2 Kings 17:1-41
17 Éíhaz éí Júdah dineʼé aláahgo yinanitʼaʼí nilı̨́įgo naakitsʼáadah náhááh góneʼ Íílah biyeʼ Hoshíya éí Samériyagi Ízrel dineʼé aláahgo yinanitʼaʼí silı̨́ı̨́ʼ áádóó nantʼáago náhástʼéí nááhai.
2 Áko Bóhólníihii binááł doo yáʼádaashóonii yaa naayá, nidi hátséedi Ízrel dineʼé aláahgo bindanitʼaʼí nidahaazlı̨́ı̨́ʼ yę́ę bikʼehgo éí dooda.
3 Nítʼééʼ Hoshíya éí Asíriya dineʼé aláahgo binanitʼaʼí Shalmaníízer hachʼįʼ nídiidzáago bá naalʼaʼí dzizlı̨́įʼgo naalyéhé bichʼįʼ nijiilé.
4 Áko Asíriya dineʼé aláahgo binanitʼaʼí éí Hoshíya nahaʼáhígíí haiideelʼı̨́ı̨́ʼ; jó, Ííjip dineʼé aláahgo binanitʼaʼí Só wolyéii yichʼįʼ haneʼ yił iʼííłʼaʼ, áko Asíriya dineʼé aláahgo binanitʼaʼí tʼáá nináháhááh bikʼeh naalyéhé bichʼįʼ ajíłʼı̨́ı̨́ nítʼéʼígíí doo baa jíníił da; éí biniinaa, Asíriya dineʼé aláahgo binanitʼaʼí hoołtsoodgo awáalyaa góneʼ hadádiʼníłkaal.
5 Nítʼééʼ Asíriya dineʼé aláahgo binanitʼaʼí kéyah tʼáá átʼéé nítʼééʼ yiiʼ hadiiyá, áádóó Samériyagóó haayáago tááʼ nááhaijįʼ yizénázná.
6 Hoshíya aláahgo naatʼáanii nilı̨́įgo náhástʼéí náhááh góneʼ Asíriya dineʼé aláahgo binanitʼaʼí éí Samériya kin haalʼáii yisnáago Ízrel dineʼé Asíriya kéyahgóó ayííʼeezhgo Héílah kin haalʼáagi áádóó Gózan kéyahgi Héíbar tooh nílíní bibąąhgóó índa Míídiya dineʼé bikin hadaasʼáágóó niyiizhʼeezh.
7 Háálá Ízrel dineʼé éí Ííjip kéyahdi aláahgo naatʼáanii Féro biyaadę́ę́ʼ Bóhólníihii haDiyin God chʼééhoníʼeezhígíí bichʼįʼ ádił nidaʼjiisíiʼgo diyin dabidiʼníinii dazhdósin nítʼééʼ.
8 Índa Bóhólníihii éí Ízrel dineʼé bitsʼąą ałʼąą dineʼé chʼíiniiskaadígíí biʼéʼélʼįʼ áádóó Ízrel dineʼé aláahgo bindanitʼaʼí biʼéʼélʼįʼ bikʼehgo dajíkááh nítʼééʼ.
9 Áko Ízrel dineʼé éí tʼáá nahontʼingo doo ákogi ádaatʼéii haBóhólníihii Diyin God binááł baa nijikaigo tʼáá kéédahojitʼı̨́ı̨́góó tʼáá átʼé éí yaʼiiʼáago bikááʼdóó haʼalzídídóó kin hadaasʼáii ditą́ągo binaa ahéédaʼastłʼinígóó ninádahałaah doo biniyé wódah nahazʼą́ągo ádayiilaa.
10 Áádóó ninádahałaah doo biniyé wódah nahazʼą́ągo ádayiilaaígíí tʼáá átʼé índa tsin dootłʼizh naazkaadii tʼáá átʼé dabiyaagóó ákǫ́ǫ́ edaʼalyaii bichʼįʼ nahadlá bá nahazʼą́ągo ádayiilaa.
