2 Kings 2:1-25
2 Nítʼééʼ Bóhólníihii náátsʼóʼoołdísii bee Iiláíjah yáʼąąshgóó yił dah didooʼashjįʼ ahoolzhiizh, áko Gílgal kin shijaaʼdóó Iiláíjah éí Iiláísha yił dah diiʼáázh.
2 Áko Iiláíjah éí Iiláísha ííłní, Tʼáá kweʼé sínídá, baa nánooshkąąh, háálá Bóhólníihii Béthel kin haalʼáágóó shííłʼaad. Nítʼééʼ Iiláísha áháłní, Tsʼídá tʼáá aaníí Bóhólníihii hiná índa hiníná; ákótʼéego tsʼídá tʼáá aaníí doo nitsʼádeesháał da. Áko Béthel góyaa jiníʼáázh.
3 Nítʼééʼ Diyin God yá dahalneʼii bídahoołʼaahígíí éí Béthelgi Iiláísha yaa yíkaigo ádeiłní, Bóhólníihii díí jı̨́ bóhoníłníihii nitsʼą́ą́ʼ néididoołtéełgoósh nił bééhózin? Aooʼ, shił bééhózin; tʼáadoo ádadohníní.
4 Áko Iiláíjah áháłní, Iiláísha, tʼáá kǫ́ǫ́ sínídá, baa nánooshkąąh, háálá Bóhólníihii Jériko kin haalʼáágóó shííłʼaad. Áko ání, Tsʼídá tʼáá aaníí Bóhólníihii hiná índa hiníná; ákótʼéego tsʼídá tʼáá aaníí doo nitsʼádeesháał da. Áko Jérikogóó jiníʼáázh.
5 Nítʼééʼ Diyin God yá dahalneʼii bídahoołʼaahígíí éí Jérikogi Iiláísha yaa yíkaigo ádeiłní, Bóhólníihii díí jı̨́ bóhoníłníihii nitsʼą́ą́ʼ néididoołtéełgoósh nił bééhózin? Áko hadzoodzíiʼgo ájíní, Aooʼ, shił bééhózin; tʼáadoo ádadohníní.
6 Áádóó Iiláíjah áháłní, Tʼáá kǫ́ǫ́ sínídá, baa nánooshkąąh, háálá Bóhólníihii éí Jórdan toohgóó shííłʼaad. Áko ání, Tsʼídá tʼáá aaníí Bóhólníihii hiná índa hiníná; ákótʼéego tsʼídá tʼáá aaníí doo nitsʼádeesháał da. Áádóó tʼáá ájíłah náás dashdiiʼáázh.
7 Áko tʼáá ájíłah Jórdan tooh bibąąhdóó dzizı̨́įgo Diyin God yá dahalneʼii bídahoołʼaahígíí éí ashdladiingo ákǫ́ǫ́ yíkaigo tʼáá nízaadę́ę́ʼ dadéezʼı̨́ı̨́ʼ.
8 Áko Iiláíjah bibeeldládí ééʼ ádeidiiltsoozgo yizdisgo yee tooh néidííʼahgo tó ałtsʼáálkʼol, áko tʼáá ájíłah hóółtseigóó haʼnaa nizhníʼáázh.
9 Nítʼééʼ ákódzaa haʼnaa nizhníʼáazhgo Iiláíjah éí Iiláísha ííłní, Tʼah doo nitsʼą́ą́ʼ náshiʼdiilteehdą́ą́ʼ haʼátʼíishąʼ ná ádeeshłííł éí yíníkeed. Áko Iiláísha ání, Bíniʼ niníłchʼi naakidi ahą́ą́h náneelʼą́ągo shikʼiidooldoh, baa nánooshkąąh.
10 Áádóó ání, Nantłʼago laʼ íʼdííníkeed, ákótʼée nidi, ííshją́ą́ nitsʼą́ą́ʼ náshiʼdiiltı̨́įgo shiiniłtsą́ą́ ládą́ą́ʼ tʼáá ná ákódoonííł, nidi dooda ládą́ą́ʼ, éí doo ákódooníił da.
11 Tʼáá yájíłtiʼgo tʼáá náás jooʼashgo, jó, tsinaabąąs bijáád naakiígíí kǫʼgo índa łı̨́ı̨́ʼ daakǫʼgo jiiłtsą́; éí ałtsʼá honínil, áko Iiláíjah yáʼąąsh góde náátsʼóʼoołdísii yee ííyá.
