2 Kings 23:1-37
23 Áko aláahgo naatʼáanii iʼiisʼaʼgo Júdah dineʼé bitahdóó áádóó Jerúsalem kin haalʼáádóó hastóí aląąjįʼ naazíinii haa áłah ádayiilaa.
2 Áádóó aláahgo naatʼáanii éí Júdah kéyahgi diné áádóó Jerúsalemgi kéédahatʼínígíí áádóó náádaʼiiłniihii áádóó Diyin God yá dahalneʼii áádóó diné aʼohgo ádaatʼéii índa ayóó ádaatʼéii tʼáá ałtso yił Bóhólníihii bikin biiʼ sohodizingóó haaskai; éí Bóhólníihii bikin biiʼ sohodizin góneʼ saad bee ahaʼdeetʼáanii naaltsoos nídiitʼánígíí biiʼdóó saad tʼáá átʼé bichʼįʼ jííłtaʼ.
3 Áádóó aláahgo naatʼáanii éí kin bíyah niiʼáii yíighahgi sizı̨́įgo Bóhólníihii bił ahazhdeetʼą́; éí Bóhólníihii bikééʼ joogáał doo áádóó bibikʼeh óʼooʼníiłii áádóó yee hahaasdzíiʼii índa yee nihwiizʼáanii hajéí tʼáá átʼé bee índa hwiiʼ sizíinii tʼáá átʼé bee ahaʼdeetʼáanii naaltsoos biyiʼ bee akʼeʼashchíinii biʼjósin doo. Áádóó diné tʼáá ałtso bee ahaʼdeetʼáanii bił daalą́go yee nídiijééʼ.
4 Áko aláahgo naatʼáanii éí aláahgo nááʼiiłniihii Hilkáíyah áádóó akééʼdóó náádaʼiiłniihii índa dáádílkał yaa ádahalyáanii yichʼįʼ haadzíiʼgo Bóhólníihii bikin biiʼ sohodizin góneʼ chodaoʼíinii Béíyal bá ádaalyaii tʼáá átʼé índa asdzání beʼelyaii áádóó yótʼááh hiníláii tʼáá átʼé bá ádaalyaii chʼídahidoojih, áádóó Jerúsalem tłʼóoʼdi Kídran halgaigi dadidoołiłgo biłeeshchʼiih éí Béthelgóó dadoohééł.
5 Áádóó aláahgo naatʼáanii danilíinii náádaʼiiłniihii Júdahgi kin hadaasʼáhídóó áádóó Jerúsalem binaagóó ninádahałaah doo biniyé wódah nahazʼą́ągo ádaalyaaígóó tsin bijeeh dilidgo łikání halchinii náádayiiłniih yiniyé nidayiiznilígíí éí Josáíyah nahjįʼ hayíínil; éí náádaʼiiłniihii ałdóʼ Béíyal bichʼįʼ áádóó jı̨́honaaʼéí bichʼįʼ áádóó tłʼééhonaaʼéí bichʼįʼ áádóó sǫʼ bichʼįʼ índa yótʼááh hiníláii tʼáá átʼé yichʼįʼ tsin bijeeh dilidgo łikání halchinii náádayiiłniih.
6 Áko Bóhólníihii bikin biiʼ sohodizin biiʼdóó asdzání beʼelyaii chʼízhníłtı̨́įgo Jerúsalemdóó Kídran tó nílíníjįʼ jiníłtı̨́įgo jidííłid áádóó dzíítseedgo dibahgo ájiilaa, índa diné dabijishchááʼ bikááʼgóó adziiskaad.
7 Áádóó Bóhólníihii bikin biiʼ sohodizin bíighahgi diné tʼáá bí ahaa nináldeehii bá kin naaznilígíí naaʼahizneeskaad; ákwii sáanii éí asdzání beʼelyaii yá dáádiníbaal deitłʼóó nítʼééʼ.
8 Áko Júdah kéyahgi kin hadaasʼáádóó náádaʼiiłniihii chʼíjiizhʼeezh, áádóó Gííba kin shijaaʼdóó Bíyer-shííbajįʼ ninádahałaah doo biniyé wódah nahazʼą́ągo ádaalyaii náádaʼiiłniihii éí tsin bijeeh dilidgo łikání halchinii náádayiiłniih yę́ęgóó ałtso bitsʼą́ą́ʼ jííłchxǫʼ índa kin haalʼáádóó naatʼáanii Jáshowa biyah aʼatiinígi kin haalʼá yah aʼatiin binishtłʼahjígo diyingo nahazʼánígíí ałtso naaʼajiistłʼííd.
