįł. Áko yáʼąąshdę́ę́ʼ kǫʼ hadadíínóodgo hó áádóó ashdladiin siláo hoł naakaígíí bił áhoʼdisdįįd.
11 Nááʼáłdóʼ siláo yinanitʼaʼí łaʼ ashdladiingo bisiláo yił hachʼįʼ anáábiʼdiisʼaʼ. Áko hachʼįʼ hanáánáádzíiʼgo áháłní, Diyin God yá naalʼaʼí nílíinii, aláahgo naatʼáanii kóní, Tsı̨́įłgo wóshdę́ę́ʼ, hadanináá, niłní.
12 Áádóó Iiláíjah hanáánáádzíiʼgo áháłní, Diyin God yá naalʼaʼí nishłı̨́ı̨́ ládą́ą́ʼ bíniʼ yáʼąąshdę́ę́ʼ kǫʼ hadadidoonołgo ni áádóó ashdladiin nisiláo ánihidoołdįįł. Áko yáʼąąshdę́ę́ʼ kǫʼ hadadíínóodgo hó áádóó ashdladiin siláo hoł naakaígíí bił áhoʼdisdįįd.
13 Áko táadi azlı̨́ı̨́ʼ góneʼ siláo yinanitʼaʼí nilíinii ashdladiingo bisiláo yił anáábiʼdiisʼaʼ. Áko díí ashdladiin siláo binanitʼaʼí ákóde haayáago Iiláíjah bidáahjįʼ nitsizhdinígoʼgo níjookąąhgo ábijiní, Diyin God yá naalʼaʼí nílíinii, nánooshkąąh, bíniʼdii sheʼiinaʼ índa díí ashdladiingo siláo bidaʼiinaʼ ná nidaalʼaʼí nił nilı̨́į leʼ.
14 Jó, yáʼąąshdę́ę́ʼ kǫʼ bidadíínóodgo áłtséédą́ą́ʼ naakigo ashdladiin siláo dah yikah áádóó binanitʼaʼí tʼáá ałʼąą bóltąʼgo iidííłkʼą́ą́ʼ; éí bąą kʼad bíniʼ sheʼiinaʼ nił nilı̨́į leʼ.
15 Áko Bóhólníihii bidiyingo naalʼaʼí Iiláíjah ííłní, Nílááh, ákóyaa bił díʼaash; tʼáadoo bináníldzidí. Áádóó nízhdiiʼnaʼgo ákóyaa aláahgo naatʼáanii bichʼįʼ jíkai.
16 Nítʼééʼ Eihazáíyah ábijiní, Bóhólníihii kóní, Ékran kin haalʼáagi diyin bidiʼníinii Béíyalzííbab nabídídííłkiłgo bichʼįʼ nisíʼníłʼaʼ; daʼ Ízrel dineʼé bitahdiísh Diyin God nabídídííłkiłígíí ádingo ánítʼı̨́? Díí kwíinidzaa bąą, tsáskʼeh bikááʼ sínítínídóó doo nídidííʼnah da, nidi tʼáá aaníí dadíítsaał.
17 Kótʼéego Bóhólníihii bizaad Iiláíjah yee haadzíʼígíí bikʼehgo Eihazáíyah daaztsą́. Áko Júdah dineʼé yá aláahgo naatʼáanii Jiiháshafat biyeʼ Jiihóram naatʼáanii nilı̨́įgo naaki náhááh binih Jiihóram hatsáskʼeh góneʼ aláahgo naatʼáanii silı̨́ı̨́ʼ, háálá Eihazáíyah biyeʼ doo łaʼ hólǫ́ǫ da.
18 Kʼad łahjįʼ Eihazáíyah ádzaaígíí áádóó yaa naayáhígíí éí Ízrel dineʼé yá aláahgo naatʼáanii danilı̨́ı̨́ nítʼééʼ yę́ę binaaltsoos Kránikals wolyéii bikʼinídaháasdzo.
