2 Kings 10:1-36
10 Samériya kin haalʼáadi Éíhab éí biyeʼké tsostsʼidiin nítʼééʼ. Áko Jííhu éí naaltsoos ádayiilaago Samériyagóó bá eejaaʼ éí Jézriyel kin haalʼáádóó naatʼáanii danilíinii áádóó hastóí aląąjįʼ naazíinii índa Éíhab baʼáłchíní yaa ádahalyą́ą́ nítʼéʼígíí kwííłní,
2 Tʼáá naaltsoos nídadoołtsoozí bídahwíínółníihii yę́ę biyeʼké nihił dahólǫ́ǫgo áádóó tsindaabąąs bijáád naakiígíí índa łı̨́ı̨́ʼda, kin haalʼá ditą́ągo binaa ahééʼítłʼinígíí áádóó bee naʼabaahii nihee dahólǫ́ǫgo,
3 kʼad bídahwíínółníihii yę́ę biyeʼ łaʼ bíiyisii áádóó baa dzólníinii éí nídadoołteehgo bizhéʼé yę́ę bibikááʼdóó nahatʼáii bikááʼ dah binołdaah índa bídahwíínółníihii yę́ę baʼáłchíní bá nidaohbaah doo.
4 Nidi tʼáá íiyisí nídaasdzíidgo ádaaní, Jó, aláahgo naatʼáanii nidiltʼéego nidi doo hóneelʼą́ą da, áko nihíshąʼ haitʼéego hódadíníilʼąął?
5 Aláahgo naatʼáanii bikin yaa áhályánígíí áádóó kin haalʼáii yaa áhályánígíí áádóó hastóí aląąjįʼ naazíinii índa Éíhab baʼáłchíní yaa ádahalyánígíí éí Jííhu yichʼįʼ adaʼasʼaʼgo ádaaní, Nihí ná naalʼaʼí daniidlı̨́įgo bichʼįʼ nihíłʼáhígíí tʼáá ałtso bidaʼdiilnííł; doo łaʼ aláahgo naatʼáanii ádadiilníił da; tʼáá ni nił yáʼátʼéhígi átʼéego ánínééh.
6 Áádóó Jííhu éí naaltsoos ánááyiidlaago ání, Shichʼijí danohłı̨́ı̨́ ládą́ą́ʼ áádóó shikʼeh dahonołʼı̨́įgo Jézriyel kin haalʼáagi yiską́ągo kóhoodzaago bídahwíínółníihii yę́ę biyeʼké bitsiitsʼiin deínóhjáahgo shaa doohkah. Íídą́ą́ʼ aláahgo naatʼáanii yę́ę biyeʼké tsostsʼidiin yiltʼéego kin haalʼáádóó hastóí aląąjįʼ naazíinii baa ádahalyą́ą́ nítʼééʼ.
7 Naaltsoos haa náánálwodgo aláahgo naatʼáanii yę́ę biyeʼké tsostsʼidiin yiltʼéego dadzisiłgo nidadzistseed áádóó dabitsiitsʼiinígíí tsʼiizis biih dadziiznilgo Jézriyelgóó aheeshjaaʼ.
8 Naalʼaʼí łaʼ Jííhu yaa níyáago yił hoolneʼgo ání, Aláahgo naatʼáanii yę́ę biyeʼkéhę́ę dabitsiitsʼiin deizhjaaʼ lá. Áko ííłní, Hoosʼįįdjįʼ yah aʼatiingi naakigo ałʼąą ałkʼi yanáaʼáago ádaohłééh.
9 Nítʼééʼ hoosʼįįdgo áajįʼ chʼíníyáago yiizįʼgo diné tʼáá ałtso yichʼįʼ haadzííʼ, Doo nihadaʼátʼeʼí da; jó, shinanitʼaʼí bikʼijįʼ sélı̨́įʼgo séłhı̨́, nidi háísh díí tʼáá ałtso neistseed?
10 Kʼad díí nihił béédahózingo Bóhólníihii yee haadzíʼígíí éí Éíhab baʼáłchíní náás ahoolchíiłii bídéétʼiʼgo Bóhólníihii yá naalʼaʼí Iiláíjah haadzíiʼgo ánínígíí bikʼehgo doo łaʼ chʼééh ádoolʼįįł da.
11 Kótʼéego Jííhu éí Jézriyelgi Éíhab baʼáłchíní daadziihígíí índa bidiné ayóó ádaatʼéii áádóó bikʼis danilíinii índa bináádaʼiiłniihii ałtso neistseedgo wónáásdóó tʼáadoo łaʼ yidzíiʼ da.
