2 Kings 4:1-44
4 Nítʼééʼ Diyin God yá dahalneʼii bídahoołʼaahígíí łaʼ beʼasdzą́ą́ léiʼ Iiláísha yichʼįʼ yéego haadzíiʼgo ání, Shahastiin ná naalʼaʼí daaztsą́; éí Bóhólníihii yidósin nítʼéeʼgo nił bééhózin. Nidi kʼad bąąh hayííłʼáhígíí shiyáázh nidiltʼéego binaalteʼ nilı̨́į dooleeł yiniyé níyá.
2 Iiláísha áháłní, Haʼátʼíísh ná baa nideeshaał? Shił hólneʼ, haʼátʼíísh nighan góneʼ hólǫ́? Áko ájíní, Asdzání ná naalʼaʼí nishłíinii shighan biiʼ haʼátʼíhída doo shee hólǫ́ǫ da nidi akʼah tʼéiyá tóshjeeh yázhí bee siʼą́.
3 Nítʼééʼ ání, Nílááh, bił kééhótʼíinii tʼáá ałtso dabighandę́ę́ʼ dabitóshjeeh tʼáágééd naaznilígíí tʼóó ahayóigo nadaʼónííł.
4 Áko yah ííníyáago ni áádóó niyáázh nidiltʼéego ádá daʼdidoołkał áádóó tóshjeeh tʼáá ałtso akʼah biih dahidííził; hadadéébįįdígíí éí nahjįʼ nihidíínił.
5 Kótʼéego Iiláísha bitsʼą́ą́dóó dashdiiyáago hó áádóó hayáázh nidiltʼéego ádá daʼdazdeeskaal; éí tóshjeeh yázhí há nináyiizhjaaʼgo akʼah biiʼ yadajiiziid.
6 Nítʼééʼ tóshjeeh yázhí hadadéébįįdgo hayáázh ábijiní, Tóshjeeh yázhí łaʼ shaa nááníʼah. Áko áháłní, Doo łaʼ náánástʼą́ą da. Áko akʼah yadajiyiizídígíí ááhoostʼįįd.
7 Áádóó Diyin God yá naalʼaʼí baazhníyáago bił hojoolneʼ. Áko ání, Nílááh, akʼah naa nahóniihgo nąąh hááʼáhígíí nináʼayídlé, áádóó ni áádóó naʼáłchíní akʼah yidziihígíí bee ákidaahdlá.
Iiláísha áádóó Shúnemdóó asdzání
8 Łah jı̨́įgo Iiláísha éí Shúnem kin haalʼá bíighahgóó chʼízhníyá, nítʼééʼ ákwii asdzání ayóó atʼı̨́ı̨́ léiʼ bááh dííyı̨́ı̨́ł hałníigo yaa náhookąąh. Áko tʼáá ákǫ́ǫ́ nízhdídááh bikʼeh ákwii níjídáahgo bááh níjídı̨́ı̨́h.
9 Áádóó hahastiin ábijiní, Shoo, diné tʼáá áłahjįʼ nihighan bíighahgóó ałnánádáhígíí éí Diyin God bitsʼą́ą́dę́ę́ʼ naagháago shił bééhoozin.
10 Haaʼíshąʼ nihikin bighą́ą́ʼdóó kin tʼáá áłtsʼísígo bá nidiitʼáałgo tsáskʼeh áádóó bikááʼ adání áádóó bikʼi dah asdáhí índa bee hoolʼiní ałdóʼ bá nidiiʼnił, áko nihaa nádáahgo ákwii nábiilkáah doo.
11 Łah jı̨́įgo ákwii níyáago kin bá ályaaígi yah ííyáago neeztı̨́įgo hanáályı̨́ı̨́ʼ.
12 Nítʼééʼ bá naalʼaʼí Giihéízai ííłní, Díí Shúnemdóó asdzání hágo bidiní. Hágo bizhdííniidgo hadááhdę́ę́ʼ niníyá.
13 Áko Giihéízai ábijiní, Kʼad kóbidiní, Shoo, nizhónígo nihá hashtʼehwiinilaa, áko haʼátʼíí lá ná ádoolnííł? Aláahgo naatʼáanii daatsʼí, doodaiiʼ siláo dah yinéełii binanitʼaʼí daatsʼí ná bichʼįʼ haʼdoodzih? Áádóó hajoodzíiʼgo ájíní, Tʼáá shí shidineʼé bitahgi kééhashtʼı̨́.
14 Iiláísha ání, Ákoshąʼ haʼátʼíí bá ádoolnííł? Giihéízai hanáánáádzíiʼgo ání, Tʼáá aaníí baʼáłchíní ádin índa bahastiin éí haastih.
15 Áko Iiláísha ání, Hágo bidiní. Hágo bizhdííniidgo chʼéʼétiindę́ę́ʼ yiizįʼ.
