2 Kings 12:1-21
12 Jííhu nantʼáago tsostsʼid náhááh binih Jiihóʼash aláahgo naatʼáanii silı̨́ı̨́ʼ, índa Jerúsalemgi nantʼáago dízdiin nááhai. Bimá éí Bíyer-shííba hoolyéédóó naagháago Zíbiyah wolyé.
2 Áádóó Jiihóʼash éí Bóhólníihii binááł tʼáá ákogi átʼéego tʼáá nááʼiiłniihii Jiihóíyada nahoneeztą́ʼígíí bikʼehgo joogááł.
3 Nidi ninádahałaah doo biniyé wódah nahazʼą́ągo ádaalyaaígíí éí doo nahjįʼ kólyaa da; diné éí ninádahałaah doo biniyé wódah nahazʼą́ągo ádaalyaaígíí tsin bijeeh dilidgo łikání halchingo nááhániihii tʼah náádayiiłniih.
4 Áko Jiihóʼash éí náádaʼiiłniihii ííłní, Béeso dílzingo nidahideestʼánígíí Bóhólníihii bikin biiʼ sohodizinjįʼ nehejáhígíí tʼáá átʼé éí dineʼé tʼáá ałtso nidayiiléhígíí, tʼáá éí nideidiyooléłígíí áádóó diné tʼáá bí ádeinízingo nidayiiléhígíí bikʼehgo Bóhólníihii bikin biiʼ sohodizin góneʼ yah adahohjááh.
5 Bíniʼdii náádaʼiiłniihii tʼááłáʼí nítínígo yił ahéédahólzinii bitsʼą́ą́dóó béeso nídeididooniłgo kin biiʼ sohodizin dááchxǫʼ yę́ęgóó hashtʼéédeidoodlííł.
6 Nidi kóhóótʼįįd: aláahgo naatʼáanii Jiihóʼash naadiin tááʼ nááhaijįʼ aláahgo naatʼáanii jílı̨́įgo hoolzhiizhígíí biyiʼ éí náádaʼiiłniihii kin biiʼ sohodizin dááchxǫʼ yę́ęgóó tʼah doo hashtʼéédeidléeh da lá.
7 Nítʼééʼ aláahgo naatʼáanii Jiihóʼash éí nááʼiiłniihii Jiihóíyada índa náánáłaʼ náádaʼiiłniihii ałdóʼ hágo yidííniidgo ííłní, Haash yitʼéego kin biiʼ sohodizin dááchxǫʼ yę́ęgóó doo hashtʼéédaohdléeh da? Éí bąą kʼad, béeso doo łaʼ nihaa náádadooʼnił da, nidi kin biiʼ sohodizin bee hashtʼéédoolníiłjįʼ nidanohnííł.
8 Áko náádaʼiiłniihii éí diné bitsʼą́ą́dę́ę́ʼ béeso doo baa náádadooʼniłgóó, doo nidi kin biiʼ sohodizin dááchxǫʼ yę́ęgóó hashtʼéédeidoodlííłgóó yee lą́ daʼasłı̨́ı̨́ʼ.
9 Nidi nááʼiiłniihii Jiihóíyada éí tsitsʼaaʼ néidiiʼą́ągo bidáńʼdítı̨́hígíí yigháʼnínilgo éí bikááʼ nááʼiiniihí bíighahgi Bóhólníihii bikin biiʼ sohodizin góneʼ nishʼnáádę́ęʼgo yah adajiikáhígi niiníʼą́, áádóó náádaʼiiłniihii chʼéʼétiin yaa ádahalyánígíí éí Bóhólníihii bikin biiʼ sohodizin góneʼ béeso yah adeizhjaaʼígíí tʼáá átʼé tsitsʼaaʼ yiih deiznil.
10 Nítʼééʼ éí tsitsʼaaʼ biiʼ béeso tʼóó ahayóí lágo dayiiłtsą́ągo, aláahgo naatʼáanii binaaltsoos ííłʼíní éí aláahgo nááʼiiłniihii yił níʼáazhgo Bóhólníihii bikin biiʼ sohodizin góneʼ béeso yiyííłtaʼgo azis yiih yiyíínil.
11 Béeso dah dahidiidloʼígíí éí nidaalnishígíí índa Bóhólníihii bikin biiʼ sohodizingi bikʼehgo nidaʼanishígíí yaa deiznil, áádóó éí tsin neheeshjííʼ nideiyiichʼiishígíí índa kin ádeiléhígíí éí Bóhólníihii bikin biiʼ sohodizin yindaalnishígíí yichʼįʼ nidayiizlá.