12 Áádóó dashdiiyáago Samériya kin haalʼáágóó joogáałgo táńdaʼdigish biniyé kin siʼánígi jiníyáago,
13 Jííhu éí Júdah dineʼé aláahgo binanitʼaʼí Eihazáíyah yę́ę bikʼisóó łaʼ bidááshníyáago ájíní, Háísh ádaahtʼı̨́? Áko hadaasdzíiʼgo ádaaní, Eihazáíyah bikʼisóó ádeitʼı̨́; nihí aláahgo naatʼáanii badaʼáłchíní índa asdzą́ą́ naatʼááh badaʼáłchíní bichʼįʼ deekai.
14 Áádóó ájíní, Tʼáá dahináago daołtsóód. Áko tʼáá dahináago deisiłgo táńdaʼdigish biniyé kin siʼání bíighahgi aʼánígi dízdiindóó baʼaan naaki diné nideistseed; tʼáadoo łaʼ yidzíiʼ da.
15 Jííhu dah náázdiidzáago Rííhab biyeʼ Jiihónadab hachʼįʼ yigáałgo bił ałdááh jítʼáázh; éí kʼé bizhdííniidgo ábijiní, Nijéísh tʼáá ákogi átʼé, tʼáá shijéí ni nijéígi átʼéego? Jiihónadab haadzíiʼgo ání, Aooʼ, ákótʼé. Jííhu ání, Ákótʼéé ládą́ą́ʼ shichʼįʼ dah didiilnííh. Áádóó Jííhu bichʼįʼ dashdiilniiʼgo tsinaabąąs bijáád naakiígíí yiih hóółtʼeʼ.
16 Áádóó Jííhu áháłní, Tįʼ, shił yíʼash, áko Bóhólníihii bá bíneeshdlínígíí yiidííłtsééł. Áko tsinaabąąs bijáád naakiígíí bee bił dashdiikai.
17 Nítʼééʼ Samériya kin haalʼáagi jiníyáago Bóhólníihii éí Iiláíjah yee yichʼįʼ haadzíʼígíí bikʼehgo ákwii Éíhab yę́ę baʼáłchíní daadziihígíí ałtso nijistseed.
Jííhu éí Béíyal bichʼįʼ nahadláhígíí nahjįʼ kóyiilaa
18 Jííhu éí diné tʼáá ałtso áłah áyiilaago ííłní, Éíhab yę́ę tʼáá áłtsʼísígo Béíyal yichʼįʼ nahałáá nítʼééʼ, nidi Jííhu éí tʼah aláhígo Béíyal yichʼįʼ nahałáa doo.
19 Éí bąą kʼad, bíniʼdii Béíyal bá dahalneʼii áádóó bá nidaalʼaʼí índa bá náádaʼiiłniihii tʼáadoo łaʼ doodaí shá hágo dabidohní, háálá ayóó átʼéego didlidgo nááhániihii Béíyal bichʼįʼ náádiyeeshnih; tʼáá háiida dooda nízinígíí éí doo jiináa da doo. Áko Jííhu hanahagiz bee Béíyal yichʼįʼ nidahałáii ádeeshdįįł jinízingo ájítʼı̨́.
20 Jííhu ání, Béíyal bá hoʼdílzingo ahíʼiildééh baa dahodoołnih. Ákótʼéego baa nidahodzisneʼ.
21 Áádóó Jííhu éí Ízrel dineʼé tʼáá átʼé bitahgóó iʼiisʼaʼ; Béíyal yichʼįʼ nidahałáii tʼáá ałtso nidahaaskai, áko tʼáadoo łaʼ doodaí diné tʼáá ałtso neheeskai. Nítʼééʼ Béíyal bá kin siʼání góneʼ áłah dzizlı̨́įʼgo kin góneʼ ałtso hazhdéébįįd.
22 Áko éénééz yaa áhályánígíí ábijiní, Aadę́ę́ʼ Béíyal yichʼįʼ nidahałáii bá éénééz chʼíníjááh. Áádóó éénééz chʼízhníjaaʼ.
23 Nítʼééʼ Jííhu dah diiyá, áádóó Rííkab biyeʼ Jiihónadab ałdóʼ Béíyal bá kin góneʼ yah ajííʼáazhgo Béíyal yichʼįʼ nidahałáii ííłní, Bóhólníihii yá nidaalʼaʼí hádadóhʼı̨́ı̨́ʼ, doo daatsʼí łaʼ nihitah da, Béíyal yichʼįʼ nidahałáii daatsʼí tʼéiyá ádaatʼı̨́.
