2 Kings 11:1-21
11 Áko Eihazáíyah bimá Athaláíyah biyáázh daaztsą́ągo yaa ákoniizı̨́įʼgo dah diiyá, áko aláahgo naatʼáanii biyeʼké ałtso íísdįįd.
2 Nidi aláahgo naatʼáanii Jóram yę́ę bitsiʼ Jiihósheba wolyéii Eihazáíyah bideezhí éí Eihazáíyah biyeʼ Jóʼash aláahgo naatʼáanii yę́ę biyeʼké nidadootsiłii bitahdóó yił dah diiʼáazhgo bí áádóó asdzání baa áhályánígíí nidaʼiilkáhí góneʼ Athaláíyah yitsʼąą náhodeesʼı̨́ı̨́ʼ, áko tʼáadoo hoʼdiisyı̨́į da.
3 Áko Bóhólníihii bikin biiʼ sohodizin góneʼ Jóʼash éí asdzání baa áhályánígíí bił nahoʼdinilʼingo hastą́ą́h nááhai. Áádóó Athaláíyah éí kéyah yiiʼ kéédahatʼíinii yinantʼáá nítʼééʼ.
4 Áádóó tsostsʼid nááhaigo Jiihóíyada iʼiisʼaʼgo neeznádiin siláo áádóó siláo aa ádahalyáanii yinantʼáhígíí hágo yidííniidgo Bóhólníihii bikin biiʼ sohodizinjįʼ baa dahoʼdiishtʼeezh, áádóó bee ahaʼdeetʼáanii bił ádajiilaago Bóhólníihii bikin biiʼ sohodizin góneʼ ádee hadahididziihgo ájiilaa, áko aláahgo naatʼáanii biyeʼ ííshjání ájiilaa.
5 Áádóó áłah áyiilaaígíí yichʼįʼ haadzíiʼgo ííłní, Díí kódadoohnííł; táaʼgo dah wohnéłígíí bitahdóó tʼááłáʼígo dah wohnéłígíí éí hááʼáyı̨́ı̨́h jı̨́ı̨́ góneʼ nidaołnishígíí aláahgo naatʼáanii bikin baa ádahołyą́ą doo;
6 tʼááłáʼígo dah náánááhʼnéłígíí Ser yah aʼatiingi baa ádahołyą́ą doo, índa tʼááłáʼígo dah náánáohʼnéłígíí aa ádahalyánígíí bineʼjígo yah aʼatiinígíí baa ádahołyą́ą doo; kótʼéego aláahgo naatʼáanii bikin baa ádahołyą́ągo doo ahiih nídoołdas da.
7 Nihí naakigo dah wohnéłígíí hááʼáyı̨́ı̨́h jı̨́ı̨́ góneʼ doo nidaołnishígíí Bóhólníihii bikin biiʼ sohodizin góneʼ aláahgo naatʼáanii baa ádahołyą́ą doo.
8 Áádóó tʼááłáʼí nohtínígo nihideezlaaʼ dah deínóhjáahgo aláahgo naatʼáanii binídoohtʼih; tʼáá háiida nihíighah deeyáhígíí hodiʼyoolyééł; aláahgo naatʼáanii chʼínádááhdóó yah anáhádáahgo baa ádahołyą́ą doo.
9 Áko neeznádiingo siláo bindanitʼaʼí tʼááłáʼí jinítínígo nááʼiiłniihii Jiihóíyada yee hoʼníłniiʼígíí tʼáá ałtso bikʼehgo ádadziidzaago hasiláo hááʼáyı̨́ı̨́h jı̨́ı̨́ góneʼ dadeeshnishígíí áádóó nidahashnishígíí éí tʼáá yił nááʼiiłniihii Jiihóíyada yaa yíkai.
10 Áádóó aláahgo naatʼáanii David yę́ę tsiidétáán áádóó naagé bee hólǫ́ǫ́ nítʼééʼ yę́ę Bóhólníihii bikin biiʼ sohodizin góneʼ sinilígíí nááʼiiłniihii éí neeznádiingo siláo bindanitʼaʼí yeinínil.
11 Áko siláo tʼááłáʼí nítínígo bideezlaʼ dah deíjáahgo aláahgo naatʼáanii binaagóó kin biiʼ sohodizin bíighahgi nishʼnáádóó nishtłʼajígo nineelʼáníjįʼ bikááʼ nááʼiiniihí yíighahgi naazı̨́.
