2 Kings 21:1-26
21 Manáseh naakitsʼáadah binááhaigo aláahgo nantʼá silı̨́ı̨́ʼ, áko Jerúsalemgi nantʼáago ashdladiindóó baʼaan ashdlaʼ nááhai. Bimá éí Héfzibah wolyé.
2 Bóhólníihii éí Ízrel dineʼé bitahdóó ałʼąą dineʼé doo daaldinii yaa naakaigo chʼíniiníłkaadii tʼáá éí bikʼehgo Bóhólníihii binááł doo yáʼádaashóonii yaa naayá.
3 Áko hazhéʼé Heziikáíyah yę́ę ninádahałaah doo biniyé wódah nahazʼą́ągo ádaalyaii niyiishchxǫʼígíí áńdajiidlaago Ízrel dineʼé aláahgo binanitʼaʼí Éíhab áátʼįįdígi átʼéego Béíyal bá bikááʼ nááʼiiniihí áádóó asdzání beʼelyaii ájiilaa, índa yótʼááh hiníláii yichʼįʼ nahałáago yaa naagháá nítʼééʼ.
4 Áádóó Bóhólníihii éí, Jerúsalemgi shízhiʼ bohoolyée dooleeł, níí nítʼééʼ yę́ęgi Bóhólníihii bikin biiʼ sohodizin góneʼ bikááʼ náádaʼiiniihí ádayiilaa.
5 Áko Bóhólníihii bikin biiʼ sohodizindóó tłʼóoʼdi naakigo hazʼánígíí biiʼ yádiłhił biiʼ dahiníláii tʼáá ałtso bikááʼ náádaʼiiniihí yá ádayiilaa.
6 Índa hayeʼ didlidgo náájiisniiʼ áádóó álíleego bee ééhózingo bee nahagháii áádóó daʼdiłgąshii áádóó chʼı̨́įdii yádabiiłtiʼii índa ihwiinidzin chodayoołʼı̨́, áko tʼáá íiyisí doo yáʼádaashóonii Bóhólníihii binááł yaa naagháago yee yáhóółchįįd.
7 Áádóó Bóhólníihii éí David yę́ę áádóó biyeʼ Sálaman yę́ę áyidííniid, Díí kin biiʼ sohodizingi áádóó Jerúsalem kin haalʼáagi Ízrel dineʼé tʼáá ałtso bitahdóó náhodiiʼánígi shízhiʼ bee wójíigo ahóyéelʼáa doo, nínígíí ákwii asdzání beʼelyaii áyiilaago éí kin biiʼ sohodizin góneʼ yiyiisįʼ.
8 Áádóó Bóhólníihii ádííniid, Bee hoséłʼáanii tʼáá átʼé áádóó bee hazʼáanii tʼáá átʼé éí shá naalʼaʼí Mózes hachʼįʼ yee haadzíʼígíí bikʼeh dahojíłʼı̨́įgo dahazhéʼé yę́ę kéyah baa diníʼáanii bitsʼą́ą́dóó doo nahjįʼ kónááhodeeshdlíił da.
9 Nítʼééʼ doo daʼíistsʼą́ąʼ da, áko Bóhólníihii éí Ízrel dineʼé bitsʼą́ą́dóó ałʼąą dineʼé íísdįįdígíí ádáátʼįįdii tʼah biláhídi átʼéego Manáseh éí doo yáʼádaashóonii yiih hóóʼeezhgo éí baa nidziskai.
10 Áko Bóhólníihii bá nidaalʼaʼí bá dahalneʼii yee hahaasdzíiʼgo ání,
11 Júdah dineʼé aláahgo binanitʼaʼí Manáseh éí díí doo daaldinii yaa naayá, áádóó Ámor dineʼé hátséedi ádáátʼįįdii tʼáá átʼé biláahgo doo yáʼáshóonii yaa naayá, índa Júdah dineʼé ałdóʼ edaʼalyaii yee nidaʼiisííh yiih yiyíínil.
12 Éí bąą Ízrel biDiyin God Bóhólníihii kóní, Jó, Jerúsalemgi dineʼé áádóó Júdah dineʼé bikʼijįʼ doo yáʼádaashóonii ádaatʼéhígíí kóshłééh, áko tʼáá háiida yaa dahodiiztsʼą́ʼígíí bikʼee tʼáá ałchʼijí bijeeh dahosiiltsʼįįh doo.