9 Ákondi ninádahałaah doo biniyé wódah nahazʼą́ągo ádaalyaaígi náádaʼiiłniihii éí Jerúsalemgi Bóhólníihii bibikááʼ nááʼiiniihí hólǫ́ǫjįʼ doo ałnáádaakah da, nidi bikʼisóó bitahgóó dííkʼǫsh tʼáágééd bááh ályaii nídeidı̨́ı̨́h nítʼééʼ.
10 Áádóó Hínam baʼáłchíní yíldzis góyaa kéédahatʼínígi Tófeth hoolyéii yiyííłchǫʼ, áko ákwii diné doo łaʼ biyeʼ, doodaiiʼ bitsiʼda yidiłidgo diyin bidiʼníinii Mólek yichʼįʼ nínéidiyoołnih da.
11 Nítʼééʼ Júdah dineʼé aláahgo binanitʼaʼí danilíinii łı̨́ı̨́ʼ éí jı̨́honaaʼéí yaa deideezʼáanii Bóhólníihii bikin biiʼ sohodizin bichʼįʼ yah aʼatiinígi naalʼaʼí Néíthan-míílek bighan bíighahgi naazínígíí nahgóó ayííʼeezh áádóó jı̨́honaaʼéí bitsindaabąąs bijáád naakiígíí deidííłid.
12 Áádóó Júdah dineʼé aláahgo binanitʼaʼí danilı̨́ı̨́ nítʼéʼígíí Éíhaz bighan bighą́ąʼdi bikááʼ náádaʼiiniihí ádayiilaa yę́ę índa Manáseh éí Bóhólníihii bikin biiʼ sohodizin tłʼóóʼgóó naakigo hazʼánígi bikááʼ náádaʼiiniihí áyiilaa yę́ę ałtso naaʼayiistłʼííd índa ałtso yiyíítseedgo łeezh dibahígo Kídran tó nílínígíí yiih yiyííłkaad.
13 Jerúsalemdóó haʼaʼaahjígo dził yíchǫʼii binishʼnáájígo ninádahałaah doo biniyé wódah nahazʼą́ągo ádaalyaaígi asdzání beʼelyaii Áshtarath wolyéii éí Sáídan dineʼé bidoo yildinii áádóó Kíímash wolyéii éí Móʼab dineʼé bidoo yildinii índa Mólek wolyéii éí Áman dineʼé bidoo yildinii yá Ízrel dineʼé aláahgo binanitʼaʼí Sálaman ádayiilaa yę́ę aláahgo naatʼáanii Josáíyah ałtso nahjįʼ kóyiilaago yiyííłchǫʼ.
14 Áádóó edaʼalyaii yidííséí índa asdzání bidaʼalyaii ałtso niyiisneʼgo bá nahazʼánígóó diné daneeznáanii bitsʼin hadeidééłbįįd.
15 Nááʼáłdóʼ Nííbat biyeʼ Jerobówam éí Ízrel dineʼé ádił nidaʼiisíihgo áyiilaii Béthelgi bikááʼ nááʼiiniihí índa dah yiskʼid bighą́ąʼdi áyiilaii éí tʼáá áłah ałtso naaʼayiistłʼíidgo dibahgo yiyíítseed índa dah yiskʼid bighą́ąʼdi hazʼánígíí ałtso yidííłid.
16 Nítʼééʼ Josáíyah naanásdzáago dziłígi tsénídaʼootséél hayíísid, áko Bóhólníihii Diyin God yá naalʼaʼí yaa halneʼgo tʼáá yee haadzíʼígíí bikʼehgo ákǫ́ǫ́ iʼííłʼaʼgo tsénídaʼootsééldę́ę́ʼ tsʼin chʼídayiizhjaaʼgo bikááʼ nááʼiiniihí yikáaʼgi yidííłidgo éí yee yiyííłchǫʼ.
17 Nítʼééʼ ájíní, Tsé ííʼáago yishʼínígíísh haʼátʼíí átʼé? Kin haalʼáádóó diné ádahałní, Díí Béthelgi bikááʼ nááʼiiniihí bikʼijįʼ nílı̨́įgo baa nisíníyáhígíí éí Júdahdę́ę́ʼ Diyin God yá naalʼaʼí éí áhodooníiłgo yaa hoolneʼii éí bitséníʼootséél átʼé.
