2 Kings 19:1-37
19 Nítʼééʼ aláahgo naatʼáanii Heziikáíyah éí yidiiztsʼą́ąʼgo biʼééʼ ákʼinayooldláadgo tłʼoh yishbizh ákʼíístiʼgo Bóhólníihii bikin biiʼ sohodizin góneʼ yah ííyá.
2 Áádóó haghan yinanitʼaʼí nilíinii Iiláíyakim áádóó naaltsoos ííłʼíní Shébna índa alą́ąjįʼ náádaʼiiłniihii éí tłʼoh yishbizh bikʼídaastiʼgo Éímaz biyeʼ Aizéíyah Diyin God yá halneʼii nilíinii bichʼįʼ ajiisʼaʼ.
3 Áko ádahałní, Heziikáíyah kóní, Díí jı̨́ éí achʼįʼ nahwiiʼnáajįʼ ayííłką́, aditeeh áádóó baaʼihgo haʼoodzííʼ bainíłką́, háálá áłchíní bidaʼniichı̨́įgo biʼniiłchíinii beʼadziilii bee ádaadin.
4 Bóhólníihii niDiyin God daatsʼí Rábshakeh bizaad tʼáá átʼé yididootsʼı̨́ı̨́ł; éí binanitʼaʼí Asíriya dineʼé aláahgo binantʼá bííłʼaadgo Diyin God hináanii yá nahastʼiʼ, áko Bóhólníihii niDiyin God éí saad yidiiztsʼą́ʼígíí biniinaa yididooteh; éí bąą Ízrel dineʼé daadziihígíí bá sodílzin.
5 Kótʼéego aláahgo naatʼáanii Heziikáíyah bá nidaalʼaʼí Aizéíyah yaa yíkai.
6 Áko Aizéíyah áhodííniid, Nihinanitʼaʼí kódabididoohniił, Bóhólníihii kóní, Asíriya dineʼé aláahgo binanitʼaʼí bá nidaalʼaʼí baaʼihgo shá hadaasdzíiʼgo disínítsʼą́ʼígíí tʼáadoo bikʼee nił yéʼí.
7 Jó, níłchʼi hwiih deeshʼaałgo aseezı̨́ yididootsʼı̨́įłgo tʼáá bí bikéyahgóó dah nídidoodááł, áádóó tʼáá bí bikéyahdi diltłish bee bidiʼyoolyééł.
8 Áko Rábshakeh tʼą́ą́ʼ nádzáago Asíriya dineʼé aláahgo binanitʼaʼí Líbnah kin haalʼáii yikʼijįʼ naabaah lá; jó, aláahgo naatʼáanii Léíkish kin haalʼáádóó dah nídiidzáago jííniiʼ.
9 Nítʼééʼ Iithiyópiya dineʼé aláahgo binanitʼaʼí Túrhakah baa haneʼgo yidiiztsʼą́ąʼgo, Jó, nikʼijįʼ nidoobah biniyé yigááł, haʼníigo baa hojííniiʼgo Heziikáíyah yichʼįʼ anááʼííłʼaʼ kóníigo,
10 Júdah dineʼé aláahgo binanitʼaʼí Heziikáíyah bichʼįʼ hadíídzih kóbidiníigo, NiDiyin God baadzíínílíhígíí tʼááká niʼdóleeh lágo, kóníigo, Asíriya dineʼé aláahgo binanitʼaʼí éí Jerúsalem kin haalʼáii doo baa didootʼáał da.
11 Jó, Asíriya dineʼé aláahgo binanitʼaʼí danilíinii kéyah tʼáá átʼé ádayííłʼįįdígíí índa ałtso dahóółchxǫʼígíí baa hodisínítsʼą́ą́ʼ; ákoósh yisdáshidiʼdooltééł nínízin?
12 Daʼ shizhéʼé yę́ę ałʼąą dineʼé bidiyin danilíinii ádeisdįįdígíí, éí Gózan áádóó Héíran índa Ríízef kin hadaasʼáhígíí áádóó Ííden dineʼé éí Thiiléísergi kéédahatʼı̨́ı̨́ nítʼéeʼii bidiyin danilíiniísh yisdádahwiiznil?
13 Héímath kin haalʼáádóó aláahgo naatʼáaniishąʼ, Árpad kin haalʼáádóó aláahgo naatʼáaniishąʼ, Séfarvéíyim kin haalʼáádóó aláahgo naatʼáanii áádóó Híína kin haalʼáádóó índa Áívah kin haalʼáádóó aláahgo naatʼáaniishąʼ, éísh daaháájí?
