2 Kings 16:1-20
16 Remaláíyah biyeʼ Pííkah éí aláahgo naatʼáanii nilı̨́įgo tsostsʼidtsʼáadah náhááh góneʼ Jótham biyeʼ Éíhaz aláahgo naatʼáanii silı̨́ı̨́ʼ.
2 Éíhaz naadiin binááhaigo aláahgo naatʼáanii silı̨́ı̨́ʼ, áádóó hastą́ʼáadah nááhaijįʼ Jerúsalemgi nantʼáá nítʼééʼ, nidi tʼáadoo tʼáá ákogi ájítʼı̨́įgo Bóhólníihii haDiyin God binááł jideeyáa da; hazhéʼé David áátįįdígi tʼáadoo ádziidzaa da.
3 Nidi Ízrel dineʼé aláahgo binanitʼaʼí nídaadleełii ádáátʼįįdii bikʼehgo nijiyá. Jó, Bóhólníihii éí Ízrel dineʼé bitsʼąą ałʼąą dineʼé chʼíiniiskaadígíí éí doo yíłdinígíí bikʼehgo hayeʼ azhdííłkʼą́ą́ʼ.
4 Áádóó ninádahałaah doo biniyé wódah nahazʼą́ągo ádaalyaaígóó áádóó dah daaskʼidgóó índa tsin dootłʼizh naazkaadii tʼáá átʼé dabiyaagóó didlidgo nááhániihii áádóó tsin bijeeh dilidgo łikání halchingo nááhániihii nínáájiiłnih.
5 Áko Síriya dineʼé aláahgo binanitʼaʼí Ríízin áádóó Ízrel dineʼé aláahgo binanitʼaʼí Remaláíyah éí Jerúsalemgi anaaʼ hodoołeeł yiniyé bisiláo yił nínáago Éíhaz yizénáshzhiizh, nidi doo bikʼeh dazhdódleʼ átʼée da.
6 Íídą́ą́ʼ Síriya dineʼé aláahgo binanitʼaʼí Ríízin éí Íílath kin shijaaʼdóó Júdah dineʼé chʼídeineeskaadgo Síriya dineʼé yá shónáyoostʼeʼ, áko Síriya dineʼé Íílathjįʼ yah aheeznáago díí jı̨́įjįʼ ákweʼé kéédahatʼı̨́.
7 Nítʼééʼ Éíhaz éí Asíriya dineʼé aláahgo binanitʼaʼí Tíglath-pilíízer yichʼįʼ haneʼ yił nidaalʼaʼí ayííłʼaʼ kóníigo, Ná naalʼaʼí nishłı̨́ áádóó niyeʼ nishłı̨́; hágo, shaa nínáahgo Síriya dineʼé aláahgo binanitʼaʼí áádóó Ízrel dineʼé aláahgo binanitʼaʼí bighááshíłteeh, háálá shichʼįʼ nídiibaaʼ.
8 Áádóó Éíhaz éí Bóhólníihii bikin biiʼ sohodizin góneʼ béésh łigaii índa óola áádóó aláahgo naatʼáanii bikin góneʼ naalyeʼé bikʼídajiiskaígíí éí aa yílyáii átʼéego Asíriya dineʼé aláahgo binanitʼaʼí yeinínil.
9 Áko Asíriya dineʼé aláahgo binanitʼaʼí háká aalwodgo Asíriya dineʼé aláahgo binanitʼaʼí Damáskas kin haalʼá góde aníʼeezhgo yisná, áádóó diné deisnáago Ker hoolyéégóó adayiizhʼeezh, áko Ríízin dayiisxı̨́.
10 Áádóó aláahgo naatʼáanii Éíhaz éí Damáskasgóó Asíriya aláahgo binanitʼaʼí Tíglath-pilíízer yił ahididooʼash yiniyé ííyáago Damáskasgi bikááʼ nááʼiiniihí yiyiiłtsą́, áko aláahgo naatʼáanii Éíhaz éí bikááʼ nááʼiiniihí ályaaígíí yiʼiilaago áádóó bikʼehgo ádoolníłígíí bééʼályaago éí nááʼiiłniihii Yuráíjah yichʼįʼ yił iʼííłʼaʼ.