24 Áádóó didlidgo nááhániihii náádahizhdoołnih biniyé yah ajookaigo Jííhu éí tłʼóóʼdę́ę́ʼ diné tseebídiingo niinínilgo ání, Díí diné nihaa diníʼánígíí łaʼ tʼóó biʼnoołniiʼgo tʼáá nihí bá ninádoohtłish.
25 Ákódzaago didlidgo nááhániihii ałtso ájiilaago Jííhu éí aa ádahalyáanii índa siláo bindanitʼaʼí ííłní, Nílááh, yah oohkáahgo nidaałtseed; tʼááká łaʼ chʼóoyaʼ lágo. Áádóó diltłish yee nideistseed, índa aa ádahalyáanii áádóó siláo bindanitʼaʼí éí nidaaztseedii chʼídayiistłʼíidgo Béíyal bá kin náwóneʼí góneʼ ajookai.
26 Béíyal bá kindę́ę́ʼ edaʼalyaii chʼídajiizhjaaʼgo dazhdííłid.
27 Áádóó Béíyal beʼelyaii naaʼadayiisxango Béíyal bikin tʼáá yił nidayiisneʼ, áko díí jı̨́įjįʼ kin biiʼ niiʼoh nídaʼaldahgo ádayiilaa.
28 Kótʼéego Jííhu éí Béíyal bichʼįʼ nahadlá Ízrel kéyahdóó nahjįʼ kóyiilaa.
29 Nidi Jííhu éí Nííbat biyeʼ Jerobówam yee niʼiisíʼígíí bee Ízrel dineʼé daʼasiihgo áyiilaii tʼáá éí Béthel kin haalʼáagi áádóó Dan kin haalʼáagi béégashii yáázh óola bee ályaago bichʼįʼ nahadláhígíí tʼáadoo yóóʼazhdííʼą́ą da.
30 Nítʼééʼ Bóhólníihii éí Jííhu ííłní, Shinááł tʼáá ákogi átʼéii biʼiinilaa áádóó shijéí bee íinisinígíí tʼáá ałtso bikʼehgo Éíhab baʼáłchíní atíinilaa; éí bąą naʼáłchíní dı̨́įdi ałkʼi náʼázhchı̨́ı̨́góó Ízrel dineʼé bibikááʼdóó nahatʼáii yikááʼ ałkééʼ dah náhidinoobįįł doo.
31 Nidi Jííhu éí Bóhólníihii Ízrel dineʼé biDiyin God bibee hazʼáanii doo yikʼeh hółʼı̨́ı̨́góó yigááł nítʼééʼ; jó, Jerobówam yee niʼiisíʼígíí éí bee Ízrel dineʼé daʼasiihgo áyiilaii tʼáadoo yóóʼiidííʼą́ą da.
32 Íídą́ą́ʼ Bóhólníihii éí Ízrel dineʼé bikéyah haʼoh áyoolíiłgo hodideeshzhiizh, áádóó Házeiyel éí Ízrel dineʼé bikéyah nidaneesʼą́ą́góó kéédahatʼínígíí tʼáá ałtso atíyoolííł nítʼééʼ.
33 Jórdan toohdóó haʼaʼaahjigo kéyah Gíliyad hoolyéegi tʼáá átʼé, Géed dineʼé áádóó Rúben dineʼé índa Manáseh dineʼé dabikéyah tooh Árnan bibąąhgóó Aróʼer kin haalʼáádóó tʼáá Gíliyad kéyah áádóó Béíshan kin haalʼáajįʼ aghaideetʼą́.
34 Áko Jííhu łahjįʼ áátʼįįdígíí áádóó yaa naayáhígíí tʼáá ałtso índa yee ayóó átʼéé nítʼéʼígíí Ízrel dineʼé aláahgo binanitʼaʼí danilı̨́ı̨́ nítʼééʼ yę́ę binaaltsoos Kránikals wolyéii bikʼinídaháasdzo.
35 Áko Jííhu éí dahazhéʼé yę́ę daʼiiłhaazhígi átʼéego ajiiłhaazh, áádóó Samériya kin haalʼáagi yóóʼáhoʼdiilyaa. Nítʼééʼ hayeʼ Jiihóʼahaz hatsáskʼehgi aláahgo naatʼáanii náánásdlı̨́ı̨́ʼ.
36 Samériyagi Jííhu éí Ízrel dineʼé yinantʼáago naadiin tseebíí nááhai.