14 Heziikáíyah éí haneʼ nideiʼáhí naaltsoos haa deistsoozgo jííłtaʼ, áádóó Heziikáíyah éí Bóhólníihii bikin biiʼ sohodizin góde hajiyáago Bóhólníihii bidááhdóó nizhníłtsooz.
15 Áko Heziikáíyah éí Bóhólníihii yichʼįʼ kóníigo sodoolzin, Ízrel biDiyin God Bóhólníihii nílíinii, diyingo naalʼaʼí chérabim bitaʼgi honílóonii, tʼáá ni tʼéiyá nihokááʼgóó bee ídahólníihii tʼáá ałtso biDiyin God nílı̨́; yádiłhił índa nahasdzáán íinilaa.
16 Bóhólníihii, shichʼįʼ dah díníitʼaahgo shíísíníłtsʼą́ą́ʼ, Bóhólníihii nílíinii, díghaałgo díníʼı̨́ı̨́ʼ áádóó Senákerib saad yee hahaasdzíiʼii diitsʼı̨́ı̨́h; éí yiyííłʼaadgo Diyin God hináanii yá nahastʼiʼ.
17 Bóhólníihii nílíinii, Asíriya dineʼé aláahgo binanitʼaʼí danilíinii tʼáá aaníí ałʼąą dineʼé íísdįįd áádóó bikéyah dayííłchxǫʼ,
18 áádóó bidiyin dabidiʼníinii adeideeskʼą́ą́ʼ; jó, éí doo diyin da nítʼééʼ, nidi tsé índa tsin ádaatʼéego diné ádabiilaa; éí bąą ádeisdįįd.
19 Éí bąą kʼad, Bóhólníihii nihiDiyin God nílíinii, nánooshkąąh, nihokááʼgóó bee ídahólníihii éí tʼáá ni tʼéiyá Bóhólníihii Diyin God nílı̨́įgo bił béédahodoozįįł biniyé éí bitsʼą́ąjįʼ yisdánihínííł.
20 Áko Éímaz biyeʼ Aizéíyah éí Heziikáíyah yichʼįʼ iʼííłʼaʼ kóníigo, Ízrel dineʼé biDiyin God Bóhólníihii nilíinii ání, Asíriya dineʼé aláahgo binanitʼaʼí Senákerib bikʼijįʼ sodíínílzinii éí disétsʼą́ą́ʼ.
21 Díí saad éí hodéétʼiʼgo Bóhólníihii yee haadzííʼ, Chʼikę́ę́h Záíyan bichʼéʼé nilíinii nizʼįįdgo áádóó neiidlohgo ná nahastʼiʼ; Jerúsalem bichʼéʼé nilíinii nichʼįʼ bitsiitsʼiin yiyíígháád.
22 Háísh baaʼihgo bá nahółtʼiʼgo yínídzííʼ? Háíyeeʼ bichʼįʼ tʼáá naʼníleʼdii háínídzííʼ? Háíyeeʼ bichʼįʼ ádaa dzíínídlíigo háíníghal? Ízrel dineʼé biDiyin nilíinii bichʼįʼ lą́ą.
23 Haneʼ ná nideiʼáhí bee Bóhólníihii bá nahosíníłtʼiʼgo ádííníniid, Shitsindaabąąs bijáád naakiígíí tʼóó ahayóigo bee dził aghádaazʼáá góde áádóó Dził Lébanan bíniinahjįʼ hadeesháałgo gad naazkaadii ayóó ádaníłnézígíí áádóó chʼó ayóó ádanoolninii deestsił áádóó kéyah nidaneesʼą́ą́góó dahooghangóó yah ahideeshááł índa Dził Kármel bitsin yílʼáhígíí bitahgi nideeshááł.
24 Tó hadahánil áádóó déʼéyóní dabitoʼ yishdlą́ą́ʼ; Ííjip kéyahgi tooh danílínígóó tádííyáago ałtso néíłtsei.
25 Daʼ doósh ałkʼidą́ą́ʼ baa niséyáhígíí baa hosidínítsʼą́ąʼ da? Ałkʼidą́ą́ʼ binahosíʼáanii éí bohoolyaago áshłaa. Kótʼéego kin hadaasʼá ditą́ągo binaa ahéédaʼastłʼinígóó ałtso dááchxǫʼgo yáádaaʼáago íinilaa.
