2 Kings 13:1-25
13 Júdah dineʼé aláahgo binanitʼaʼí Éíhazáíyah biyeʼ Jóʼash nantʼáago naadiin tááʼ náhááh binih Jííhu biyeʼ Jiihóʼahaz éí Samériya kin haalʼáagi Ízrel dineʼé aláahgo yinanitʼaʼí silı̨́ı̨́ʼ; aláahgo naatʼáanii nilı̨́įgo tsostsʼidtsʼáadah nááhai.
2 Áko Bóhólníihii binááł doo yáʼáshóonii yaa naayá, Nííbat biyeʼ Jerobówam yee niʼiisíʼígíí, éí bee Ízrel dineʼé nidaʼiisíihgo áyiilaii yikʼehgóó níyáago tʼáadoo yóóʼiidííʼą́ą da.
3 Bóhólníihii éí Ízrel dineʼé yichʼįʼ báhóóchįįdgo Síriya dineʼé aláahgo binanitʼaʼí Házeiyel índa biyeʼ Ben-héídad yaa náhodiʼáahgo hoolzhiizh.
4 Síriya dineʼé aláahgo binanitʼaʼí éí Ízrel dineʼé yide áhósingo Ízrel dineʼé bichʼįʼ nidahwiiʼná; éí bąą Jiihóʼahaz éí Bóhólníihii baa níjooskango hodiiztsʼą́ą́ʼ.
5 (Áko Bóhólníihii éí Ízrel dineʼé yisdábidooniłii yeidiníʼą́, ákótʼéego Síriya dineʼé biyaadóó hajookai, áko índa Ízrel dineʼé átséédą́ą́ʼ dabighan yiiʼ kéédahatʼı̨́ı̨́ nítʼéʼígi átʼéego ninákai.
6 Kótʼée nidi Jerobówam bitsʼą́ą́dóó oochíłígíí éí yee nidaʼiisíʼígíí, éí bee Ízrel dineʼé nidaʼiisíihgo áyiilaii yikʼehgo deíkáahgo tʼáadoo yóóʼadeidííʼą́ą da, áádóó Samériya kin haalʼáagi ałdóʼ asdzání bidaʼalyaii tʼah hólǫ́.)
7 Ben-héídad éí Jiihóʼahaz ashdladiin łı̨́ı̨́ʼ yee nidaabaahígíí áádóó tsindaabąąs bijáád naakiígíí neeznáá índa siláo neeznáadi míilgo tʼéiyá niinínil, háálá Síriya dineʼé aláahgo binanitʼaʼí łahjįʼ diné ałtso íísdįįdgo łeezh dibahí nahalingo áyiilaa.
8 Nítʼééʼ Jiihóʼahaz łahjįʼ ádzaaígíí áádóó yaa naayáii tʼáá ałtso índa yee ayóó átʼéé nítʼééʼ yę́ę éí Ízrel dineʼé aláahgo binanitʼaʼí danilı̨́ı̨́ nítʼééʼ yę́ę binaaltsoos Kránikals wolyéii bikʼinídaháasdzo.
9 Áko Jiihóʼahaz éí dahazhéʼé yę́ę daʼiiłhaazhígi átʼéego ajiiłhaazh, áádóó Samériya kin haalʼáagi yóóʼádahojiilaa, áko hayeʼ Jóʼash hatsáskʼehgi aláahgo naatʼáanii náánásdlı̨́ı̨́ʼ.
Jóʼash éí Ízrel kéyahgi nantʼáá nítʼééʼ
10 Júdah dineʼé aláahgo binanitʼaʼí Jóʼash nantʼáago tádiindóó baʼaan tsostsʼid náhááh góneʼ, Jiihóʼahaz biyeʼ Jiihóʼash Samériyagi Ízrel dineʼé aláahgo yinanitʼaʼí silı̨́ı̨́ʼ, áko nantʼáago hastą́ʼáadah nááhai.
11 Jiihóʼash éí Bóhólníihii binááł doo yáʼádaashóonii yaa naayáago Nííbat biyeʼ Jerobówam yee niʼiisíʼígíí tʼáá átʼé éí bee Ízrel dineʼé nidaʼiisíihgo áyiilaii tʼáadoo yóóʼiidííʼą́ą da, nidi éí yikʼehgo naayá.
12 Áádóó Jóʼash łahjįʼ ádzaaígíí áádóó yaa naayáii éí tʼáá átʼé índa yee ayóó átʼéii bee Júdah dineʼé aláahgo binanitʼaʼí Amazáíyah yikʼijįʼ naazbaaʼígíí éí Ízrel dineʼé aláahgo binanitʼaʼí danilı̨́ı̨́ nítʼééʼ yę́ę binaaltsoos Kránikals wolyéii bikʼinídaháasdzo.