16 Áádóó ání, Kónáhootʼéhí kojįʼ anáhoolzhiizhgo niyáázh adíidííltsoł. Áko ájíní, Dooda, shinanitʼaʼí, Diyin God yá naalʼaʼí nílíinii, asdzání ná naalʼaʼí nishłíinii doo shidínííʼah da.
17 Nidi asdzání iʼniiltsąąd áádóó Iiláísha tʼáá áhodííniidígíí bikʼehgo nááhaigo tʼáá áajįʼ anáhoolzhiizhgo hayáázh hazlı̨́ı̨́ʼ.
18 Áádóó hayáázh dínéesą́ągo łaʼa jı̨́ bizhéʼé éí daʼayizhii yił daʼayizhgo ákǫ́ǫ́ yichʼįʼ ííyá.
19 Nítʼééʼ bizhéʼé ííłní, Shitsiitsʼiin neezgai, shitsiitsʼiin neezgai! Áko há naalʼaʼí ábijiní, Bimá bichʼįʼ nídíłteeh.
20 Áádóó dah yidiiłtı̨́įgo bimá yaa néiníłtı̨́įgo hatsáskʼeegi sidáago ałníʼníʼą́, nítʼééʼ daaztsą́.
21 Áko dashdiiłtı̨́įgo Diyin God yá naalʼaʼí bitsáskʼeh bikááʼ nizhníłtı̨́, áádóó bidázhdiʼníłkaalgo dashdiiyá.
22 Áko hahastiin hágo bizhdííniidgo ájíní, Diyin God yá naalʼaʼí bichʼįʼ télii tsı̨́įłgo shił dooldlosh áádóó nídeeshdááł biniyé ná naalʼaʼí łaʼ télii sheidoolóós.
23 Áko ání, Haʼátʼíísh biniyé díí jı̨́ bichʼįʼ deeshááł nínízin? Tʼah doo dah yiitįįh da, doo nidi hááʼáyı̨́ı̨́h jı̨́ aleeh da. Nidi ájíní, Tʼáá áko.
24 Nítʼééʼ télii yikʼi dah aznilgo bá naalʼaʼí ííłní, Tsxı̨́įłgo shilą́ąjįʼ yílwoł; shiniinaa tʼáadoo honiitłóhí yílwoł, átʼahálo nidishníigo tʼéiyá.
25 Ákohgo dashdiiyáago Dził Kármeldi Diyin God yá naalʼaʼí bichʼįʼ joogááł nítʼééʼ.
Nízaadę́ę́ʼ joogáałgo hoołtsą́ągo bá naalʼaʼí Giihéízai ííłní, Shoo, níléídę́ę́ʼ Shúnemdóó asdzání yigááł;
26 bidááhgóó nídiilyeedgo ábidiní, Nitahásh yáʼáhootʼééh? Nahastiinísh bitah yáʼáhootʼééh? Ashkiishąʼ bitahásh yáʼáhootʼééh? Áko ájíní, Tʼáá yáʼátʼééh.
27 Nítʼééʼ dziłghą́ąʼdi Diyin God yá naalʼaʼí baazhníyáago bikeeʼ dziiłtsood, áádóó Giihéízai nahjįʼ ahodoodzı̨́ı̨́s biniyé áajįʼ niníyá. Nidi Diyin God yá naalʼaʼí ání, Tʼáadoo baa nánítʼíní, háálá biiʼ sizíinii bide áhootʼé; éí Bóhólníihii shitsʼąą neiniłʼingo doo yee shił hoolneʼ da.
28 Áko ájíní, Daʼ shinanitʼaʼíísh shiyáázh hodooleełgo bííkeed? Doo shidínííʼah da, doósh dííniid da?
29 Nítʼééʼ Iiláísha éí Giihéízai ííłní, Niʼééʼ nitsiistʼah gónaa náníyishgo shigish nídiitįįhgo nílááh nídiilyeed; diné łaʼ nidááh níyáá ládą́ą́ʼ yáʼátʼééh doo bididííniił da, índa łaʼda yáʼátʼééh niłníí ládą́ą́ʼ doo bichʼįʼ hadíídzih da, áádóó shigish éí ashkii biniiʼ bikááʼ nidíítı̨́ı̨́ł.
30 Áádóó ashkii bimá ání, Tsʼídá tʼáá aaníí Bóhólníihii hiná índa hiníná; ákótʼéego tsʼídá tʼáá aaníí doo nitsʼádeesháał da. Áádóó Iiláísha nídiiʼnaʼgo hakééʼ dah diiyá.