13 Áádóó Samériya kin haalʼáagi tłʼóół bee íʼneelʼąąhí índa Éíhab baʼáłchíní náás ahoolchíiłii kʼéhézdon tłʼóół náátʼiʼígíí éí Jerúsalem kin haalʼáii bee bídadíʼnéeshʼąął, áádóó diné éí łeetsʼaaʼ yitʼoodgo yaa niiʼáhígi átʼéego Jerúsalem tʼáá átʼé biiʼ hahodeeshtʼoł.*
14 Áko dineʼé shííʼ nilı̨́įgo yidziihígíí yóóʼadideeshʼáałgo hodaʼanaʼí baa hodideeshʼááł; hodaʼanaʼí tʼáá ałtso hadahontáa doo áádóó bąąh oogą́ąʼii dajílı̨́į doo.
15 Háálá dahazhéʼé yę́ę Ííjipdę́ę́ʼ chʼínínáádóó díí jı̨́įjįʼ doo yáʼádaashóonii shinááł baa nidziskaigo bee shá dahojííłchįįd.
16 Júdah dineʼé nidaʼiisíihgo ájiilaa yę́ę Bóhólníihii binááł doo yáʼáshóonii yaa naaskaígíí tʼah biláhídi átʼéego Manáseh éí baʼátʼeʼ ádaadinii tʼóó ahayóigo neistseedgo bidił dadeeznaʼ; Jerúsalem kin haalʼáagi tʼáá nidahoneesʼą́ąjįʼ daneeznánígíí nihidíbéezhgo áyiilaa.
17 Manáseh łahjįʼ ádzaii áádóó yaa naayáhígíí tʼáá átʼé índa bee ádił nidziisíhígíí éí Júdah dineʼé aláahgo binanitʼaʼí danilı̨́ı̨́ nítʼééʼ yę́ę binaaltsoos Kránikals wolyéii bikʼinídaháasdzo.
18 Áko Manáseh éí dabizhéʼé yę́ę daʼiiłhaazhígi átʼéego ajiiłhaazh, áádóó tʼáá hó haghandóó bighą́ąhjįʼ dah náháltsogi Ázza wolyéii bikéyahgi yóóʼáhoʼdiilyaa, áádóó hayeʼ Éíman hatsáskʼehgi aláahgo naatʼáanii silı̨́ı̨́ʼ.
Éíman nantʼáá nítʼééʼ (2Chr. 33:21-25)
19 Éíman naadiin naaki binááhaigo aláahgo nantʼá silı̨́ı̨́ʼ; Jerúsalem kin haalʼáagi aláahgo naatʼáanii nilı̨́įgo naaki nááhai. Bimá éí Miishóliimeth wolyé; éí Játbahdóó diné Héíraz yitsiʼ nilı̨́ı̨́ nítʼééʼ.
20 Áádóó hazhéʼé yę́ę Manáseh áátʼįįdígi átʼéego Bóhólníihii binááł doo yáʼádaashóonii baa nijigháá nítʼééʼ.
21 Áko hazhéʼé yę́ę yaa naagháago bíyoołkááł nítʼéʼígíí éí tʼáá átʼé bikʼehgo joogááł nítʼééʼ áádóó edaʼalyaii hazhéʼé yę́ę yichʼįʼ nahałá nítʼéʼígíí bichʼįʼ nahojiłáá nítʼééʼ.
22 Dahazhéʼé yę́ę biDiyin God Bóhólníihii yóóʼazhdííʼą́; Bóhólníihii tʼáadoo yikʼehgo naayáa da.
23 Nítʼééʼ aláahgo naatʼáanii Éíman há nidaalʼaʼí hodahodeezʼą́ągo tʼáá hó haghan góneʼ dahwiisxı̨́.
24 Áko kéyahdóó dineʼé éí aláahgo naatʼáanii Éíman yindahazʼánígíí ałtso nideistseed, áádóó kéyahdóó dineʼé éí Éíman biyeʼ Josáíyah hatsáskʼehgi aláahgo naatʼáanii ádayiilaa.
25 Éíman łahjįʼ ádzaii éí yaa naayáhígíí Júdah dineʼé aláahgo binanitʼaʼí danilı̨́ı̨́ nítʼééʼ yę́ę binaaltsoos Kránikals wolyéii bikʼinídaháasdzo.
26 Áko Ázza bikéyah dah náháltsogi ákwii tʼáá hó hatséníʼootséél góneʼ yóóʼáhoʼdiilyaa, áádóó hayeʼ Josáíyah hatsáskʼehgi aláahgo naatʼáanii silı̨́ı̨́ʼ.
Footnotes
^ Bóhólníihii hwíinitáahgo índa haa nídóotʼįįłgo ááhyiłní.