26 Éí bąą ákwii kéédahatʼı̨́ı̨́ nítʼéʼígíí bibee adziilii ádaadin nítʼééʼ, áko nitseekaigo tʼóó bił dahóóląąd; halgaidóó chʼilígíí áádóó chʼil ditʼódí áádóó kin bighą́ą́ʼdóó chʼil hadaneesánígíí índa tłʼoh naadą́ą́ʼ tʼah doo díníséégóó tʼáá áajįʼ ásdįįdígíí nidahalin nítʼééʼ.
27 Nidi kééhótʼı̨́įgi áádóó chʼéénídáahgi índa yah anánídáahgi áádóó shichʼįʼ náháchįʼígíí shił bééhózin.
28 Shichʼįʼ náháchįʼígíí áádóó yéego náháchįʼgo disétsʼą́ʼígíí biniinaa shibéésh názhahígíí níchı̨́ı̨́h bighá deestsih índa sheʼazáátʼiʼí nizadeeshtʼih áádóó yíníyáhádę́ę́ʼ ákǫ́ǫ́ tʼą́ą́ʼ kónándeeshdlííł.
29 Áko díí nichʼįʼ bee ééhózin doo: Díí yihahígíí naniseʼ tʼáá bí hadahineesáanii éí niyą́ą doo áádóó naaki náhááh góneʼ tʼáá ákótʼéego hadaneesánígíí bąąh nááʼídą́ą doo áádóó tááʼ náhááh góneʼ kʼidiʼdíílééł áádóó adííyish índa chʼil naʼatłʼoʼii kʼididííléełgo bineestʼąʼ niyą́ą doo.
30 Áádóó Júdah dineʼé daadziihígíí éí yóóʼadahineezhchą́ʼígíí behétłʼóól łeeh dadínóoséełgo áádóó dego dadínóoséełgo bineestʼąʼ dahodooleeł.
31 Jó, daadziihígíí Jerúsalem kin haalʼáádóó chʼídookah; tʼáá éí Dził Záíyandóó yisdádahineezhchą́ʼígíí tʼáá ałtsoní bee Bóhólníihii hóneedlı̨́įgo haa hą́ą́h nízingo ákódoonííł.
32 Éí bąą Bóhólníihii éí Asíriya dineʼé aláahgo binanitʼaʼí bídéétʼiʼgo haadzíiʼgo ání, Díí kin haalʼáajįʼ doo yah adoogáał da áádóó bikʼaaʼ doo áajįʼ yee azdoołtʼoh da índa naagé doo bidáahjįʼ yił nidoogáał da; tsé ahénátłʼinígíí doo bíilkʼidgo íidoolíił da.
33 Bóhólníihii haadzíiʼgo ání, Jiníyáhádę́ę́ʼ ákǫ́ǫ́ tʼą́ą́ʼ nihéézhdoodááł; díí kin haalʼáajįʼ doo yah azhdoogáał da.
34 Háálá díí kin haalʼáhígíí shá doodzih áádóó shá naalʼaʼí yę́ę David bá doodzih biniyé bichʼą́ą́h naasháa doo.
35 Nítʼééʼ tʼáá éí bitłʼééʼ Bóhólníihii bidiyingo naalʼaʼí honíleʼgo Asíriya dineʼé bisiláo dah yinéłígi tʼááłáhídi neeznádiindóó baʼaan tseebídiindóó baʼaan ashdladi mííl siláo neistseed, áko hoosʼįįdgo nízhdiijéeʼgo, shoo, éí tʼáá ałtso daneeznáá lá!
36 Áko Asíriya dineʼé aláahgo binanitʼaʼí Senákerib dah diiyáago bighangóó tʼą́ą́ʼ anáádzáago Nínevehgi kin haalʼáagi kééhatʼı̨́ı̨́ nítʼééʼ.
37 Ákódzaago bidiyin Nísrak wolyéii bikin góneʼ yichʼįʼ nahałáago hayeʼké Adrámalek áádóó Sharíízer diltłish yee hwiisxı̨́įgo Armíniya kéyahgóó yóóʼahiʼnoolchą́ą́ʼ. Áko hayeʼ Íísar-hádan hatsáskʼehgi aláahgo nantʼá silı̨́ı̨́ʼ.