11 Áko nááʼiiłniihii Yuráíjah éí bikááʼ nááʼiiniihí áyiilaa, tʼáá Damáskasdę́ę́ʼ aláahgo naatʼáanii Éíhaz yiniyé hachʼįʼ yił aʼííłʼaʼígíí bikʼehgo bikááʼ nááʼiiniihí ájiilaa. Damáskasdę́ę́ʼ aláahgo naatʼáanii Éíhaz tʼah doo yíghááhgóó nááʼiiłniihii Yuráíjah ákóyiilaa.
12 Nítʼééʼ Damáskasdę́ę́ʼ aláahgo naatʼáanii níyáago bikááʼ nááʼiiniihí yiyiiłtsą́, áádóó aláahgo naatʼáanii bikááʼ nááʼiiniihí yichʼįʼ niníyáago yikááʼ nááʼiisniiʼ.
13 Áko bikááʼ nááʼiiniihí yikáaʼgi didlidgo nááhániihígíí áádóó akʼáán nááhániihígíí áádóó yanáadziʼgo nááhániihígíí índa hózhǫ́ǫ́jí nááhániihígíí bidił yikʼíístahgo nááyiisniiʼ.
14 Áko Bóhólníihii bikin biiʼ sohodizin bidáahgi índa tʼáá hó habikááʼ nááʼiiniihí bitaʼdóó béésh łitsoii bee bikááʼ nááʼiiniihí ályaaígíí éí Bóhólníihii bidáahgi siʼánígíí ałdóʼ néidiiʼą́ągo habikááʼ nááʼiiniihí bíighahgi náhookǫsjígo nizhníʼą́.
15 Aláahgo naatʼáanii Éíhaz éí nááʼiiłniihii Yuráíjah yichʼįʼ haadzíiʼgo ání, Díí bikááʼ nááʼiiniihí nitsaaígíí bikáaʼgi abínígo didlidgo nááhániihii índa eʼeʼáahgo akʼáán nááhániihii, áádóó aláahgo naatʼáanii bá didlidgo nááhániihii índa akʼáán nááhániihii áádóó kéyahdóó diné tʼáá átʼé bá didlidgo nááhániihii índa akʼáán nááhániihii áádóó yanáadziʼgo nááhániihii nááhíłniih, índa didlidgo náádahaniihii áádóó náádahaniihígíí bidił tʼáá ałtso bikʼínídaniłtah, nidi bikááʼ nááʼiiniihí béésh łitsoii bee ályaaígíí éí naʼídíshkidgo chonáoshʼįįh doo.
16 Aláahgo naatʼáanii Éíhaz yee haadzíʼígíí tʼáá ałtso bikʼehgo nááʼiiłniihii Yuráíjah yiʼiilaa.
17 Áádóó aláahgo naatʼáanii Éíhaz éí biiʼ táʼádígisí bá naaznilii bá nidaazʼáhígíí yąąh yiyííbı̨́ı̨́ʼ índa biiʼ táʼádígisí yitsʼá yiiznil, áádóó biiʼ táʼádígisí béésh łitsoii doolyı̨́įʼgo bee ályaaígíí éí biyaadóó béésh łitsoii bee béégashii ádaalyaii naazı̨́ı̨́ nítʼéʼédóó nahjįʼ nizhníʼą́ągo tsé yá yiztłʼingo yikáaʼgi dah yizʼą́.
18 Áko aláahgo naatʼáanii éí hááʼáyı̨́ı̨́h jı̨́ı̨́ góneʼ Bóhólníihii bikin biiʼ sohodizin góneʼ bá yah ahóótʼiʼígíí índa tłʼóóʼdę́ę́ʼ yah aʼatiinígíí bee ályaa yę́ę Asíriya dineʼé aláahgo binanitʼaʼí yá nahjįʼ kóyiilaa.
19 Éíhaz łahjįʼ ádzaii éí yaa naayáhígíí Júdah dineʼé aláahgo binanitʼaʼí danilı̨́ı̨́ nítʼééʼ yę́ę binaaltsoos Kránikals wolyéii bikʼinídaháasdzo.
20 Éíhaz éí dahazhéʼé yę́ę daʼiiłhaazhígi átʼéego ajiiłhaazh áádóó David yę́ę bikin haalʼáagi yóóʼádaalyaaígi yóóʼáhoʼdiilyaa; nítʼééʼ hayeʼ Heziikáíyah hatsáskʼehgi aláahgo naatʼáanii silı̨́ı̨́ʼ.