13 Áko Jóʼash éí dahazhéʼé yę́ę daʼiiłhaazhígi átʼéego ajiiłhaazh, áádóó Ízrel dineʼé aláahgo bindanitʼaʼí yę́ę Samériya kin haalʼáagi yóóʼádaalyaagi yóóʼáhoʼdiilyaa, áko Jerobówam éí habikááʼdóó nahatʼáii yikááʼ dah neezdá.
Iiláísha akéeʼdi náás áhooníiłii yaa hoolneʼ áádóó daaztsą́
14 Áko Iiláísha éí bitah honiigaii tʼáá éí yitsʼą́ą́dóó dadootsaał yę́ędą́ą́ʼ, Ízrel dineʼé aláahgo binanitʼaʼí Jóʼash éí haa níyáago hakʼijįʼ sitı̨́įgo yichago ání, Shizhéʼé, shizhéʼé, tsinaabąąs bijáád naakiígíí Ízrel dineʼé bee bichʼą́ą́h naʼabaahii índa łı̨́ı̨́ʼ yee nidaʼałbąąsii!
15 Nítʼééʼ Iiláísha áháłní, Ałtı̨́ı̨́ʼ áádóó kʼaaʼ nídiinííł. Áko ałtı̨́ı̨́ʼ kʼaaʼ biłgo nízhdiinil.
16 Áko Ízrel dineʼé aláahgo binanitʼaʼí ábijiní, Nílaʼ bee ałtı̨́ı̨́ʼ yiiłtsóód. Áko jiiłtsoodgo Iiláísha bílaʼ yee aláahgo naatʼáanii bílaʼ yikááʼ dah deesniiʼ.
17 Nítʼééʼ ání, Haʼaʼaahjigo tsésǫʼ ąą ánílééh. Áko ąą ájiilaa. Nítʼééʼ Iiláísha ání, Adzíłtʼóóh. Áko iijííłtʼoh. Áádóó ání, Bóhólníihii bikʼaaʼ bee hodínóonééł; tʼáá éí Síriya dineʼé bee baa hodínóonééł; jó, Éífekdi Síriya dineʼé ałtso ásíníłdįįdjįʼ nidííłtsił.
18 Áko áháłní, Kʼaaʼ nídiinííł. Áko nízhdiinil. Áádóó Ízrel dineʼé aláahgo binanitʼaʼí ábijiní, Niʼjįʼ bee adzíłtʼóóh. Táadi bee iijííłtʼoh áádóó tʼáá ákódí.
19 Nítʼééʼ Diyin God yá naalʼaʼí hachʼįʼ báhóóchįįdgo ání, Ashdladi, doodaiiʼ hastą́ądi iizdííłtʼoh nítʼééʼ, ákohgo Síriya dineʼé ałtso ádííłdįįłjįʼ atídíílííł nítʼééʼ, nidi kʼad Síriya dineʼé tʼáá táʼídi atídíílííł.
20 Áádóó Iiláísha daaztsą́ągo yóóʼádajiilaa. Íídą́ą́ʼ náhááh góneʼ Móʼab dineʼé łaʼ kéyahjįʼ anájahgo tʼáadoo leʼé ghadayiiʼnííł.
21 Ákódzaadóó diné léiʼ yóóʼádajiléehgo, shoo, diné łaʼ tʼáá naʼníleʼdii yijahgo dadziiłtsą́ągo diné yóóʼádajiléhígíí Iiláísha bitséníʼootséél góneʼ adadziisxan, áádóó diné bitsʼíís éí Iiláísha yę́ę bitsʼin bíhidééʼnáaʼgo náhooʼniiʼgo yiizįʼ.
22 Jiihóʼahaz bíyoołkááł yę́ędą́ą́ʼ Síriya dineʼé aláahgo binanitʼaʼí Házeiyel éí Ízrel dineʼé yide áhósin nítʼééʼ.
23 Áko Bóhólníihii haa joobaʼ áádóó haa aʼááh nízingo hodiiztsʼą́ą́ʼ índa Éíbraham áádóó Áízak índa Jéíkab yił ahadaʼdeestʼánígíí biniinaa doo ałtso áhodoołdįįł da, nidi díí jı̨́įjįʼ hólónídóó doo átsʼą́ąjįʼ kóháléeh da.
24 Síriya dineʼé aláahgo binanitʼaʼí Házeiyel daaztsą́ągo hayeʼ Ben-héídad éí hatsáskʼehgi aláahgo naatʼáanii silı̨́ı̨́ʼ.
25 Áko Jiihóʼahaz biyeʼ Jiihóʼash éí Házeiyel biyeʼ Ben-héídad éí kin hadaasʼá hazhéʼé Jiihóʼahaz anaaʼ bee yílákʼeedóó hayíínilígíí bílákʼee háájooʼnil. Jóʼash táadi hakʼeh nídeesdlı̨́įʼgo Ízrel dineʼé bikin hadaasʼáhígíí nínázhdiiʼnil.
