2 Kings 14:1-29
14 Ízrel dineʼé aláahgo binanitʼaʼí Jiihóʼahaz yę́ę biyeʼ Jóʼash nantʼáago naaki náhááh góneʼ Júdah dineʼé aláahgo binanitʼaʼí Jóʼash yę́ę biyeʼ Amazáíyah aláahgo nantʼá silı̨́ı̨́ʼ.
2 Éí naadiin ashdlaʼ binááhaigo aláahgo naatʼáanii nilı̨́įgo hahoolzhiizh, áádóó naadiin náhástʼéí nááhaijįʼ Jerúsalem kin haalʼáagi nantʼáá nítʼééʼ. Áko bimá éí Jerúsalemdóó naagháago Jiihóʼadan wolyéé nítʼééʼ.
3 Áádóó Bóhólníihii binááł tʼáá ákogi ádaatʼéii yaa naayá, nidi doo bizhéʼé David yę́ęgi átʼéego naayáa da, áko bizhéʼé Jóʼash tʼáá ałtso yaa naayáhígíí bikʼehgo yaa naayá.
4 Nidi dah daaskʼid bighą́ąʼdi ádaalyaaígíí doo nahjįʼ kólnééhgóó ákweʼé tsin bijeeh dilidgo łikání halchinii diné tʼah náádayiiłniih nítʼééʼ.
5 Kódzaago bee óhólnííh haa deetʼą́ągo tʼáá áko há naalʼaʼí nidiltʼéego hazhéʼé aláahgo naatʼáanii yiyiisxínígíí nidzistseed.
6 Nidi hazhéʼé yiyiisxínígíí baʼáłchíní éí tʼáadoo nidzistseed da; Mózes binaaltsoos biyiʼ bee hazʼáanii tʼáá bee akʼeʼashchínígíí biyiʼ Bóhólníihii haadzííʼ kóníigo, Azhéʼé danilíinii áłchíní biniinaa doo nidootsił da, doodaiiʼ áłchíní bizhéʼé biniinaa doo nidootsił da, nidi diné tʼááłáʼí jinítínígo ádił nidadziisíhígíí biniinaa nidahoʼditseed doo.
7 Áádóó Áshįįh Bił Honítsʼaaʼ hoolyéé góyaa Íídam dineʼé bisiláo neeznáadi míilgo nidzistseed, índa Síílah kin haalʼáii anaaʼ bee dzisná, áádóó díí jı̨́įjįʼ Jákthiyel bee hojíízhiʼ.
8 Nítʼééʼ Amazáíyah éí Jííhu binálí Jiihóʼahaz biyeʼ Ízrel dineʼé aláahgo binanitʼaʼí Jiihóʼash yichʼįʼ haneʼ yił nidaalʼaʼí ayííłʼaʼgo ííłní, Hágo, anaaʼ biniyé ahididiitʼashgo ahidiigą́ą́ł.
9 Áko Ízrel dineʼé aláahgo binanitʼaʼí Jiihóʼash éí Júdah dineʼé aláahgo binanitʼaʼí Amazáíyah yichʼįʼ iʼííłʼaʼgo ííłní, Lébanan kéyahdóó chʼil deeníní éí Lébanandóó gad sikaadii yichʼįʼ iʼííłʼaʼgo kóní, Nitsiʼ shiyeʼ yił ahaa dootʼash biniyé baa dííłtééł; nítʼééʼ Lébanangi naaldlooshii ałchinii naagháago éí chʼil deeníní łeeh yíʼííłʼeez.
10 Íídam dineʼé bisiláo tʼáá aaníí nisíníłtseedgo éí bee ádaa hosíníʼnih; bee ádaa hoʼniihígíí hazhóʼó nighangi bił ánítʼé. Haʼátʼíísh biniyé ni áádóó Júdah dineʼé tʼáá bił nihikʼeh didoodleełgo atínihidoolíiłii baa nánítʼı̨́?
11 Nidi Amazáíyah doo íistsʼą́ąʼ da. Éí bąą Ízrel dineʼé aláahgo binanitʼaʼí Jiihóʼash éí Júdah dineʼé aláahgo binanitʼaʼí Amazáíyah yichʼįʼ ákóde ííyáago éí Júdah kéyahgi Beth-shíímesh kin shijaaʼdi ałchʼįʼ nizhníʼáázh.
12 Áádóó Ízrel dineʼé éí Júdah dineʼé yikʼeh dadeesdlı̨́įʼgo diné tʼááłáʼí nítínígo dabighangóó anídahineezhchą́ą́ʼ.
13 Áko Ízrel dineʼé aláahgo binanitʼaʼí Jiihóʼash éí Júdah dineʼé aláahgo binanitʼaʼí Amazáíyah éí Eihazáíyah binálí Jiihóʼash biyeʼ nilı̨́įgo Beth-shíímeshgi yisná áádóó Jerúsalemjįʼ níyáago Jerúsalem ditą́ągo binaa ahééʼítłʼinígíí Íífreiyim yah aʼatiinídóó bee nástłʼahgi aańʼdítı̨́híjįʼ, éí hastą́ądi neeznádiin adéesʼeez bíighahjįʼ naa adeineeskaad.
14 Áko Bóhólníihii bikin biiʼ sohodizin góneʼ óola áádóó béésh łigaii índa łeetsʼaaʼ bikʼídajiiskaígíí índa aláahgo naatʼáanii bighandóó naalyeʼé nídayiizláʼígíí áádóó diné dadzisnánígíí bił Samériya kin haalʼáágóó tʼą́ą́ʼ aníjookai.