18 Áádóó ádííniid, Tʼáadoo baa nídaohtʼíní; doo łaʼ diné hatsʼin nahjįʼ kwíidoolíił da. Áko hatsʼin índa Samériya kin haalʼáádę́ę́ʼ Diyin God yá halneʼii bitsʼin tʼáadoo yaa nídaastʼįįd da.
19 Samériya kéyahgi kin hadaasʼáágóó ninádahałaah doo biniyé wódah nahazʼą́ągo ádayiilaadi daakinígíí éí Ízrel dineʼé aláahgo binanitʼaʼí nídaadleełii ádayiilaago Bóhólníihii yá dahashchįįdígíí éí ałdóʼ Josáíyah ałtso nahgóó kóyiilaa; tʼáá Béthelgi íʼjiilaaígíí bikʼehgo ádziidzaa.
20 Áko náádaʼiiłniihii ninádahałaah doo biniyé wódah nahazʼą́ągo ádayiilaadi nidahałáá nítʼééʼ yę́ę bikááʼ nááʼiiniihí yikáaʼjįʼ neistseed, áádóó tʼáá ákwii diné bitsʼin bikʼijįʼ jidííłid, áádóó Jerúsalemgóó anáádzá.
Atisʼadeesdzá bee bééhániihii nídajiiłʼaʼ (2Chr. 35:1-19)
21 Nítʼééʼ aláahgo naatʼáanii éí diné tʼáá ałtso yichʼįʼ haadzíiʼgo ání, Naaltsoos bee ahaʼdeetʼáanii biyiʼ bee akʼeʼashchíinii ánínígíí bikʼehgo Bóhólníihii nihiDiyin God bichʼįʼ atisʼadeesdzá bee bééhániihii baa naahkai doo.
22 Tʼáá aaníí, á nidahodiiʼaahii éí Ízrel dineʼé yá nidahodiiʼaahgo bídeiníłkánígíí áádóó Ízrel dineʼé índa Júdah dineʼé yinanitʼaʼí nídaadleełii bídeiníłkánígíí biyiʼ atisʼadeesdzá bee bééhániihii ákótʼéhígíí tʼáadoo dayiiłʼaʼ da.
23 Áko Josáíyah aláahgo naatʼáanii nilı̨́įgo tseebíítsʼáadah náhááh góneʼ Jerúsalem kin haalʼáagi Bóhólníihii bichʼįʼ atisʼadeesdzá bee bééhániihii nídajiiłʼaʼ.
Bóhólníihii éí Júdah dineʼé yichʼįʼ báhodinoochįįd
24 Áádóó ałdóʼ Josáíyah éí Bóhólníihii bikin biiʼ sohodizin góneʼ nááʼiiłniihii Hilkáíyah díí naaltsoos yikʼíníyáhígíí bee hazʼáanii biyiʼ bee akʼeʼashchínígíí bizhʼdoolííł biniyé chʼı̨́įdii yábiiłtiʼii áádóó daʼdiłgąshii áádóó dinéshchíín áádóó edaʼalyaii índa doo daaldinii éí Júdah kéyahgi índa Jerúsalemgi hadadeesʼı̨́ʼígíí ałtso nahjįʼ kójiilaa.
25 Hátséedi aláahgo naatʼáanii nídaadleełii doo łaʼ hógi ádaatʼée da nítʼééʼ, áko hajéí tʼáá átʼé bee áádóó hwiiʼ sizíinii tʼáá átʼé bee índa hadziil tʼáá átʼé bee tʼáá Mózes bibee hazʼáanii ánínígíí bikʼehgo ájítʼé; doo nidi hakéédę́ę́ʼ łaʼ ákótʼéego naatʼáanii nilı̨́į da nítʼééʼ.
26 Ákondi Manáseh yaa naayáhígíí biniinaa Bóhólníihii éí Júdah dineʼé yichʼįʼ doo bił hóózhǫǫd dago Bóhólníihii tʼóó báhádzidgo báhóóchįįdígíí doo yitsʼą́ąjįʼ ánáʼnéeh da.
27 Bóhólníihii ádííniid, Ízrel dineʼé shitsʼą́ąjįʼ kóshłaaígi átʼéego Júdah dineʼé ałdóʼ nahjįʼ kóhodeeshłííł, índa Jerúsalem kin haalʼáii áádóó kin biiʼ sohodizin shízhiʼ bee wójíi doo dishníigo nidiníʼáanii nahjįʼ kódeeshłííł.