31 Giihéízai éí halą́ąjįʼ ííyáago ashkii biniiʼ bikáaʼgi gish niinítą́, nidi tʼáadoo hadooʼniʼ da áádóó tʼáadoo íistsʼąʼí da. Éí bąą Iiláísha bidááh níjílwodgo ábijiní, Ashkii tʼáadoo nídeesgal da.
32 Iiláísha éí kin góneʼ yah ííyáago, jó, ashkii daaztsą́ągo hatsáskʼeh bikáaʼgi sitı̨́įgo dziiłtsą́.
33 Áádóó ashkii sitíní góneʼ yah ajííyáago ádázhdeelkaalgo Bóhólníihii bichʼįʼ sozdoolzin.
34 Áko tsáskʼeh bikááʼ hajiyáago ashkii bikááʼ tséʼyaa dzineeztı̨́įgo hazééʼ bee bizééʼ bizhdíníitʼą́, índa hanááʼ bee binááʼ bizhdíníitʼą́, hálaʼ bee bílaʼ bikááʼ nizhdeelniiʼ, áádóó bikááʼ kʼíʼázhdeestsʼǫ́ǫdgo ashkii bitsʼíís nániidoi.
35 Nítʼééʼ nízhdiiʼnaʼgo kin biiʼ ałnáájídááh, áádóó ashkii bikááʼ kʼínááʼízdeestsʼǫ́ǫdgo ashkii tsostsʼidi hátsʼíyaa nídooʼniidgo deezghal.
36 Áádóó Iiláísha éí Giihéízai hágo yidííniidgo ání, Shúnemdóó asdzání, Hágo, bidiní. Áko hágo bizhdííniid. Nítʼééʼ haa níyáago, Niyáázh nídiiłteeh, bijiní.
37 Áko asdzání yah ííyáago hakeeʼjįʼ nitsidinígoʼgo niʼjįʼ neeshjool, áádóó hayáázh nízhdiiłtı̨́įgo bił chʼééjítʼáázh.
Iiláísha éí Diyin God yá dahalneʼii bá álíleego íʼiilaa
38 Áádóó Iiláísha éí Gílgal hazʼánígi náánádzá; nítʼééʼ ákwii kéyahgi hodííchįįd lá, áko Diyin God yá dahalneʼii bídahoołʼaahígíí hadááhdóó naháaztą́ągo há naalʼaʼí ábijiní, Ásaaʼ nitsaaígíí biiʼ ásaʼíníiłgo Diyin God yá dahalneʼii bídahoołʼaahígíí bá niłbéézh.
39 Nítʼééʼ łaʼ chʼil jidoonishgo biniyé halgaigóó ajííyáago chʼil tʼáá bíniʼdii daʼítłʼóhígíí bikʼízhníyá; éí bąąhdóó nidilkal yiyííbı̨́įʼgo biʼéénééz hadeezbingo néiníłtsoozgo abézhígíí yiih yiyííłgizh, nidi éí ádaatʼéhígíí doo hoł béédahózin da.
40 Áko éí diné deidooyı̨́ı̨́ł biniyé bá hadajiizką́. Ákódzaago azhbézhígíí deiyą́ągo, hadadeeshghaazhgo ádaaní, Diyin God yá naalʼaʼí nílíinii, díí bee abézhí biyiʼ aniné hólǫ́ǫ́ lá. Éí bąą doo dajóyą́ą́ʼ átʼée da.
41 Áádóó ájíní, Aadę́ę́ʼ akʼáán łaʼ nídoohjááh. Áko akʼáán azhbézhígíí biih jííłkaadgo diné bá hadahohkaah, jiní; bíniʼ deiyą́, jó, azhbézhígíí tʼáadoo baʼátʼeʼí da.
42 Nítʼééʼ Béíyal-shálisha hazʼánídę́ę́ʼ diné léiʼ éí áłtsé neestʼáanii tłʼoh naadą́ą́ʼ bideeʼí bee bááh naadiingo ályaago índa ániid neestʼánígíí tʼah doo habéʼélʼéésgóó Diyin God yá naalʼaʼí yaa yiníjaaʼ. Áko Iiláísha ání, Diné deidooyı̨́ı̨́ł biniyé baa nohjááh.
43 Áko há naalʼaʼí ání, Haʼátʼíísh ááhdiní? Daʼ díísh neeznádiin dinéhígíí bidáahgi ninishjááh? Áádóó ánáábizhdiʼní, Diné baa níjááh, bíniʼ deiyą́, háálá Bóhólníihii kóní, Éí daʼdooyı̨́įłgo łaʼ tʼáá chʼídahidínóołnah.
44 Áádóó chʼiyáán haa yíjaaʼígíí diné bidáahgi nizhníjaaʼgo dayííyą́ą́ʼ áádóó Bóhólníihii tʼáá ádííniidígíí bikʼehgo łaʼ chʼídahineesnaʼ.
