2 Kings 20:1-21
20 Éí yoołkááł yę́ędą́ą́ʼ Heziikáíyah dadootsaałgo bitah doo hóótsʼíid da. Éímaz biyeʼ Aizéíyah Diyin God yá halneʼii haa níyáago áháłní, Bóhólníihii kóní, Naʼáłchíní bá tʼáá ałtso hashtʼedíílííł, háálá dadíítsaał; doo náádidíídáał da.
2 Nítʼééʼ kin ahééʼítłʼinígíí bichʼįʼ níjiizhjizhgo Bóhólníihii bichʼįʼ sozdoolzingo ájíní,
3 Bóhólníihii nílíinii, kʼad shéénílniih, nánooshkąąh, ninááł tʼáá aaníígóó áádóó tʼáá ákogi áníshtʼéego níyá, áádóó ninááł yáʼádaatʼéehii baa niséyá. Áko Heziikáíyah tʼáá íiyisí jíícha.
4 Áko Aizéíyah tłʼóoʼdi hazʼáníjįʼ tʼáadoo ałníjígháhí, Bóhólníihii hachʼįʼ haadzíiʼgo ání,
5 Tʼą́ą́ʼ nídídáahgo shidineʼé yinanitʼaʼí Heziikáíyah bił hólneʼ, Bóhólníihii éí nizhéʼé David yę́ę biDiyin God kóní, Nisodizin disétsʼą́ą́ʼ; ninákʼeeshtoʼ yiiłtsą́; jó, nándeesdzih; tááʼ yiską́ągo Bóhólníihii bikin biiʼ sohodizin góde díínááł.
6 Áádóó níyoołkáłígíí éí ashdlaʼáadah nááhai bínéideeshnił, áko díí kin haalʼáhígíí índa ni Asíriya dineʼé aláahgo binanitʼaʼí bigháánihideeshnił, áádóó tʼáá shí shinahjįʼ índa shá naalʼaʼí David yę́ę binahjįʼ díí kin haalʼáii bichʼą́ą́h naasháa doo.
7 Áko Aizéíyah ání, Fig sikaadii bineestʼąʼ ałkʼíbíʼnéésniiʼii nídoohʼaah. Áko nídazhdiiʼą́ągo yilchʼozhígi há bikááʼ nidadzizʼą́ągo yáʼátʼééh níjísdlı̨́ı̨́ʼ.
8 Heziikáíyah éí Aizéíyah ííłní, Bóhólníihii náshidoołdzihígíí áádóó tááʼ yiską́ągo Bóhólníihii bikin biiʼ sohodizin góde deesháałgo haʼátʼíísh bee bééhózin doo.
9 Áko Aizéíyah ání, Bóhólníihii yee haadzíʼígíí ádooníiłii Bóhólníihii bitsʼą́ą́dę́ę́ʼ díí bee nichʼįʼ ééhózin doo: chahaʼoh yildoh bee bééhózinígíí daatsʼí neeznáá bikʼeh ánízahjįʼ náás doolkił, doodaiiʼ tʼą́ą́ʼ nídoolkił?
10 Nítʼééʼ Heziikáíyah haadzíiʼgo ání, Chahaʼoh yildoh náásee neeznáá bikʼeh ánízahjįʼ eeldohgo éí tʼáá bééhózíní, éí dooda, nidi bíniʼ chahaʼoh neeznáá bikʼeh ánízahjįʼ tʼą́ą́ʼ nídoolkił.
11 Áko Aizéíyah Diyin God yá halneʼii éí Bóhólníihii yéego yichʼįʼ ádííniidgo chahaʼoh yildoh bee bééhózinígíí Éíhaz áyiilaa yę́ę chahaʼoh neeznáá bikʼeh ánízahjįʼ tʼą́ą́ʼ néideeskid.
Heziikáíyah éí Bábilandę́ę́ʼ baa íldeeʼ (2Chr. 32:27-31; Is. 39:1-8)
12 Íídą́ą́ʼ Báladan biyeʼ Bábilan dineʼé aláahgo binanitʼaʼí Biiródak-báladan éí Heziikáíyah daatsaah nítʼéeʼgo yaa hodiiztsʼą́ą́ʼ, áko éí naaltsoos áádóó aa doolyéełii Heziikáíyah yichʼįʼ yił aʼííłʼaʼ.
13 Áko Heziikáíyah éí hachʼįʼ hadaasdzíʼígíí bázdiiztsʼą́ąʼgo haghan góneʼ daʼílíinii hólónígíí tʼáá átʼé deinééłʼı̨́ı̨́ʼ; éí béésh łigaii áádóó óola áádóó spáis wolyéii áádóó tłah daʼílíinii áádóó kin góneʼ béésh ééʼ hwee hólóonii tʼáá átʼé índa yódí bá hooghan hwee hólóonii tʼáá átʼé; bighan góneʼ índa bee hóhólníhígi hólóonii éí tʼáadoo łaʼ tʼáá bídiní tʼáá átʼé deinééłʼı̨́ı̨́ʼ.
14 Nítʼééʼ Aizéíyah Diyin God yá halneʼii éí Heziikáíyah yaa níyáago ííłní, Díí dinéshąʼ haʼátʼíí daaní? Háádę́ęʼshąʼ naa yíkai? Áko Heziikáíyah ádííniid, Kéyah nízaadę́ę́ʼ, Bábilan hoolyéédę́ę́ʼ yíkai.
15 Áádóó ání, Nighan góneʼ haʼátʼíísh deinééłʼı̨́ı̨́ʼ? Heziikáíyah haadzíiʼgo ání, Shighan góneʼ hólónígíí tʼáá átʼé deinééłʼı̨́ı̨́ʼ: shinaalyeʼé daʼílíinii bitahdóó tʼáadoo łaʼ doodaí shá deinééłʼı̨́ı̨́ʼ.
16 Áko Aizéíyah éí Heziikáíyah áyidííniid, Bóhólníihii ánínígíí yísíníłtsʼą́ą́ʼ.
17 Jó, beiníłką́ągo nighan góneʼ hólónígíí tʼáá átʼé, áádóó díí jı̨́įjįʼ danizhéʼé yę́ę hashtʼenidayiiznilígíí éí Bábilangóó ahidoogéełgo doo łaʼ doodzih da, ní Bóhólníihii.
18 Áádóó daniyeʼké náás ahoolchíiłii łaʼ adeidiyooʼish, áko éí Bábilan dineʼé aláahgo binanitʼaʼí bighan góneʼ naalteʼ danilı̨́į doo.
19 Nítʼééʼ Heziikáíyah éí Aizéíyah ábizhdííniid, Bóhólníihii áníinii bee háínídzíʼígíí éí yáʼátʼééh. Shíyoołkáłígíí biyiʼ hashtʼehodítʼé áádóó tʼáá aaníinii hólónígíí éí yáʼátʼééh.
Heziikáíyah daaztsą́ (2Chr. 32:32,33)
20 Heziikáíyah łahjįʼ ádzaii áádóó yee ayóó átʼéii índa tó bá azʼánígíí áádóó bitsʼą́ą́dóó kin haalʼáajįʼ tó biiʼ nílíní áyiilaii éí Júdah dineʼé aláahgo binanitʼaʼí danilı̨́ı̨́ nítʼééʼ yę́ę binaaltsoos Kránikals wolyéii bikʼinídaháasdzo.
21 Áko Heziikáíyah éí dahazhéʼé yę́ę daʼiiłhaazhígi átʼéego ajiiłhaazh, áádóó hayeʼ Manáseh hatsáskʼehgi aláahgo nantʼá silı̨́ı̨́ʼ.
