2 Kings 24:1-20
24 Jiihóíyakim bíyoołkááł yę́ędą́ą́ʼ Bábilan dineʼé aláahgo binanitʼaʼí Nébukadnézzar haa níná, áko tááʼ nááhaijįʼ bá nijisʼaʼ, áko nítʼééʼ yitsʼą́ąjįʼ silı̨́įʼgo yichʼįʼ nídiilteeʼ.
2 Áádóó Bóhólníihii éí Kaldíya dineʼé łaʼ dah yikah, Síriya dineʼé łaʼ dah yikah, Móʼab dineʼé łaʼ dah yikah áádóó Áman dineʼé łaʼ dah yikah; éí Júdah dineʼé dayóbáahgo ádeidoołdįįł biniyé Bóhólníihii yee haadzíiʼgo Diyin God yá dahalneʼgo nidaalʼaʼígíí yaa dahoolneʼígíí bikʼehgo hakʼijįʼ yeʼiisniiʼ.
3 Manáseh niʼiisíihgo yaa naayáhígíí tʼáá átʼé biniinaa Bóhólníihii éí Júdah dineʼé nahjįʼ kóyiilaa; tʼáá yee haadzíʼígíí bikʼehgo tʼáá aaníí bohoolyaa.
4 Áádóó baʼátʼeʼ ádaadinii neistseedgo bidił dadeeznaʼgo ałdóʼ biniinaa, háálá Jerúsalem kin haalʼáii tʼáá nidahoneesʼą́ąjįʼ baʼátʼeʼ ádaadinii bidił nidaashchxiiʼgo áyiilaa, éí Bóhólníihii doo há yóóʼiididooʼáał da.
5 Áko Jiihóíyakim łahjįʼ ádzaii áádóó yaa naayáhígíí tʼáá átʼé éí Júdah dineʼé aláahgo binanitʼaʼí danilı̨́ı̨́ nítʼééʼ yę́ę binaaltsoos Kránikals wolyéii bikʼinídaháasdzo.
6 Jiihóíyakim éí dahazhéʼé yę́ę daʼiiłhaazhígi átʼéego ajiiłhaazh, áko hatsáskʼehgi hayeʼ Jehóíyakin aláahgo nantʼá silı̨́ı̨́ʼ.
7 Nidi Ííjip dineʼé aláahgo binanitʼaʼí bikéyahdóó tʼáadoo chʼínáánádzáa da, háálá Ííjip dineʼé aláahgo binanitʼaʼí éí Ííjip kéyahgi tooh nílínídóó Yufréítiiz tooh nílíníjįʼ bídéétʼiʼ nítʼééʼ yę́ę ałtso Bábilan dineʼé aláahgo binanitʼaʼí bííʼ silı̨́ı̨́ʼ.
Jehóíyakin áádóó binaatʼáanii danilíinii Bábilangóó yisnááh ádabiʼdiilyaa (2Chr. 36:9,10)
8 Jehóíyakin tseebíítsʼáadah binááhaigo aláahgo naatʼáanii silı̨́ı̨́ʼ áádóó tááʼ nídeezidjįʼ Jerúsalemgi nantʼáá nítʼééʼ. Bimá éí Niihúshta wolyéego Jerúsalemdóó Elnéíthan yitsiʼ nilı̨́.
9 Áko Bóhólníihii binááł tʼáá hazhéʼé yę́ę áátʼįįdígíí bikʼehgo doo yáʼáshóonii baa nijiyá.
10 Íídą́ą́ʼ Bábilan dineʼé aláahgo binanitʼaʼí Nébukadnézzar bá nidaalʼaʼí Jerúsalem yichʼįʼ nídadiibaaʼgo kin haalʼáhígíí yináshzhiizh.