11 Bóhólníihii éí Ízrel dineʼé bitsʼąą ałʼąą dineʼé nahjįʼ kóyiilaaígíí éí ninádahałaah doo biniyé wódah nahazʼą́ągo ádaalyaaígi tʼáá átʼé ádáátʼįįdígi átʼéego ákwii tsin bijeeh dilidgo łikání halchinii dazhdiłidgo doo yáʼádaashóonii baa nijikaigo bee Bóhólníihii bá dahojííłchįįd.
12 Háálá edaʼalyaii bichʼįʼ nidahojiłá; éí Bóhólníihii hachʼįʼ yee haadzííʼ, Díí doo ádadoohłíił da, hałní.
13 Nidi Bóhólníihii éí bá dahalneʼii tʼáá ałtso índa náásgóó áhodooníiłii dayooʼíinii binahjįʼ Ízrel dineʼé áádóó Júdah dineʼé yikʼijįʼ haadzíiʼgo ání, Doo yáʼáshóonii baohkahígíí bitsʼą́ąjįʼ ninánóhkáahgo shibikʼeh óʼooʼníiłii áádóó bee nihwiishʼaahii, éí shibee hazʼáanii bikʼeh dahonołʼı̨́į doo biniyé shá nidaalʼaʼí shá dahalneʼii danilíinii éí danihizhéʼé yę́ę bichʼįʼ yíłʼaadgo bee bichʼįʼ haasdzííʼ.
14 Ákóbiʼdooʼniid nidi doo ádahodiiltsʼaʼ dago dabizhéʼé yę́ę biʼákʼehaʼı̨́ bee doo binídahazʼáa da yę́ęgi átʼéego doo binídahazʼáa da; éí biDiyin God Bóhólníihii doo dayoodlą́ą da nítʼééʼ.
15 Áádóó yee nihwiizʼáanii áádóó dahazhéʼé yę́ę yił ahaʼdadeestʼáanii índa yee hahaasdzíiʼii yee hoʼníłniiʼígíí doo dazniizı̨́įʼ da, áko tʼáadoo nánídlíinii yikééʼ dahidiikaigo tʼáadoo nánídlíinii daazlı̨́įʼgo ałʼąą dineʼé hanaagóó kéédahatʼíinii deíkáhígíí bikʼehgo dajikááh; éí Bóhólníihii doo ákódadoohníił da, hałní.
16 Áko biDiyin God Bóhólníihii bibikʼeh óʼooʼníiłii tʼáá átʼé yitsʼákaigo óola doolyı̨́įʼgo bee béégashii yáázh naakigo beʼelyaago ádayiilaa, áádóó asdzání beʼelyaii ádayiilaa, áádóó yótʼááh hiníláii tʼáá átʼé yichʼįʼ nidahałá, índa Béíyal yichʼįʼ nidahałá.
17 Áádóó biyeʼké índa bitsiʼké didlidgo náádayiisniiʼgo, bee ééhodoozįįłii índa bee álílee ádaʼoolʼįįłii chodayoołʼı̨́įgo Bóhólníihii binááł doo yáʼáshóonii yichʼįʼ nidaʼádiisniiʼgo bąą Bóhólníihii yádahóółchįįd.
18 Éí bąą Bóhólníihii éí Ízrel dineʼé yichʼįʼ tʼáá íiyisí doo bił hóózhǫǫd da, áko binááł doo nináájíldeeh da doo biniyé átsʼą́ąjįʼ kóhoolaa; tʼáá hazhóʼó Júdah dineʼé tʼéiyá daadzííʼ.
19 Júdah dineʼé ałdóʼ biDiyin God Bóhólníihii bibikʼeh óʼooʼníiłii doo yikʼeh hółʼı̨́į da, nidi Ízrel dineʼé tʼáá bí yee nihwiizʼáanii bikʼehgo dajíkááh.
20 Áko Bóhólníihii éí Ízrel dineʼé náás ahoolchíiłii doo yiniizı̨́įʼ da áádóó atíyiilaago doo náádahwiidoołtséeł da biniyé aghadaʼiiʼníiłgo ádaʼoołdįįłii yaa hodiníʼą́.
