2 Kings 15:1-38
15 Ízrel dineʼé aláahgo binanitʼaʼí Jerobówam nantʼáago naadiin tsostsʼid náhááh góneʼ Júdah dineʼé aláahgo binanitʼaʼí Amazáíyah yę́ę biyeʼ Azaráíyah aláahgo nantʼá silı̨́ı̨́ʼ.
2 Éí hastą́ʼáadah binááhaigo aláahgo nantʼá silı̨́ı̨́ʼ. Jerúsalem kin haalʼáagi nantʼáago ashdladiindóó baʼaan naaki nááhai. Bimá éí Jerúsalemdóó naagháago Jekoláíyah wolyé.
3 Áádóó hazhéʼé Amazáíyah áátʼįįdígíí tʼáá átʼé bikʼehgo éí Bóhólníihii binááł tʼáá ákogi ádaatʼéii baa nijiyá.
4 Tʼáá hazhóʼó ninádahałaah doo biniyé wódah nahazʼą́ągo ádaalyaaígíí tʼáadoo nahjįʼ kólyaa da; ákweʼé tʼahdii didlidgo nááhániihii índa tsin bijeeh dilidgo łikání halchinii nááhániihii náádajiiłniih.
5 Nítʼééʼ aláahgo naatʼáanii éí łóód atsʼíís yiyáanii naałdzidii yee Bóhólníihii atíbiilaago daaztsą́ bijı̨́įjįʼ tʼáá sahdii bighan nítʼééʼ. Aláahgo naatʼáanii biyeʼ Jótham haghan bee bóhólníihgo kéyahgi kéédahatʼínígíí yinantʼáá nítʼééʼ.
6 Azaráíyah łahjįʼ ádzaaígíí áádóó yaa naayáhígíí tʼáá átʼé Júdah dineʼé aláahgo binanitʼaʼí danilı̨́ı̨́ nítʼééʼ yę́ę binaaltsoos Kránikals wolyéii bikʼinídaháasdzo.
7 Áko Azaráíyah éí dahazhéʼé daʼiiłhaazhígi átʼéego ajiiłhaazh, áádóó David yę́ę bikin haalʼáagi dahazhéʼé yę́ę yóóʼádabiʼdiilyaaígi yóóʼáhoʼdiilyaa, áádóó hayeʼ Jótham hatsáskʼehgi aláahgo naatʼáanii silı̨́ı̨́ʼ.
Zakaráíyah nantʼáá nítʼééʼ
8 Azaráíyah éí Júdah dineʼé aláahgo yinanitʼaʼí nilı̨́įgo tádiindóó baʼaan tseebíí náhááh góneʼ Jerobówam yę́ę biyeʼ Zakaráíyah éí Samériya kin haalʼáagi Ízrel dineʼé yinantʼáago hastą́ą́h nídeezid.
9 Dahazhéʼé ádáátʼįįdígíí bikʼehgo Bóhólníihii binááł doo yáʼádaashóonii baa nijiyá; Nííbat biyeʼ Jerobówam yee niʼiisíʼígíí éí bee Ízrel dineʼé nidaʼiisíihgo áyiilaii éí tʼáadoo yóóʼiidííʼą́ą da.
10 Jéíbesh biyeʼ Shálam honahazʼą́ągo dineʼé yinááł atíhoolaago hwiisxı̨́ áádóó hatsáskʼehgi aláahgo nantʼá silı̨́ı̨́ʼ.
11 Zakaráíyah łahjįʼ ádzaaígíí éí Ízrel dineʼé aláahgo binanitʼaʼí danilı̨́ı̨́ nítʼééʼ yę́ę binaaltsoos Kránikals wolyéii bikʼinídaháasdzo.
12 Bóhólníihii éí Jííhu díí yee yichʼįʼ haadzíiʼgo ádííniid, Naʼáłchíní náás ahoolchíiłii dı̨́įdi ałkʼi náʼázhchı̨́ı̨́góó Ízrel dineʼé bibikááʼdóó nahatʼáii yikááʼ dah náhidinoobįįł dooleeł. Ákótʼéego bohoolyaa.
Shálam nantʼáá nítʼééʼ
13 Azáíyah éí Júdah dineʼé aláahgo yinanitʼaʼí nilı̨́įgo tádiindóó baʼaan náhástʼéí náhááh góneʼ Jéíbesh yę́ę biyeʼ Shálam aláahgo nantʼá silı̨́ı̨́ʼ, áko Samériya kin haalʼáagi nantʼáago tʼááłáʼí nídeezid.