11 Bábilan dineʼé aláahgo binanitʼaʼí Nébukadnézzar bá nidaalʼaʼí éí kin haalʼáhígíí yináshzhiizhgo yaatįįh yíná.
12 Áádóó Júdah dineʼé aláahgo binanitʼaʼí Jehóíyakin éí Bábilan dineʼé aláahgo binanitʼaʼí yichʼįʼ chʼíníyá; bí áádóó bimá índa bá nidaalʼaʼí áádóó naatʼáanii danilíinii índa bikééʼdóó bídahólníhígíí chʼékai. Bábilan dineʼé aláahgo binanitʼaʼí éí aláahgo naatʼáanii nilı̨́įgo tseebíí náhááh góneʼ Jehóíyakin yiyiiłtsood.
13 Áko Bóhólníihii tʼáá yee haadzíʼígi átʼéego aláahgo naatʼáanii éí Bóhólníihii bikin biiʼ sohodizin biyiʼdóó tʼáadoo leʼé daʼílíinii áádóó aláahgo naatʼáanii bighandóó daʼílíinii chʼíyiizhjaaʼ, índa óola bee ádaalyaii Ízrel dineʼé aláahgo binanitʼaʼí Sálaman áyiilaa yę́ę Bóhólníihii bikin biiʼ sohodizin góneʼ sinilígíí ałtso ałtsʼáyiiztiʼ.
14 Áádóó Jerúsalemgi dineʼé tʼáá átʼé, naatʼáanii danilíinii áádóó diné doo nídanilyéesii áádóó tʼáadoo leʼé dayiichįįhii índa daʼatsidii éí tʼáá neeznáadi míilgo deisnáago ayiizhʼeezh; doo łaʼ tʼáá ákǫ́ǫ́ nidaakai da, tʼáá hazhóʼó éí kéyahdóó aʼohgo ádaatʼéii tʼéiyá tʼáá daʼákǫ́ǫ́.
15 Áko Jerúsalemdóó díí yisná éí aláahgo naatʼáanii Jehóíyakin áádóó bimá áádóó aláahgo naatʼáanii bidaʼasdzą́ą́ áádóó bikééʼdóó bídahólníhígíí índa kéyahdóó diné alááh dahideezíinii Jerúsalemdóó yisnááh danilı̨́įgo Bábilangóó ayiizhʼeezh.
16 Áádóó diné doo nídanilyéesii tsostsʼidi míilgo índa diné tʼáadoo leʼé dayiichįįhii áádóó daʼatsidii tʼáá biłgo tʼááłáhídi míilgo éí tʼáá ałtso anaaʼ yídaneelʼánígíí Bábilan dineʼé aláahgo binanitʼaʼí yisnánígíí Bábilanjįʼ ayííʼeezh.
17 Nítʼééʼ Bábilan dineʼé aláahgo binanitʼaʼí éí Jiihóíyachin bizhéʼé yázhí Matanáíyah hatsáskʼehgi aláahgo naatʼáanii nilı̨́įgo áyiilaa, áko bízhiʼ łahgo átʼéego áyiilaago Zedekáíyah yee yiyíízhiʼ.
Zedekáíyah nantʼáá nítʼééʼ (2Chr. 36:11-16; Jer. 52:1-3)
18 Zedekáíyah éí naadiin łaʼ binááhaigo aláahgo naatʼáanii silı̨́ı̨́ʼ áádóó Jerúsalemgi łaʼtsʼáadah nááhaijįʼ aláahgo naatʼáanii nilı̨́ı̨́ nítʼééʼ. Bimá éí Hamútal wolyéego Líbnahdóó Jeremáíyah yitsiʼ nilı̨́.
19 Áádóó Bóhólníihii binááł tʼáá Jiihóíyakim áátʼįįdígíí bikʼehgo doo yáʼáshóonii baa nijiyá.
20 Áko Bóhólníihii báhóóchįįdígíí yee Jerúsalem dineʼé áádóó Júdah dineʼé hólónídóó átsʼą́ąjįʼ nahjįʼ kóhoolaajįʼ ákóhóótʼįįd; nítʼééʼ Zedekáíyah éí Bábilan dineʼé aláahgo binanitʼaʼí yichʼįʼ naasteeʼ.
