2 Kings 18:1-37
18 Íídą́ą́ʼ Íílah biyeʼ Hoshíya éí Ízrel dineʼé aláahgo yinanitʼaʼí nilı̨́įgo tááʼ náhááh góneʼ Júdah dineʼé aláahgo binanitʼaʼí Éíhaz yę́ę biyeʼ Heziikáíyah aláahgo nantʼá silı̨́ı̨́ʼ.
2 Naadiin ashdlaʼ binááhaigo nantʼáago hahoolzhiizh, áko Jerúsalemgi naadiin náhástʼéí nááhaijįʼ aláahgo naatʼáanii nilı̨́ı̨́ nítʼééʼ. Bimá éí Éíbai wolyéego Zakaráíyah yitsiʼ nilı̨́.
3 Áádóó hazhéʼé yę́ę David áátʼįįdii bikʼehgo Bóhólníihii binááł tʼáá ákogi átʼéego ádzaa.
4 Nítʼééʼ ninádahałaah doo biniyé wódah nahazʼą́ągo ádaalyaaígíí áádóó edaʼalyaii niyiiztiʼ, índa asdzání bidaʼalyaii niyiisneʼ áádóó Mózes éí béésh łitsoii yee tłʼiish yiʼiilaaígíí yidííséí; jó, Heziikáíyah bíyoołkáałjįʼ Ízrel dineʼé tsin bijeeh dilidgo łikání halchinii éí tłʼiish yichʼįʼ náádayiiłniih nítʼééʼ, áko éí Nehúshtan yee yiyíízhiʼ.
5 Ízrel dineʼé biDiyin God Bóhólníihii yaadzólíí nítʼééʼ; Júdah dineʼé aláahgo binanitʼaʼí nídaadleełii índa hakéédę́ę́ʼ aláahgo naatʼáanii nídaadleełii tʼáá ałtso bitahdóó doo łaʼ hógi ádaatʼée da nítʼééʼ.
6 Áko Bóhólníihii yąąh dah sitı̨́įgo yikééʼ níyá, nidi Bóhólníihii bibikʼeh óʼooʼníiłii yee Mózes yichʼįʼ haadzíʼígíí yikʼeh hółʼı̨́ı̨́ nítʼééʼ.
7 Áko tʼáá hidighááhgóó Bóhólníihii bił hólǫ́ǫgo tʼáá ałtsoní yáʼátʼéehgo bá áánííł nítʼééʼ, áádóó Asíriya dineʼé aláahgo binanitʼaʼí yichʼįʼ yisteeʼgo tʼáadoo yá naasʼaʼ da.
8 Áko Géíza kin haalʼáhígíí índa kéyah nidaneesʼą́ąjįʼ tʼáá éí yaaʼiiʼáago bikááʼdóó haʼalzídídóó kin haalʼá ditą́ągo binaa ahéédaʼastłʼinígóó Filístiya dineʼé yichʼįʼ naabaahgo yikʼeh deesdlı̨́ı̨́ʼ.
Samériya kin haalʼáii bikʼeh hodeesdlı̨́ı̨́ʼ
9 Nítʼééʼ Heziikáíyah aláahgo naatʼáanii nilı̨́įgo dı̨́ı̨́ʼ náhááh góneʼ índa Íílah biyeʼ Hoshíya éí Ízrel dineʼé aláahgo yinanitʼaʼí nilı̨́įgo tsostsʼid náhááh góneʼ Asíriya dineʼé aláahgo binanitʼaʼí Shalmaníízer éí Samériya kin haalʼáii yichʼįʼ nídiidzáago yináshzhiizh.
10 Áko tááʼ nááhaijįʼ nihoolzhiizhgo deisná; Heziikáíyah aláahgo naatʼáanii nilı̨́įgo hastą́ą́h náhááh góneʼ índa Hoshíya éí Ízrel dineʼé aláahgo yinanitʼaʼí nilı̨́įgo náhástʼéí náhááh góneʼ Samériya kéyah yisná.