21 David yę́ę baʼáłchíní náás ahoolchíiłii bee óhólnííh bitsʼą́ą́dóó Ízrel dineʼé tʼáá naʼníleʼdii haghaideetʼą́, áko Nííbat biyeʼ Jerobówam aláahgo binanitʼaʼí ádayiilaago Ízrel dineʼé éí Bóhólníihii yikééʼ deíkáahii yitsʼą́ąjįʼ kóyiilaago ayóó átʼéego ádił nidaʼiisíihgo áyiilaa.
22 Áádóó Ízrel dineʼé éí Jerobówam niʼiilzííh yaa naayáhígíí tʼáá átʼé bééjískaigo tʼáadoo yóóʼadazdeezʼą́ą da;
23 Bóhólníihii bá nidaalʼaʼí éí bá dahalneʼii tʼáá ałtso binahjįʼ yee haadzíʼígi átʼéego Ízrel dineʼé doo náájootʼı̨́į da doogo nahjįʼ kóyiilaajįʼ ákódajíítʼįįd. Áko Ízrel dineʼé díísh jı̨́įjįʼ tʼáá hó hakéyahdóó Asíriyagóó adahoʼdiishtʼeezh.
Samériya kéyahgi ałʼąą dineʼé kéédahatʼı̨́įgo ályaa
24 Áko Asíriya dineʼé aláahgo binanitʼaʼí éí Bábilandę́ę́ʼ áádóó Káthahdę́ę́ʼ áádóó Éívadę́ę́ʼ áádóó Héímathdę́ę́ʼ índa Séfarvéíyimdę́ę́ʼ dineʼé niyiizhʼeezhgo Samériya kéyahgi kin hadaasʼáágóó Ízrel dineʼé bitsáskʼehgi niyiiznil, áko éí Samériya kéyah bííʼ daazlı̨́įʼgo ákwii kin hadaasʼáagi kéédahatʼı̨́ı̨́ nítʼééʼ.
25 Kótʼéego ákwii kéédahatʼı̨́ silı̨́įʼgo Bóhólníihii doo deidósin dago biniinaa Bóhólníihii éí hatahjįʼ náshdóítsoh bitsiijįʼ daditłʼooígíí yiʼníłniiʼgo éí łaʼ nidahastseed.
26 Nítʼééʼ Asíriya dineʼé aláahgo binanitʼaʼí yichʼįʼ yee hadaasdzíiʼgo ádaaní, Samériyagi kin hadaasʼáagi ałʼąą dineʼé nináhíníʼeezhgo ákwii níínínilii éí kéyahgi diyin átʼéii doo bił béédahózinígíí biniinaa, jó, bitahjįʼ náshdóítsoh bitsiijįʼ daditłʼooígíí yiʼníłniiʼgo nidabistseed, háálá éí kéyahgi diyin átʼéii doo yéédahósin da.
27 Áádóó Asíriya dineʼé aláahgo binanitʼaʼí haadzíiʼgo ání, Náádaʼiiłniihii áádę́ę́ʼ nídashooʼeezhígíí łaʼ bił nídoohtʼaashgo bíniʼ ákǫ́ǫ́ doogáałgo áadi kééhatʼı̨́įgo bíniʼ ákwii kéyahgi diyin átʼéii yee neinitin doo.
28 Nítʼééʼ náádaʼiiłniihii łaʼ Samériya kéyahdę́ę́ʼ yił nídaaskaígíí éí Béthelgi kééhatʼı̨́, áko Diyin God haash yitʼéego dólzinígíí yee neinitin nítʼééʼ.
29 Nidi ałʼąą dineʼé tʼáá ałtso tʼáá hakin hadaasʼá kéédahojitʼínígóó tʼáá hó hadiyin bidaʼalyaago ninádahałaah doo biniyé wódah nahazʼą́ągo ádayiilaadi Samériya dineʼé éí kin ádayiilaii góneʼ nidayiiznil.