14 Nítʼééʼ Géídai biyeʼ Ménahem éí Térzah kin haalʼáádóó Samériyajįʼ níyá, áádóó ákwii Jéíbesh biyeʼ Shálam atíyiilaago yiyiisxı̨́, áko éí bitsáskʼehgi aláahgo naatʼáanii silı̨́ı̨́ʼ.
15 Shálam łahjįʼ ádzaaígíí áádóó inahazʼánígíí éí Ízrel dineʼé aláahgo binanitʼaʼí danilı̨́ı̨́ nítʼééʼ yę́ę binaaltsoos Kránikals wolyéii bikʼinídaháasdzo.
16 Nítʼééʼ Ménahem éí Tífsah kin haalʼáii áádóó ákwii diné kéédahatʼínígíí tʼáá ałtso índa Térzah kin haalʼáádóó kéyah tʼáá átʼé yikʼijįʼ naazbaaʼgo yikʼeh deesdlı̨́ı̨́ʼ; yah aʼatiin doo há ąą ádahalééhgóó biniinaa yikʼijįʼ naazbaaʼgo asdzání daaltsánígíí tʼáá ałtso bibid ąą deidiyiizǫ́ǫ́z.
Ménahem nantʼáá nítʼééʼ
17 Azaráíyah éí Júdah dineʼé aláahgo yinanitʼaʼí nilı̨́įgo tádiindóó baʼaan náhástʼéí náhááh góneʼ Géídai biyeʼ Ménahem éí Ízrel dineʼé aláahgo yinanitʼaʼí silı̨́ı̨́ʼ, áko Samériyagi aláahgo nantʼáago neeznáá nááhai.
18 Áko Bóhólníihii binááł doo yáʼádaashóonii yaa naayáago Nííbat biyeʼ Jerobówam yee niʼiisíʼígíí éí bee Ízrel dineʼé nidaʼiisíihgo áyiilaii éí hóyoołkááł bijı̨́įjįʼ tʼáadoo yitsʼáníyáa da.
19 Áádóó Asíriya dineʼé aláahgo binanitʼaʼí Pul éí Ízrel dineʼé yichʼįʼ anaaʼ hasłı̨́ı̨́ʼ, áko Ménahem bee óhólnííh bidziilgo jótąʼ doo biniyé Pul háká adoolwołgo béésh łigaii tálent wolyéhígíí tʼááłáhídi míilgo baazhnínil.
20 Áko Ménahem éí béésh łigaii shékel wolyéii Asíriya dineʼé aláahgo binanitʼaʼí baa dooʼnił biniyé Ízrel dineʼé daʼatʼíinii tʼáá ałtso bitsʼą́ą́dóó tʼááłáʼí nítínígo shékel ashdladiingo nideidiyooléełgo bee hojiiłʼaʼ, áádóó anáádzáago doo tʼáá kéyahgi naagháa da nítʼééʼ.
21 Ménahem łahjįʼ ádzaaígíí áádóó yaa naayáhígíí tʼáá ałtso éí Ízrel dineʼé aláahgo binanitʼaʼí danilı̨́ı̨́ nítʼééʼ yę́ę binaaltsoos Kránikals wolyéii bikʼinídaháasdzo.
22 Áko Ménahem éí dahazhéʼé yę́ę daʼiiłhaazhígi átʼéego ajiiłhaazh áádóó hayeʼ Pekaháíyah hatsáskʼehgi aláahgo nantʼá silı̨́ı̨́ʼ.
Pekaháíyah nantʼáá nítʼééʼ
23 Azaráíyah éí Júdah dineʼé aláahgo yinanitʼaʼí nilı̨́įgo ashdladiin náhááh góneʼ Ménahem biyeʼ Pekaháíyah éí Samériyagi Ízrel dineʼé aláahgo yinanitʼaʼí silı̨́ı̨́ʼ, áádóó nantʼáago naaki nááhai.
24 Áádóó Bóhólníihii binááł doo yáʼádaashóonii yaa naayáago Nííbat biyeʼ Jerobówam yee niʼiisíʼígíí éí bee Ízrel dineʼé nidaʼiisíihgo áyiilaii tʼáadoo yitsʼáníyáa da.
25 Nidi hasiláo yinanitʼaʼí nilíinii Remaláíyah biyeʼ Pííkah éí Gíliyadóó diné ashdladiingo yił honahazʼą́ągo Samériyadi aláahgo naatʼáanii bikin náwóneʼédi Árgab áádóó Aráíyeh tʼáá yił nahastseed, áko hatsáskʼehgi aláahgo naatʼáanii silı̨́ı̨́ʼ.