11 Áádóó Asíriya dineʼé aláahgo binanitʼaʼí éí Asíriya kéyahgóó Ízrel dineʼé ayiizhʼeezhgo Héílah kin haalʼáadi áádóó Gózan kéyahgi Héíbar tooh nílíní bibąąhgóó índa Míídiya dineʼé bikin hadaasʼáhígóó niyiizhʼeezh.
12 Háálá Bóhólníihii haDiyin God ánínígíí doo bikʼeh dahojíłʼı̨́į da nítʼééʼ, nidi bibee ałhaʼdeetʼáanii tʼóó bikʼi nidziskai índa Bóhólníihii bá naalʼaʼí Mózes yee hachʼįʼ haadzíʼígíí tʼáá átʼé doo dayíistsʼą́ąʼ dago doo yikʼehgo ádaanéeh da nítʼééʼ.
Senákerib anaaʼ hasłı̨́ı̨́ʼ (2Chr. 32:1-19; Is. 36:1-22)
13 Nítʼééʼ Heziikáíyah aláahgo naatʼáanii nilı̨́įgo dı̨́ı̨́ʼtsʼáadah náhááh góneʼ Asíriya dineʼé aláahgo binanitʼaʼí Senákerib éí Júdah kéyahgi kin hadaasʼá ditą́ągo binaa ahéédaʼastłʼinígíí tʼáá átʼé yichʼįʼ naabaahgo yisná.
14 Júdah dineʼé aláahgo binanitʼaʼí Heziikáíyah éí Léíkish kin haalʼáágóó, Asíriya dineʼé aláahgo binanitʼaʼí yichʼįʼ iʼííłʼaʼgo ání, Ádihodiishtʼiʼ; shitsʼánóhnééh; nichʼįʼ nahashłée doogo shííníkeedígíí bíneeshʼą́. Áko Asíriya dineʼé aláahgo binanitʼaʼí éí Júdah dineʼé aláahgo binanitʼaʼí Heziikáíyah éí táadi neeznádiin béésh łigaii tálent* wolyéii áádóó tádiin óola tálent wolyéii niidooléełgo yíyííkeed.
15 Áko Heziikáíyah éí Bóhólníihii bikin biiʼ sohodizin góneʼ béésh łigaii índa aláahgo naatʼáanii bighan góneʼ daʼílíinii tʼáá átʼé bikʼízhníyáhígíí Asíriya dineʼé aláahgo binanitʼaʼí baazhnínil.
16 Íídą́ą́ʼ Heziikáíyah éí Bóhólníihii bikin biiʼ sohodizin bidáádaʼdilkał áádóó bá adaazʼáhígíí bąąhdóó éí Júdah dineʼé aláahgo binanitʼaʼí Heziikáíyah éí kin bíyah daniiʼáii óola yikʼíístiʼígíí yąąh yiyííbı̨́įʼgo Asíriya dineʼé aláahgo binanitʼaʼí yeinínil.
17 Áádóó Asíriya dineʼé aláahgo binanitʼaʼí éí Léíkishdóó Tártan áádóó Rábsaris índa Rábshakeh éí ayóó átʼé siláo yinéełgo yił Jerúsalemgi aláahgo naatʼáanii Heziikáíyah yikʼijįʼ yiyííłʼaad. Áko ákǫ́ǫ́ Jerúsalem góde haaskaigo áá yíkai. Áádóó wódahgo tó bá azʼánídóó tó bá aníʼáhígíí bíighahgi iigisgo iilgááh bá hazʼánígíí bichʼįʼgo atiinígi deizįʼ.
18 Aláahgo naatʼáanii hágo deidííniidgo Hilkáíyah biyeʼ Iiláíyakim éí aláahgo naatʼáanii bighan bee bóhólníhígíí áádóó Shébna éí naaltsoos ííłʼíní índa Éísaf biyeʼ Jóʼah éí naatʼáaniishchíín nilíinii díí hachʼįʼ chʼékai.