30 Áádóó Bábilandóó dineʼé éí edaʼalyaii Sákath-bíínath wolyéii ádayiilaa, Káthahdóó dineʼé éí edaʼalyaii Néíyergal wolyéii ádayiilaa, índa Héímathdóó dineʼé éí edaʼalyaii Asháíma wolyéii ádayiilaa.
31 Áádóó Éívadóó dineʼé éí edaʼalyaii Níbhaz índa Tártak wolyéii ádayiilaa, Séfarvéíyimdóó dineʼé bidiyin bidiʼníinii Adrámalek índa Anámelek wolyéii yichʼįʼ baʼáłchíní deidiłidgo náádayiiłniih nítʼééʼ.
32 Áko Bóhólníihii deidósin, nidi ałdóʼ diné bitahdóó łaʼ nídayiizláaʼgo ninádahałaah doo biniyé wódah nahazʼą́ągo ádaalyaaígi náádaʼiiłniihii niinínil; éí ninádahałaah doo biniyé wódah nahazʼą́ągo ádayiilaadi daakin biiʼ há náádaʼiiłniih nítʼééʼ.
33 Bóhólníihii deidósin, nidi ałʼąą dineʼé bitahdóó nidahoʼdiishtʼeezhígíí ádaatʼínígi átʼéego tʼáá hó dahodiyin ałdóʼ dazdósin nítʼééʼ.
34 Áko díísh jı̨́įjįʼ tʼáá nahdę́ę́ʼ ádaatʼı̨́ı̨́ nítʼééʼ yę́ęgi ádaatʼı̨́.
Bóhólníihii doo deidósin da, doo nidi yee nihwiizʼáanii, doodaiiʼ bibikʼeh hoogáałii, doodaiiʼ bibee hazʼáanii, doodaiiʼ bibikʼeh óʼooʼníiłii éí Jéíkab tʼáá éí Ízrel yee yiyíízhiʼígíí baʼáłchíní yichʼįʼ Bóhólníihii hahaasdzíʼígíí doo bikʼehgo ádajitʼı̨́į da.
35 Bóhólníihii éí Ízrel dineʼé yił ahadaʼdeestʼą́ągo ádííniid, Diyin dabidiʼníinii tʼáadoo dadíínóhsiní, áádóó tʼáadoo bichʼįʼ yaa áńdaohtʼįįhí, áádóó tʼáadoo bichʼįʼ nidahohłáhí, índa tʼáadoo bichʼįʼ náádaʼiyołniihí.
36 Nidi Bóhólníihii bibee adziil ayóó átʼéii yee índa bigaan yee kʼídeeshchidgo Ííjip kéyahdę́ę́ʼ háánihííʼeezhígíí dadíínóhsin; éí bichʼįʼ nidahohłá, índa bichʼįʼ náádaʼiyołniih.
37 Áko yee nihwiizʼáanii áádóó bikʼeh hoogáałii áádóó bee hazʼáanii índa bikʼeh óʼooʼníiłii nihá yee akʼeʼashchínígíí bikʼeh dahonołʼı̨́įgo hoolʼáágóó hazhóʼó ádaołʼı̨́į doo, áko diyin dabidiʼníinii doo dadíínóhsin da doo.
38 Nihił ahadaʼdinishtʼáanii doo baa deidiyohnah da; diyin dabidiʼníinii doo dadíínóhsin da doo.
39 Nidi nihí éí Bóhólníihii Diyin God dadíínóhsin, áko nihiʼanaʼí tʼáá ałtso yigháánihidooʼnił.
40 Ákótʼée nidi doo ádahodiiltsʼaʼ da, nidi tʼáá ałkʼidą́ą́ʼ ádáátʼįįdii bikʼehgo ádaanííł nítʼééʼ.
41 Áko díí ałʼąą dineʼé éí Bóhólníihii deidósin, áádóó edaʼalyaii ałdóʼ yichʼįʼ nidahałáá nítʼééʼ; badaʼáłchíní áádóó banáádaʼáłchíní éí dabizhéʼé yę́ę ádáátʼįįdígi átʼéego díí jı̨́įjįʼ ałdóʼ ákódaatʼı̨́.