Josáíyah daaztsą́ (2Chr. 35:20-27)
28 Áko Josáíyah łahjįʼ ádzaii éí Júdah dineʼé aláahgo binanitʼaʼí danilı̨́ı̨́ nítʼééʼ yę́ę binaaltsoos Kránikals wolyéii bikʼinídaháasdzo.
29 Hwíyoołkááł yę́ędą́ą́ʼ Ííjip dineʼé aláahgo binanitʼaʼí Féro-nííko éí Asíriya dineʼé aláahgo binanitʼaʼí yichʼįʼ nídiibaaʼgo Yufréítiiz tooh nílínígóó yinéełgo aláahgo naatʼáanii Josáíyah hachʼįʼ nídiibaaʼgo Megído kin haalʼáagi jiiłtsą́ągo ákwii jiisxı̨́.
30 Áko dadziztsą́ągo há nidaalʼaʼí Megídodóó tsinaabąąs bijáád naakiígíí yee Jerúsalemgóó nídahaastı̨́įgo hatséníʼootséél góneʼ yóóʼadahoolaa. Nítʼééʼ kéyahdóó dineʼé éí hayeʼ Jiihóʼahaz aláahgo naatʼáanii nilı̨́į doo biniyé akʼah yikʼi yadayiiziidgo yíísı̨́ı̨́ʼ, áko éí bizhéʼé yę́ę bitsáskʼehgi aláahgo naatʼáanii silı̨́ı̨́ʼ.
Jiihóʼahaz nantʼáá nítʼééʼ áádóó nahjįʼ anááltʼeʼ (2Chr. 36:1-4)
31 Jiihóʼahaz éí naadiin tááʼ binááhaigo aláahgo nantʼá silı̨́ı̨́ʼ, áádóó Jerúsalemgi aláahgo naatʼáanii nilı̨́įgo tááʼ nídeezid. Bimá éí Hamútal wolyéego Líbnahdóó diné Jeremáíyah yitsiʼ nilı̨́.
32 Bóhólníihii binááł dahazhéʼé yę́ę ádáátʼįįdii bikʼehgo doo yáʼáshóonii yaa naagháá nítʼééʼ.
33 Áko Jerúsalemgi doo nazhnitʼáa da doo biniyé aláahgo naatʼáanii Féro-nííko éí Héímath kéyahgi Ríblah kin haalʼáadi yah ahóółtʼeʼ, áádóó éí kéyahígíí béésh łigaii tálent wolyéii neeznádiin bíighahgo índa óola tʼááłáʼí tálent dah hidiidloh bíighahgo nehelyée doogo áyiilaa.
34 Áádóó Féro-nííko éí Josáíyah biyeʼ Iiláíyakim bizhéʼé yę́ę bitsáskʼehgi aláahgo naatʼáanii nilı̨́įgo áyiilaago Jiihóíyakim éí yee yiyíízhiʼ, áko Jiihóʼahaz éí nahjįʼ hayííłtʼeʼgo Ííjipgóó hoʼdeedlóozgo áadi dadziztsą́.
35 Nítʼééʼ Jiihóíyakim éí Féro nilíinii béésh łigaii áádóó óola yeinínil, nidi béeso ahindéhígíí éí Féro haadzíʼígíí bikʼehgo kéyahgi kéédahatʼínígíí nidayiiléego ájiilaa. Féro-nííko éí béeso baa dooʼnił biniyé kéyahgi diné kéédahatʼínígíí tʼááłáʼí jinízínígo tʼáá dah daʼjíléii bíighahgo nidahizhdooléełgo béésh łigaii índa óola nidajiiléé nítʼééʼ.
Jiihóíyakim nantʼáá nítʼééʼ (2Chr. 36:5-8)
36 Jiihóíyakim éí naadiin ashdlaʼ binááhaigo aláahgo naatʼáanii silı̨́ı̨́ʼ, áádóó łaʼtsʼáadah nááhaijįʼ Jerúsalemgi nantʼáá nítʼééʼ. Bimá éí Ziibódah wolyéego Rúmahdóó Piidéíyah yitsiʼ nilı̨́.
37 Bóhólníihii binááł dahazhéʼé yę́ę ádáátʼįįdii bikʼehgo doo yáʼáshóonii yaa naagháá nítʼééʼ.