19 Rábshakeh áhodííniid, Heziikáíyah bichʼįʼ hadaohdziih, Asíriya dineʼé aláahgo binanitʼaʼí ayóó átʼé nanitʼaʼí nilíinii kóní, Haʼátʼíí baʼahódlíí shı̨́įshąʼ baadzíínílí?
20 Anaaʼ biniyé shinahatʼaʼ índa adziil shee hólǫ́, diní, nidi éí saad tʼáadoo nánídlíinii ádaatʼé. Kʼad háishąʼ baadzíínílíigo shichʼįʼ nanilteeh?
21 Shoo, kʼad díí lókʼaaʼ yiskʼisgo ííʼáhígíí baadzíínílí; tʼáá éí Ííjip dineʼé átʼé, tʼáá éí diné łaʼ yíniizı̨́įʼgo bílaʼ baa adoozhosh, áko tʼáá ádzíłtso éí Ííjip dineʼé aláahgo binanitʼaʼí Féro baadeijólíhígíí ákódahodoolííł.
22 Nidi kódashidooniidgo, Bóhólníihii nihiDiyin God baadadzííníidlí; éí ninádahałaah doo biniyé wódah nahazʼą́ągo bíhígíí índa bibikááʼ náádaʼiiniihí yę́ę éí Heziikáíyah nahjįʼ kóyiilaa yaʼ? Júdah dineʼé áádóó Jerúsalem dineʼé áyidííniid, Jerúsalemgi bibikááʼ nááʼiiniihí bidááhdóó nidahohłá, nihiłní.
23 Éí bąą kʼad, nánooshkąąh, shinanitʼaʼí, Asíriya dineʼé aláahgo binanitʼaʼí nilíinii baʼnílé, áko bíninilʼą́ągo łı̨́ı̨́ʼ dabíyeeh dooígíí shóisíníłtʼeʼ ládą́ą́ʼ naakidi mííl łı̨́ı̨́ʼ naa deeshnił.
24 Haash yitʼéego shinanitʼaʼí bá nidaalʼaʼí aʼohgo ádaatʼéii siláo yinanitʼaʼí nilíinii níwehjįʼ bidaʼdoołnihgo Ííjip dineʼé bitsindaabąąs bijáád naakiígíí índa dabisiláo łı̨́ı̨́ʼ yee nidaabaahii baʼíídííliiłgo baa dzíínílíi doo?
25 Bóhólníihii tʼáágéédísh díí hazʼánígíí ádeeshdįįłgo níyá? Bóhólníihii áshíłní, Nílááh, díí kéyah bikʼijįʼ hasínáahgo áhółdįįh.
26 Nítʼééʼ Hilkáíyah biyeʼ Iiláíyakim áádóó Shébna índa Jóʼah éí Rábshakeh ádeiłní, Baa nídaniikąąh, ná nidaalʼaʼí bichʼįʼ Síriya dineʼé bizaad bee yáníłtiʼ, háálá éí dadiitsʼaʼ; Jew dineʼé bizaad éí tʼáadoo bee nihichʼįʼ yáníłtiʼí, áko tsé ahénátłʼinígíí bikááʼdę́ę́ʼ diné doo dandidootsʼı̨́įł da.
27 Nidi Rábshakeh ání, Shinanitʼaʼíísh nihinanitʼaʼí áádóó nihí nihichʼįʼ hadeesdzihgo biniyé shiníłʼaʼ? Tsé ditą́ągo ahénátłʼin bighą́ąʼdi diné dah naháaztánígíí daʼ éísh doo bichʼįʼ shiʼdeelʼaʼ da? Áko éí tʼáá bí dabichaan áádóó dabilizh nił deidooyı̨́ı̨́ł?