12 Tsé deitłʼinígíí índa tsé hashtʼeniyídaʼałneʼígíí ałdóʼ yichʼįʼ nidayiizlá; Bóhólníihii bikin biiʼ sohodizin dááchxǫʼ yę́ęgóó hashtʼéédadoolnííł biniyé tsin dilkʼis índa tsé hashtʼedaalyaaígíí áádóó kin hashtʼéédoolnííł biniyé niiʼnilígíí tʼáá átʼé béeso bee nidahaazniiʼ.
13 Nidi Bóhólníihii bikin biiʼ sohodizin góneʼ béésh łigaii daʼasaaʼ áádóó kǫʼ bee niltsésí áádóó łeetsʼaaʼ áádóó béésh dilní bee íʼdílzoołí índa tʼáá haʼátʼíhída béésh łigaii bee ádaalyaaígíí, doodaiiʼ óola bee ádaalyaaígíí éí Bóhólníihii bikin biiʼ sohodizin góneʼ béeso yah aajaaʼígíí doo bee nidahaazniiʼ da,
14 nidi éí nidaalnishígíí yaa deiznilgo Bóhólníihii bikin biiʼ sohodizin yee hashtʼéédayiidlaa.
15 Nááʼáłdóʼ bá nidaʼanishígíí éí nidaalnishígíí yichʼįʼ nidayiilée doo biniyé béeso baa daasʼnilígíí éí doo yaa chʼínídahwiitʼaah da, háálá badaʼahódlíigo chodayoołʼı̨́ı̨́ nítʼééʼ.
16 Bee hazʼáanii kʼétiʼjí nááhániihii áádóó ádił oodzíiʼgi bee kʼééhodoodǫǫłgo nááhániihii bá béeso sinilígíí éí náádaʼiiłniihii daabí; éí doo Bóhólníihii bikin biiʼ sohodizin góneʼ yah aajaaʼ da.
17 Nítʼééʼ Síriya dineʼé aláahgo binanitʼaʼí Házeiyel éí Gath kin haalʼáágóó haayáago yikʼijįʼ naazbaaʼgo yisná, áádóó Házeiyel éí Jerúsalem góde doogáałgo bíniʼ áhoolaa.
18 Áádóó Júdah dineʼé aláahgo binanitʼaʼí Jiihóʼash éí hazhéʼé yę́ę Júdah dineʼé aláahgo bindanitʼaʼí Jiiháshafat áádóó Jiihóram índa Eihazáíyah éí dílzingo ninádeidiyiizʼą́ą́ nítʼéʼígíí tʼáá átʼé, áádóó tʼáá hó tʼáadoo leʼé dílzingo nináhizdeezʼánígíí, índa Bóhólníihii bikin biiʼ sohodizin góneʼ daʼílíinii hashtʼeʼsinilígíí bitahdóó índa aláahgo naatʼáanii bikindóóígíí óola tʼáá átʼé éí nízhdiinilgo Síriya dineʼé aláahgo binanitʼaʼí bichʼįʼ há eejaaʼ, áko Házeiyel éí Jerúsalem yitsʼą́ąjigo dah diiyá.
19 Áko Jiihóʼash łahjįʼ ádzaaígíí áádóó yaa naayáhígíí tʼáá átʼé Júdah dineʼé aláahgo binanitʼaʼí danilı̨́ı̨́ nítʼééʼ yę́ę binaaltsoos Kránikals wolyéii bikʼinídaháasdzo.
20 Bá nidaalʼaʼí dah diiʼáazhgo hakʼijįʼ hohodeezʼą́ągo Síla hazʼą́ą́ góyaa atiinígóó ákwii kin Míllo wolyéhígíí biyiʼ góneʼ Jiihóʼash yiyiisxı̨́.
21 Shímiyath biyeʼ Józakar áádóó Shómar biyeʼ Jiihózabad há naalʼaʼí nilíinii éí díí atíhoolaago dadziztsą́; nítʼééʼ David yę́ę bikin haalʼáagi dahazhéʼé yę́ę yóóʼádaalyaaígi yóóʼádahoolaa, áko hayeʼ Amazáíyah hatsáskʼehgi aláahgo naatʼáanii náánásdlı̨́ı̨́ʼ.