12 Áko Iiláísha éí yiyiiłtsą́ągo hadoolghaazh, Shizhéʼé, shizhéʼé, tsinaabąąs bijáád naakiígíí Ízrel dineʼé bee bichʼą́ą́h naʼabaahii índa łı̨́ı̨́ʼ yee nidaʼałbąąsii! Áádóó tʼáadoo náádziiłtsą́ą da. Áko tʼáá hó haʼééʼ dziiłtsoodgo ałtsʼá dzíízǫ́ǫ́z.
Iiláísha éí Iiláíjah yitsáskʼehjįʼ ííyá
13 Áádóó Iiláíjah bibeeldládí ééʼ bidáánaʼígíí ałdóʼ nízhdiiłtsoozgo nátʼą́ą́ʼ níjídzáago Jórdan tooh bibąąhdóó jiizįʼ,
14 áko Iiláíjah bibeeldládí ééʼ bidáánaʼgo nízhdiiłtsoozígíí bee tooh nízhdííʼahgo ájíní, Iiláíjah biBóhólníihii Diyin Godshąʼ háájí? Áko hó ałdóʼ tooh nízhdííʼahgo tó ałtsʼáálkʼol, áko Iiláísha haʼnaa nizhníyá.
15 Nítʼééʼ Diyin God yá dahalneʼii bídahoołʼaahígíí éí Jérikodę́ę́ʼ dadéezʼı̨́ʼígíí ádaaní, Iiláíjah biníłchʼi Iiláísha bikʼi hooleʼ lá. Áko ákǫ́ǫ́ hadááh yíkaigo niʼjįʼ hachʼįʼ yaa ádaadzaa.
16 Áko ádahałní, Shoo, kʼad ná nidaalʼaʼí ashdladiin diné dahayóígíí yił naakai; bíniʼ ákǫ́ǫ́ dookah, baa nídaniikąąh, áko bóhoníłníihii hadeidínóotaał; Bóhólníihii biníłchʼi dego abííłtı̨́įgo haaʼí shı̨́ı̨́ daadził bikáaʼjįʼ, doodaiiʼ deildzis góyaa abiyííłhan dóʼóshłí. Áko Iiláísha ání, Doo ákǫ́ǫ́ adaʼdoołʼaał da.
17 Nítʼééʼ yídahoniyodgo wónáásdóó baa yázniizı̨́įʼgo ájíní, Daʼdołʼá. Éí bąą diné ashdladiingo adeisʼaʼgo, chʼééh hadeintáago tááʼ yiską́, nidi tʼáadoo yikʼídaneeztą́ąʼ da.
18 Áádóó haa nínáánákai, áko Jériko kin haalʼáagi nijighá, áko ádabizhdííniid, Daʼ doósh tʼáá íídą́ą́ʼ ánihidííniid da, Doo ákǫ́ǫ́ dohkah da?
19 Nítʼééʼ kin haalʼáádóó hastóí éí Iiláísha ádeiłní, Nánooshkąąh, shinanitʼaʼí nílíinii, jó, yíníʼı̨́įgo díí yáʼáhootʼéehgi kin haalʼá, nidi tó éí tʼóó baaʼih áádóó náhodiniichiiʼgo hazʼą́.
20 Áko ání, Ásaayáázh ániidíígíí áshįįh biih daahjáahgo shá nídohʼaah. Áko bá nídadzizʼą́.
21 Áádóó tó háálı̨́ı̨́góó ííyáago áadi áshįįh yiih yiyííłkaadgo ání, Bóhólníihii kóní, Díí tó hadaazlínígíí doo bąąhígóó ánáshdlaa; éí bitsʼą́ą́dóó aniné doo nááhódlǫ́ǫ da doo, índa kéyah doo nínáhodiniichiiʼ da doo.
22 Kótʼéego Iiláísha haadzíʼígíí bikʼehgo díísh jı̨́įjįʼ tó doo bąąhígóó ánályaa.
23 Áádóó Béthel kin haalʼáá góde dah náázhdiidzá; ákǫ́ǫ́ joogááł nítʼééʼ kin haalʼáádę́ę́ʼ tsíłkéí chʼéheezhjéeʼgo há nidahałtʼiʼgo ádahałní, Tsiitʼádii, dego dínááh; tsiitʼádii, dego dínááh.
24 Áko Iiláísha naanásdzáago yiníłʼı̨́įgo Bóhólníihii bízhiʼ bee atídadoolníiłgo yichʼįʼ haadzííʼ. Nítʼééʼ tsintahdę́ę́ʼ shash biʼáadii naakigo chʼíníʼáazhgo tsíłkéí dízdiindóó baʼaan naakigo tídeidiilaa.
25 Áádóó Dził Kármelgóó dah náázdiidzá áádóó índa Samériya kin haalʼáágóó níjídzá.