26 Pekaháíyah łahjįʼ ádzaaígíí áádóó yaa naayáii tʼáá átʼé Ízrel dineʼé aláahgo binanitʼaʼí danilı̨́ı̨́ nítʼééʼ yę́ę binaaltsoos Kránikals wolyéii bikʼinídaháasdzo.
Pííkah nantʼáá nítʼééʼ
27 Azaráíyah éí Júdah dineʼé aláahgo yinanitʼaʼí nilı̨́įgo ashdladiindóó baʼaan naaki náhááh góneʼ Remaláíyah biyeʼ Pííkah éí Samériyagi Ízrel dineʼé aláahgo yinantʼá silı̨́ı̨́ʼ; ákwii nantʼáago naadiin nááhai.
28 Áádóó Bóhólníihii binááł doo yáʼádaashóonii yaa naayá; Nííbat biyeʼ Jerobówam yee niʼiisíʼígíí éí bee Ízrel dineʼé nidaʼiisíihgo áyiilaii tʼáadoo yitsʼáníyáa da.
29 Ízrel dineʼé aláahgo binanitʼaʼí Pííkah bíyoołkááł yę́ędą́ą́ʼ Asíriya dineʼé aláahgo binanitʼaʼí éí kin hadaasʼá Áíjan, Éíbel-beth-méíyakah, Janówah, Kíídesh índa Héízar áádóó Gíliyad, Gálilii índa Náftalai kéyah tʼáá átʼéé nítʼééʼ yisná, áádóó diné deisnánígíí Asíriyagóó ayiizhʼeezh.
30 Áko Azáíyah biyeʼ Jótham aláahgo naatʼáanii nilı̨́įgo naadiin náhááh góneʼ Íílah biyeʼ Hoshíya éí Remaláíyah biyeʼ Pííkah yinahazʼą́ągo atíyiilaago yiyiisxı̨́ áádóó éí bitsáskʼehgi aláahgo naatʼáanii silı̨́ı̨́ʼ.
31 Pííkah łahjįʼ ádzaaígíí áádóó yaa naayáii tʼáá átʼé éí Ízrel dineʼé aláahgo binanitʼaʼí danilı̨́ı̨́ nítʼééʼ yę́ę binaaltsoos Kránikals wolyéii bikʼinídaháasdzo.
Jótham nantʼáá nítʼééʼ (2Chr. 27:1-9)
32 Remaláíyah biyeʼ Pííkah éí Ízrel dineʼé aláahgo yinanitʼaʼí nilı̨́įgo naaki náhááh góneʼ Júdah dineʼé aláahgo binanitʼaʼí Azáíyah biyeʼ Jótham aláahgo naatʼáanii silı̨́ı̨́ʼ.
33 Naadiin ashdlaʼ binááhaigo aláahgo naatʼáanii silı̨́ı̨́ʼ, áko Jerúsalemgi nantʼáago hastą́ʼáadah nááhai. Bimá éí Zéídak yitsiʼ nilı̨́įgo Jiirúsha wolyé.
34 Áko hazhéʼé Azáíyah yę́ę áátʼįįdígíí bikʼehgo Bóhólníihii binááł tʼáá ákogi ájítʼı̨́ı̨́ nítʼééʼ.
35 Ákondi ninádahałaah doo biniyé wódah nahazʼą́ągo ádaalyaaígíí éí tʼáadoo nahjįʼ kólyaa da, nidi ákweʼé diné éí tʼah didlidgo nááhániihii índa tsin bijeeh dilidgo łikání halchinii nááhániihii náádayiiłniih. Bóhólníihii bikin biiʼ sohodizingi wódahgo yah aʼatiinígíí áńjiidlaa.
36 Jótham łahjįʼ áátʼįįdígíí áádóó yaa naayáii tʼáá átʼé éí Júdah dineʼé aláahgo binanitʼaʼí danilı̨́ı̨́ nítʼééʼ yę́ę binaaltsoos Kránikals wolyéii bikʼinídaháasdzo.
37 Éí yoołkááł yę́ędą́ą́ʼ Bóhólníihii éí Síriya dineʼé aláahgo binanitʼaʼí Ríízin áádóó Remaláíyah biyeʼ Pííkah éí Júdah dineʼé yichʼįʼ yiłʼáago hahoolzhiizh.
38 Jótham éí dahazhéʼé yę́ę daʼiiłhaazhígi átʼéego ajiiłhaazh, áádóó hazhéʼé David yę́ę bikin haalʼáhígi dahazhéʼé yę́ę yóóʼádabiʼdiilyaaígi yóóʼáhoʼdiilyaa, áko hayeʼ Éíhaz hatsáskʼehgi aláahgo naatʼáanii silı̨́ı̨́ʼ.