28 Nítʼééʼ Rábshakeh yiizįʼgo ayóó íitsʼaʼgo Jew kʼehjí chánahgo yee haadzíiʼgo ání, Asíriya dineʼé aláahgo binanitʼaʼí ayóó átʼé nanitʼaʼí nilíinii yee hahaasdzíʼígíí dadoohtsʼı̨́ı̨́h.
29 Aláahgo naatʼáanii kóní, Tʼááká Heziikáíyah nihiʼdóleeh lágo, háálá éí yisdánihidoojihígíí doo yíneelʼą́ą da.
30 Heziikáíyah éí Bóhólníihii baadadzíínóhłíigo ánihólééh lágo kóníigo, Bóhólníihii tʼáá aaníí yisdánihidoonił; díí kin haalʼáii Asíriya dineʼé aláahgo binanitʼaʼí doo baa didootʼáał da.
31 Heziikáíyah éí tʼáadoo deísółtsʼą́ʼí, háálá Asíriya dineʼé aláahgo binanitʼaʼí kóní, Aa doolyéełii bee shił lą́ daʼohłeehgo wóshdę́ę́ʼ shichʼįʼ chʼínóhkááh, áko tʼááłáʼí nootínígo nihichʼil naʼatłʼoʼii áádóó nihifig sikaadii bąąhdóó daʼohsą́ą doo, áádóó tʼááłáʼí nootínígo nihitoʼ bá naʼazʼą́ą́dóó daʼohdlą́ą doo.
32 Deesháałjįʼ kéyah tʼáá nihí danihikéyah átʼéhígi átʼéego kéyah bikááʼ tłʼoh naadą́ą́ʼ áádóó wáin ániidíii biiʼ dahólǫ́ǫjįʼ, kéyah bikááʼ bááh índa chʼil naʼatłʼoʼii dahólóníjįʼ, kéyah bikááʼ áliv naazkaadii bikʼah índa tsésʼná bitłʼizh dahólǫ́ǫjįʼ bichʼįʼ ninihideeshʼish, áko dahinohnáago doo dadínóohnéeł da; Heziikáíyah éí tʼáadoo deísółtsʼą́ʼí; éí doo ákóneʼ anihiʼééshgóó kóní, Bóhólníihii éí yisdánihidoojih.
33 Ałʼąą dineʼé dabidiyinígíísh łaʼ dahakéyah Asíriya dineʼé aláahgo binanitʼaʼí yighadahodeestʼą́?
34 Héímath kin haalʼáádóó índa Árpad kin haalʼáádóó dadiyinii éí háájí? Séfarvéíyim kin haalʼáádóó, Híína kin haalʼáádóó índa Áívah kin haalʼáádóó dadiyiniishąʼ háájí? Daʼ éísh Samériya kéyah shighadeideestʼą́?
35 Kédaayahdóó dadiyinii bitahdóó háídíígíishąʼ hakéyah shighaideetʼą́, áko Bóhólníihii éí Jerúsalem doo shighaididootʼáał da.
36 Nidi dineʼé dadéesxéelgo saad tʼááłáʼí nidi tʼáadoo yee yichʼįʼ hadaasdzíiʼ da, háálá aláahgo naatʼáanii haadzíiʼgo ání, Doo bichʼįʼ háádadoohdzih da.
37 Nítʼééʼ Hilkáíyah biyeʼ Iiláíyakim éí aláahgo naatʼáanii bighandóó tʼáadoo leʼé yinanitʼaʼí nilíinii áádóó Shébna naaltsoos ííłʼíní nilíinii índa Éísaf biyeʼ Jóʼah naatʼáaniishchíín nilíinii éí ákʼindaʼiisdláadgo Heziikáíyah yaa yíkaigo Rábshakeh hahaasdzíʼígíí yee yił dahoolneʼ.
Footnotes
^ Tálent wolyéhígíí tsostsʼidiindóó baʼaan ashdlaʼ dah hidiidloh bíighahgo óolyé.