15 Áko Jiihóʼash łahjįʼ ádzaaígíí éí yaa naayáhígíí índa yee ayóó átʼéé nítʼéʼígíí áádóó Júdah dineʼé aláahgo binanitʼaʼí Amazáíyah yił anaaʼ ahiłʼı̨́ı̨́ nítʼéʼígíí éí Ízrel dineʼé aláahgo binanitʼaʼí danilı̨́ı̨́ nítʼééʼ yę́ę binaaltsoos Kránikals wolyéii bikʼinídaháasdzo.
16 Nítʼééʼ Jiihóʼash éí dabizhéʼé yę́ę daʼiiłhaazhígi átʼéego ajiiłhaazhgo Samériyagi Ízrel dineʼé aláahgo binanitʼaʼí danilı̨́ı̨́ nítʼééʼ yę́ę yóóʼádaalyaaígi yóóʼáhoʼdiilyaa, áádóó hayeʼ Jerobówam hatsáskʼehgi aláahgo naatʼáanii nantʼá silı̨́ı̨́ʼ.
17 Ízrel dineʼé aláahgo binanitʼaʼí Jiihóʼahaz biyeʼ Jiihóʼash daaztsą́ą́dóó bikʼijįʼ Júdah dineʼé aláahgo binanitʼaʼí Jóʼash biyeʼ Amazáíyah hináago ashdlaʼáadah nínáánááhai.
18 Áádóó Amazáíyah łahjįʼ ádzaaígíí éí Júdah dineʼé aláahgo binanitʼaʼí danilı̨́ı̨́ nítʼééʼ yę́ę binaaltsoos Kránikals wolyéii bikʼinídaháasdzo.
19 Áko Jerúsalemgi hondahazʼą́ągo Léíkish kin haalʼáágóó azhnííchą́ą́ʼ, nidi ákǫ́ǫ́ hakééʼ adaʼasʼaʼgo áadi dahwiisxı̨́.
20 Áádóó łı̨́ı̨́ʼ yee nídahastı̨́įgo Jerúsalem éí David yę́ę bikin haalʼáhígi dahazhéʼé yę́ę yóóʼádaalyaagi yóóʼádahojiilaa.
21 Áádóó Júdah dineʼé tʼáá ałtso éí Azaráíyah hastą́ʼáadah binááhaigo hazhéʼé Amazáíyah yę́ę bitsáskʼehgi aláahgo naatʼáanii nilı̨́įgo ádahoolaa.
22 Aláahgo naatʼáanii Amazáíyah éí dabizhéʼé yę́ę daʼiiłhaazhígi átʼéego ajiiłhaazhdóó bikʼijįʼ Azaráíyah éí Íílath kin haalʼáii hashtʼééyiidlaago Júdah dineʼé yaa néidiníʼą́.
Jerobówam nantʼáá nítʼééʼ
23 Júdah dineʼé aláahgo binanitʼaʼí Jóʼash yę́ę biyeʼ Amazáíyah nantʼáago ashdlaʼáadah náhááh góneʼ Ízrel dineʼé aláahgo binanitʼaʼí Jóʼash yę́ę biyeʼ Jerobówam éí Samériya kin haalʼáagi aláahgo nantʼá silı̨́ı̨́ʼ áádóó nantʼáago dízdiindóó baʼaan tʼááłáʼí nááhai.
24 Áádóó Bóhólníihii binááł doo yáʼádaashóonii yaa naayáago Nííbat biyeʼ Jerobówam yee niʼiisíʼígíí tʼáá átʼé éí bee Ízrel dineʼé nidaʼiisíihgo áyiilaii tʼáadoo yóóʼiidííʼą́ą da.
25 Gath-híífer kin shijaaʼdóó Diyin God yá halneʼii Amítai biyeʼ Jónah éí Bóhólníihii Ízrel biDiyin God yá naalʼaʼí yee yichʼįʼ haadzíʼígíí bikʼehgo Jerobówam éí Héímath kin haalʼáádóó, dzígai Árabah hoolyéedi tónteel siyíníjįʼ, éí kéyah tʼáá nidaneesʼáníjįʼ shónáyoostʼeʼ.
26 Áko Ízrel dineʼé tʼáá íiyisí bikʼeʼashchʼíiʼgo bichʼįʼ nidahwiiʼnáá lágo Bóhólníihii yiyiiłtsą́; jó, Ízrel dineʼé naalteʼ, doodaiiʼ doo naalteʼ nilíinii bíká adoolwołígíí doo łaʼ daadzíiʼ da.
27 Nidi, Bóhólníihii éí yáʼąąsh biyaadóó Ízrel dineʼé bízhiʼ nahjįʼ kódeeshłííł, doo dííniid da, nidi Jóʼash biyeʼ Jerobówam yee yisdáhóónil.
28 Áko Jerobówam łahjįʼ ádzaaígíí áádóó yaa naayáhígíí tʼáá átʼé índa yee ayóó átʼéé nítʼééʼ yę́ę áádóó naazbaaʼgo Damáskas kin haalʼáii índa Héímath kin haalʼáii éí Júdah dineʼé bí nítʼéʼígíí Ízrel dineʼé yá shónáyoostʼeʼígíí éí Ízrel dineʼé aláahgo binanitʼaʼí danilı̨́ı̨́ nítʼééʼ yę́ę binaaltsoos Kránikals wolyéii bikʼinídaháasdzo.
29 Áádóó Jerobówam éí dahazhéʼé yę́ę tʼáá éí Ízrel dineʼé aláahgo bindanitʼaʼí daʼiiłhaazhígi átʼéego ajiiłhaazh, áko hayeʼ Zakaráíyah hatsáskʼehgi aláahgo nantʼá silı̨́ı̨́ʼ.