12 Áádóó aláahgo naatʼáanii biyeʼ bił chʼízhníʼáazhgo naatʼá chʼah bikʼizhdííʼą́ągo bee akʼeʼashchíinii bee bééhániihii baazhníłtsooz, áádóó akʼah yikʼi yadeiyiiziidgo dayíísı̨́įʼgo aláahgo naatʼáanii ádahoolaa, áko ahídaakadgo ádaaní, Aláahgo naatʼáanii asʼahgóó hináa leʼ.
13 Nítʼééʼ Athaláíyah éí aa áhályáanii índa diné hahóółʼáago yidiiztsʼą́ąʼgo Bóhólníihii bikin biiʼ sohodizin góneʼ diné yichʼįʼ yah ííyá.
14 Áko dééʼı̨́ı̨́ʼ nítʼééʼ, shoo, tʼáá bee éʼélʼįʼ bikʼehgo aláahgo naatʼáanii éí kin bíyah niiʼáii yíighahdóó sizı̨́, naatʼáanii áádóó béésh dilní bee íʼdílzoołí yee ádaanínígíí aláahgo naatʼáanii yíighahdóó naazı̨́, índa kéyahdóó diné tʼáá átʼé bił dahózhǫ́ǫgo béésh dilní bee íʼdílzoołí yee ádaaní, áádóó Athaláíyah akʼi naʼooldláadgo hadoolghaazhgo ání, Shiyaʼiidloʼgo shighahodeetʼą́!
15 Nidi nááʼiiłniihii Jiihóíyada éí neeznádiingo siláo dah yikahii yindanitʼaʼí éí dah oonééł yaa ádahalyáanii áyidííniid, Siláo bitaʼ góneʼ bił oohkááh, áko tʼáá háiida yikééʼ góneʼ eelwodígíí diltłish bee bidiʼyoolyééł. Háálá nááʼiiłniihii ádííniid, Bóhólníihii bikin biiʼ sohodizin góneʼ éí doo hodiʼyoolyéeł da, ní.
16 Áádóó Athaláíyah deisiłgo aláahgo naatʼáanii bighan bichʼįʼgo łı̨́ı̨́ʼ bee yah anáʼáldahí góneʼ chʼélwodgo ákweʼé biʼdiisyı̨́.
17 Áko Jiihóíyada éí Bóhólníihii áádóó aláahgo naatʼáanii bidineʼé tʼáá bił Bóhólníihii bidineʼé dajílı̨́į doo biniyé ahadazdeestʼą́; aláahgo naatʼáanii áádóó bidineʼé ałdóʼ yił ahadadeestʼą́.
18 Nítʼééʼ kéyahgi dineʼé kéédahatʼíinii tʼáá ałtso éí diyin bidiʼníinii Béíyal bá kin góneʼ yah eekaigo nidayiiztiʼ, áádóó bibikááʼ náádaʼiiniihí índa bidaʼalyaiida tʼáá íiyisí ałtso nidayiiztiʼgo deidííséiigo Béíyal binááʼiiłniihii Mátan éí bikááʼ náádaʼiiniihí bidááhdóó dayiisxı̨́. Nítʼééʼ nááʼiiłniihii éí Bóhólníihii bikin biiʼ sohodizin yaa ádahalyą́ą doo biniyé naanish bee bídahólníihii niinínil.
19 Siláo neeznádiingo bindanitʼaʼí áádóó siláo dah deínéehii bindanitʼaʼí índa siláo aa ádahalyánígíí áádóó kéyahgi dineʼé kéédahatʼíinii tʼáá ałtso aláahgo naatʼáanii éí Bóhólníihii bikin biiʼ sohodizindę́ę́ʼ yił adadaaskaigo siláo aa ádahalyáanii bichʼéʼétiin góneʼ aláahgo naatʼáanii bikinjįʼ yił yíkai. Áádóó aláahgo naatʼáanii nídaadleełii bibikááʼ nahatʼáii yikááʼ dah neezdá.
20 Nítʼééʼ éí kéyahgi dineʼé kéédahatʼíinii tʼáá ałtso bił dahózhǫ́, áádóó aláahgo naatʼáanii bikin bíighahgi Athaláíyah diltłish yee dayiisxı̨́ı̨́dóó bikʼijįʼ kin haalʼáhígi hodiiyeel.
21 Jiihóʼash* tsostsʼid binááhaigo aláahgo naatʼáanii silı̨́ı̨́ʼ.
Footnotes
^ Jiihóʼash éí Jóʼash ałdóʼ wolyé.
